Mateyo 21
21
Ifyo Yesu ayinjile mu Yelusalemu
(Mk. 11.1-11; Luk. 19.28-40; Yoh. 12.12-19)
1Ulo Yesu nabakusambila bakwe bapalamine ku Yelusalemu nokufika apepi napamushi wa Betefage Palupili lwa Maolife, Yesu atumine abakusambila bakwe babili 2nokubeba ati, “Kamuya kumushi uuli kuntanshi yenu. Amwayinjila bwaka, mwakusanga punda alikakilwe pamo nakana. Mubakakuleni nokubaleta nkuno. 3Kati umuntu akumufumba ati, ‘Mba findo mukochita mpo?’ Mumwasuke ati, ‘Bashikulu bali nabo nenchito.’ Elo akoya kumusuminisha.”
4Mfi fyalichitikile ukubati nimulya Lesa asosele mumusoseshi ati,
5“Ebani abamumushi wa Sioni ati,
boneni, imfumu yenu
ikoyisa kuli mwebo.
Iyafuuka, ilininine pali punda,
nachine pamwana wa punda.”#Esa. 62.11; Sek. 9.9
6Ulo abakusambila bayile, bachitile mwenka umo Yesu abebele. 7Balitwite punda nomwana kuli Yesu nokwanshikapo amalaya abo pamisana yaku bapunda. Elo Yesu anininepo. 8Abantu abenji bayanshikile ifyakufwala fyabo mumusebo, bambi balikukonaula imisambo yafiti nokwanshika mumusebo. 9Elo abantu balikwendela kuntanshi, nabali kumunkonka panuma, balikwaula bati,
“Achinshikwe Mwana Davide!
Alishuka uyo uwishila mwishina lyaku Lesa!
Muchinshikeni mwe bakumulu wamyulu!”#Amal. 118.26
10Ulo Yesu ayinjile mu Yelusalemu, abantu bonse batukwile ichongo nokufumba ati, “Nga uyu muntu ninani?”
11Amabumba akonkele Yesu ayasukile ati, “Ngu ni Yesu, musoseshi ngulya waku Nasaleti, umushi wamuchalo cha Galili.”
Yesu ayinjila munanda yakulombelamo Lesa
(Mk. 11.15-19; Luk. 19.45-48; Yoh. 2.13-22)
12Yesu ayinjile munanda yaku Lesa nokutamfya bonse abalikushitisha nabali kushita mukati. Atatikile ukupenaula amatebulu abantu abali kukabushanya indalama, nefipuna fyaku bo abali kushitisha inkunda.#21.12 abalikushitisha inkunda: Abantu mba balikushitisha ifitekwa ukwebati abalikulomba kunanda yaku Lesa batule imitulo. (Boneni muli Yoh. 2.14). Abalikushitisha balikwibila abantu ukupitila mukuninika ukwinekantu imitengo yabo. 13Abebele ati, “Chalilembwa ukuti, ‘Inanda yanji yakwitwa inanda yakulombelemo,’ kuntu mwebo eyo mwasangula uluchengo lwabang’o.”#Esa. 56.7; Yel. 7.11
14Elo impofu nabalemana bayile kuli Yesu munanda yaku Lesa, na Yesu alibaposeshe. 15Intungulushi shabachipupila nabasambishi ba Mafunde babwene ifintu fyakushimbwisha ifyo Yesu achitile. Elo baumfwile abana bakobilikisha munanda yakulombelamo Lesa ati, “Achinshikwe Mwana Davide!” Mfi fyakalifishe imitima yabo. 16Echo balimwebele bati, “Napo ulyumfwilepo ifyo mba bakososa?”#Amal. 8.3
Elo Yesu abasukile ati, “Ina, napo tamwapendapo amashiwi ngalya aasosa ati, ‘Mwalisambilisha utwayiche notucheche ukuti tumutondayishe ukufikapo.’”
17Ulo asosele mfi, Yesu ayile nokuya kumushi wa Beteni uko ayile kulala.
Yesu alapisha ichiti
(Mk. 11.12-14,20-24)
18Kachelo-chelo ulo Yesu alikubwelela ku Yelusalemu, aumfwile insala. 19Ulo abwene umukunyu mumbali yanshila, alileko ukuti alyeko amakunyu. Nomba asangileko bwaka amabula enka. Elo asosele kumukunyu ati, “Ukufuma nduno tawakatwalepo nakambi ifisabo.” Penkapo umukunyu ngulya walyumine.
20Ulo abakusambila babwene mfilya, balishimbilwe, nokusosa ati, “Mba mukunyu wauma bwangu shani mfi?”
21Elo Yesu abasukile ati, “Nachine nkomweba ati, kati mukochetekela nokutakayikapo, tamwakachite bwaka nchi chachitika kumukunyu ngu iyowo, kuntu mungasosa nakulupili ndu mwati, ‘Fuma mpa, uye uyipose muli bemba,’ nacho chakuchitika. 22Nga mwachetekela, chonse icho mwakufumba mukulomba kwenu, mwakupelwa.”
Insambu shaku Yesu uko shafuma
(Mk. 11.27-33; Luk. 20.1-8)
23Ulo Yesu ayinjile munanda yaku Lesa, intungulushi shabachipupila nabakulu Babayuda bayile kuli Yesu ulo alikusambisha, nokumufumba ati, “Ninsambu ndo uchitilamo mfi fintu? Mba uwakupela nshi nsambu ninani?”
24Yesu abasukile ati, “Nandibo nkomufumbapo chimo bwaka, namwe nga mwangasuka, nkomwebako ukwafuma nshi nsambu nchitilamo fintu. 25Napo ulubatisho lwakwa Yohane nikuli Lesa lwafumine nangula nikubantu?”
Elo batatikile ukutalikishanya bati, “Nga twaeba ati, ‘Lwafumine kuli Lesa,’ Yesu akutufumba ati, ‘Mba nindo mutachetekele Yohane?’ 26Elo atwaeba ati, ‘Lwafumine kubantu,’ tukotina pantu bonse balishininkishe ukwebati Yohane ali musoseshi.” 27Echo bayasukile Yesu ati, “Tatwishibilepo.”
Yesu naye epakubeba ati, “Kanshi nandibo nshamubushepo ukwafuma insambu nshi nchitilamo mfi fintu.
Ichelusho chabana babili
28“Nomba mukolangulukapo shani? Umuntu umo ali nabana abalumbwana babili. Ulo ayile kumwana wakwamba asosele ati, ‘We mwana wanji, koya ukabombe mwibala lya mpesha lelo.’ 29Naye ayasukile ati, ‘Nshikofwayapo.’ Nomba panuma alilangulukilemo nokuya kubomba. 30Panuma wishi ayile kumwana wachibili nokumweba amashiwi amo enka. Ye ayasukile ati, ‘Ina, nkoya bata,’ kuntu tayileko. 31Nomba ninani pali mba bana uwachitile ifyalikufwaya wishi?”
Nabo bayasukile ati, “Wakwamba.”
Yesu epakubeba ati, “Nachine nkomweba ati, abamisonko nabachende bakumutanjilila pakwinjila mubufumu bwaku Lesa. 32Pakuti Yohane Mubatishi alishile nokumulanga inshila yabulungami, nomba tamwamuchetekelepo iyowo, kubati fintu abamisonko nabachende bamuchetekele. Ulo mwebo mwabwene mfilya, tamwalapililepo nokumuchetekela iyowo.”
Ichelusho chabalimi bamwibala
(Mk. 12.1-12; Luk. 20.9-19)
33Yesu asosele ati, “Umfweni ichelusho nachimbi. Kwalipo umuntu umo uwalimine ibala lya mpesha nokushitililako wombe. Ayimbilemo nechakukaminamo impesha, ayimekemo nechiteba. Elo ashile ibala kubalimi bambi nokuya kuchalo chimbi. 34Ulo inshita iyakulobolola ifitwalo yafikile, umwine webala atumine abasha bakwe kubalimi ukuti bakamuleteleko ifitwalo fyakwe. 35Nomba abalimi mbalya balimulasawile amabwe. 36Umwine webala atumineko nabambi abamilimo abenji ukuchila abantanshi. Nabo babachitile mumo mwenka. 37Pakulekelesha atumineko umwana wakwe nokuti, ‘Nachine umwana wanji bakoya kumuchinshika.’ 38Nomba ulo abalimi bamubwene, balisoshenye abati, ‘Tenjilya impyani yakwe ikoyisa. Iseni tumwipaye pakuti ibala libe lyesu.’ 39Elo bayikete umwana ngulya nokumuposela kunse yebala lya mpesha nokumwipaya.
40“Nomba umwine webala lya mpesha nga abwela, akubachita shani mba balimi?”
41Nabo bamwasukile ati, “Nachine akubepaya mba abalimi ababi nokupela ibala ndilya kubalimi bambi abakumupelako ifitwalo munshita shalinga.”
42Elo Yesu abebele ati, “Napo tamwapendapo Mumalembo ukuti,
‘Ibwe ndilya abakwimaka basulile,
elyayishile kuba ilinenene ilyapachimfuntu.
Kanshi efyo Imfumu yachita!
Yangwee, mwandi twashimbwa fwe babonako!’”#Amal. 118.22-23
43Elo Yesu abebele ati, “Nkomweba ati, mwakupokwa ubufumu bwaku Lesa, elo bwakupelwa kumutundu umbi uwakutwala ifitwalo ifinenene.” [ 44Umuntu onse uukaponena pali ndi bwe, akukonayika, noyo lyakuwilapo akushonayika.]
45Ulo intungulushi shabachipupila na Bafalisi baumfwile ifyelusho fyasoselwe, balishibile ukuti ebo akoeba. 46Echo balikufwaya ukuti bamwikate, nomba batinine abantu pantu abenji balisumine ukuti Yesu musoseshi.
Currently Selected:
Mateyo 21: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.
