Popular Bible Verses from ကလီးစဲ 2

Share

ဒ်သုတူၢ်လိာ်တ့ၢ်လံယ့ၣ်ၡူးခရံာ်ဒ်သုကစၢ်တဂၤအသိးန့ၣ်, အိၣ်မူသုဝဲလၢအဝဲဒၣ်အပူၤတက့ၢ်. အိၣ်သူၣ်လီၤသုသးယိာ်ယိာ် ဒီးဘှီထီၣ်သုတၢ်အိၣ်မူလၢ ခရံာ်အပူၤ, ဒီးမ်သုတၢ်စူၢ်တၢ်နာ်အဂံၢ်အဘါကဆူၣ်ထီၣ်ဒ် သုဘၣ်တၢ်သိၣ်လိတ့ၢ်သုအသိး, ဒီးလၢထီၣ်ပှဲၤထီၣ်ဒီးတၢ်စံးဘျုးစံးဖှိၣ်န့ၣ်တက့ၢ်.

ဒ်သိးသုသုတဘၣ်တၢ်ဖီၣ်န့ၢ်ဟံးဃာ်သုလၢဟီၣ်ခိၣ်ဖိအတၢ် ကူၣ်သ့လၢအဘျုးတအိၣ်ဘၣ်ဒီးအလီန့ၢ်တၢ်တဂ့ၤဒီးပလီၢ် သုသးတက့ၢ်. တၢ်သိၣ်လိသီလိတဖၣ်အံၤမ့ၢ်ပှၤဟီၣ်ခိၣ်ဖိအတၢ်ဟ့ၣ်ခီ ဃီၤတဆီဘၣ်တဆီလၢအဟဲလၢဟီၣ်ခိၣ်အကစူၤကစၢ် အအိၣ်ဒီးတမ့ၢ်ဘၣ်လၢခရံာ်အအိၣ်န့ၣ်ဘၣ်လီၤ.

လၢညါန့ၣ်လၢသုတၢ်ဒဲးဘးအဃိ, ဒီးလၢသုမ့ၢ်ပှၤကလုာ်ဂၤတဖၣ်လၢအတအိၣ်ဘၣ်ဒီးတၢ်သိၣ်တၢ်သီ အဃိသုမ့ၢ်တ့ၢ်ပှၤလၢအသံဝဲလၢသူၣ်လၢသးလီၤ. ဘၣ်ဆၣ်အခဲအံၤယွၤဒုးဂဲၤဆၢထၢၣ်က့ၤလံသုလၢတၢ်သံဃုာ်ဒီး ခရံာ်လံ. ယွၤပျၢ်ကွံာ်ကယဲၢ်ပတၢ်ဒဲးဘးတဖၣ်ခဲလၢာ်လီၤ. အဝဲတြူာ်ကွံာ်တၢ်ကွဲးနီၣ်ကွဲးဃါဘၣ်ဃးပဒ့ၣ်ကမၢ်ခဲလၢာ်ဃုာ် ဒီးတၢ်သိၣ်တၢ်သီလၢအစၢဃာ်တၢ်တဖၣ်လၢာ်လၢာ်ဆ့ဆ့ ခီဖျိအပျၤထီကွံာ်ဝဲလၢထူၣ်စုညါအလိၤန့ၣ်လီၤ.

ယွၤအန့ဆၢၣ်သကဲာ်ပဝးအလၢအပှဲၤအိၣ်ဝဲလၢခရံာ် အနီၢ်ခိနီၢ်ခီအပူၤဖဲအဝဲဟဲဒ်ပှၤကညီတဂၤအသိးအခါန့ၣ်လီၤ. လၢသုအိၣ်မူလၢခရံာ်လၢအဒိၣ်စိလၢပှၤပၢတၢ်တဖၣ်ဒီး တၢ်စိတၢ်ကမီၤကိးမံၤဒဲးဘၣ်ဃးဒီးသူၣ်ဒီးသးအဖီခိၣ် တဂၤအံၤအပူၤအဃိန့ၣ်, သုဘၣ်တၢ်ဟ့ၣ်လီၤသုလၢတၢ်မူ အလၢအပှဲၤန့ၣ်လီၤ.

လၢတၢ်န့ၣ်အဃိတဘၣ်ပျဲပှၤနီတဂၤစံၣ်ညီၣ်တဲာ်န့ၢ်တၢ်လၢ နဂီၢ်ဘၣ်ဃးဒီးတၢ်လၢနအီၣ်နအီမ့ၢ်ဂ့ၤ, မုၢ်နံၤလီၤဆီလၢနံၣ် တနံၣ်အပူၤမ့ၢ်ဂ့ၤ, လါထီၣ်သီအမူးသးဖှံတဖၣ်မ့ၢ်ဂ့ၤ, အိၣ်ဘှံးအနံၤမ့ၢ်ဂ့ၤန့ၣ်တဂ့ၤ. တၢ်တဖၣ်အံၤမ့ၢ်ဒၣ်တၢ်လၢအကမၤအသးလၢခံတဖၣ် အကဒုလီၤ. မ့မ့ၢ်တၢ်လၢအမ့ၢ်တၢ်နီၢ်နီၢ်မ့ၢ်ခရံာ်လီၤ.