Mateyo 20
20
Ichelusho chabamilimo
1“Ubufumu bwakumulu buli kubati muntu umo uwafumine luchelo-chelo ukuti enjishe abamilimo mwibala lyakwe ilya mpesha. 2Ulo ashilile ukupangana nabamilimo ukubapa ikobili limo akasuba kamo, alibatumine mwibala lyakwe ilya mpesha. 3Nakambi alifumine panshita ya 9 koloko, asangile bambi bekele bwaka pachisanke. 4Elo abebele ati, ‘Namwebo kamuya mwibala lyanji, nakwisa kumufolesha isho mulingile ukufola. Nabo balile.’ 5Ulo akasuba kafikile 12 koloko, napa 3 koloko achitile mumo mwenka, aya atumako nabambi. 6Elo pa 5 koloko, alile nokusanga nabambi balimakene bwaka. Elo abafumbile ati, ‘Nindo mwikalile mpano akasuba konse?’ 7Nabo balyasukile bati, ‘Pantu takupo uwakutwinjisha imilimo.’ Naye abebele ati, ‘Kamuya namwe mwibala lyanji mukubomba.’
8“Ulo kwali ichingulo, umwine webala aeba kapitawo ati, ‘Kete abamilimo, ubafoleshe, ukubalila pabakulekelesha, elo ulekeleshe ukulipila abakwamba.’ 9Elo abayinjile pa 5 koloko wachungulo bayisa, balipilwe ikobili limo-limo. 10Abapakwamba ulo bayishile, balikulanguluka ati bakofola indalama ishinji. Nomba nabo balipilwe ikobili limo-limo. 11Pakufola bayilishenye kumwine webala 12ati, ‘Mba abalekelesha ababomba bwaka oola limo, ebo mwatulinganya nabo. Fwebo tulichulile akasuba konse!’ 13Nomba alyasukile umo waku bo ati, ‘We munanji, tanshikuchenjelekelepo iyowo. Napo tatupangenepo nobe ikobili limo? 14Bula ikobili lyobe ulokuya. Nafwaya ukuti mpele uwakulekelesha ikobili limo ukubati nimfi nakufolesha webo. 15Napo tekuti nchitepo ifyo nkofwaya pandalama shanji? Napo wafitwa pamulandu wakupela kwanji?’”
16Elo Yesu alekelesha ukusosa ati, “Nomba abapanuma ebakuba abapantanshi, nabapantanshi ebakuba abapanuma.”
Yesu asosa pamfwa yakwe inshita yachitatu
(Mk. 10.32-34; Luk. 18.31-34)
17Ulo Yesu alikuya ku Yelusalemu, atwite abakusambila bakwe pambali nokubeba ati,
18“Boneni! Tukoya ku Yelusalemu uko Umwana wa Muntu bakoya kumutwala kuntungulushi shabachipupila nakubasambishi ba Mafunde. Bakoya kumupingula ukufwa. 19Bakoya kumupela muminwe yabenafyalo. Nabo bakoya kumusekuluka, ukumupanda ifikoti nokumusamika pamutashi. Nomba pakasuba kalenga shitatu akwisa kubuka kubafwa.”
Icho balombele banyina Yohane
(Mk. 10.35-45)
20Elo bamuka Sebedi bayile kuli Yesu nabana babo#20.20 nabana babo: Mba niba Yakobe na Yohane. (Boneni muli Mat. 4.31). babili. Balimufukamine ukuti bamulombepo ichintu chimo.
21Elo Yesu abafumbile ati, “Nindo mukofwaya?”
Nabo balyasukile ati, “Nati ubalaye ukwebati abana banji mba babili bakese kwikala umbi kukuboko kwenu ukwamulyo, umbi naye ukwakuchipiko ulo mwakwisa mubufumu bwenu.”
22Yesu alyasukile ati, “Tamwishibilepo icho mukofumba. Napo mwebo mwinganwenako kulukombo lwamachushi ulo nkoya kunwenako?”
Nabo balimwasukile ati, “Ina, kuti twachita.”
23Yesu alibasukile ati, “Nachine mwakwisa kunwako kulukombo lwanji, nomba tanshikwetepo insambu ishakusuminisha abakwikala kukuboko kwanji ukwamulyo nangula ukwakuchipiko. Ni Bata ebakupela ififulo kuli bo abo bapekanishishe.”
24Ulo abakusambila banabo ikumi baumfwile mfi, balikalipile bawabo mbalya babili. 25Elo Yesu abetile pamo nokusosa ati, “Mwe mwalishiba ukuti bakateka babenafyalo balila abantu babo amasuku pamitwi. Elo intungulushi nasho shibwenesha ifiso fyashiko pabantu babo. 26Nomba tachifwile ukubapo mfi kuli mwe. Uyo onse uukofwaya ukuba umukulu pakati kenu, abe umupyungi wenu. 27Echo na uyo onse uukofwaya ukuba uwantashi pakati kenu, abe umusha wenu. 28Pakuti nangu Mwana wa Muntu umwine tayishilepo ukuti bakamupyungile iyowo, kuntu Ye ayishile mukupyungila nokupela ubumi bwakwe ukuti abantu abenji bakalubulwe.”
Yesu aposha impofu shibili
(Mk. 10.46-52; Luk. 18.35-43)
29Ulo Yesu nabakusambila bakwe balikufuma mu Yeliko, ibumba lyabantu ilikulu lyalikubakonka. 30Nomba impofu shibili ishalalume shayikele mumbali yanshila. Ulo shaumfwile ukuti Yesu akopita munshila njilya, shalibilikishe neshiwi ilikulu ati, “Mwe Shikulu, mwe Shikulu, Mwana Davide, tukwatileni ichisa!”
31Abantu mbalya balikalipile impofu nokusheba ukuti shitalale. Nomba shena shalibilikishe ati, “Mwe Bashikulu, Mwana Davide, tukwatileni inkumbu!”
32Yesu alimakene nokushita. Elo ashifumbile ati, “Nindo mukofwaya ukuti muchitile?”
33Nasho shalyaswike ati, “Bashikulu, tukofwaya ukubona.”
34Yesu alibomfwilile inkumbu nokubekata pamenso abo. Penkapo balitatikile ukubona nokumukonka kabamukonka.
Currently Selected:
Mateyo 20: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.
