Mateyo 22
22
Ichelusho chamutebeto wabwinga
(Luk. 14.15-24)
1Yesu abebele nachimbi ichelusho ati, 2“Ubufumu bwakumulu buli kubati nimfumu imo iyapekanishishe umwana wayiko umutebeto wapabwinga. 3Yatumine abapyungi bayiko ukuya kwita bo abayitilwe kumutebeto ngu, kuntu balikene ukwisa. 4Elo yatumine abapyungi bambi ati, ‘Kebeni abo abayitilwe ukuti ifyakulya tulipekenye. Intungu shanji neng’ombe shimbi ishinine balipeye. Elo nefintu fyonse balipekenye kale. Echo iseni kumutebeto wabwinga.’ 5Nomba bonse abayitilwe tabayileko. Bayile mukuchita bwaka ifyo bakofwaya: umbi ayile kwibala lyakwe, umbi kumakwebo akwe. 6Nomba abashelepo, bayikete abapyungi bakwe, balibachushishe nokubepaya. 7Echo imfumu yalikalipile ukwinekantu. Elo yatumine abashilikali bayiko ukuya kubepaya nokocha umushi wabo. 8Elo yasosele kubapyungi bayiko ati, ‘Ubwinga bapekenye kale, nomba abayitilwe tabalingilepo. 9Kanshi kamuyeni kumampandwa amisebo mukete bonse abo mwakubona!’ 10Nachine abapyungi bayile mumisebo nokulonganya pamo bonse bo basangile, ababi nabaweme. Elo nenanda yamutebeto yaliwilemo abantu abenji.
11“Ulo imfumu yayinjilemo mukubona abalwendo, yasangilemo umwalalume umo uutafwitepo ilaya lyabwinga. 12Elo yamufumbile ati, ‘We munanji, mba winjilemo shani muno we utafwitepo ilaya lyabwinga?’ Nomba ye akutumene bwaka. 13Elo imfumu yaebele abamilimo bakwe ati, ‘Mukakeni kumaboko nakumolu, mumupose panse pamfinshi. Kwenka uko akulila nokukwesanya ameno!’”
14“Pakuti abayitwa benji, nomba abasalwa banini bwaka.”
Umulandu wamusonko
(Mk. 12.13-17; Luk. 20.20-26)
15Elo Abafalisi bayile mukupangana ukuti basange umwakumwikatila Yesu mumisosele yakwe. 16Bamutumine abakusambila babo, elo nebumba lyakwa Helodi ukuya kumufumba ati, “We musambishi, twalishiba ukuti uli wachine nakambi usambisha ifyachine. Elo tautinapo muntu nangu umo, pakuba tawakwatapo akapatulula kubantu. 17Nomba twebeko, ukochibonapo shani? Napo fwebo tulingile ukusonka umusonko kuli Kayisale nangula iyowo?”
18Nomba Yesu alishibile ubuchebjeshi bwabo. Elo abebele ati, “Nindo mukonjesesha? Mwe bakutumpayika mwe! 19Ndeteleniko indalama mbone.”
Nabo balimulangile imo. 20Elo Yesu abafumbile ati, “Kanshi ngu umutwi namfi ifyalembwapo fyaku nani?”
21Nabo bamwasukile ati, “Fyakwa Kayisale.”
Elo abebele ati, “Kanshi peleni kuli Kayisale ifyakwa Kayisale, nakuli Lesa ifyaku Lesa.”
22Ulo baumfwile mfi, balishimbilwe ukwinekantu. Elo bafuminepo nokumusha.
Umulandu wakubuka kubafwa
(Mk. 12.18-27; Luk. 20.27-40)
23Mukasuba kenka nkalya, kwayishile Abasaduki bambi kuli Yesu. Abasaduki mba balikusambisha abantu ukwebati takupo ukubuka kubafwa. Elo bafumbile Yesu ati, 24“We musambishi, fwebo Mosesi alitukonkobeshe ati, umuntu uwaupa nga afwa ukwambula ukufyalapo abana, wabo alinokupyana mukamfwilwa pakuti afyalileko wakwe abana.#Deut. 25.5 25Nomba kwalipo abalalume basano na babili abalikwikala nkuno. Umukulu-bantu aupile umwanakashi, kafwa ukwambula ukufyalamo abana. 26Uwachibili kamupyana, naye chimo chenka kafwa bwaka ukwambula ukufyalamo abana, nowachitatu naye chimo chenka. Basukile bonse basano na babili bashilile ukufwa ukwambula ukuti bafyalemo abana. 27Kumupwilo umwanakashi naye alifwile. 28Nomba abantu pakubuka kubafwa, ngu mwanakashi akuba nimukani pali mba bonse basano na babili abo aupilweko?”
29Elo Yesu alibasukile ati, “Mwaliluba pantu tamwayishiba Amalembo aku Lesa nangula ifiso fyakwe. 30Pakuba ulo abantu bakabuka kubafwa, tabayise kupanapo iyowo, pantu bakuba kubati bangelo bakumulu. 31Nomba pamulandu wakubuka kwabafwa, napo tamwapendapo ifyo Lesa asosele ati, 32‘Nine Lesa wakwa Abulahamu, Lesa wakwa Isake, Lesa wakwa Yakobe?’ Ekwebati ni Lesa wababumi, te Lesapo wabafwa iyowo.”#Ukuf. 3.6,15-16
33Nomba abantu abenji abaliko ulo baumfwile mfi, balishimbilwe ukwinekantu pamulandu wakusambisha kwakwe.
Ifunde ilyachilapo
(Mk. 12.28-34; Luk. 10.25-28)
34Inshita ulo Abafalisi baumfwile ukuti Yesu aasukile Abasaduki bwino-bwino, nabo balongene pamo. 35Elo umo uwaku bo afwayile ukwesha Yesu. Elo alimufumbile 36ati, “We musambishi, nga kanshi ifunde lyachilapo pa Mafunde aku Lesa nilisa?”
37Elo Yesu amwasukile ati, “‘Ulokutemwa Bashikulu Lesa obe nobumi bobe bonse, nomutima obe onse, namano obe onse.’#Deut. 6.5 38Ndi efunde ilikulu nakambi elyachilapo. 39Ilyakonkapo nalyo nindi lilikubati linakwe likoti, ‘Ulokutemwa umunobe kubati nimfilya wayitemwa wemwine!’#Ab.Lef. 19.18 40Pamafunde nga abili epashinta Amafunde onse akwa Mosesi nokusambisha kwabasoseshi.”
Nga Uwasubwa waku Lesa nimwana nani?
(Mk. 12.35-37; Luk. 20.41-44)
41Ulo Abafalisi balongene pamo, Yesu alibafumbile ati, 42“Nga mulangulukapo shani pafya Wasubwa waku Lesa? Wamulupwa lwakwani?”
Nabo balimwasukile ati, “Wamulupwa lwakwa Davide.”
43Elo abebele ati, “Mulandu ndo Davide ulo asanikilwe no Mupashi waku Lesa asosele ati, ‘Ni Mfumu?’ Pakuti asosele ati,
44‘Bashikulu Lesa
basosele kuli Bashikulu banji ati,
ikala kukuboko kwanji ukwamulyo,
ukufikila mbike utupondo tobe,
ukuti tube ichakunyantapo amakasa obe.’#Amal. 110.1
45Kati Davide umwine amwitile ati, ‘Bashikulu,’ mba angaba shani umwana wakwe?”
46Tapalipo nangu umo uwapamine ukumwasuka ishiwi nangu limo iyowo. Ukufumu pali nkalya kasuba, tapalipo nangu umo uwamufumbile amafumbo nayambi.
Currently Selected:
Mateyo 22: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.
