Luke 9

Jisua'n ruoisi sômleinik ngei a tîrsuok

(Mat 10:5-15; Mk 6:7-13)

1Jisua'n ruoisi sômleinik ngei hah a koibûma, an kôma, ramkhori rujûlpai theina le natnangei mindam theinangei le rachamneina a pêk ngeia. 2Male chu, Pathien Rêngram thurchi misîr rang le damloingei mindam rangin a tîrsuok ngei zoia.

3Hanchu, an kôma, “Khuolchaina rangin ite chôi no roi, sunrol mo, cholite mo, sum mo, bu mo, kancholi insak mo,” a tipe ngeia. 4“Nangni an lei modômna ina han, om tit ungla, ma khopui nin mâk nôk mâka chu. 5#Luk 10:4-11Mi'n nangni an lei modôm nônchu, anni rilnân nin kea pildi hah khôngpai roi.”

6Hanchu rouisingei an sea, muntina thurchisa misîrin khuotina an chaia, damloingei an mindam tir zoi.

Herod mulungjîngna roi

(Mat 14:1-12; Mk 6:14-29)

7 # Mat 16:14; Mk 8:28; Luk 9:19 Hanchu Galilee rama roijêkpu, Herod'n neinun omtie ngei a rieta anîn chu a mulung a jînga, senkhatin Baptispu John kêng a ring nôk an tipe sikin, 8Senkhatin Elijah kêng a juong inlâr nôk zoi, an ti, senkhatin tienlâia dêipu tumakhat kêng a ring nôk zoi an tia. 9Herod'n John lu laka ka tan zoia, hi ang taka thurchi ki riet hih tumo ai ni? tiin Jisua mu rangin a nuoma.

Jisua'n mi isâng rangnga a vâina

(Mat 14:13-21; Mk 6:30-44; Joh 6:1-14)

10Hanchu, tîrton sômleinik ngei an hongkîr nôkin chu an sin va tho Jisua an rila. Hanchu, a kôm a tuong ngeia, Bethsaida khopuia atheiin a sepui ngei zoi. 11Mipuiin an rietin chu an jûia. A modôm ngeia, Pathien Rêngram thurchi a misîr pe ngeia, mindam anâng ngei kai chu a mindam ngeia.

12Hanchu, kholoi ahong nîn chu, ruoisi sômleinik ngei an honga, a kôma, “Mipui ngei hih min se ngei ta roh, khopui sûnga le akôlrevêla bu le riamun an man theina rangin, ei omna lak mun inthim kêng ani” an tia. 13Ania Jisua'n an kôma, “Nangnin sâkruo pêk ngei roi” a tipe ngeia. “Annin, vâipôl tâp rangnga le nga inik mang kêng kin nei. 14Hi dôra pasal isâng rangnga sâk rang hih a rochôk rangin kin se rang mini?” tiin an thuona. Hanchu, Jisua'n a ruoisingei kôma, “Mipui hi sômranga ngân abukin min sung ngei roi,” a tia. 15Hanchu, a ruoisingeiin a he bê angin mipui ngei hah an minsung ngeia. 16Hanchu, Jisua'n vâipôl rangnga le nga inik hah a lâka, invân tieng a tanga, Pathien kôm râisânchong a rila, a khoia, hanchu mipui ngei sem rangin a ruoisingei a pêka. 17Hanchu, anrêngin an khop dodôrin an sâk suonûkin, an sâk minieng, tâidôn sômleinik ruoisingeiin an rût minsip ani.

Peter'n Jisua chungroi a phuong

(Mat 16:13-19; Mk 8:27-29)

18Sûnkhat chu, Jisua'n atheiin chubai a thoa, a ruoisingei an honga, an kôma, “Mipuingeiin tumo min ti ngâi?” tiin a rekela. 19#Mat 14:1,2; Mk 6:14,15; Luk 9:7,8 “Senkhatin, ‘Baptispu John’ senkhatin ‘Elijah,’ senkhatin tienlâia dêipu tumakhat, a juong nôk nang an ti ngâi,” tiin an thuona. 20#Joh 6:68,69 Hanchu, “nangnin te tumo minin ti?” tiin a rekel ngeia. Peter'n, “Messiah Pathien na ni” tiin a thuona.

Jisua'n a tuong rang le a thi rang roi a ril

(Mat 16:21-28; Mk 8:30—9:1)

21Hanchu, Jisua'n hi chong hih tute kôma misîr tet loi rangin chong a be ngeia. 22An kôma, “Miriem Nâipasal hi upangei, Ochaisingei, Balam minchupungeiin hengpai an ta, dengmanthei ok an tih. That an ta, ania, sûnthum suole chu a ringin inthoi nôk a tih,” a tia. 23#Mat 10:38; Luk 14:27 Hanchu an rênga kôma, “Tutu, ni jûi a nuoma anîn chu ama in mingilin, anîngtin a khros ruputin ni jûi rese. 24#Mat 10:39; Luk 17:33; Joh 12:25Tutu, a ringna minjôk a nuom kaiin chu machân a ta, ania, keima sika a ringna machân kaiin ring an tih. 25Mîn rammuol hih apumin nei senla, a theiin inmangin mo, machânin mo om ta senla ata rangin imo ânlap! 26Mîn keima le ka thurchi inzakpui chu, Miriem Nâipasal khomin, a roiipuina leh Pa roiinpuina leh vântîrton inthieng ngei leh a juong tikin inzakpui a tih. 27Hitaka senkhat ngei hin Pathien rêngram an mu mâka chu thi noni ngei iti riettit roi” a tia.

Mêl inthûlna

(Mat 17:1-8; Mk 9:2-8)

28 # 2 Pet 1:17,18 Hi chong a misîr zoia, hapta khat suole chu, Jisua'n Peter, John le Jacob ngei hah muol chunga chubai tho rangin a tuong ngeia. 29Hanchu, chubai a tho lâitakin a mâi ânthûla, a mêl le a puonsilngei khom avâr intêrrakin a oma. 30Harenghan mi inik an juong oma, an chongpuia, Moses le Elijah an ni. 31Invân roiinpuinân an juong inlâra, Pathien bôkna len ranga, Jerusalema Jisua thi rang tie an misîra. 32Peter le a champui ngei chu an inphara, an inthoiin chu Jisua roiinpuina le a kôma mi inik inding ngei an mua. 33Mingei han Jisua an mak rangtôn chu, Peter'n a kôma, “Hitaka om hi eita rangin asa, puon in inthum nata rang inkhat, Moses rang inkhat le Elijah rang inkhat sin kin tih” a tia. (ha a chong ti hah asadimin riet minthâr mak) 34A la chong lâitakin sûmin a juong minlia, an chunga sûmin a juong mukhûn chu ruoisingeiin an chia. 35#Isa 42:1; Mat 3:17; 12:18; Mk 1:11; Luk 3:22 Sûm renga rôlin, “Ama hih ka Nâipasal ka thangsuok chu ani, a chong rangâi roi” a tia. 36Rôl amongin chu, Jisua vai a om zoia. ruoisingei han an neinun mu tute ril loiin an ip tita.

Jisua'n ramkhori sûr nâipang a mindam

(Mat 17:14-18; Mk 9:14-27)

37Anangtûka Jisua le ruoisi inthum ngei hah muol chung renga an juong chumin chu mipui tamtak ngeiin an lei dona. 38Hanchu, mipuingei lâia mi inkhatin, “Minchupu, ka nâipasal, ke neisun hi en ta,” tia ngênin ân-ieka. 39“Ramkhorin a sûra, a minleta, a cherhuon asuoka, a minna, inningloiin a min ieka, a vôr raka darnân a min se ngâia. 40A rujûlpai rangin nu ruoisingei ke ngên ngei lakin thei mak ngeia” a tia. 41Jisua'n, “Iemna neiloi le mi puoloingei o! Iten sôt mo nin kôma omin nangni ko donsûi ranga? Na nâipasal hah hin hong tuong roh” a tia. 42Hanchu nâipang hah a hongin chu, ramkhori han a nîka pila inngil rakin a vôra. Jisua'n ramkhori hah chong a pêka, nâipang hah a mindama, a pa kôma a pêk zoi. 43Pathien sinthotheina roiinpui hah mipui ngei murdi'n an kamâm ok ani.

Jisua'n a thi rang roi a misîr nôkna

(Mat 17:22-23; Mk 9:30-32)

Mipui ngeiin Jisua sinthongei an kamâm lâiin, a ruoisingei kôma, 44“Nangni ki ril rang hih mingil no roi, Miriem Nâipasal hih miriemngei kôma ipêk nîng a tih” a tia. 45Ania, ruoisingei lakin ai ti omtie hah rietthei mak ngeia. An riet thei loina ranga chong inthup ania, ama laka an chi sikin rekel ngam mak ngeia.

Tumo a lientak?

(Mat 18:1-5; Mk 9:33-37)

46 # Luk 22:24 Hanchu, ruoisingei han ei lâia tumo a lien rang tak tiin inkhalna an neia. 47Jisua'n an mindonna a rieta, nâipangte a kaia, a kôla a mindinga. 48#Mat 10:40; Luk 10:16; Joh 13:20 An kôma, “Tutu, hi nâipangte ki riminga modôm chu, keima ni modôm ani; tutu keima ni modôm chu ni tîrpu modôm ani. Nin lâia a chintak hi a lientak ani,” a tipe ngeia.

Nangni chakal loi chu nan tienga kop ani

(Mk 9:38-40)

49John'n, “Minchupu, mi inkhatin ni rimingin, ramkhori a rujûlpaia, ei pâla mi ani loi sikin, kan khap” a tia. 50Jisua'n a kôma le adangngei kôma, “Khap no roi nangni chakal loi chu nin tienga kop ani” a tipe ngeia.

Samari khopui inkhata Jisua an hengpai

51Jisua invâna a kal rang ni a hong nâia anîn chu, Jerusalema se rangin a mulungin a bôka, a se kelen zoi. 52A motona thangthei a tîra, ata ranga neinuntin lei cherêl rangin Samari khuo inkhata an lûta. 53Ania, Jerusalema se anni iti an rietminthâr sikin lei modôm mak ngeia. 54#2 Rêng 1:9-16 Hanchu, ruoisi Jacob le John'n an rietin chu a kôma, “Pumapa, anni ngei minmangna rangin Elijah angin invân renga mei koisumna rangin mini nuom mo?”#9:54: Miziek senkhatngei chu an bôk Elijah a tho angin. an tia. 55#9:55: miziek senkhatngeiin an bôk “kho anga ratha ta mo nin ni nangnin riet mak chei; asikchu Miriem Nâpasal chu munisi ringna minboi ranga juong nimaka; ania sanminring ranga juong kêng ani,” a tia. Jisua an tieng ânheia, a ngo ngeia. 56Male Jisua le a ruoisingei chu khuo danga an se zoi.

Jisua la jûi rang ngei

(Mat 9:18-22)

57Hanchu, lampuia an lôn lâiin, mi inkhatin Jisua kôma, “Na sêna muntina nang jûi ki tih” a tia. 58Jisua'n a kôma, “Sialngei'n kuo an dôna, vangeiin rubu an dôna, ania, Miriem Nâipasal chu a lu minngamna rang luo mun dôn mak” a tipea. 59Hanchu midang kôma, “Ni jûi roh” a tipea. Ania ha mi han, “Pumapa, sêng ka ta, ka pa la phûm bak ki tih,” a tia. 60Jisua'n a kôma, “A thi ngeiin an mithi champui ngei phûm rese ngei, nang chu sênla, Pathien Rêngram thurchi va misîr roh” a tia. 61#1 Rêng 19:20 Mi dangin a kôma, “Pumapa, nang jûi ki tih, ania, ki inmingei chong hoiin ni manthân bak roh” a tia. 62Hanchu Jisua'n a kôma, “Tutu, âl kaina taka kut bânga, nûk tienga en chu, Pathien Rêngrama ranga mi nithei mak” a tipea.

Currently Selected:

Luke 9: SAKNT

Highlight

Copy