Mateyo 19
19
Umulandu wakubengana mufyupo
(Mk. 10.1-12)
1Ulo Yesu ashilile ukusosa nga mashiwi, alifumineko ku Galili, nokuya kuchalo cha Yudeya kwitala lya Yodani. 2Amabumba abantu alimukonkele. Elo alibaposeshe kwenka nkulya.
3Bambi abamu Bafalisi bayishile kuli Yesu mukumwesha bati, “Napo chamwifunde kumwalalume ukubenga umukashi wakwe pamulandu uuli onse?”
4Naye abasukile ati, “Napo tamwapendapo ukuti pakutatika Lesa abumbile umwalalume nomwanakashi?#Ukut. 1.27; 5.2 5Lesa asosele ati, ‘Pamulandu ngu umwalalume akusha bawishi nabanyina nakuyilundako kumukashi wakwe. Echo mba babili bakuba umubili umo!’#Ukut. 2.24 6Nomba tabalipo babili iyowo, kuntu bali umo bwaka. Echo icho Lesa alundanya, umuntu elundululapo.”
7Abafalisi balimufumbile ati, “Kanshi chindo Mosesi asuminishe ukuti umwalalume apele umukashi wakwe kalata yakumubengelapo, elo amuleke?”#Deut. 24.1
8Naye Yesu alibasukile ati, “Mulandu wakutomfwapo kwenu echo Mosesi amusuminishe ukubenga abakashi benu. Nomba ukufuma pakutatika kwachalo tefyopo chali iyowo. 9Nomba nkomweba ati, umuntu nga abenga umukashi wakwe nokupa umbi pamulandu uutali wabuchende, epela achita ubuchende.”
10Elo abakusambila bakwe bamwebele ati, “Kati umulandu wamwalalume nomwanakashi waba mfi, chingalinga bwaka nokutopapo.”
11Elo Yesu abebele ati, “Te bonsepo abomfwisha amashiwi nga iyowo, kuntu abo Lesa afwilisha. 12Eko bali bambi abatangopapo, pantu efyo bafyelwe. Eko bali bambi abatangopapo, pantu abantu bambi babachitile mfi. Elo eko bali nabambi abasala ukutopapo, pantu bakofwaya ukupyungila Lesa. Uyo uungomfwa mfi, omfwishe.”
Yesu ashukisha abana banini
(Mk. 10.13-16; Luk. 18.15-17)
13Abantu bambi baletele abana banini kuli Yesu ukuti abike amaboko akwe pali bo nokubashukisha. Nomba ulo abakusambila bakwe bababwene, balibakalipile. 14Elo Yesu asosele ati, “Lekeni abana banini bese kuli nebo, mwibakanyapo, pakuti Ubufumu bwakumulu bwaku bo abali nga mba.”
15Elo abikile amaboko akwe pabana banini. Ulo ashilile, ayile kumbi.
Umulumbwana umusambashi
(Mk. 10.17-31; Luk. 18.18-30)
16Nomba kwayishile umwalalume umo kuli Yesu nokumufumba ati, “We musambishi, chintu ndo ichiweme mfwile ukuchita pakuti nkapoke ubumi butapwa?”
17Naye amwasukile ati, “Mba nindo wamfumbila pachintu ichiweme? Uuweme Umo bwaka. Nomba nga akofwaya ukukwata ubumi butapwa ulokukonka amafunde akwe.”
18Naye alimufumbile ati, “Mafunde ndo?”
Yesu amwasukile ati, “Wilokwipayapo, wilokuchitapo buchende, wilokwibapo, wilokubepeshapo umunobe,#Ukuf. 20.12-16 19chinshika bawiso nabanoko, nakambi ulokutemwa umunobe kubati nimfilya wayitemwa wemwine.”#Ab.Lef. 19.18
20Elo mulumbwana ngulya alyasukile ati, “Nga Mafunde onse naliyalama. Nomba chindo chashalako?”
21Yesu amwasukile ati, “Kati ukofwaya ukuba uwapwililika, koya ukashitishe ifintu fyonse ifyo wakwata. Indalama wakusangamo, ushipele kubachula, elo wakwisa kuba nobuboni kumulu. Elo wise unkonke.”
22Ulo umulumbwana ngu aumfwile mfi, ichinso chakwe chalifitile. Epo ayile nechinkonko pantu ali nobuboni ubwinji ukwinekantu.
23Elo Yesu asosele kubakusambila bakwe ati, “Nachine nkomweba ati, chaliba ichakosa kumuntu uwabuboni ukwinjila mubufumu bwakumulu. 24Echo chaliba ichayanguka ingamila ukupula mulinso lyakashinje ukuchila umusambashi ukwinjila mu Bufumu bwaku Lesa.”
25Abakusambila bakwe balishimbilwe ukwinekantu pakumfwa nga mashiwi. Epo balifumbene bati, “Nga muntu shani wakwisa kupuluka?”
26Yesu alibalolekeshe nokusosa ati, “Nchi chaba ichafishe kubantu, kuntu tekuli Lesapo iyowo. Kuli Ye fyonse finakile.”
27Elo Petulo asosele ati, “Boneni, fwebo twalisha ifintu fyonse nokumukonka. Kanshi fwebo findo twakupelwapo?”
28Yesu abebele ati, “Nachine nkomweba ati, mubufumu bwabwangu bukoyisa, ulo Mwana wa Muntu akwikala pamupando wakwe uwabuleme, namwe mwe bankonka mwakwikala pamipando iili ikumi na ibili. Mwakuya kupingula imitundu ikumi na ibili iya Baisilaeli. 29Na uyo onse uwasha inanda, nangula bawabo, nangula inkashi, nangula bawishi, nangula banyina, nangula abana, nangula amabala pamulandu wakunebo, akupokelelapo ifinji ukwinekantu ukuchila ifyo ashile. Akupokelela ubumi butapwa. 30Nomba abenji abali pantanshi ebakuba panuma, nabo abapanuma abenji ebakuba pantanshi.
Currently Selected:
Mateyo 19: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.
