၂ ကရံၣ်သူး 11
11
စီၤပီလူးဒီးတၢ်မၢဖိအဘျၣ်တဖၣ်
1ယဆၢလၢသုကဝံသးစူၤယၤ, ဖဲယသူၣ်တဆးသးတဆးတဆံးတက့ၢ်အခါန့ၣ်လီၤ. ဝံသးစူၤဘၣ်ယၤသပှၢ်ပှၢ်တက့ၢ်. 2ယသးက့ၣ်တၢ်လၢသုဂီၢ်ဒ်ကစၢ်ယွၤသးက့ၣ်ဝဲအသိးန့ၣ်လီၤ. သုလီၤဂာ်ဒီးမုၣ်ကနီၤနီၢ်နီၢ်တဂၤ လၢယအၢၣ်လီၤအီလီၤတ့ၢ် ယဲလၢယကဒိးတ့ဒိးဖျီအီၤဒီးပိာ်ခွါထဲတဂၤဧိၤ, ခရံာ်အနီၢ်ကစၢ်ဒၣ်ဝဲန့ၣ်လီၤ. 3ယဘၣ်ယိၣ်ဘၣ်ဘီလၢသုသူၣ်သုသးကဘၣ်တၢ်မၤဟးဂီၤကွံာ် အီၤဒီးသုကညိကွံာ်သုတၢ်ဟ့ၣ်လီၤသးလၢာ်လၢာ်ဆ့ဆ့စီစီ ဆှံဆှံဆူခရံာ်အအိၣ်လၢကျဲတဘိဃီလၢနီၢ်အံၣ်အုဘၣ်တၢ် လီန့ၢ်အီၤခီဖျိဂုၢ်သ့ၣ်အတၢ်ကတိၤကဘျံးကဘျၣ်တၢ်သ့သ့ ဘၣ်ဘၣ်တဖၣ်န့ၣ်လီၤ. 4အဂ့ၢ်ဒ်အံၤ, သုတူၢ်လိာ်ပှၤတဂၤလၢ်လၢ်လၢအဟဲဆူသုအိၣ် ဒီးစံၣ်တဲၤတဲလီၤယ့ၣ်ၡူးအဂၤတဂၤ, တမ့ၢ်တဂၤဃီလၢပစံၣ်တဲၤတဲလီၤလၢအဂ့ၢ်ဘၣ်. ဒီးသုတူၢ်လိာ်သးလၢအလီၤဆီဝဲဒၣ်လၢာ်လၢာ်ဆ့ဆ့ ဒီးသးလၢသုဒိးန့ၢ်လၢပအိၣ်, ဒီးတၢ်သးခုကစီၣ်လၢအလီၤဆီဝဲလၢာ်လၢာ်ဆ့ဆ့ဒီးတၢ် သးခုကစီၣ်လၢသုဒိးန့ၢ်သုဝဲလၢပအိၣ်န့ၣ်လီၤ.
5ယတဆိကမိၣ်လၢယဆံးန့ၢ်သုပှၤလီၤတိၢ်လီၤဆီမးတဖၣ် လၢတၢ်ကိးအီၤလၢသု “ပှၤတၢ်မၢဖိတဖၣ်” ထဲတစဲး ဧိၤဒၣ်လဲာ်န့ၣ်ဘၣ်. 6ဘၣ်တဘၣ်ယတမ့ၢ်ပှၤသ့စံးသ့ကတိၤတၢ်တဂၤသ့ၣ်သ့ၣ် လီၤ. ဘၣ်ဆၣ်ဒီးမ့မ့ၢ်လၢတၢ်သ့ၣ်ညါနၢ်ပၢၢ်တကပၤန့ၣ်, သပှၢ် ကတၢၢ်, တမ့ၢ်ဒ်န့ၣ်ဘၣ်. ပပာ်ဖျါထီၣ်တ့ၢ်တၢ်ဂ့ၢ်တမံၤအံၤဖျါဖျါလၢသုမဲာ်ညါ ထီဘိတဘိယူၢ်ဃီလၢဆၢကတီၢ်ကိးကတီၢ်ဒဲးအပူၤလီၤ.
7ဖဲယစံၣ်တဲၤတဲလီၤကစၢ်ယွၤအတၢ်သးခုကစီၣ်ဆူသုအိၣ်န့ၣ်, ယတဃ့သုတၢ်ဘူးတၢ်လဲနီတမံၤဘၣ်. ယဆီၣ်လီၤယသးဒ်သိးသုကကဲထီၣ်ပှၤအကါဒိၣ်တဖၣ်လီၤ. အဝဲအံၤန့ၣ်, မ့ၢ်ယမၤကမၣ်တၢ်ဧါ. 8ဖဲယဖံးတၢ်မၤတၢ်လၢသုသိးသုကျါအဆၢကတီၢ် ယဘၣ်တၢ်ဟ့ၣ်ဘူးဟ့ၣ်လဲယၤလၢတၢ်အိၣ်ဖှိၣ်အဂၤ တဖၣ်လီၤ. လၢကျဲတဘိန့ၣ်, ယဂုာ်န့ၢ်အဝဲသ့ၣ်အတၢ်လၢယကမၤစၢၤသုအဂီၢ်လီၤ. 9ဖဲယအိၣ်ဒီးသုအဖၢမုၢ်ဒီးဖဲယလိၣ်ဘၣ်ကျိၣ်စ့အဆၢ ကတီၢ်န့ၣ်, ယတမၤတံာ်တာ်သုလၢတၢ်မၤစၢၤအဂီၢ်ဘၣ်. ဒီပုၢ်ဝဲၢ်ဟဲလၢကီၢ်မၤက့းဒနံတဖၣ်ဟဲစိာ်န့ၢ်ယၤကယဲၢ် တၢ်လၢယလိၣ်ဘၣ်ယဲခဲလၢာ်လီၤ. ဒ်လၢခါပူၤကွံာ်အသိး န့ၣ်, ခါဆူညါကမ့ၢ်တၢ်ဒ်န့ၣ်အသိးလီၤ. ယတကဲထီၣ်တၢ်ဝံတၢ်ယိးလၢသုဂီၢ်နီတစုဘၣ်. 10ဒ်ခရံာ်အတၢ်မ့ၢ်တၢ်တီလၢအအိၣ်လၢယပူၤအသိးန့ၣ်, ယအၢၣ်လီၤအီလီၤယဲလၢယတၢ်ကတိၤတၢ်ကဖၢလၢတမံၤ အံၤတဘၣ်တၢ်မၤဘှ့ၣ်မၤဘှီၣ်အီၤလၢကီၢ်အဃါယၤဒီဘ့ၣ် အပူၤလၢတၢ်လီၢ်နီတတီၤဘၣ်. 11ယစံးတၢ်အံၤ, မ့ၢ်လၢယတအဲၣ်သုအဃိဧါ. ကစၢ်ယွၤသ့ၣ်ညါဝဲလၢယအဲၣ်သုလီၤ.
12ယကမၤဒံးတၢ်လၢယမၤတ့ၢ်လံယဲခဲကနံၣ်အံၤ, ဒ်သိးယက တြီဃာ် “ပှၤတၢ်မၢဖိ” အဂၤသ့ၣ်တဖၣ်န့ၣ်ဒ်သိးအသုတအိၣ်ဒီးတၢ်ဂ့ၢ်တၢ်ကျိၤ တမံၤမံၤလၢအကကတိၤတၢ်ကဖၢလၢအဂီၢ်ဒီးစံးလၢ အဝဲသ့ၣ်မၤတၢ်လၢကျဲတဘိဃီဒ်ပမၤပဝဲအသိးတဂ့ၤ အဂီၢ်လီၤ. 13ပှၤသ့ၣ်တဖၣ်န့ၣ်တမ့ၢ်ပှၤတၢ်မၢဖိနီၢ်နီၢ်ဘၣ်. အဝဲသ့ၣ်မ့ၢ်ပှၤတၢ်မၢဖိအဘျၣ်တဖၣ်, လၢအကတိၤကဘျံးကဘျၣ်တၢ်ဘၣ်ဃးအတၢ်ဖံးတၢ်မၤအဂ့ၢ်, ဒီးပျိာ်လီၤဆီအသးဒ်သိးအကလီၤဂာ်ဒီးခရံာ်အတၢ်မၢဖိနီၢ် နီၢ်တဖၣ်လီၤ. 14အဝဲန့ၣ်တမ့ၢ်တၢ်လီၤကမၢကမၣ်ဘၣ်. မုၣ်ကီၤလံၢ်ဒၣ်လဲာ်ပျိာ်လဲလိာ်အသးဒ်သိးအကလီၤဂာ်ဒီးတၢ် ကပီၤအကလူးန့ၣ်သ့ဝဲလီၤ. 15လၢတၢ်န့ၣ်အဃိ, အဝဲအခ့အပှၤတဖၣ်မ့ၢ်ပျိာ်လဲလိာ်အသးဒ်သိး အကလီၤဂာ်ဒီးတၢ်တီတၢ်လိၤအခ့အပှၤန့ၣ်, တမ့ၢ်တၢ်အဒိၣ်အမုၢ် တမံၤဘၣ်. လၢခံကတၢၢ်န့ၣ်, အဝဲသ့ၣ်ကဒိးန့ၢ်ဘၣ်တၢ်ဒ်အကြၢးဝဲဘၣ်ဝဲဒီးအတၢ်ဖံး တၢ်မၤတဖၣ်နီၢ်နီၢ်အသိးန့ၣ်လီၤ.
စီၤပီလူးအတၢ်တူၢ်ဘၣ်တၢ်ဒ် ပှၤတၢ်မၢဖိတဂၤအသိး
16ယစံးကဒီးယဲ, မတၤတဂၤမးတကြၢးဆိကမိၣ်လၢယမ့ၢ်ပှၤအပျုၢ် တဂၤဘၣ်. ဘၣ်ဆၣ်ဒီး, သုမ့ၢ်ဆိကမိၣ်န့ၣ်, အစှၤကတၢၢ်တူၢ်လိာ်ယၤဒ်ပှၤအပျုၢ်တဂၤအသိး ဒ်သိးယကအိၣ်ဒီးတၢ်ဂ့ၢ်တဆံးတက့ၢ်လၢယကကတိၤ တၢ်ကဖၢလၢအဂီၢ်န့ၣ်တက့ၢ်. 17သပှၢ်ကတၢၢ်, တၢ်လၢယစံးကတိၤယဲခဲကနံၣ်အံၤန့ၣ် တမ့ၢ်ဝဲဒ်ကစၢ်အဲၣ်ဒိးယကကတိၤအီၤအသိးန့ၣ်ဘၣ်. ဖဲလၢအဘၣ်ဃးဒီးတၢ်ကတိၤတၢ်ကဖၢလၢဒ်အံၤအသိး န့ၣ်ယကတိၤစဲဃဲၤယဲတၢ်ဒ်တၢ်ပျုၢ်တဂၤအသိးလီၤ. 18ဘၣ်ဆၣ်ဒီး မ့ၢ်လၢပှၤအိၣ်ဝဲအါဒံအါဂၤလၢအကတိၤ တၢ်ကဖၢလၢ, မ့ၢ်ဒၣ်လၢပှၤဟီၣ်ခိၣ်ဖိအတၢ်ဂ့ၢ်တၢ်ကျိၤ အဃိန့ၣ်, ယကမၤယဲတၢ်တမံၤဃီအဝဲန့ၣ်လီၤ. 19သုနီၢ်ကစၢ်ဒၣ်သုဝဲသုကူၣ်ဘၣ်ကူၣ်သ့ဒိၣ်မးဒီးလၢတၢ်န့ၣ် အဃိ, သုဝံသးစူၤပှၤအပျုၢ်တဖၣ်လၢတၢ်သးအိၣ်အပူၤလီၤ. 20သုဝံသးစူၤပှၤတဂၤဂၤလၢအမၢထီၣ်မၢလီၤသုဆူအံၤ ဆူဘး, မ့တမ့ၢ်ဟံးန့ၢ်တၢ်အခွဲးအယာ်လၢသုဖီခိၣ်, မ့တမ့ၢ်ဃုဖီၣ်န့ၢ်သု, မ့တမ့ၢ်ကွၢ်တလီၤသု, မ့တမ့ၢ်ဒဲသုမဲာ်န့ၣ်လီၤ. 21လၢပကမၤတၢ်သ့ၣ်တဖၣ်န့ၣ်အဂီၢ်ပအိၣ်ဒီးတၢ်သူၣ်ပျံၤသးဖုး အါကဲၣ်ဆိးအဂ့ၢ်န့ၣ်, ယကအၢၣ်လီၤအဂီၢ်ယမဲာ်ဆှးလီၤ.
ဘၣ်ဆၣ်ဒီးပှၤတဂၤဂၤကတိၤတၢ်ကဖၢလၢလၢတၢ်တမံၤမံၤ အဂ့ၢ်မ့ၢ်ဘူၣ်ကစီဒီန့ၣ်ယကတိၤတၢ်ဒ်တၢ်ပျုၢ်တဂၤအသိး, ယကဒူယဲဒ်န့ၣ်အသိးစ့ၢ်ကီးလီၤ. 22အဝဲသ့ၣ်မ့ၢ်ပှၤဧ့ၤဘြံၤဖိတဖၣ်ဧါ. ယဲစ့ၢ်ကီးယမ့ၢ်လီၤ. အဝဲသ့ၣ်မ့ၢ်ပှၤအံၣ်စရ့လးဖိတဖၣ်ဧါ. ယဲစ့ၢ်ကီးယမ့ၢ်လီၤ. အဝဲသ့ၣ်မ့ၢ်စီၤအၤဘြၤဟၣ်အစၢၤအသွဲၣ်ဧါ. ယဲစ့ၢ်ကီးယမ့ၢ်လီၤ. 23အဝဲသ့ၣ်မ့ၢ်ခရံာ်အခ့အပှၤတဖၣ်ဧါ. ယကတိၤတၢ်လီၤဂာ်လၢပှၤ အပျုၢ်, ဘၣ်ဆၣ်ဒီးယမ့ၢ်တၢ်ခ့တၢ်ပှၤလၢအဂ့ၤဒိၣ်န့ၢ် အဝဲသ့ၣ်လီၤ. ယမၤတ့ၢ်လံတၢ်ဆူၣ်ဒိၣ်တက့ၢ်, ယအိၣ်တ့ၢ်လံလၢဃိာ်ပူၤအဘျီအါဒိၣ်တက့ၢ်, ယဘၣ်တၢ်ဒိတ့ၢ်တီၢ်တ့ၢ်လံယၤအါဒိၣ်တက့ၢ်, ဒီးယအိၣ်ဘူးတ့ၢ်လၢတၢ်သံအဘျီအါဒိၣ်တက့ၢ်လီၤ. 24ယဘၣ်တၢ်တီၢ်ယၤသၢဆံခွံဘီလၢပှၤယူဒၤဖိတဖၣ်န့ၣ်အိၣ် ယဲၢ်ဘျီလီၤ. 25ယဘၣ်တၢ်ဖျ့ယၤလၢပှၤရိမ့ၤဖိတဖၣ်သၢဘျီ, ဒီးတဘျီန့ၣ်ယဘၣ်တၢ်ကွံာ်ယၤလၢလၢၢ်လီၤ. ယလဲၤတၢ်ဒီးကဘီဟးဂီၤလၢကျဲန့ၣ်အိၣ်လံသၢဘျီ, ဒီးတဘျီန့ၣ်ယအိၣ်လၢထံကျါ, လၢခံဆံလွံၢ်နၣ်ရံၣ် အတီၢ်ပူၤလီၤ. 26လၢယတၢ်လဲၤတၢ်က့ၤအါစုအါဘျီအပူၤန့ၣ်, ယအိၣ်တ့ၢ်လၢတၢ်ဘၣ်ယိၣ်တၢ်လီၤပျံၤအလီၢ်ဘၣ်ဃးဒီးထံ လုၣ်ဘၢတၢ်ဒီးတမျိးတမျာ်, တၢ်ဘၣ်ယိၣ်အလီၢ်ဘၣ်ဃးပှၤယူဒၤဖိသကိးပှၤယူဒၤဖိ အတၢ်ထီဒါဒီးပှၤကလုာ်ဂၤတဖၣ်အတၢ်ထီဒါန့ၣ်လီၤ. တၢ်ဘၣ်ယိၣ်အလီၢ်အိၣ်တ့ၢ်ဝဲလၢယဂီၢ်ဖဲပှၤခူပူၤ ဝ့ၢ်ပူၤ, လၢပှၢ်လၢ်ကျါ, လၢပီၣ်လဲၣ်ပူၤ, ဒီးတၢ်လီၤပျံၤ အလီၢ်အိၣ်လၢယဂီၢ်ခီဖျိတံၤသကိးအတမ့ၢ်တတီတဖၣ်လီၤ. 27ယဘၣ်ဖံးဘၣ်မၤတ့ၢ်တၢ်ကိၢ်ကိၢ်ဂီၤဂီၤ, လီၤဘှံးလီၤ တီၤ, အါစုအါဘျီတၢ်မံတၢ်ဂဲၤလီၤမၢ်ကွံာ်လၢယဂီၢ်, တၢ်သၣ်ဝံၤယသးဒီးတၢ်သူတ့ၢ်ယသးလၢထံအါစု အါဘျီယတအီၣ်ဘၣ်အီဘၣ်လၢအီၣ်လၢအီ, ယတဒိးန့ၢ်ဘၣ်တၢ်အိၣ်ကဒုအလီၢ်ဒီးတၢ်ကူတၢ်ကၤလၢလၢ ပှဲၤပှဲၤဘၣ်လီၤ. 28ဒီးယတယၢၤထီၣ်တၢ်အဂၤဘၣ်. ကိးနံၤဒဲးယဘၣ်တၢ်ဆီၣ်သနံးယၤလၢယတၢ်ကိၢ် တၢ်ဂီၤ, တၢ်ဘၣ်ယိၣ်ဘၣ်ဘီတၢ်လၢတၢ်အိၣ်ဖှိၣ်ကိးဖုဒဲး အဂီၢ်လီၤ. 29ဖဲပှၤတဂၤဂၤအဂံၢ်စၢ်ဘါစၢ်န့ၣ်, ယဂံၢ်ယဘါစၢ်လီၤဘၣ်ယၤစ့ၢ် ကီးလီၤ. ဖဲပှၤတဂၤဂၤဘၣ်တၢ်ဆှၢအီၤဆူတၢ်ဒဲးဘးအပူၤန့ၣ်, ယလၢပှဲၤဒီးတၢ်ကိၢ်တၢ်ဂီၤလီၤ.
30ယမ့ၢ်ဘၣ်ကတိၤတၢ်ကဖၢလၢန့ၣ်, ယကကတိၤတၢ်ကဖၢလၢဘၣ် ဃးဒီးတၢ်သ့ၣ်တဖၣ်လၢအပာ်ဖျါထီၣ်ယတၢ်ဂံၢ်စၢ်ဘါစၢ်လီၤ. 31ကစၢ်ယ့ၣ်ၡူးအယွၤဒီးအပၢ်လၢအဘၣ်တၢ်စံးပတြၢၤအီၤ လီၤထူလီၤယိာ်တဂၤသ့ၣ်ညါလၢယတလီတၢ်ဘၣ်လီၤ. 32ဖဲယအိၣ်လၢဝ့ၢ်ဒၤမ့ၤစ့းအဆၢကတီၢ်န့ၣ်, ပဒိၣ်လၢစီၤပၤအရံတၢ်အဖီလာ်တဂၤပာ်လီၤဃာ်ပှၤခိး တၢ်ဖိဖဲဝ့ၢ်အတြဲၤတဖၣ်အခီၣ်ထံးဒ်သိးအကဖီၣ်န့ၢ်ယၤ အဂီၢ်လီၤ. 33ဘၣ်ဆၣ်ဒီးယဘၣ်တၢ်စဲၤလီၤယၤလၢဃၤတဖျၢၣ်အပူၤ ခီဖျိတၢ်ပူၤဟိလၢတၢ်ဒူၣ်အကပၤဒီးယထူၣ်ဖျဲးကွံာ်လၢ အစုပူၤလီၤ.
Currently Selected:
၂ ကရံၣ်သူး 11: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
