Mateyo 23

Muchenjele nabasambishi ba Mafunde

(Mk. 12.38-39; Luk. 11.43,46; 20.45-46)

1Elo Yesu aebele amabumba abantu nabakusambila bakwe ati, 2“Abasambishi ba Mafunde na Bafalisi ebakwete insambu ishakulondolola Amafunde yakwa Mosesi. 3Kanshi fyonse ifyo bakomweba mulokufichita. Nomba mulokupashanyapo imichitile yabo pantu tabakonkapo ifyo basambisha iyowo. 4Batwika abantu ifipe fyalemesha, nomba bo tabemyapo nangu nikanantengelesha ukwafwilishako ukupinta ifipe mfilya. 5Balabomba imilimo yabo yonse ukuti babonwe kubantu. Balayibwenesha ulo bakusha apalembwa Amalembo aku Lesa awo bafwala pampumi napamaboko yabo. Elo balakusha insenkebele kuminjila yabo. 6Ulo baya kunshiku-nkulu namumananda aakulombelamo Lesa, batemwesha ukwikala pafipuna fyamuchinshi. 7Bafwaya ukubapela umutende wamuchinshi mufisanke kubantu nokubeta ati, ‘Abasambishi.’ 8Nomba mwe tamulingilepo ukwitwa ‘Abasambishi’ iyowo, pantu mulikwete umusambishi umo mpo, namwe bonse muli banankashi. 9Elo mulokwitapo umuntu umo panonshi ati, ‘Bata,’ pakuti mwakwata Wishinwe umo mpo, naye aba kumulu. 10Nakambi mulokwitwapo ati, ‘Intungulushi,’ pantu mwakwata intungulushi imo mpo ni Klistu. 11Umukulu pali mwe bonse ewo abe umupyungi wenu. 12Pakuti umuntu onse uyikusha, Lesa akamuchefya, nowichefya Lesa akamukusha.

Yesu akalipila abasambishi ba Mafunde na Bafalisi

(Mk. 12.40; Luk. 11.39-42,44,52; 20.47)

13“Ishamo kuli mwebo mwe basambishi ba Mafunde na Bafalisi, mwe bakutumpayika! Mulesala pamulyango wabufumu bwakumulu pakuti abantu bayinjilamo. Namwe tamwinjilamo, elo nabo abakofwaya ukwinjilamo mulabakanya. [ 14Ishamo kuli mwebo mwe basambishi ba Mafunde na Bafalisi, mwe bakutupayika! Mulalila bamukamfwilwa amasuku pamitwi pabuboni bwabo nokuchenjeleka abantu pakulomba kwenu ukutali! Echo Lesa akumupelelapo umulandu ukulu.]

15“Ishamo kuli mwebo mwe basambishi ba Mafunde na Bafalisi mwe bakutumpayika! Mulenda inyendo shapamenshi napamulundu ukuti mwalule umuntu umo. Nga mwamusanga, mulamulenga ukubipisha ukuya kumulilo uutashimapo kubati fintu muli.

16“Ishamo kuli mwebo mwe ntungulushi shapofula! Ulo musosa mwati, ‘Kati umo alapa ati, napananda yaku Lesa! Ukulapa nku takukwetepo umulandu. Nomba aalapa ati, napali golide yamunanda yaku Lesa! Ekwebati alingile ukufikilisha ukulapa kwakwe.’ 17Mwe mpofu shapunama! Mba chachilapo chindo, golide nangula inanda yaku Lesa iilenga golide ukuba uwabuta? 18Elo mulasosa ati, ‘Kati umuntu alapa ati, napachipupilo! Ukulapa nku takukwetepo umulandu. Nomba aalapa ati, napachipupo ichili pachipupilo! Ekwebati alingile ukufikilisha ukulapa kwakwe.’ 19Mwe mpofu shabantu! Mba chachilapo chindo, ipupo nangula ichipupilo ichilenga ipupo ukubuta? 20Echo umuntu aalapa ati, napachipupilo! Ekwebati techipupilopo chenka alapapo, kuntu napafintu fyonse ifilipo. 21Na uyo uulapa ati, napananda yaku Lesa! Aalapa napali uyo uwikalamo. 22Elo na uyo uulapa ati, nakumulu! Aalapa napachipuna chaku Lesa napali uyo uwikalapo.

23“Ishamo kuli mwebo mwe basambishi ba Mafunde na Bafalisi, mwe bakutumpayika! Mulapela ichekumi ichambewu ishinunkila bwino, nechambewu ichakuwamya ifyakulya, nomba mulasula ifinenene ifya Mafunde aku Lesa, kubati ukulungika mukulubulwisha, ukulanga inkumbu nokuba abachetekelwa. Mfi efyo mulingile ukuchita ukwambula ukusulapo fimbi. 24Mwe ntungulushi shapofula! Mulasansa kalunshi mufyakunwa fyenu, kuntu ingamila mulamina iyibulungene!

25“Ishamo kuli mwebo mwe basambishi ba Mafunde na Bafalisi, mwe bakutumpayika! Musamfya inkombo nembale kunse, kuntu mukati mwayiulamo ifyo mwapokolola kubunkalwe nakuli bukayitemwe. 26Mwe mpofu Shabafalisi! Baleni ukusamfya mukati kankombo nembale, elo kunse nako kwakuwama.

27“Ishamo kuli mwebo mwe basambishi ba Mafunde na Bafalisi, mwe bakutumpayika! Muli kubati nimanda ishapentwa nempemba ishiboneka ishiweme kunse, kuntu mukati mwayiulamo bwaka amafupa aabantu abafwa nefyabusali fyonse. 28Munshila imo yenka, namwe efyo mwaba: panse mulaboneka abalungama, kuntu mukati kenu mwayiulamo ukutumpayika nobubi bonse.

Yesu asosa ifyakupamwa kwabo

(Luk. 11.47-54)

29“Ishamo kuli mwebo, mwe basambishi ba Mafunde na Bafalisi, mwe bakutumpayika! Mulemaka imanda shabasoseshi, elo mulawamya nansho ishabakaele. 30Mulasosa ati, ‘Nga eko twali panshita yafikolwe fyesu, nga tatwayisanshisheko ukwipaya abasoseshi.’ 31Echo mulayipela umulandu pakwebati muli mukowa waku bo abayipeye abasoseshi. 32Chiweme, kanshi shilisheni umulimo uyo ifikolwe fyenu fyatatikile! 33Mwe nsoka, mwe bana bafipili, kanshi mukaya kupuluka shani kubupingushi bwakuposwa mumulilo utashimapo! 34Echo nkamutumina abasoseshi, abantu bamulangwe nabasambishi. Bambi mwakubepaya nokubasamika pamutanshi. Bambi nabo mwakubapamina munanda yenu iyakulombelamo Lesa, nokubachusha mukubachilausha ukufuma mumushi nomushi. 35Echo umulandu wamfwa shabantu abatakwetepo umulandu bonse abo mwayipeye pano chalo wakumuwila ukutatikila kuli Abeli uwalungama ngulya, nokufikila kuli Sakaliya mwana Balakiya, uwo mwayipeye munanda yaku Lesa pakati kachifulo chabutisha nechipupilo. 36Nachine nkomweba ati, abantu bamuli njino nkulo, bakwisa kupelwa umulandu pali mfi fyonse.

Yesu alilila Yelusalemu

(Luk. 13.34-35)

37“Yelusalemu, Yelusalemu! We wipaya abasoseshi nokulasa amabwe abatumwa baku Lesa! Ilinji line nafwayile ukulonganya abana bobe nga mfilya nyina-nkoko afukatila utwana mumapindo akwe, kuntu webo walikene. 38Nachine inanda yenu iyo yaku Lesa yakuba ichibolya. 39Nachine nkomweba ati, tamwakambonepo nakambi iyowo, ukufikila mukasose ati, ‘Alishuka uyo uukoyisa mwishina lyaku Bashikulu.’”

Currently Selected:

Mateyo 23: LalaNT

Highlight

Copy