ကလီးစဲ 4
4
1ကစၢ်သ့ၣ်ဧၢ, လၢသုတၢ်ဘၣ်ထွဲဒီးသုကုၢ်သုပှၤအပူၤန့ၣ်မၤ သုဝဲတီတီတအိၣ်ဘၣ်ဒီးတၢ်ကွၢ်မဲာ်တၢ်ဘၣ်န့ၣ်တက့ၢ်. သ့ၣ်ညါလၢသုဝဲစ့ၢ်ကီးသုအိၣ်ဒီးသုကစၢ်တဂၤလၢမူခိၣ်န့ၣ် တက့ၢ်.
တၢ်သိၣ်လီၤသီလီၤတဖၣ်
2ဘါထုကဖၣ်ယွၤသပှၢ်ပှၢ်ထီဘိတက့ၢ်. ပာ်သုသးစၢၢ်ဆၢပံၢ်ကလာ်လၢတၢ်ထုကဖၣ်အပူၤအိၣ်ဒီးတၢ်စံးဘျုးစံးဖှိၣ်ကစၢ်ယွၤ တက့ၢ်. 3ဒီးဃ့ဘါထုကဖၣ်စ့ၢ်ကီးလၢပဂီၢ်, ဒ်သိးကစၢ်ယွၤကအိးထီၣ် န့ၢ်ပှၤကျဲလၢပကစံၣ်တဲၤတဲလီၤဘၣ်တၢ်အကစီၣ်ဘၣ်ဃးဒီးခရံာ် အတၢ်ခူသူၣ်န့ၣ်တက့ၢ်. အဂ့ၢ်ဒ်အံၤယလီၤဘၣ်လၢဃိာ်အပူၤမ့ၢ်လၢတၢ်ဂ့ၢ်အံၤအဃိလီၤ. 4လၢတၢ်န့ၣ်အဃိ, ဃ့ဘါထုကဖၣ်ဒ်သိးယကစံၣ်တဲၤတဲလီၤ တၢ်ကစီၣ်အံၤဆှံဆှံဒ်ယဂ့ၤစံၣ်တဲၤတဲလီၤယဲအသိးန့ၣ်တက့ၢ်.
5လၢသုတၢ်ဘၣ်ထွဲဒီးပှၤတစူၢ်တနာ်တၢ်တဖၣ်အပူၤန့ၣ်, အိၣ်ဒီးတၢ်ကူၣ်သ့တက့ၢ်. တၢ်ဆၢကတီၢ်ဒီးတၢ်ခွဲးတၢ်ယာ်လၢသုဒိးန့ၢ်ကိးကတီၢ်ဒဲးန့ၣ်, သူအီၤအဂ့ၤကတၢၢ်တက့ၢ်. 6သုတၢ်စံးတၢ်ကတိၤန့ၣ်, မ်အကမ့ၢ်တၢ်လၢအမုာ်ဝဲဒီးထုးန့ၢ် ပှၤအသးဒီးသုကြၢးသ့ၣ်ညါစံးဆၢက့ၤပှၤကိးဂၤဒဲးသ့သ့ ဘၣ်ဘၣ်န့ၣ်လီၤ.
တၢ်ဆၢဂ့ၤဆၢဝါလၢခံကတၢၢ်
7ယဒီပုၢ်ဝဲၢ်လၢတၢ်အဲၣ်အီၤစီၤတူဃံၤကူးလၢအမ့ၢ်ပှၤမၤတၢ်ဖိလၢ အကလုၢ်တီဒီးမ့ၢ်ပှၤမၤသကိးတၢ်လၢကစၢ်အတၢ်မၤအပူၤတဂၤ ကတဲဘၣ်သုလၢယဂ့ၢ်ယကျိၤခဲလၢာ်လီၤ. 8ယမၢလီၤအီၤဆူသုအိၣ် ဒ်သိးအဝဲကတဲဘၣ်သုလၢပဝဲခဲလၢာ် အဂ့ၢ်အကျိၤ, ဒ်သိးအကမၤမုာ်ထီၣ်သုသးအဂီၢ်န့ၣ်လီၤ. 9ဃုာ်ဒီးအီၤန့ၣ်ယမၢလီၤစ့ၢ်ကီးဒီပုၢ်ဝဲၢ်လၢတၢ်အဲၣ်အီၤဒီး အကလုၢ်တီဝဲစီၤအီးန့ၤစံမူး, လၢအဘၣ်ဃးဒီးသုတဂၤန့ၣ်လီၤ. အဝဲသ့ၣ်ကတဲဘၣ်သုလၢတၢ်မၤအသးဖဲအံၤခဲလၢာ်လီၤ.
10စီၤအရံးစတၢ်ဃူးလၢအလီၤဘၣ်ဃိာ်တပူၤဃီဒီးယၤဆှၢလီၤ အတၢ်ဆၢဂ့ၤဆၢဝါဆူသုအိၣ်လီၤ. စီၤဘၢ်နါဘၤအတခွါစီၤမၢ်ကူး (ပှၤလၢသုဘၣ်တၢ်မၢတ့ၢ်သုလၢသုကတူၢ်လိာ်ခီၣ်ဆၢအီၤဖဲ အဝဲလဲၤဘၣ်ဆူသုအိၣ်တဘျီလၢ်လၢ်တဂၤ) စ့ၢ်ကီးဆှၢလီၤ အတၢ်ဆၢဂ့ၤဆၢဝါဆူသုအိၣ်လီၤ. 11စီၤယ့ၣ်ၡူးလၢအဘၣ်တၢ်ကိးစ့ၢ်ကီးလၢစီၤယူစတူးတဂၤ ဆှၢလီၤစ့ၢ်ကီးအတၢ်ဆၢဂ့ၤဆၢဝါဆူသုအိၣ်လီၤ. ထဲအဝဲသ့ၣ်သၢဂၤဧိၤမ့ၢ်ပှၤယူဒၤဖိလၢအစူၢ်က့ၤနာ်က့ၤခရံာ် လၢအမၤသကိးတၢ်ဒီးယၤလၢယွၤအဘီအမုၢ်အပူၤဒီး ကဲထီၣ်တၢ်မၤစၢၤအဒိၣ်အအါလၢယဂီၢ်န့ၣ်လီၤ.
12ပှၤလၢအဘၣ်ဃးဒီးသု, ယ့ၣ်ၡူးခရံာ်အခ့အပှၤ, စီၤအ့းပၤဖြါတဂၤ ဆၢဂ့ၤဆၢဝါလီၤသုဒီးထီဘိန့ၣ်ဃ့ဘါထုကဖၣ်ကစၢ်ယွၤသပှၢ် ပှၢ်လၢသုဂီၢ်ဒ်သိးသုကဆၢထၢၣ်ဂၢၢ်ဂၢၢ်ကျၢၤကျၢၤလၢတၢ်လူၤဘၣ် ယွၤအသးအပူၤ, ဒ်ပှၤခရံာ်ဖိလၢအနာ်တၢ်နီၢ်နီၢ်ဒီးဒိၣ်တုာ်ခိၣ် ပှဲၤဝဲတဖၣ်အသိးန့ၣ်လီၤ. 13ယအုၣ်ယသးလၢယနီၢ်ကစၢ်ဒၣ်ယဲသ့ဝဲလၢအဝဲမ့ၢ်ပှၤလၢ အကျဲးစၢးတၢ်ဒိၣ်မးလၢသုဂီၢ်, ဒီးလၢပှၤအိၣ်လၢဝ့ၢ်လီၤဒံၤကံဒီးဝ့ၢ်ဟံၣ်ရိးပလံတဖၣ် အဂီၢ်န့ၣ်လီၤ. 14ပကသံၣ်သရၣ်လၢတၢ်အဲၣ်အီၤစီၤလူၤကၣ်ဒီးစီၤဒ့မၤဆှၢလီၤဘၣ် အတၢ်ဆၢဂ့ၤဆၢဝါသုလီၤ.
15ဟ့ၣ်ဘၣ်ပတၢ်ဆၢဂ့ၤဆၢဝါအဒိၣ်ကတၢၢ်ဆူဒီပုၢ်ဝဲၢ်လၢအအိၣ်လၢ ဝ့ၢ်လီၤဒံၤကံတဖၣ်အအိၣ်, ဆူစီၤနူၣ်ဖၤအအိၣ်ဒီးဆူတၢ်အိၣ်ဖှိၣ်လၢအဘူၣ်သကိးဘါ သကိးတၢ်လၢအဝဲဒၣ်အဟံၣ်ပူၤအအိၣ်တက့ၢ်. 16တုၤပှၤဖးလံာ်ပရၢအံၤဝံၤဒီးမၤဒ်သိးဝ့ၢ်လီၤဒံၤကံအတၢ် အိၣ်ဖှိၣ်စ့ၢ်ကီးကဖးဘၣ်ဝဲသပှၢ်ကတၢၢ်တက့ၢ်. သုဝဲစ့ၢ်ကီးဖးဘၣ်လံာ်ပရၢလၢယကွဲးန့ၢ်အဝဲသ့ၣ်လၢအဝဲသ့ၣ် ကဆှၢလီၤန့ၢ်သုတက့ၢ်. 17ဒီးတဲဘၣ်စီၤအၢ်ဃံးပူးလၢအကပာ်လီၤအသးသပှၢ်ကတၢၢ်လၢ အကမၤတၢ်မၤလၢအဒိးန့ၢ်ဝဲလၢကစၢ်အအိၣ်န့ၣ်တုၤအဝံၤ, ဒီးလၢထီၣ်ပှဲၤထီၣ်တစုတက့ၢ်.
18လၢယစုလီၢ်ဒၣ်ယဲယကွဲးတၢ်အံၤလီၤ. တၢ်ဆၢဂ့ၤဆၢဝါလၢယၤ စီၤပီလူးအအိၣ်, သ့ၣ်နီၣ်ထီၣ်ယတၢ်ဘၣ်စၢဃာ်တက့ၢ်.
မ်ကစၢ်ယွၤအဘျုးအဖှိၣ်လီၤဘၣ်လၢသုလိၤတက့ၢ်.
Currently Selected:
ကလီးစဲ 4: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
