1. Mose 8
8
Daut Wota veschwinjt
1Un Gott docht aun Noah un aule Tieren un aulet Vee, daut met am enne Arche wia; un Gott leet eenen Wint äwa de Ieed foaren, un daut Wota sunk. 2Un de deepe Kjwalen worden veschloten un de Himmelsfensta, un däm Räajen vom Himmel wort trigjjehoolen. 3Un daut Wota veschwunk vonne Ieed, naum mea un mea auf; un daut Wota naum no 150 Doag auf. 4Un em säwenden Moonat, aum 17-den Dach em Moonat, leet sikj de Arche oppe Boaj Ararat rauf. 5Un daut Wota naum emma mea auf, bat aum 10-den Moonat; em 10-den Moonat, aum ieeschten em Moonat, kunn maun de Spetz de Boaj seenen.
6Un daut passieed – no 40 Doag, doa muak Noah daut Fensta enne Arche op, daut hee jemoakt haud, 7un hee schekjt de Krauj rut; un dee fluach han un trigj, bat daut Wota vonne Ieed utjedrächt wia. 8Un hee leet de Duw von sikj rut, om to seenen, auf daut Wota vom Ieedboddem verant wia; 9oba de Duw funk kjeene Rustäd fa äare Feet un kjeem no am enne Arche trigj; dan daut Wota wia noch oppe gaunze Ieed; un hee strakjt siene Haunt ut un neem ar un brocht ar no sikj enne Arche. 10Un luad noch säwen aundre Doag un leet de Duw wada ut de Arche; 11un de Duw kaum no am Oppenowent, un kjikj, een aufjerätnet Eeljboomblaut wia en äarem Schnowel. Un Noah erkjand, daut et Wota oppe Ieed weinja jeworden wia. 12Un hee wacht noch säwen Doag un leet de Duw rut; un see kjeem nich mea no am trigj.
13Un daut passieed aum 601-en Joa, em ieeschten Moonat, aum ieeschten em Moonat, doa wia daut Wota vonne Ieed utjedrieecht. Un Noah deed daut Dak vonne Arche op un sach: Un kjikj, de Ieedboddem wia drieech. 14Un aum tweeden Moonat, aum 27-ten Dach em Moonat, wia de Ieed drieech.
Noah brinjt Opfa – Gott sien Vespräakjen
15Un Gott räd too Noah un säd: 16Go ut de Arche, du un diene Fru un diene Säns un de Frues diene Säns met die. 17Aule Tieren, dee bie die sent, von aulem Fleesch, aun Väajel un aun Vee un aun aulem Krupendem, daut sikj oppe Ieed bewäacht, lot met die rutgonen, daut see oppe Ieed wimlen un fruchtboa sent un sikj oppe Ieed vemieren. 18Un Noah jinkj rut un siene Säns un siene Fru un de Frues siene Säns met am. 19Aule Tieren, aulet Krupende un aule Väajel, aules waut sikj oppe Ieed bewäacht, no äara Oat, jinjen ut de Arche.
20Un Noah bud däm Harn een Aultoa; un hee naum von aulem reinen Vee un von aule reine Väajel un opfad Brauntopfa opp däm Aultoa. 21Un de Har rikjt däm leeftoljen Jeroch, un Gott säd en sienem Hoaten: Ekj well nich mea däm Ieedboddem om de Menschen wellen vefluchen; dan daut Sennen vom menschlichen Hoat es bees von siene Jugent aun; un ekj well wiedahan nich mea aulet Läwendje schlonen, aus ekj jedonen ha. 22Wiedahan, aule Doag de Ieed, saul nich opphieren Sot un Arnt, un Frost un Hett, Somma un Winta, un Dach un Nacht.
Currently Selected:
1. Mose 8: PBJHF
Highlight
Share
Copy
Want to have your highlights saved across all your devices? Sign up or sign in
© SW-Radio e.V.
