Openboarunk 17

Daut groote Babel un daut säwenkopje Tia

1Un daut kjeem eena von de säwen Enjel, dee de säwen Kommen hauden, un räd met mie un säd: Komm häa, ekj well die daut Jerecht äwa de groote Hua wiesen, dee opp [dee] väle Wotasch sett, 2met dee de Kjennichs de Ieed Huararie jedräwen ha; un dee opp de Ieed wonen, sent bedrunken jeworden von däm Wien äara Huararie. 3Un hee brocht mie em Jeist wajch en eene Wieste; un ekj sach eene Fru opp een scharlachroodet Tia setten, voll Nomes de Lastrunk, daut säwen Kjap un tieen Hieena haud. 4Un de Fru wia aunjekjleet met Purpur un Scharlach (bleiwroode dunkelroode Kjleeda) un utjepuzt met Golt un wieetvolle Steena un Parlen, un see haud een goldnet Kuffel en äare Haunt, voll Äakjel un Orreinheit derch äare Huararie, 5un opp äa Stiern eenen Nomen jeschräwen: Jeheemnis, Babel, de groote, de Mutta de Huaren un de Äakjel de Ieed. 6Un ekj sach de Fru bedrunken von daut Bloot de Heilje un von daut Bloot de Zeijen Jesus. Un ekj vewundad mie, aus ekj ar sach, met groota Vewundrunk.

7Un de Enjel säd to mie: Wuarom wundascht du die? Ekj well die daut Jeheemnis von de Fru sajen un daut Tia, daut ar drajcht, dee de säwen Kjap un tieen Hieena haft. 8Daut Tia, daut du sachst, wia, un es nich un woat ut däm Aufgrunt oppstieen un em Vedoawnis gonen; un dee opp de Ieed wonen, dän äare Nomes nich em Läwensbuak jeschräwen sent von Gruntloag de Welt aun, woaren sikj vewundren, wan see daut Tia seenen, daut et wia un nich es un doa sennen woat. 9Hia velangt daut Vestaunt, dee Weisheit haft: Dee säwen Kjap sent säwen Boaj, opp dee de Fru sett. 10Un daut sent säwen Kjennichs: fief von an sent jefollen, de eena es, de aundra es noch nich jekomen; un wan hee kjemt, mott hee eene korte Tiet bliewen. 11Un daut Tia, daut doa wia un nich es, hee es uk de achta un es von dee säwen un jeit en de Vedoawnis. 12Un de tieen Hieena, dee du sachst, sent tieen Kjennichs, dee noch kjeene Harschoft jekjräajen ha, oba Macht aus Kjennichs emfangen fa eene Stund met däm Tia. 13Dise ha eenen Senn (Jedanken, sent sikj eenich) un jäwen äare Macht un Jewault daut Tia. 14Dise woaren met daut Laum Kjrich fieren, un daut Laum woat an besiejen; dan hee es de Har de Haren un Kjennich äwa de Kjennichs, un dee met am sent Beroopne un Uterwälde un True.

15Un hee sajcht to mie: De Wotasch, dee du sachst, wua de Hua sett, sent Velkja un groote Häaden von Menschen un Nazionen un Sproaken; 16un de tieen Hieena, dee du sachst, un daut Tia, dise woaren de Hua haussen un woaren ar to de Grunt brinjen un noaktich moaken, un woaren äa Fleesch fräten un ar met Fia vebrennen. 17Dan Gott haft en äare Hoaten jejäft, sienen Wellen to doonen en een Senn to haundlen un äa Kjennichrikj daut Tia to jäwen, bot Gott siene Wieed erfelt sennen woaren. 18Un de Fru, dee du sachst, es de groote Staut, dee daut Kjennichtum haft äwa de Kjennichs de Ieed.

Currently Selected:

Openboarunk 17: PBJHF

Highlight

Copy