Mateyo 24

Yesu asosa ukonaulwa kwananda yaku Lesa

(Mk. 13.1-2; Luk. 21.5-6)

1Ulo Yesu afumine munanda yaku Lesa, abakusambila bakwe bamulangile ubune bwamimakile yananda njilya. 2Elo Yesu abasukile ati, “Tamwabona mfi fintu fyonse? Nachine nkomweba ati, tapakashalepo ibwe nangu limo pamulu walinakwe iyowo. Onse nga akubungumuka.”

Amafya namachushi

(Mk. 13.3-13; Luk. 21.7-19)

3Ulo Yesu ayikele Palupili lwa Maolife, abakusambila bafikile kuli Ye mubumfishi nokumufumba ati, “Twebeko, kanshi mfi fintu ukososapo nilwisa fyakuchitika? Chindo twakwishibilako ukuti ukwisa kobe nokushila kwachalo kwafikila?”

4Elo Yesu abasukile ati, “Chenjeleni ukuti umuntu nangu umo ekamubepapo. 5Pakuba abenji bakwishila mwishina lyanji nokusosa ati, ‘Nine Klistu,’ nokubepa bakubepa abantu abenji. 6Mwakumfwa inkondo nomukunkunto wankondo, nomba mwilokusakamikwapo iyowo. Mfi fintu fyakwisa kuchitika, kuntu ukushila kwachalo takulayisapo. 7Ifyalo fyakulwa nefyalo ifinakwe. Ubufumu bwakulwisha ubufumu bunakwe. Kwakwisa kuba insala nefinkunkuma konse-konse. 8Mfi fyonse fyakuba ekutatika kwamachushi.

9“Abantu bamitundu yonse bakumusula pamulandu wanji. 10Munshita nji abantu abenji bakusula ubuchetekelo bwabo. Bakwisa kwebushanya nokupatana. 11Kwakuboneka abasoseshi ababufi abenji, abakupulula abantu abenji. 12Pamulandu wakufula kwabubi, echo nokutemwana kwabantu abenji kwakuchepelelako. 13Nomba uwakushipikisha ukufikila kumupwilo, ewakupuluka. 14Elo Ubutumi Bwawama ubwa Bufumu bwakubala bubilwe muchalo chonse pakuti abantu bamitundu yonse bakomfwe, epo nempelo yachalo yakwisa.

Ichabunani nakambi ichabonaushi chikoyisa

(Mk. 13.14-23; Luk. 21.20-24)

15“Mwakubona ‘Ichabunani nakambi ichabonaushi’ ichasoselwe nomusoseshi Daniele chilimakene apo chitalingile ukwimakana.” (Uukopenda eluke umo chilolele!)#Dan. 9.27; 11.31; 12.11 16“Nomba abamu Yudeya bafulumukile kumpili. 17Uuli pamutenje wananda yakwe, eyikapo mukubula ifili munanda. 18Uwakuba mwibala lyakwe, ekabwelelapo kunanda mukubula ilaya. 19We shamo we kubanakashi abali kwimitile nakubali konsha muli nshilya nshiku! 20Mulokulomba Lesa ukuti ukubutuka kwenu kwikaba panshita yampepo nangula pakasuba ke Sabata! 21Pantu panshita njilya kwakuba amachushi aakulu ukwinekantu atabonekapo ukufuma apo Lesa atalile ichalo ukufika nanduno. Elo takwakabepo amachushi akuba nga aya. 22Nga chakuti Lesa tayipifisheko inshiku nshilya, nga tapapulukilepo umuntu nangu umo iyowo. Nomba pamulandu wabantu bakwe abasalwa, Lesa akwipifyako inshiku nshilya.

23“Munshiku nshilya umuntu kati akumweba ati, ‘Boneni Klistu ngu!’ Nangula, ‘Ngulya!’ Tekweshapo ukusumina iyowo. 24Pakuti ba Klistu nabasoseshi ababufi bakwima nokuchita ifyafiso ifikulu nefyakushimbwisha ukwebati babepayike nabasalwa kumo nga chingachitika. 25Umfweni, namwebela kabela ulo ifintu fyonse mfi afitalachitika.

26“Echo nga bantu bamweba ukuti, ‘Umfweni, Klistu ali muchiswebebe!’ Mwikayako iyowo. Nangula abamweba ati, ‘Umfweni, Klistu ali mukati munanda!’ Mwikasuminapo iyowo. 27Pakuti Umwana wa Muntu akwisa nga mfilya akampeshi kabyata ukufuma kumutule-suba nokuboneka kumbonshi.

28“Pantu konse ukuli ichitumbi ekulongana amakubi.

Ukwisa kwa Mwana wa Muntu

(Mk. 13.24-27; Luk. 21.25-28)

29“Bwangu-bwangu ulo akushila nga machushi munshiku nshilya, akasuba kakufita fititi, umwenshi nawo wakuleka ukusanika, nakambi intandala shakupona mumulu nefiso fyamumulu fyakutenkana.#Esa. 13.10; Yoe. 2.10,31; 3.15 30Penkapo kumulu kwakuboneka ichishibilo cha Mwana wa Muntu. Imitundu yonse yabantu panonshi yakulila, ulo bakubona Umwana wa Muntu akoyisa mumakumbi ali nefiso, elo nobuleme ubukulu. 31Epo akutuma abangelo bakwe ukulisha ulupenga ulwachiunda ichikulu. Bakulonganya abasalwa bakwe ukufuma konse kutupinda tune twachalo, ukutatikila uko ichalo chapela ukufikila nokumpelo kunakwe.

Isambililo lyachiti chamukunyu

(Mk. 13.28-31; Luk. 21.29-33)

32“Sambilileni kuchiti chamukunyu. Ulo mubona amabula atatika ukusoka ulutundwa, muleshiba ukuti amayinsa apalama. 33Munshila imo yenka, ulo mwakubona mfi fintu fikochitika, mwakwishiba ukuti Umwana wa Muntu ali apepi, ali bwaka pamulyango. 34Nachine nkomweba ati, abantu banjino nkulo pakufwa sembi mfi fintu fyonse fikabale fikachitike. 35Umulu nechalo fyakupita, kuntu amashiwi anji akubelelela umuyayaya.

Akasuba nenshita yakwisa kwaku Yesu tafyayishibikwapo

(Mk. 13.32-37; Luk. 17.26-30,34-36)

36“Ulo nkalya kasuba kakufika, tapapo umuntu uwayishiba, nangu bangelo bakumulu nangu Mwana wa Muntu iyowo, sembi Bawishi benka. 37Nga mfilya chali panshita yakwa Nowa, efyo chakuba napakwisa kwa Mwana wa Muntu.#Ukut. 6.9,12 38Pakuti panshita njilya ichama tachilayisa, abantu balikulya nokunwa, balikuupwa nokuupa ukufikila ulo Nowa ayinjile mubwato. 39Abantu tabayilukilepo ukufikila ulo ichama chayishile nokubepaya bonse. Efyo chakuba napakwisa kwa Mwana wa Muntu. 40Abalalume babili bakuba mwibala: umo akupintwa, umbi akushala. 41Abanakashi babili balikupela: Umo akupintwa, umbi naye akushala. 42Echo mulokulola pakuti tamwishibilepo ulo imfumu yenu yakwisa. 43Nomba ishibeni nchi, nga chakuti umwine wananda alishibile inshita umung’o akoyishilapo, angalindilila, ukwebati betobapo inanda yakwe. 44Echo namwe mulokwipekenye pakuti panshita mutebukilepo epo Umwana wa Muntu akwishilapo.

Umupyungi wachine nomubi

(Luk. 12.41-48)

45“Nga ninani engaba umupyungi wachine, uwamano uwo Bashikulu bakwe bengasonta pabapyungi banakwe ukuti eye alokubapela ichakulya panshita iilingile? 46Alishuka uyo mupyungi uwo Bashikulu wakwe bakusanga akobombela umo mwenka. 47Nachine nkomweba ati, akumubika ukuba umupyungi pafintu fyonse ifyo akwata. 48Nomba umupyungi mubi akuyisosha ati, ‘Bashikulu banji bakokola ukubwela.’ 49Echo ye akutatika ukupama abapyungi banakwe, elo akulya nokunwa nabachakolwa. 50Bashikulu wakwe bakubwela pakasuba ako atebukilepo, napanshita ateshibilepo. 51Bashikulu wakwe bakumupuma ukwinekantu. Elo bakumutamfisha kuchifulo ukusangwa abakutumpayika, uko abantu balila nokukwesanya ameno.

Currently Selected:

Mateyo 24: LalaNT

Highlight

Copy