လံာ်ပှၤစံၣ်တဲၤတဲလီၤတၢ် 5

အၢၣ်လီၤတၢ်ချ့ဒံးချ့ဒူးလၢတၢ်တဆိကမိၣ်အပူၤတဂ့ၤ

1ပလီၢ်နသးလၢနတၢ်လဲၤဆူယွၤအတၢ်လုၢ်ဟံၣ်န့ၣ်တက့ၢ်. ဂ့ၤတက့ၢ်လၢနကလဲၤဖဲန့ၣ်လၢနကမၤလိန့ၢ်တၢ်အဂီၢ်အါန့ၢ်ဒံး တၢ်လဲၤလုၢ်ထီၣ်ပာ်ထီၣ်တၢ်လုၢ်တၢ်ပာ်တဖၣ်ဒ်ပှၤဟးဂီၤဖိတဖၣ်မၤ ဝဲအသိး, ပှၤတဖၣ်လၢအတသ့ၣ်ညါနီၤဖးတၢ်အဘၣ်ဒီးတၢ်အကမၣ်ဘၣ်န့ၣ်လီၤ. 2တချုးနကတိၤဒံးတၢ်န့ၣ်, ဆိကမိၣ်တၢ်တက့ၢ်. ဒီးအၢၣ်လီၤတၢ်ဒီးကစၢ်ယွၤချ့ဒံးချ့ဒူးလၢတၢ်တဆိကမိၣ်အပူၤတဂ့ၤ. အဝဲအိၣ်လၢမူခိၣ်, မ့မ့ၢ်နဲနအိၣ်လၢဟီၣ်ခိၣ်လိၤလီၤ. အဃိဒီး, စံးကတိၤတၢ်အါန့ၢ်ဒံးတၢ်လၢနကြၢးစံးကတိၤအီၤတဂ့ၤ. 3နဒံးကိၢ်တၢ်ဂီၤတၢ်ဒီး, နကအိၣ်ဒီးတၢ်မံမီၢ်အအၢအသီတဖၣ်ဒံး အါထီၣ်ဘၣ်ဖုးလီၤ. ဒီးနကတိၤတၢ်ဒံးအါထီၣ်, နကတိၤပှၤဟးဂီၤဖိအတၢ်ကတိၤတမံၤမံၤကဒံးအါထီၣ်ဘၣ်ဖုးန့ၣ် လီၤ. 4မၤသးဒ်န့ၣ်ဒီး, ဖဲနမၤတၢ်အၢၣ်လီၤအီလီၤဒီးကစၢ်ယွၤန့ၣ်, မၤလၢပှဲၤအီၤချ့ချ့တသ့ဖဲအသ့တက့ၢ်. ပှၤအမၢးတဂၤန့ၣ်, ကစၢ်ယွၤသူအီၤတသ့ဘၣ်. မၤတၢ်လၢနအၢၣ်လီၤလၢနကမၤအီၤန့ၣ်တက့ၢ်. 5တၢ်တအၢၣ်လီၤအီလီၤတၢ်နီတမံၤန့ၣ်, ဂ့ၤဒိၣ်န့ၢ်ဒံးတၢ်အၢၣ် လီၤအီလီၤတၢ်ဝံၤဒီးတဘၣ်တၢ်မၤလၢပှဲၤက့ၤအီၤတက့ၢ်န့ၣ်လီၤ. 6ပျဲနတၢ်ကတိၤဒၣ်နဲတဖၣ်ဆှၢနၤဆူတၢ်ဒဲးဘးအပူၤတုၤနကဘၣ်တဲ ဘၣ်က့ၤကစၢ်ယွၤအပှၤလုၢ်တၢ်အခိၣ်လၢ, “ယအၢၣ်လီၤတၢ်ကမၣ်လံ” န့ၣ်တဂ့ၤ. ဘၣ်မနုၤအဃိနမၤသးဒိၣ်ကစၢ်ယွၤန့ၣ်လဲၣ်. ဘၣ်မနုၤအဃိနပျဲအမၤဟးဂီၤတၢ်လၢနမၤတ့ၢ်လံအီၤန့ၣ်လဲၣ်. 7တၢ်မံမီၢ်အါဒီးတၢ်ကတိၤတၢ်အါန့ၣ်အခီပညီတအိၣ်ဘၣ်. မၤသးဒ်န့ၣ်ဒီးဆၢထၢၣ်လၢကစၢ်ယွၤအမဲာ်ညါလၢတၢ်ပျံၤဒီးတၢ် ယူးယီၣ်အပူၤန့ၣ်တက့ၢ်.

တၢ်အိၣ်မူန့ၣ်အဘျုးတအိၣ်ဘၣ်.

8ဖဲလၢနထံၣ်ဘၣ်ထံကီၢ်ပဒိၣ်ပပှၢ်မၤနးမၤဖှီၣ်ပှၤဖှီၣ်ဖိယာ်ဖိဒီးတပျဲ ဘၣ်အဝဲသ့ၣ်ဒိးန့ၢ်တၢ်စံၣ်ညီၣ်တီဒီးအခွဲးအယာ်တဖၣ်ဘၣ်န့ၣ်, ကမၢကမၣ်တဂ့ၤ. ပဒိၣ်ပပှၢ်ကိးဂၤဒဲးန့ၣ်ဘၣ်တၢ်ဒီဒၣ်အိၣ်ပှိၤ အီၤလၢပှၤလၢအဖီခိၣ်တဂၤ, ဒီးအဝဲသ့ၣ်ခံဂၤလိာ်န့ၣ်ဘၣ်တၢ်ဒီဒၣ်အိၣ်ပှိၤဒံးအီၤလၢ ပဒိၣ်ပပှၢ်တဖၣ်လၢအဒိၣ်န့ၢ်ထီန့ၢ်အဝဲသ့ၣ်န့ၣ်လီၤ.

9စီၤပၤတဂၤဒၣ်လဲာ်ဘၣ်သန့ၤအသးလၢဟီၣ်ခိၣ်အတၤသၣ်န့ၣ်လီၤ.

10နမ့ၢ်အဲၣ်စ့ဒီးနသးတမံနီတစုဘၣ်. နမ့ၢ်ဆၢထူးထီၣ်တီၤထီၣ် ဒီး, တၢ်လၢနသးလီအီၤခဲလၢာ်န့ၣ်နမၤတန့ၢ်နီတဘျီဘၣ်. တၢ်အံၤမ့ၢ်တၢ်လၢအဘျုးတအိၣ်န့ၣ်လီၤ. 11နဒံးထူးထီၣ်တီၤထီၣ်ဒီး, ကိာ်ပူၤကဒံးအါထီၣ်ဝဲလၢနကဘၣ် ဒုးအီၣ်အီၤန့ၣ်လီၤ. တၢ်လၢနမၤန့ၢ်အီၤခဲလၢာ်န့ၣ်, မ့ၢ်တၢ်သ့ၣ်ညါလၢနမ့ၢ်ပှၤအထူးအတီၤအဃိန့ၣ်လီၤ. 12ပှၤလၢအမၤတၢ်တဂၤန့ၣ်, တၢ်အီၣ်ကအိၣ်ဒီးအီၤလၢလၢပှဲၤပှဲၤ, မ့တမ့ၢ်တအိၣ်ဒီးအီၤသ့ၣ်သ့ၣ်လီၤ. ဘၣ်ဆၣ်, အစှၤကတၢၢ်န့ၣ်, အဝဲကမံဘၣ်ဝဲမုာ်မုာ်န့ၣ်လီၤ. မ့မ့ၢ်, ပှၤအထူးအတီၤတဂၤန့ၣ်အတၢ်အိၣ်အါတုၤဒၣ်လဲာ်ဘၣ်ကိၢ်ဘၣ် ဂီၤဒီးမံဝဲတန့ၢ်ဘၣ်လီၤ.

13တၢ်အံၤမ့ၢ်တၢ်လၢအလီၤပျံၤဒိၣ်မးတမံၤလၢယထံၣ်ဘၣ်တ့ၢ်အီၤလၢ ဟီၣ်ခိၣ်အံၤန့ၣ်လီၤ. ပှၤဂီၢ်မုၢ်ပာ်ဖှိၣ်အကျိၣ်အစ့ဖဲလၢတၢ်အကတီၢ်ဖဲအဝဲသ့ၣ်ကလိၣ် ဘၣ်ဝဲအဂီၢ်န့ၣ်လီၤ. 14ဘၣ်ဆၣ်သူလၢာ်ကွံာ်ဝဲခဲလၢာ်ခီဖျိတၢ်မၤအအၢတမံၤအဃိ, ဒီးအကတၢၢ်န့ၣ်ကဟ့ၣ်သါအဖိတဖၣ်အဂီၢ်တၢ်တအိၣ်နီတမံၤ လၢၤဘၣ်လီၤ. 15ပဟးထီၣ်ကွံာ်လၢဟီၣ်ခိၣ်အံၤဒ်ပဟဲနုာ်လီၤအသိး, တၢ်တအိၣ်ဒီးပှၤနီတမံၤဘၣ်န့ၣ်လီၤ. ပမၤတၢ်ထဲထဲအံၤသနာ်က့, တၢ်တအိၣ်နီတမံၤလၢပကက့ၤစိာ်ဃုာ်ဒီးပှၤန့ၣ်ဘၣ်. 16တၢ်အံၤတဘၣ်ဘၣ်. ပက့ၤဒ်ပဟဲအသိးန့ၣ်လီၤ. ပဖံးတၢ်မၤတၢ်, ပကျဲးစၢးဖီၣ်ကလံၤ, ဒီးပမၤန့ၢ်တၢ်မနုၤလဲၣ်. 17ပဘၣ်အိၣ်မူပတၢ်အိၣ်မူတဖၣ်လၢတၢ်ခံးတၢ်နၤဒီးတၢ်သူၣ်အုးသး အုး, တၢ်ဘၣ်ကိၢ်ဘၣ်ဂီၤ, တၢ်သူၣ်ဒိၣ်သးဖျိး, ဒီးတၢ်ဆူးတၢ်ဆါအပူၤလီၤ.

18အအံၤမ့ၢ်တၢ်လၢယထံၣ်ဘၣ်တ့ၢ်ယဲလီၤ. တၢ်အဂ့ၤကတၢၢ်လၢပှၤတဂၤဂ့ၤတဂၤဂ့ၤမၤဝဲသ့န့ၣ်, မ့ၢ်အကအီၣ်တၢ်, အီတၢ်, ဒီးမုာ်လၤသးခုလၢတၢ်လၢအမၤန့ၢ်တ့ၢ် ဝဲတဖၣ်လၢတၢ်အိၣ်မူဖုၣ်ကိာ်လၢကစၢ်ယွၤဟ့ၣ်လီၤအီၤအပူၤလီၤ. တၢ်အံၤမ့ၢ်ပှၤကညီအတၢ်ဘူၣ်တၢ်တီၢ်န့ၣ်လီၤ. 19ယွၤမ့ၢ်ဟ့ၣ်ပှၤကညီတဂၤလၢတၢ်ထူးတၢ်တီၤဒီးတၢ်စုလီၢ်ခီၣ် ခိၣ်ဒီးပျဲအမုာ်လၤသးခုလၢတၢ်လၢအမၤန့ၢ်တ့ၢ်ဝဲတဖၣ်ဒီး, အဝဲကြၢးသ့ၣ်ညါတၢ်ဘျုးတၢ်ဖှိၣ်ဒီးမၤမုာ်လၤသးခုလၢတၢ်လၢ အမၤတ့ၢ်ဝဲအဃိန့ၣ်လီၤ. တၢ်န့ၣ်မ့ၢ်တၢ်ဟ့ၣ်ဟဲလၢယွၤတမံၤလီၤ. 20မ့ၢ်လၢယွၤပျဲအီၤလၢကသူၣ်ဖှံသးညီအဃိ, တၢ်အိၣ်မူဖုၣ်သနာ်က့အဝဲတကိၢ်တဂီၤဝဲကဲၣ်ဆိးလၢၤဘၣ်န့ၣ်လီၤ.

Currently Selected:

လံာ်ပှၤစံၣ်တဲၤတဲလီၤတၢ် 5: KSWC

Highlight

Copy