၂ ကရံၣ်သူး 10
10
စီၤပီလူးကတိၤဒီဒၣ်အတၢ်ဖံးတၢ်မၤ
1ယၤ, စီၤပီလူး, ယသကွံၢ်ကညးတၢ်ဆူသုအိၣ်လၢယနီၢ် ကစၢ်ဒၣ်ယဲ, ယၤ, လၢပှၤစံးလၢအဆီၣ်လီၤအသးဒီးမၤအသး ကပုာ်ကပုာ်ဖဲအအိၣ်ဒီးသုအဆၢကတီၢ်, ဘၣ်ဆၣ်မၤအသးဆူၣ်ဆူၣ်ကိၤကိၤဖဲအအိၣ်ယံၤဒီးသုအဆၢ ကတီၢ်န့ၣ်လီၤ. ခီဖျိခရံာ်အတၢ်သူၣ်ဂ့ၤသးဝါဒီးတၢ်အဲၣ်တၢ် ကွံန့ၣ်, ယဃ့ကညးသုဒ်သိး 2သုသုတထိၣ်ဂဲၤဆူၣ်ယၤလၢယကမၤယသးဆူၣ်ဆူၣ်ကိၤ ကိၤဖဲယဟဲယဲအဆၢကတီၢ်တဂ့ၤန့ၣ်လီၤ. အဂ့ၢ်ဒ်အံၤ, ယနာ်လီၤယသးသပှၢ်ကတၢၢ်လၢပှၤလၢအစံးဝဲ, ပမၤတၢ်အိၣ်ဒီးဟီၣ်ခိၣ်အတၢ်ထိၣ်ဂဲၤပသးတဖၣ်န့ၣ်, ယဆူၣ်ယကိၤလၢအဖီခိၣ်သ့ကစီဒီန့ၣ်လီၤ. 3ပအိၣ်မူလၢဟီၣ်ခိၣ်ချၢန့ၣ်မ့ၢ်ကစီဒီလီၤ. ဘၣ်ဆၣ်ဒီးပတဒုးတၢ်အိၣ်ဒီးဟီၣ်ခိၣ်အတၢ်ထိၣ်ဂဲၤပသး တဖၣ်န့ၣ်ဘၣ်. 4တၢ်စုကဝဲၤလၢပသူအီၤလၢပတၢ်ဒုးအပူၤတဖၣ်န့ၣ်, တမ့ၢ်ဟီၣ်ခိၣ်အတၢ်စုကဝဲၤတဖၣ်ဘၣ်. မ့မ့ၢ်, မ့ၢ်ဝဲကစၢ်ယွၤအတၢ်စုကဝဲၤအသဟီၣ်ဆူၣ်တဖၣ်, လၢပသူအီၤဒ်သိးပကမၤလီၤပှီၢ်ကွံာ်တိာ်ဧိၤတာ်ဧိၤအဒိၣ် အသွါတဖၣ်အဂီၢ်န့ၣ်လီၤ. ပမၤဟးဂီၤကွံာ်တၢ်ဂ့ၢ်လိာ်ဘှီလိာ်အတမ့ၢ်တတီတဖၣ်လီၤ. 5ပဒုးလီၤမၢ်ကွံာ်ကယဲၢ်တၢ်တြီမၤတံာ်တာ်လၢအအိၣ်ဒီးတၢ်ပာ် ကဖၢလၢသးတမံၤလၢ်လၢ်, လၢအဘၣ်တၢ်ယူာ်ထီၣ်အီၤထီဒါတၢ်သ့ၣ်ညါဘၣ်ဃးဒီး ကစၢ်ယွၤ, ပဖီၣ်န့ၢ်ကယဲၢ်တၢ်ဆိကမိၣ်တမံၤလၢ်လၢ်ဒီးစူၢ်အီၤလၢ ခရံာ်အကလုၢ်န့ၣ်လီၤ. 6ဒီးဖဲသုပာ်ဖျါတၢ်အုၣ်အသးဘၣ်ဃးသုတၢ်သူၣ်တီသးတီ လၢာ်လၢာ်ဆ့ဆ့အဂ့ၢ်လံန့ၣ်, ပကအိၣ်ကတဲာ်ကတီၤပသးလၢပကစံၣ်ညီၣ်တၢ်သးတတီ အတၢ်ဖံးတၢ်မၤတမံၤလၢ်လၢ်န့ၣ်လီၤ.
7သုကွၢ်ဃီၤတ့ၢ်သုဝဲဆူတၢ်အိၣ်ဖျါလၢခိတဖၣ်န့ၣ်လီၤ. မ့ၢ်ပှၤအိၣ်ဝဲဖဲန့ၣ်တဂၤဂၤလၢအဒွးလီၤအသးလၢအဘၣ်ထွဲဒီး ခရံာ်န့ၣ်ဧါ. မ့မ့ၢ်ဒ်န့ၣ်ဒီး, ပျဲအဝဲဒၣ်ကွၢ်ဆိကမိၣ်ကဒီးတၢ်လၢအနီၢ်ကစၢ်ဒၣ်ဝဲအဂ့ၢ် န့ၣ်တက့ၢ်. အဂ့ၢ်ဒ်အံၤ, ထဲသိးအဝဲဒၣ်ဘၣ်ဃးဒီးခရံာ်န့ၣ်, ပဘၣ်ဃးပဝဲစ့ၢ်ကီးလီၤ. 8အဂ့ၢ်ဒ်အံၤ, ယမ့ၢ်ကတိၤပာ်ကဖၢလၢယသးအါကဲၣ်ဆိးတစဲး ဘၣ်ဃးဒီးတၢ်စိတၢ်ကမီၤလၢကစၢ်ဟ့ၣ်လံယၤ (တၢ်စိတၢ်ကမီၤလၢတၢ်ကမၤထီၣ်မၤထီသုအဂီၢ်ဒီးတမ့ၢ်တၢ် ကမၤဟးဂီၤသုအဂီၢ်ဘၣ်) ဒၣ်လဲာ်န့ၣ်, ယတမဲာ်ဆှးယဲဒၣ်ဘၣ်. 9ယတအဲၣ်ဒိးအကအိၣ်ဖျါလၢယဂုာ်ကျဲးစၢးမၤပျံၤမၤဖုးသုလၢ ယလံာ်ပရၢတဖၣ်န့ၣ်ဘၣ်. 10ပှၤစံးဝဲ, “စီၤပီလူးအလံာ်ပရၢတဖၣ်ဆူၣ်ဝဲကိၤဝဲ, ဒီးအသဟီၣ် ဆူၣ်လီၤ. မ့မ့ၢ် ဖဲအဝဲအိၣ်လၢပသိးပကျါန့ၣ်အဂံၢ်စၢ်ဘါစၢ်ဒီး အတၢ်ကတိၤတဖၣ်တမ့ၢ်တၢ်နီတမံၤဘၣ်.” 11ပှၤလၢအစံးတၢ်ဒ်န့ၣ်အသိးတဂၤကဘၣ်နၢ်ပၢၢ်ဝဲလၢတၢ်လၢ ပကွဲးလၢပလံာ်ပရၢအပူၤဖဲပအိၣ်စီၤစုၤယံၤအဆၢကတီၢ်န့ၣ်တလီၤ ဆီဒီးတၢ်လၢပကမၤပဝဲဖဲပအိၣ်ဖဲန့ၣ်ဒီးသုန့ၣ်ဘၣ်လီၤ.
12သပှၢ်ကတၢၢ်, တမ့ၢ်ပကအိၣ်ဒီးတၢ်သးဒူလၢပကပာ်လီၤပသး တပူၤဃီမ့တမ့ၢ်, ထိၣ်သတြီၤပသးဒီးပှၤလၢအပာ်ဖျါထီၣ်ထီ အသးဒိၣ်ဒိၣ်ကလဲာ်တဖၣ်န့ၣ်ဘၣ်. အဝဲသ့ၣ်အီပံာ်အီပီမးဆံးဒိၣ်လဲၣ်. အဝဲသ့ၣ်ဒုးအိၣ်ထီၣ်အနီၣ်ထိၣ်ဒၣ်ဝဲလၢအကထိၣ်လီၤဒွးလီၤအသး အဂီၢ်, ဒီးစံၣ်ညီၣ်လီၤက့ၤအသးလၢအနီၢ်ကစၢ်ဒၣ်ဝဲအနီၣ်ထိၣ် တဖၣ်န့ၣ်လီၤ. 13မ့မ့ၢ်ပဝဲသ့ၣ်တဖၣ်အံၤ, ပတၢ်ပာ်ကဖၢလၢပသးတလဲၤတလၢ ကွံာ်တၢ်အဆၢလၢအဘၣ်တၢ်ပာ်လီၤဃာ်အီၤန့ၣ်ဘၣ်. ကအိၣ်ဒၣ်ဝဲလၢပတၢ်ဖံးတၢ်မၤအကဝီၤပူၤ, ဒ်ကစၢ်ယွၤပာ်လီၤတ့ၢ်ဝဲလၢပဂီၢ်အသိး, ဒီးအဝဲအံၤပၣ်ဃုာ်ဒီးပတၢ်ဖံးတၢ်မၤလၢသုသိးသုကျါန့ၣ်လီၤ. 14ဒီးမ့ၢ်လၢသုအိၣ်လၢတၢ်အဆၢတၢ်အကဝီၤတဖၣ်အံၤအပူၤ အဃိ, တမ့ၢ်ပလဲၤဖျိလဲၤတလၢကွံာ်အီၤ, ဖဲပဟဲဆူသုအိၣ်, စိာ်ဃုာ်ဒီးတၢ်သးခုကစီၣ်ဘၣ်ဃးခရံာ်အဂ့ၢ်န့ၣ်ဘၣ်. 15လၢတၢ်န့ၣ်အဃိ, ပတကတိၤပာ်ကဖၢလၢပသးဘၣ်ဃးဒီး တၢ်ဖံးတၢ်မၤလၢပှၤအဂၤတဖၣ်မၤဝဲလၢတၢ်ဖံးတၢ်မၤလၢ ကစၢ်ယွၤပာ်လီၤန့ၢ်ပှၤအကဝီၤပူၤအချၢန့ၣ်ဘၣ်. မ့မ့ၢ်ပမုၢ်လၢ် ပဝဲလၢသုတၢ်စူၢ်တၢ်နာ်ကဒိၣ်ထီၣ်, ဒီးပမၤတၢ်လၢအဒိၣ်န့ၢ် အလီၢ်လၢသုသိးသုကျါကသ့ဝဲ, ထီဘိလၢနီၣ်ထိၣ်လၢကစၢ်ယွၤပာ်လီၤန့ၢ်ပှၤအကဝီၤပူၤန့ၣ်လီၤ. 16တုၤနုၤတစုပစံၣ်တဲၤတဲလီၤတၢ်သးခုကစီၣ်ဆူထံကီၢ်အဂုၤ အဂၤလၢအဖျိကွံာ်သုထံသုကီၢ်ကသ့ဝဲ, ဒီးအလီၢ်တအိၣ်လၢပကကတိၤပာ်ကဖၢလၢပသးဘၣ်ဃး တၢ်ဖံးတၢ်မၤလၢအဘၣ်တၢ်မၤတ့ၢ်လံအီၤလၢပှၤအဂၤတဂၤ အတၢ်မၤလီၢ်အကဝီၤပူၤန့ၣ်ဘၣ်လီၤ.
17ဘၣ်ဆၣ်ဒီး, ဒ်တၢ်ကွဲးအသးစံးဝဲအသိး, “ပှၤတဂၤလၢ်လၢ်လၢအအဲၣ်ဒိးကတိၤတၢ်ကဖၢလၢန့ၣ်, မ်အကတိၤတၢ်ကဖၢလၢလၢတၢ်လၢကစၢ်မၤတ့ၢ်ဝဲအဂ့ၢ်န့ၣ် တက့ၢ်.” 18အဂ့ၢ်ဒ်အံၤ, ပှၤတဂၤဘၣ်တၢ်ဘၣ်သူၣ်ဘၣ်သးအီၤဖဲကစၢ်ဆိ ကမိၣ်ဂ့ၤအီၤဒီးတမ့ၢ်ဖဲအဆိကမိၣ်ဂ့ၤလီၤအသးဒၣ်ဝဲအခါ န့ၣ်ဘၣ်လီၤ.
Currently Selected:
၂ ကရံၣ်သူး 10: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
