Openboarunk 16

De säwen Kommen voll met Gott sien Oaja woaren utjegoten

1Ekj hieed eene lude Stemm ut däm Tempel to de säwen Enjel sajen: Got han un jeet de säwen Kommen voll von Gott sien Oaja ut oppe Ieed.

2Un de ieeschta jinkj han un goot siene Komm ut opp de Ieed; un daut kjeem een beeset un schlemmet Jeschwäa aun de Menschen, dee daut Moltieekjen von daut Tia hauden un dee sien Bilt aunbäden.

3Un de tweeda goot siene Komm ut en daut Mäa; un daut wort to Bloot, aus von eenen Doodjen, un jiedre läwendje Seel storf, aules waut en daut Mäa wia.

4Un de dredda goot siene Komm ut opp de Streem un [opp] de Wotakjwalen, un see worden to Bloot. 5Un ekj hieed dän Enjel von daut Wota sajen: Du best jerajcht, dee doa es un dee doa wia, dee Heilja, daut du aulsoo jerecht hast. 6Dan Bloot von Heilje un Profeeten ha see vegoten, un Bloot hast du an to drinkjen jejäft; see sent daut wieet. 7Un ekj hieed dän Aultoa sajen: Jo, Har, Gott, Aulmajchtja, woarhauft un jerajcht sent diene Jerechten.

8Un de vieeda goot siene Komm ut äwa de Sonn; un daut wort ar jejäft, de Menschen met Fia to vesenjen. 9Un de Menschen worden von groote Hett vesenjt un lastaden Gott sien Nomen, dee äwa dise Ploagen Macht haft, un deeden nich omdenkjen (Busse), am de Iea to jäwen.

10Un de fefta goot siene Komm ut opp däm Troon von daut Tia; un sien Rikj wort vediestat; un see vebeeten äare Tungen fa Kwol (Weedoag), 11un lastaden däm Gott em Himmel wäajen äare Kwol un wäajen äare Schwäaren, un deeden nich omdenkjen von äare Woakjen.

12Un de sasta goot siene Komm ut opp dän groote Stroom Eufrat; un sien Wota drieejd ut, om daut de Wajch fa de Kjennichs reed jemoakt wort, dee vom Sonnenoppgank häakomen. 13Un ekj sach ut daut Mul vom Droak un ut daut Mul von daut Tia un ut daut Mul vom faulschen Profeet dree orreine Jeista komen, soo aus Poggen; 14dan daut sent Jeista von Dämonen, dee Tieekjen doonen, dee to de Kjennichs de gaunz bewonde Ieed utgonen, an to vesaumlen toom Kjrich aun [janem] groote Dach Gottes, däm Aulmajchtjen. 15(Kjikj, ekj kom aus een Deef. Seelich, dee doa woakt un siene Kjleeda bewoat, doamet hee nich noaktich omhäa jeit un maun siene Schaund sitt!) 16Un hee vesaumeld an aun däm Uat, de opp hebräisch Harmagedon heet.

17Un de säwenda goot siene Komm ut enne (opp) Loft; un doa jinkj eene lude Stemm ut von däm Tempel [em Himmel], von däm Troon, dee säd: Daut es passieet. 18Un daut passieeden Blitzen un Stemmen un Donna; un een grootet Ieedbäben passieed, soo aus daut noch nich passieet es, soo lang de Menschen opp de Ieed wieren, soo een Ieedbäben, soo groot. 19Un de groote Staut wort en dree Deel jedeelt, un de Städa de Velkja follen, un daut groote Babel kjeem em Jedajchnis ver Gott, daut ar daut Kuffel (Drunk) met Wien det Oajanis von sien Oaja to jäwen. 20Un jiedre Insel rand wajch, un Boaj worden nich jefungen. 21Un groote Hoagelsteena, aus een Talent schwoa, faulen ut däm Himmel opp de Menschen rauf; un de Menschen lastaden Gott wäajen de Ploag vom Hoagel, dan siene Ploag es sea groot.

Currently Selected:

Openboarunk 16: PBJHF

Highlight

Copy