Mateyo 18
18
Ninani umukulu mubufumu bwakumulu
(Mk. 9.33-37; Luk. 9.46-48)
1Panshita yenka njilya, abakusambila bayile kuli Yesu nokuti, “Nga umukulu mubufumu bwakumulu ninani?”
2Elo ayitile akana kanini nokukemanika pantanshi yabo, 3nokuti, “Nachine nkomweba ati, nga tamuli kubati twana tunini, tamwakenjilemo mubufumu bwakumulu. 4Kanshi uuyichefya ukubati akana kanini nka, ewakuba umukulu mubufumu bwakumulu. 5Nakambi umuntu onse upokelela akana kanini akalinga nka mwishina lyanji, epela nine apokelela.
Ifilenga ukubifya
(Mk. 9.42-48; Luk. 17.1-2)
6“Kati umuntu akulenga umo uwaku mba bana banini ukuposa ichichetekelo muli nebo, chamulinga ukumukakila ichilibwe chakupelako mumukoshi wakwe nokumuposa muli bemba. 7Ishamo kubantu bapanonshi abo abalenga abanabo ukubifya! Ina ukubifya epo kwaba, kuntu ishamo kumuntu uyo uulenga abantu bambi ukubifya!
8“Kati ukuboko nangula ukulu kobe kulakulenga ukubifya, kuputuleko nokukuposa! Chawama ukwinjila mubumi butapwa uwaputulwako ukuchila ukuya kuposwa mumulilo uutashimapo namaboko abili nangula namolu abili. 9Nakambi kati ilinso lyobe lilakulenga ukubifya lilobolemo. Chawama ukwinjila mubufumu bwaku Lesa nelinso limo ukuchila ukuposwa mumulilo uutashimapo namenso abili.
Ichelusho chambelele yalubile
(Luk. 15.3-7)
10“Chenjeleni ukuti mwisulapo umo uwabana mba abanini. Nachine nkomweba ati, abangelo babo abakumulu baba pantanshi yaku Bata abali kumulu inshita shonse. [ 11Pantu Umwana wa Muntu ayishile mukupulusha bo abaluba.]
12“Nga mwebo mukolangulukapo shani? Nga umuntu alikwete imbelele umwanda umo, elo imo yaluba, napo tekuti ashepo isho ishili amakumi asano na ane nashisano nashine nokuya kufwaya njilya iilubile? 13Nachine nkomweba ati, nga ayisanga alinokusekelela ukwinekantu pali njilya imo ukuchila pali nshilya ishitalubilepo. 14Efyo na Bata abali kumulu tabafwayapo umo uwabana mba abanini ukuti alube.
Ifyo tulingile ukuchita umunensu nga atubifisha
15“Kati wenu akubifisha uye ukamwebe ulo muli babili bwaka. Elo nga akumfwila ekwebati mwawikishanya. 16Nga tomfwilepo, witeko umuntu umo nangu babili ukuti umulandu onse upingulwe pamenso yabakamboni babili nangu batatu. 17Kati akana ukubomfwila nabo, webeko abamuchilonganino chaku Lesa. Nga akana ukubomfwila abamuchilonganino, elo umuchite nga uwakunse nangu kasonkesha.
Ukubinda nokusuminisha
18“Nachine nkomweba ati, chonse icho mwakaka panonshi, nakumulu chakakwa, necho mwakakula panonshi, nakumulu chakakulwa.
19“Nakambi nkomweba ati, nga abantu babili pali mwebo baumfwana panonshi ukulombapo ichintu chimo, Bata abakumulu bakubapela. 20Pantu uko abantu babili nangu batatu balongana mwishina lyanji, nandibo ndi pakati kabo.”
Ichelusho chamupyungi uwankansa
21Elo Petulo ayile kuli Yesu nokumufumba ati, “Bashikulu, nga wesu ambifisha kuti namunakilila imiku inga? Napo isano na ibili?”
22Yesu alimwasukile ati, “Temikupo isano na ibili bwaka iyowo, kuntu ukufikila imiku amakumi asano na abili ukufushishako imiku isano na ibili. 23Pantu ubufumu bwakumulu buli kubati nimfumu iyayitile abapyungi bayiko ukuti babweshe inkongole shabo kuli ye. 24Ulo yatatikile ukupitulukamo, umo uwakongwele indalama amakana ikumi limo, aletelwe kuli ye. 25Nomba pamulandu wakuti takwete ichakufutilako, imfumu yakwe yapingwile ukuti ashitishiwe pamo nomukashi wakwe nabana, nafyonse ifyo akwete, ukuti abweshe inkongole yakwe. 26Ulo umupyungi aumfwile mfi, afukeme pamakasa aamfumu nokuti, ‘Nakilileniko, nakumubwesesha shonse.’ 27Elo imfumu yamupyungi ngu yamukwatile inkumbu, yalimunakilile inkongole nokumweba ukuti aye.
28“Nomba ulo afuminepo bwaka, akumenye umupyungi munakwe uwamukongwele indalama umwanda umo bwaka. Alimukamine pamukoshi nokumweba ati, ‘Mbwesesha inkongole yanji!’ 29Umupyungi munakwe alimufukamine nokumupapata ati, ‘Nakilileniko, nakumubwesesha!’ 30Nomba ye alikene, alimwikete nokuya kumuposa muchifungo ukufikila akabweshe inkongole. 31Ulo abapyungi banakwe babwene mfilya, baliketwe ichikonko. Elo bayile kubusha imfumu yabo ifyachitikile. 32Elo imfumu yakwe yalimwitile nokumweba ati, ‘We mupyungi mubi we! Nalikunakilile umulandu onse ngulya pantu walimpapatile. 33Nomba webo taukwatilepo umunobe inkumbu kubati nimfilya nebo nakukwatile inkumbu?’ 34Echo mubukali imfumu yakwe yamutumine kuchifungo ukuti akakwe ukufikila akabweshe inkongole yonse.”
35“Efyo namwe bakumuchitila Bata abakumulu nga tamukonakililapo wenu nomutima onse.”
Currently Selected:
Mateyo 18: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.
