ကလီးစဲ 2

1ပျဲယဒုးသ့ၣ်ညါသုလၢယကျဲးစၢးတၢ်ဆူၣ်ဆူၣ်လၢ သုဂီၢ်, ပှၤအိၣ်လၢဝ့ၢ်လီၤဒံၤကံတဖၣ်အဂီၢ်, ဒီးပှၤလၢအတထံၣ်ဘၣ်တသ့ၣ်ညါဘၣ်ယၤလၢနီၢ် ခိနီၢ်ခီတဖၣ်ခဲလၢာ်အဂီၢ်ထဲလဲၣ်ထဲလဲၣ်န့ၣ်တက့ၢ်. 2ယတၢ်ကျဲးစၢးမ့ၢ်ဒ်သိးဒီးသုကလၢထီၣ်ပှဲၤထီၣ်လၢတၢ်သူၣ်ဒူ သးဒူ, ဒီးလၢသုကအိၣ်ဒီးတၢ်သးတဖျၢၣ်ဃီလၢတၢ်အဲၣ်တၢ်ကွံ အပူၤ, ဒ်သိးသုကဒိးန့ၢ်တၢ်လုၢ်ဒိၣ်ပှ့ၤဒိၣ်ခဲလၢာ်ဘၣ်ဃးဒီးတၢ် သူၣ်ဂၢၢ်သးကျၢၤလၢတၢ်သ့ၣ်ညါနၢ်ပၢၢ်နီၢ်နီၢ်ဟဲစိာ်ဝဲဒီးတၢ် သ့ၣ်ညါကစၢ်ယွၤအတၢ်ခူသူၣ်လၢအမ့ၢ်ခရံာ်န့ၣ်လီၤ. 3ခရံာ်လီၣ်ဖျါထီၣ်ကစၢ်ယွၤအတၢ်ကူၣ်သ့ဒီးအတၢ်သ့ၣ်ညါခဲလၢာ် လၢအလီၤဂာ်ဒီးတၢ်ထူးတၢ်တီၤလုၢ်ဒိၣ်ပှ့ၤဒိၣ်လၢအအိၣ်သဒၢ တဖၣ်န့ၣ်လီၤ.

4ယစံးဘၣ်တဲဘၣ်သုတၢ်တဖၣ်အံၤမ့ၢ်ဒ်သိးသုသုတပျဲပှၤဆှၢ ကမၣ်သုလၢတၢ်ဂ့ၢ်လိာ်ဘှီလိာ်ကဘျံးကဘျၣ်လၢအဖျါဂ့ၤဖျါဘၣ် တဖၣ်န့ၣ်တဂ့ၤ. 5အဂ့ၢ်ဒ်အံၤယမ့ၢ်တအိၣ်ဒီးသုလၢနီၢ်ခိနီၢ်ခီသနာ်က့, ယအိၣ်ဒီးသုလၢသူၣ်လၢသးဒီးယသးခုလၢယထံၣ်ဘၣ် သုဟံးဃာ်လိာ်သုသးဒီးဆၢထၢၣ်သကိးလၢတၢ်စူၢ် တၢ်နာ်အဂၢၢ်အကျၢၤလၢခရံာ်အပူၤအဃိန့ၣ်လီၤ.

တၢ်အိၣ်မူအလၢအပှဲၤလၢခရံာ်အပူၤ

6ဒ်သုတူၢ်လိာ်တ့ၢ်လံယ့ၣ်ၡူးခရံာ်ဒ်သုကစၢ်တဂၤအသိးန့ၣ်, အိၣ်မူသုဝဲလၢအဝဲဒၣ်အပူၤတက့ၢ်. 7အိၣ်သူၣ်လီၤသုသးယိာ်ယိာ် ဒီးဘှီထီၣ်သုတၢ်အိၣ်မူလၢ ခရံာ်အပူၤ, ဒီးမ်သုတၢ်စူၢ်တၢ်နာ်အဂံၢ်အဘါကဆူၣ်ထီၣ်ဒ် သုဘၣ်တၢ်သိၣ်လိတ့ၢ်သုအသိး, ဒီးလၢထီၣ်ပှဲၤထီၣ်ဒီးတၢ်စံးဘျုးစံးဖှိၣ်န့ၣ်တက့ၢ်.

8ဒ်သိးသုသုတဘၣ်တၢ်ဖီၣ်န့ၢ်ဟံးဃာ်သုလၢဟီၣ်ခိၣ်ဖိအတၢ် ကူၣ်သ့လၢအဘျုးတအိၣ်ဘၣ်ဒီးအလီန့ၢ်တၢ်တဂ့ၤဒီးပလီၢ် သုသးတက့ၢ်. တၢ်သိၣ်လိသီလိတဖၣ်အံၤမ့ၢ်ပှၤဟီၣ်ခိၣ်ဖိအတၢ်ဟ့ၣ်ခီ ဃီၤတဆီဘၣ်တဆီလၢအဟဲလၢဟီၣ်ခိၣ်အကစူၤကစၢ် အအိၣ်ဒီးတမ့ၢ်ဘၣ်လၢခရံာ်အအိၣ်န့ၣ်ဘၣ်လီၤ. 9ယွၤအန့ဆၢၣ်သကဲာ်ပဝးအလၢအပှဲၤအိၣ်ဝဲလၢခရံာ် အနီၢ်ခိနီၢ်ခီအပူၤဖဲအဝဲဟဲဒ်ပှၤကညီတဂၤအသိးအခါန့ၣ်လီၤ. 10လၢသုအိၣ်မူလၢခရံာ်လၢအဒိၣ်စိလၢပှၤပၢတၢ်တဖၣ်ဒီး တၢ်စိတၢ်ကမီၤကိးမံၤဒဲးဘၣ်ဃးဒီးသူၣ်ဒီးသးအဖီခိၣ် တဂၤအံၤအပူၤအဃိန့ၣ်, သုဘၣ်တၢ်ဟ့ၣ်လီၤသုလၢတၢ်မူ အလၢအပှဲၤန့ၣ်လီၤ.

11လၢသုမူဝဲလၢခရံာ်အပူၤအဃိ, သုဘၣ်တၢ်ကူးတရံးသု တမ့ၢ်ဘၣ်လၢနီၢ်ခိနီၢ်ခီလၢပှၤကညီမၤဝဲန့ၣ်ဘၣ်, မ့ၢ်တၢ်ကူးတရံးဘၣ်ဃးဒီးခရံာ်လၢအမၤထူၣ်ဖျဲးထီၣ်ကွံာ် သုလၢတၢ်ဒဲးဘးတခီန့ၣ်လီၤ. 12အဂ့ၢ်ဒ်အံၤ, ဖဲသုဒိးစူၢ်ဒိးဘျၢသုသးအခါန့ၣ်, သုဘၣ်တၢ်ခူၣ်လီၤကွံာ်သုဃုာ်ဒီးခရံာ် ဒီးသုဘၣ်တၢ်ဒုးဂဲၤ ဆၢထၢၣ်က့ၤသုလၢတၢ်သံအပူၤဃုာ်ဒီးခရံာ်ခီဖျိလၢသုတၢ် စူၢ်တၢ်နာ်ယွၤအစိအကမီၤလၢအဒုးဂဲၤဆၢထၢၣ်သမူထီၣ်က့ၤ ခရံာ်လၢတၢ်သံအပူၤအဃိန့ၣ်လီၤ. 13လၢညါန့ၣ်လၢသုတၢ်ဒဲးဘးအဃိ, ဒီးလၢသုမ့ၢ်ပှၤကလုာ်ဂၤတဖၣ်လၢအတအိၣ်ဘၣ်ဒီးတၢ်သိၣ်တၢ်သီ အဃိသုမ့ၢ်တ့ၢ်ပှၤလၢအသံဝဲလၢသူၣ်လၢသးလီၤ. ဘၣ်ဆၣ်အခဲအံၤယွၤဒုးဂဲၤဆၢထၢၣ်က့ၤလံသုလၢတၢ်သံဃုာ်ဒီး ခရံာ်လံ. ယွၤပျၢ်ကွံာ်ကယဲၢ်ပတၢ်ဒဲးဘးတဖၣ်ခဲလၢာ်လီၤ. 14အဝဲတြူာ်ကွံာ်တၢ်ကွဲးနီၣ်ကွဲးဃါဘၣ်ဃးပဒ့ၣ်ကမၢ်ခဲလၢာ်ဃုာ် ဒီးတၢ်သိၣ်တၢ်သီလၢအစၢဃာ်တၢ်တဖၣ်လၢာ်လၢာ်ဆ့ဆ့ ခီဖျိအပျၤထီကွံာ်ဝဲလၢထူၣ်စုညါအလိၤန့ၣ်လီၤ. 15လၢထူၣ်စုညါအံၤအလိၤန့ၣ်ယ့ၣ်ၡူးဂုာ်န့ၢ်ဆူၣ်ကွံာ်ပှၤပၢတၢ် ဒီး, တၢ်စိတၢ်ကမီၤတဖၣ်လၢအဘၣ်ဃးဒီးသူၣ်ဒီးသးအစိအကမီၤ, ဒီးဒုးကဲထီၣ်အဝဲသ့ၣ်လၢကမျၢၢ်အတၢ်ကွၢ်ကီ အလီၢ်လၢအတၢ်မၤနၢၤအဝဲသ့ၣ်အပူၤန့ၣ်လီၤ.

16လၢတၢ်န့ၣ်အဃိတဘၣ်ပျဲပှၤနီတဂၤစံၣ်ညီၣ်တဲာ်န့ၢ်တၢ်လၢ နဂီၢ်ဘၣ်ဃးဒီးတၢ်လၢနအီၣ်နအီမ့ၢ်ဂ့ၤ, မုၢ်နံၤလီၤဆီလၢနံၣ် တနံၣ်အပူၤမ့ၢ်ဂ့ၤ, လါထီၣ်သီအမူးသးဖှံတဖၣ်မ့ၢ်ဂ့ၤ, အိၣ်ဘှံးအနံၤမ့ၢ်ဂ့ၤန့ၣ်တဂ့ၤ. 17တၢ်တဖၣ်အံၤမ့ၢ်ဒၣ်တၢ်လၢအကမၤအသးလၢခံတဖၣ် အကဒုလီၤ. မ့မ့ၢ်တၢ်လၢအမ့ၢ်တၢ်နီၢ်နီၢ်မ့ၢ်ခရံာ်လီၤ. 18တဘၣ်ပျဲပှၤလၢအပာ်မၤအသးဒ်အဆီၣ်လီၤအသးဘါကလူး တဖၣ်, ပှၤလၢအဟံးန့ၢ်အခီၣ်တဃာ်လၢအတၢ်ထံၣ်တၢ်လၢညါ ခီတဖၣ်, ဒီးပာ်ကဖၢလၢအသးလၢအတၢ်ကူၣ်တၢ်ဆးဒၣ်ဝဲ အဃိတဖၣ်, စံၣ်ညီၣ်သုတဂ့ၤ. 19ပှၤဒ်အံၤတဖၣ်တဟံးဃာ်လၢၤခရံာ်လၢအမ့ၢ်တၢ်အခိၣ်, လၢအပၢနီၢ်ဒီဂၤညါ, ဟ့ၣ်ဂံၢ်ဟ့ၣ်ဘါဒီးဟံးဃာ်အီၤတပူၤဃီခီဖျိအဆၢဒီးအထူၣ် အပျၢ်တဖၣ်ဒီးလၢအဒုးဒိၣ်ထီၣ်နီၢ်ခိဒ်ယွၤအဲၣ်ဒိးဝဲအသိး, န့ၣ်လၢၤဘၣ်.

တၢ်သံဒီးတၢ်မူဃုာ်ဒီးခရံာ်

20သုသံတ့ၢ်ဃုာ်ဒီးခရံာ် ဒီးဘၣ်တၢ်မၤထူၣ်ဖျဲးထီၣ်သုလၢဟီၣ် ခိၣ်အပှၤပၢတၢ်ဘၣ်ဃးဒီးသူၣ်ဒီးသးတဖၣ်အတၢ်ပၢတၢ်ဆှၢ အဖီလာ်လံ. မ့မ့ၢ်ဒ်န့ၣ်ဒီး, ဘၣ်မနုၤလၢသုအိၣ်မူဒ်ပှၤတဖၣ်လၢ အဘၣ်ဃးဒံးဒီးဟီၣ်ခိၣ်အသိးန့ၣ်လဲၣ်. ဘၣ်မနုၤလၢသုဟံးဃာ် ဒံးတၢ်ဒုၣ်တၢ်ထုတဖၣ်, 21ဒ်ပစံးတၢ်အသိး “တဘၣ်ဖီၣ်တၢ်အံၤတဂ့ၤ,” “တဘၣ်လ့ၣ်ကွၢ်တၢ်န့ၣ်တဂ့ၤ,” “တဘၣ်ထိးတၢ် အဝဲန့ၣ်တဂ့ၤ,” န့ၣ်လဲၣ်. 22တၢ်တဖၣ်အံၤဘၣ်ဃးဒၣ်ဒီးတၢ်လၢအဘၣ်တၢ်သူအီၤဝံၤအလီၢ် ခံအဘျုးတအိၣ်လၢၤဘၣ်တဖၣ်ဒီးမ့ၢ်ဒၣ်တၢ်သိၣ်တၢ်သီလၢ အဘၣ်တၢ်ဒုးကဲထီၣ်အီၤလၢပှၤကညီန့ၣ်လီၤ. 23တၢ်တဖၣ်အံၤ, ဖျါလီၤဂာ်ဒီးတၢ်ကူၣ်သ့ကူၣ်ဘၣ်အတၢ်သိၣ်တၢ် သီလၢအပာ်ဖျါထီၣ်အသးဒ်တၢ်သူၣ်ဆူၣ်သးဂဲၤအတၢ်ဘူၣ် တၢ်ဘါ, တၢ်ဆီၣ်လီၤသးဒီးတၢ်မၤအၢမၤနးလီၤက့ၤအနီၢ်ခိ အသိးန့ၣ်လီၤ. ဘၣ်ဆၣ်ဒီးမ့မ့ၢ်လၢအကမၤစၢၤဘှီက့ၤတၢ်လူၤ ဘၣ်နီၢ်ခိအတၢ်မိၣ်န့ၢ်သးလီန့ၣ်, တၢ်သိၣ်တၢ်သီတဖၣ်အံၤ အဘျုးတအိၣ်ဘၣ်.

Currently Selected:

ကလီးစဲ 2: KSWC

Highlight

Copy