Mateyo 17
17
Kusanguka kwaku Yesu palupili
(Mk. 9.2-13; Luk. 9.28-36)
1Ulo papitile inshiku shisano nabumo, Yesu abulile Petulo, Yemusi na Yohane wabo nokuya nabo kulupili ulutali apabenka. 2Elo asangukile pamenso abo. Impumi yakwe yalikubengeshima kubati kasuba, amalaya akwe alikubeka nokubutisha tuutu. 3Penkapo abakusambila balibwene Eliya na Mosesi bakososhanya na Yesu. 4Elo Petulo aebele Yesu ati, “Bashikulu, chingawama kuli fwebo ukwikala mpano! Kati mukofwaya, nkoyimaka imisasa itatu: Umo ube wenu, umbi ube wakwa Mosesi, umbi nawo ube wakwa Eliya.”
5Achili mukusosa, kwayishile ikumbi ilitubile tuutu nokubafimba. Elo mwafumine ishiwi mukati kekumbi ndilya ilyasosele ati, “Ngu Mwana wanji uwatemwekwa. Muli Ye emo nkosekelela. Mumfweni!”
6Ulo abakusambila baumfwile ishiwi, balitinine ukwinekantu nokuwila panshi ubwifuneme. 7Elo Yesu apalamine nokubakumya nokuti, “Bukeni, mwitinapo!” 8Ulo bashibatwile amenso, tababwenepo umuntu umbi, sembi Yesu enka.
9Ulo balikutentemuka ulupili, Yesu alibakonkobeshe ati, “Tekwesha ukubushako umuntu nangu umo ifyo mwabona, sembi ulo Umwana wa Muntu akubuka kubafwa.”
10Elo abakusambila balimufumbile ati, “Mba nindo abasambishi ba Mafunde bakososela ati Eliya ewakubalilapo ukwisa?”
11Yesu alibasukile ati, “Nachine Eliya ewakubalilapo ukwisa mukuwamya ifintu fyonse. 12Nomba nkomweba ati, Eliya alisa kale, kuntu abantu tabamwishibilepo iyowo. Elo bamuchitile bwaka umo balikufwayila abene benka. Efyo no Mwana wa Muntu bakumuchusha.”
13Elo abakusambila baumfwile ukuti alikusosa pali Yohane Mubatishi.
Yesu aposha umulumbwana uwali nomupashi uubi
(Mk. 9.14-29; Luk. 9.37-43)
14Ulo bafikile ukwali ibumba lyabantu, umuntu umbi ayile kuli Yesu nokumufukamina. 15Elo asosele ati, “Bashikulu, beni nenkumbu pamwana wanji pantu akolwala ichinkoni-nkoni, nakambi chilamuposa mumulilo nangu mumenshi. 16Nalimuletele kubakusambila benu ukuti bamuposhe, kuntu chalibakangile.”
17Yesu alibasukile ati, “Mama wesu ee, mwe nkulo iibipile neyitachetekelapo! Kanshi nakwikala nenu ukufika lwisa? Nkoshipikisha nenu ukufika lwisa? Temulandupo, letenipo umulumbwana kuli ne!” 18Elo Yesu akalipile umupashi uubi uwalikuchusha umulumbwana ngulya, nawo walifuminemo muli ye. Elo alipolele panshita yenka njilya.
19Nomba abakusambila balimufumbile kumbali ati, “Mulandu ndo fwebo chatukangila ukufumya umupashi uubi?”
20Naye abebele ati, “Pantu ukuchetekela kwenu kunini. Nachine nkomweba ati, nga mwakwata ichichetekelo kubati kaluseke kamasitadi,#17.20 kamasitadi: kaluseke akanini Abayuda bali kubyala. Mwilala kali kubati kaluseke ka lubanga. (Boneni namuli Luk. 17:6). kuti mwaeba ulupili ndu ati, ‘Telela nkulya!’ Nalo kuti lwatela, tekuti kube nangu chimo icho ichingamukanga.”[ 21Echo pakutamfya umupashi uubi uwaba mfi, takupo inshila imbi, kuntu nimukulomba namukuyikanya ukulya.]
Yesu asosa nakambi pamfwa yakwe
(Mk. 9.30-32; Luk. 9.43-45)
22Ulo abakusambila balongene pamo mu Galili, Yesu alibebele ati, “Umwana wa Muntu akoyembulwa kubantu. 23Elo bakumwipaya. Nomba mubushiku bwalenga shitatu, akwisa kubuka kubafwa.”
Abakusambila balibele nechikonko
Yesu apela umusonko wananda yaku Lesa
24Ulo Yesu nabakusambila bakwe bafikile ku Kapenaumu, abalonganya umutulo wananda yaku Lesa#17.24 Umutulo wananda yaku Lesa: Umuyuda onse uwali nemyaka amakumi abili nokuchilapo, alingile ukutula umutulo ngu chila mwaka. (Boneni mu Kufuma 30.11-16.) bayile kuli Petulo nokumufumba ati, “Napo umusambishi wenu tatulapo umusonko uwakunanda yaku Lesa?”
25Petulo alyasukile ati, “Alatula.”
Ulo Petulo ayinjile munanda, Yesu abangililepo ukumweba ati, “Webo Simoni ukolangulukapo shani? Kanshi imfumu shachalo nikulibani shipoka umusonko? Napo nikubantu bashiko nangula nikuli bambi?”
26Petulo alyasukile ati, “Nikuli bambi.”
Yesu amwebele ati, “Kanshi abantu babo tabatulapo umusonko. 27Nomba pakuti abantu befulwapo, koya kuli bemba ukateye indobani. Inswi iyo ukoya kubalilapo ukuloba, ukayichenamune akanwa, elo wakusangamo indalama. Ukashipinte indalama nshilya nokuya tula umusonko wanji nowobe.”
Currently Selected:
Mateyo 17: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.
