လံာ်နီၢ်အ့ၤစတၢ် 1
1
နီၢ်ပၤမုၣ်ဝးၡတံၤအတၢ်ခီၣ်ဆၢ စီၤပၤအဃၤၡဝ့ရိၣ်
1-2တၢ်အံၤမ့ၢ်တၢ်မၤအသးဖဲမုၢ်နံၤမုၢ်သီတဖၣ် လၢစီၤပၤအဃၤၡဝ့ရိၣ်ပၢတၢ်လၢကီၢ်ပၤရၣ်အဝ့ၢ်ခိၣ်ဝ့ၢ်ၡူၡၣ် န့ၣ်လီၤ. အဝဲပၢဘၣ်ကီၢ်ဖိတကယၤခံဆံနွံဘ့ၣ်, စးထီၣ် လၢကီၢ်ဟံၣ်ဒူၤတုၤလၢကီၢ်ကူၤၡးန့ၣ်လီၤ.
3လၢအဝဲပၢတၢ်သၢနံၣ်တနံၣ်န့ၣ်, မၤတၢ်အီၣ်တၢ်အီအမူးဖးဒိၣ်တခါလၢအပဒိၣ်တဖၣ်ဒီးပှၤပၢတၢ် သ့ၣ်တဖၣ်အဂီၢ်န့ၣ်လီၤ. ကီၢ်ပၤရၣ်ဒီးကီၢ်မၤဒဲအသုးမုၢ်သံၣ်ဘိတဖၣ်, ဒီးဒ်န့ၣ်အသိးကီၢ်ဖိတဖၣ်အပဒိၣ်ဖးဒိၣ်ဒီးပှၤတူၢ်ဒိၣ်ကီၢ်ဒိၣ်တဖၣ် ဟဲဝဲစ့ၢ်ကီးန့ၣ်လီၤ. 4ဒီးမၤတၢ်ဒုးနဲၣ်တမံၤလၢအပာ်ဖျါထီၣ်အဘီအမုၢ် အလၤကပီၤအတၢ်ထူးတၢ်တီၤဒီးအကဟုကညီၢ်လၢအယံာ်ဝဲဃု လါန့ၣ်လီၤ.
5တၢ်န့ၣ်ဝံၤအလီၢ်ခံ, စီၤပၤမၤတၢ်အီၣ်တၢ်အီအမူးဖးဒိၣ်တခါလၢပှၤအိၣ်လၢဝ့ၢ်ခိၣ် ဝ့ၢ်ၡူၡၣ်အပူၤ, ပှၤထူးပှၤတီၤမ့ၢ်ဂ့ၤ, ပှၤဖှီၣ်ဖိယာ်ဖိမ့ၢ်ဂ့ၤ, လၢပှၤခဲလၢာ်အဂီၢ်န့ၣ်လီၤ. ဒီးယံာ်ဝဲဒီတနွံညါဒီးဘၣ်တၢ် မၤအီၤလၢစီၤပၤအတၤသၣ်လီၢ်န့ၣ်လီၤ. 6စီၤပၤအတၤသၣ်လီၢ်အဂၢၤန့ၣ်ဘၣ်တၢ်ကယၢကယဲအီၤဒီးယၣ်ဘျးသဒၢ လၢအလါအဲးဒီးအဝါတဖၣ်လၢတၢ်စၢဃာ်အီၤဒီးပျံၤဂီၤလုးတ ကုာ်, ဒီးဘျးလီၤအီၤလၢကွီၤစ့လၢအအိၣ်လၢထူၣ်လၢၢ်ဝါ, အလိၤန့ၣ်လီၤ. လီၢ်မံခးထူဒီးစ့တဖၣ်ဘၣ်တၢ်ပာ်အီၤလၢဂၢၤလၢ အဘၣ်တၢ်ဒါလီၤအီၤဒီးလၢၢ်ဘဟး, လၢၢ်ဝါ, လၢၢ်ဒၢ်ဒီးလၢၢ်သူတဖၣ်အပူၤန့ၣ်လီၤ. 7တၢ်အီတဖၣ်ဘၣ်တၢ်ဟ့ၣ်အီအီၤလၢလီ ခီထူလီၤဆီလိာ်အသးတဖၣ်အပူၤ, ဒီးစီၤပၤဟ့ၣ်အီအစပံးထံလၢ တၢ်သူၣ်အိၣ်သးအိၣ်အပူၤန့ၣ်လီၤ. 8တၢ်တြီတအိၣ်ဘၣ်နီတမံၤလၢတၢ်အီအဂီၢ်ဘၣ်. စီၤပၤဟ့ၣ်လီၤအကလုၢ်ဆူအခ့အပှၤအိၣ်လၢနီ ပူၤတဖၣ်ဒ်သိးပှၤကိးဂၤဒဲးကမၤန့ၢ်ဒ်အသးလီဝဲအသိးန့ၣ် လီၤ.
9တကတီၢ်ဃီအံၤန့ၣ်, နီၢ်ပၤမုၣ်ဝးၡတံၤမၤစ့ၢ်ကီးတၢ်အီၣ်တၢ်အီအမူးဖးဒိၣ်တခါ လၢပိာ်မုၣ်ပိာ်မၢၤသ့ၣ်တဖၣ်အဂီၢ်လၢစီၤပၤအနီပူၤန့ၣ်လီၤ.
10ဒီးလၢတၢ်အီၣ်တၢ်အီအမူးဖးဒိၣ်နွံနံၤတနံၤ, ဖဲစီၤပၤမုာ်လၤဝဲလၢစပံးထံအကတီၢ်အခါန့ၣ်, ကိးဃီၤပှၤဒ့ဒံၣ်ဖိနွံဂၤလၢအမ့ၢ်အနီၢ်ကစၢ်ဒၣ်ဝဲအခ့အပှၤ, စီၤမဟူမၣ်, စီၤဘံးစသၤ, စီၤဃၤရဘိနၤ, စီၤဘံးကသၤ, စီၤအဘၤကသၤ, စီၤစ့သၢ်ဒီးစီၤကၤရယၣ်တဖၣ်န့ၣ်လီၤ. 11စီၤပၤမၤလိာ်အဝဲသ့ၣ်ဒ်သိးအကဟဲကိးန့ၢ်အီၤနီၢ်ပၤမုၣ်ဝးၡတံၤ, အိၣ်ဒီးနီၢ်ပၤမုၣ်အခိၣ်သလုးလၢအခိၣ်လိၤလီၤ. နီၢ်ပၤမုၣ်မ့ၢ်ပိာ်မုၣ်လၢအဃံလၤဝဲဒီးစီၤပၤသးအိၣ်ပာ်ဖျါထီၣ် အတၢ်ဃံတၢ်လၤဆူပဒိၣ်ဖးဒိၣ်တဖၣ်ဒီးအပှၤတမှံၤတပျီၤခဲလၢာ် န့ၣ်လီၤ. 12ဘၣ်ဆၣ်ဒီး, ဖဲတၢ်ခ့တၢ်ပှၤသ့ၣ်တဖၣ်တဲဘၣ်နီၢ်ပၤမုၣ်ဝးၡတံၤလၢစီၤပၤ အတၢ်မၤလိာ်အီၤန့ၣ်, အဝဲဂ့ၢ်လိာ်ဝဲလၢအကဟဲဝဲဒၣ်န့ၣ်လီၤ. တၢ်အံၤမၤသးဒိၣ်ထီၣ်စီၤပၤန့ၣ်လီၤ.
13မ့ၢ်စီၤပၤအလုၢ်အလၢ်လၢကဃ့တၢ်ဟ့ၣ်ကူၣ်ဘၣ်ထွဲဒီးတၢ်သံ ကွၢ်လၢတၢ်သိၣ်တၢ်သီဒီးတၢ်မၤလိာ်တဖၣ်အဂ့ၢ်န့ၣ်လီၤ. အဝဲကိးဃီၤအပှၤဟ့ၣ်ကူၣ်တၢ်တဖၣ်ဒီးသံကွၢ်ဝဲလၢ ကဘၣ်မၤဝဲဒ်လဲၣ်န့ၣ်လီၤ. 14ပှၤလၢအဝဲညီနုၢ်ဃ့တၢ်ဟ့ၣ်ကူၣ်အအါကတၢၢ်မ့ၢ်ဝဲ, ကီၢ်ပၤရၣ်ဒီးကီၢ်မၤဒဲအပဒိၣ်ဖးဒိၣ်နွံဂၤလၢအမ့ၢ်စီၤကၢ်ၡနၤ, စီၤၡ့သၢ်, စီၤအၤဒမါသၤ, စီၤတၢ်ၡံၣ်, စီၤမ့ရ့း, စီၤမၢ်စနၤဒီးစီၤမမူကၣ်န့ၣ်လီၤ. အဝဲသ့ၣ်မ့ၢ်ပှၤအိၣ်ဒီးလီၢ်လၤအထီကတၢၢ်လၢဘီမုၢ်အပူၤန့ၣ်လီၤ. 15စီၤပၤအဃၤၡဝ့ရိၣ်စံးဘၣ်ပှၤတဖၣ်အံၤ, “ယမၢလီၤယခ့ယပှၤတဖၣ်ဆူနီၢ်ပၤမုၣ်ဝးၡတံၤအအိၣ်, ဃုာ်ဒီးတၢ်မၤလိာ်တမံၤ, ဘၣ်ဆၣ်အဝဲတဒိကနၣ်ဝဲဘၣ်. မ့ၢ်တၢ်သိၣ်တၢ်သီစံးဝဲလၢပကြၢးမၤ အီၤဒ်လဲၣ်.”
16တုၤနုၤတစု, စီၤမမူကၣ်စံးဆၢစီၤပၤဒီးအပဒိၣ်ဖးဒိၣ်တဖၣ်, “တမ့ၢ်ထဲနီၢ်ပၤမုၣ်ဝးၡတံၤမၤကမၣ်စီၤပၤဧိၤန့ၣ်ဘၣ်. မ့ၢ်စ့ၢ်ကီးအပဒိၣ်ဖးဒိၣ်တဖၣ်ဒီးပှၤပိာ်ခွါခဲလၢာ်လၢ အအိၣ်လၢစီၤပၤအတၢ်ပၢအပူၤလီၤ. 17လၢနီၢ်ပၤမုၣ်ဝးၡတံၤမၤဒ်သိးအံၤအဃိပိာ်မုၣ်ခဲလၢာ်, ကစးထီၣ်ကွၢ်တလီၤအဝၤတဘျီဃီန့ၣ်လီၤ. ဒီးအဝဲသ့ၣ်ကစံးလၢစီၤပၤအဃၤၡဝ့ရိၣ်မၤလိာ်နီၢ်ပၤမုၣ်ဝးၡတံၤဒ်သိးအကဟဲဆူအအိၣ်ဘၣ်ဆၣ်တဒိကနၣ်ဝဲဒၣ်ဘၣ်. 18စးထီၣ်လၢမုၢ်တနံၤအံၤတုၤစီၤပၤအပဒိၣ်ဖးဒိၣ်လၢကီၢ်ပၤရၣ်ဒီးကီၢ်မၤဒဲ အပူၤအမါတဖၣ်နၢ်ဟူနီၢ်ပၤမုၣ်အတၢ်မၤအံၤဒီး, အဝဲသ့ၣ်ကတဲဘၣ်အဝၤတဖၣ်လၢတၢ်ဂ့ၢ်အံၤန့ၣ်လီၤ. ဒီးမါလၢတၢ်လီၢ်ကိးပူၤဒဲးတမ့ၢ်ကပာ်ကဲအဝၤလၢၤဘၣ်န့ၣ်လီၤ. 19မ့ၢ်ဘၣ်, စီၤပၤအသးဒီး, မ်တၢ်ရၤလီၤစီၤပၤအတၢ်မၤလိာ်လၢနီၢ်ပၤမုၣ် ဝးၡတံၤအသုတပာ်ဖျါထီၣ်လၢၤအသးနီတစုလၢစီၤပၤအမဲာ်ညါ ဘၣ်တဂ့ၤန့ၣ်တက့ၢ်. တၢ်မၤလိာ်အံၤကဘၣ်တၢ်ကွဲးနီၣ်အီၤလၢကီၢ်ပၤရၣ်ဒီးကီၢ်မၤဒဲ အတၢ်သိၣ်တၢ်သီတဖၣ်အပူၤဒ်သိးတၢ်လဲ လိာ်ကွံာ်အီၤသုတသ့နီတဘျီတဂ့ၤလီၤ. အန့ၣ်ဒီးဟ့ၣ်လီၤကွံာ်အနီၢ် ပၤမုၣ်အလီၢ်အံၤဆူပိာ်မုၣ်လၢအဂ့ၤဒိၣ်န့ၢ်အီၤတဂၤအအိၣ်န့ၣ်တက့ၢ်. 20ဒီးတုၤနတၢ်မၤလိာ်အံၤဘၣ်တၢ်ဒုးသ့ၣ်ညါအီၤလၢ နဘီနမုၢ်ဒီဘ့ၣ်ညါဒီးပိာ်မုၣ်ကိးဂၤဒဲးကဟ့ၣ်အဝၤ တၢ်ယူးယီၣ်လၢအကြၢးဝဲဘၣ်ဝဲ, ဖဲအဝဲမ့ၢ်ပှၤထူးပှၤတီၤမ့ၢ်ဂ့ၤ, ပှၤဖှီၣ်ဖိယာ်ဖိမ့ၢ်ဂ့ၤန့ၣ်လီၤ.”
21စီၤပၤအပဒိၣ်ဖးဒိၣ်တဖၣ်ဘၣ်သူၣ်ဘၣ်သးတၢ်ဟ့ၣ်ကူၣ်အံၤ, ဒီးစီၤပၤမၤဝဲဒ်စီၤမမူကၣ်ဟ့ၣ်ကူၣ်ဝဲအသိးန့ၣ်လီၤ. 22အဝဲဆှၢလီၤတၢ်ကစီၣ်တမံၤအံၤဆူကီၢ်တဘ့ၣ်ဘၣ် တဘ့ၣ်လၢအပၢဘၣ်ဝဲဒ်အကျိာ်ဒၣ်ဝဲအသိး, လၢဝၤကိးဂၤဒဲးကဘၣ်မ့ၢ်ဟံၣ်ခိၣ်လၢအဟံၣ်ဒၣ်ဝဲဒီး ကတိၤတၢ်အိၣ်ဒီးတၢ်စိတၢ်ကမီၤလၢခံကတၢၢ်န့ၣ်လီၤ.
Currently Selected:
လံာ်နီၢ်အ့ၤစတၢ် 1: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
