Johanes 11

Lazarus woat krank un stoaft

1Oba doa wia een Jewessa krank, Lazarus von Betanien, ut däm Darp de Maria un äare Sesta Marta wieren. 2(Maria oba wia daut, dee däm Har met Saulw siene Feet enreef un met äare Hoa dee aufdrieejd; äa Brooda Lazarus wia krank). 3De Sestren schekjten no am un leeten am sajen: Har, see, dee, däm du goot best, es krank. 4Oba aus Jesus daut hieed, säd hee: Dise Krankheit es nich toom Doot, oba om Gottes Harlichkjeit wellen, om daut de Sän Gottes doaderch veharlicht woat. 5Jesus oba wia Marta un äare Sesta un Lazarus goot. 6Aus hee daut hieed, daut hee krank es, bleef hee noch twee Doag aun däm Uat, wua hee wia.

7Nodäm säd hee to de Jinja: Lot ons wada no Judäa gonen. 8De Jinja sajen to am: Rabi, em korten sochten de Juden die to steenjen, un wada jeist du doa han? 9Jesus auntwuad: Sent nich 12 Stund em Dach? Wan wäa aum Dach jeit, dee stat sikj nich, wiels hee daut Licht dise Welt sitt; 10Oba wan wäa enne Nacht jeit, dee stat aun (sikj), wiels daut Licht nich en am es. 11Dit säd hee, un donn säd hee to an: Lazarus, ons Frint, es enjeschlopen, oba ekj go han, om am opptowakjen. 12Donn säden de Jinja to am: Har, wan hee enjeschlopen es, dan woat hee jesunt woaren. 13Oba Jesus haud von sienem Doot jerät; see oba meenden, hee räd vonne Ru em Schlop. 14Donn säd Jesus to an met Openheit: Lazarus es jestorwen; 15un ekj frei mie junt haulwen, daut ekj nich doa wia, om daut jie jleewen; oba lot ons no am gonen. 16Donn säd Tomas, de Zwillinkj jenant es, to de aundre Jinja: Lot uk ons gonen, om daut wie met am stoawen.

Lazarus woat oppjewakjt

17Aus Jesus kaum, funk hee am aul 4 Doag em Grauf ligjen. 18Betanien wia oba dicht bie Jerusalem, bie 15 Stadien auf; 19un väle Juden wieren no Marta un Maria jekomen, om daut see an äwa äarem Brooda treesten. 20Oba Marta, aus see hieed, daut Jesus kjemt, jinkj am entjäajen. Oba Maria saut em Hus. 21Donn säd Marta to Jesus: Har, wan du wieescht hia jewast, soo wia mien Brooda nich jestorwen; 22[oba] uk nu weet ekj, daut, wautemma du von Gott bedden deist, Gott die jäwen woat. 23Jesus säd to ar: Dien Brooda woat oppstonen. 24Marta säd to am: Ekj weet, daut hee oppstonen woat, aum Dach wan de Doodes oppstonen woaren, aum latsten Dach. 25Jesus säd to ar: Ekj sie de Opperstoninj un daut Läwen; wäa aun mie jleeft, woat läwen, uk wan hee jestorwen es; 26un jiedra, dee doa läft un aun mie jleeft, woat nich stoawen en Eewichkjeit. Jleefst du daut? 27See säd to am: Jo, Har, ekj jleew, daut du de Christus best, de Gottes Sän, dee enne Welt komen saul. 28Un aus see dit jesajcht haud, jinkj see han un roopt heemlich äare Sesta Maria un säd: De Liera es hia un roopt die. 29Aus dee daut hieed, stunt see schwind opp un jeit no am. 30Oba Jesus wia noch nich en däm Darp jekomen, oba wia noch aun däm Uat, wua Marta am bejäajent wia. 31Un aus de Juden, dee bie ar em Hus wieren om an to treesten, sagen, daut Maria haustich oppstunt un rut jinkj, jinjen see äa hinjaraun, un säden: See jeit nom Grauf, om doa auleen to hielen.

32Aus Maria doahan kjeem, wua Jesus wia, un am sach, foll see am to Feet un säd to am: Har, wan du wieescht hia jewast, dan wia mien Brooda nich jestorwen. 33Aus Jesus ar hielen sach, un de Juden hielen, dee met ar jekomen wieren, veseft hee deep em Jeist un räajd sikj opp 34un säd: Wua ha jie am hanjelajcht? See säden to am: Har, komm un kjikj! 35Jesus vegoot Tronen. 36Donn säden de Juden: Kjikj, woo goot hee am wia! 37Oba atelje von an säden: Kunn disa, dee däm Blinjen de Uagen opmuak, nich moaken, daut uk disa nich jestorwen wia? 38Un Jesus, veseft wada en sikj selfst, kjemt nom Grauf. Daut wia oba ne Heel, un een Steen lach doafäa. 39Jesus säd: Nämt dän Steen wajch. De Sesta vom jestorwnen, Marta, säd to am: Har, dee rikjt (stinkjt) aul, dan hee es 4 Doag hia. 40Jesus säd to ar: Ha ekj die nich jesajcht, wan du jleewen woascht, soo woascht du de Harlichkjeit Gottes seenen? 41See naumen dän Steen wajch. Jesus oba hoof de Uagen nohecht un säd: Voda, ekj dank die, daut du mie jehieet hast. 42Oba ekj wist, daut du mie aulentiet erhieescht, oba om daut Volkj wäajen, dee hia rom stonen, ha ekj daut jesajcht, daut see jleewen, daut du mie jeschekjt hast. 43Un aus hee dit jesajcht haud, roopt hee met ne lude Stemm: Lazarus, komm rut! 44Un dee jestorwen wia kjeem rut, de Feet un Henj bewekjelt met Grauf Loakes, un sien Jesecht wia met eenem Schweetduak omjebungen. Jesus säd to an: Binjt (leest) am loos un lot am gonen.

45Väle von de Juden, dee no Maria jekomen wieren un sagen, waut hee jedonen haud, jleewden aun am. 46Oba eenje von an jinjen no de Farisäa un säden an, waut Jesus jedonen haud.

De Huaga Rot wort sikj eenich Jeus omtobrinjen

47Donn vesaumelden de Huagapriesta un de Farisäa eenen Huagen Rot un säden: Waut well wie moaken? Dan dis Mensch deit väl Tieekjens (Wunda). 48Wan wie am soo tochloten, woaren aula aun am jleewen, un de Reema woaren komen un ons (heiljet) Launt uk onse Nazion wajch nämen. 49Oba eena von an, Kaifas, dee daut Joa Huagapriesta wia, säd to an: Jie weeten nuscht, 50un bedenkjen uk nich, dautet fa junt bäta es, daut een Mensch fa daut Volkj stoaft un nich de gaunze Nazion omkjemt. 51Dit oba säd hee nich ut sikj selfst, oba wiels hee daut Joa Huagapriesta wia, profezeid hee, daut Jesus fa de Nazion stoawen sull, 52un nich fa de Nazion auleen, oba om daut hee de vestreide Kjinja Gottes en eent toopbrinjt (vesaumelt). 53Von däm Dach aun plonden see, om am omtobrinjen. 54Oba Jesus jinkj nich mea openboa mank de Juden, oba jinkj wajch von doa no ne Jäajent dicht aune Wieste, no eene Staut, Efraim jenant; un doa bleef hee met de Jinja.

55Daut wia oba dichtbie de Juden äa Passafast, un väle ut däm Launt jinjen nopp no Jerusalem ver daut Passafast, om sikj to reinjen. 56See sochten Jesus un säden to eenaunda, aus see em Tempel stunden: Waut meen jie? Woat hee nich toom Fast komen? 57Oba doa hauden de Huagapriesta un de Farisäa een Befäl jejäft, daut, wan irjentwäa weeten sull, wua hee es, dee sull an toweeten loten, doamet see am faust nämen kunnen (kjennen).

Currently Selected:

Johanes 11: PBJHF

Highlight

Copy