Openboarunk 14

Daut Laum un de Sienje

1Un ekj sach; un kjikj, daut Laum stunt opp däm Boajch Zion un met am 144 000, dee sienen Nomen un dän Nomen von sien Voda aun (opp) äare Stierns jeschräwen hauden (druagen). 2Un ekj hieed eene Stemm utem Himmel aus daut Ruzhen von väle Wotasch un aus eene Stemm von een ludet donren; un de Stemm, dee ekj hieed, wia aus von Hoapensenja, dee opp äare Hoapen spälen. 3Un see sinjen een nieet Leet ver däm Troon un ver dee vea läwendje Wäsent un de Eltestasch; un kjeena kunn daut Leet lieren, aus blooss dee 144 000, dee von de Ieed jekoft (loosjekoft) wieren. 4Dise sent daut, dee sikj met Frues nich veorreinicht ha, dan see sent Junkfrues; dise sent daut, dee daut Laum foljen, wuahan daut jeit. Dise sent ut de Menschen jekoft (loosjekoft) worden aus Ieeschtlinje fa Gott un daut Laum. 5Un en äa Mul wort kjeen Faulschet (Läajes) jefungen; [dan] see sent onen Dodel.

De Jerechts Norecht

6Un ekj sach eenen aundren Enjel enne Medd vom Himmel flieejen, dee haud eene eewje frooe Bootschoft, om dee dän to vekjindjen, dee oppe Ieed wonen (setten), un jieda Nazion un Staum un Sproak un Volkj, 7endäm hee met ne lude Stemm säd: Fercht Gott un jeft am Iea, dan de Stund fa sien Jerecht es jekomen; un bät däm aun, dee dän Himmel un de Ieed jemoakt haft un daut Mäa un de Wotakjwalen.

8Un een aundra, tweeda Enjel foljd un säd: Jefollen, jefollen es Babel, de groote, dee met dän Wien de Wutt äara Huararie aule Velkja jedrenkjt haft.

9Un een aundra, dredda Enjel foljd an un säd met ne lude Stemm: Wan wäa daut Tia un sien Bilt aunbät un een Moltieekjen aunnemt aun sienen Stiern ooda aun siene Haunt, 10soo woat uk hee drinkjen von dän Wien vom Oaja Gottes, dee onen jedempelt en daut Kuffel (Drunk) von sien Oajanis reed jemoakt es; un hee woat met Fia un Schwäwel jekjwält woaren ver de heilje Enjel un ver daut Laum. 11Un de Ruak äara Kwol sticht opp von Eewichkjeit to Eewichkjeit; un see ha kjeene Ru Dach un Nacht, dee daut Tia un sien Bilt aunbäden, un wan wäa daut Moltieekjen von sienen Nomen aunnemt. 12Hia es de Jedult (daut Uthoolen) de Heilje, dee de Jebooten Gottes hoolen (bewoaren) un dän Gloowen aun Jesus.

13Un ekj hieed eene Stemm utem Himmel sajen: Schriew: Seelich sent de Doodes, dee em Harn stoawen, von nu aun! Jo, sajcht de Jeist, om daut see ruen von äare Mieej (Oabeit), dan äare Woakjen foljen an no.

De Arnt oppe Ieed es riep

14Un ekj sach; un kjikj, eene witte Wolkj, un opp de Wolkj saut eena soo aus de Menschensän, dee opp sien Haupt eene goldne Kroon un en siene Haunt eene schoape Siechel (Säakjel, Sans) haud. 15Un een aundra Enjel kjeem ut däm Tempel rut un roopt däm, dee opp de Wolkj saut, met ne lude Stemm to: Schekj diene Siechel un arnt; dan de Stund toom arnten es jekomen, dan de Arnt de Ieed es äwariep (drieech) jeworden. 16Un dee opp de Wolkj saut, läd (schmeet) siene Siechel aun (opp) de Ieed, un de Ieed wort jeeifst.

17Un een aundra Enjel kjeem ut däm Tempel rut, dee em Himmel es, un uk hee haud eene schoape Siechel (Säakjel, Sans). 18Un een aundra Enjel, dee Macht äwa daut Fia haud, kjeem ut däm Aultoa rut, un hee roopt däm, dee de schoape Siechel haud, met ne lude Stemm too un säd: Schekj diene schoape Siechel un schnied auf de Wiendruwen von däm Wienstock de Ieed, dan siene Bäaren (Druwen) sent riep jeworden. 19Un de Enjel läd siene Siechel aun de Ieed un laus (saumeld) de Wiendruwen vom Wienstock de Ieed un schmeet dee en de groote Wienprass von Gott sien Oaja. 20Un de Wienprass wort butre Staut jeprast (jeklunjt), un Bloot jinkj ut de Wienprass rut bot aun de Teem de Pieed, 1600 Stadien.

Currently Selected:

Openboarunk 14: PBJHF

Highlight

Copy