Yohane 10
10
Chembela uuweme
1Yesu asosele ati, “Nachine nkomweba ati, umuntu uutenjilila pamulyango wechinka lyambelele, kuntu akoyinjilila pambi, emung’o nowakufumpula. 2Nomba uyo uwinjilila pamulyango, echembela wambelele. 3Eye mulonda wapamulyango eswilako, nembelele shilomfwa ishiwi lyakwe ulo ashita amashina ashiko. Elo alashitanjilila kumwemfu. 4Ulo ashifumya panse alashitanjilila, nembelele shilamukonka pakuti shalishiba ishiwi lyakwe. 5Tashikonkapo umulwendo, kuntu shilamutina nokumubutuka pantu tashayishibapo ishiwi lyakwe.”
6Yesu abebele nchi chelusho, kuntu bena tabaumfwilepo umo chalolele.
Yesu echembela uuweme
7Nakambi Yesu asosele kuli bo ati, “Nachine nkomweba ati, nine mulyango wambelele. 8Bonse abayishile pantanshi yanji bang’o nabakufumpula. Echo nembelele tashabomfwilepo. 9Nine mulyango. Umuntu onse uwinjilila pali nebo akwisa kupuluka. Akwisa kwinjila mukati nakambi nokufuma nokusanga ichakulya. 10Umung’o ena eshila ukwiba, ukwipaya nokonaula. Nomba nebo nalisa ukuti mwise mube nobumi, ubumi ubwinenene.
11“Nine chembela uuweme. Chembela uuweme apela ubumi bwakwe pamulandu wambelele. 12Umuntu uwamilimo, uutali chembela uuweme nakambi tashilipo nimbelele shakwe, ulo abona umumbulu akoyisa, alashisha imbelele nokubutuka. Echo umumbulu ulashisumaula nokushipalanganya. 13Umuntu uwamilimo alabutuka pantu ye wanchito bwaka, tasakamanako naku mbelele. 14Nomba nebo nine chembela uwawama. Nalishiba imbelele shanji, nasho shalinjishiba. 15Ukubati nimfilya Bata banjishiba, nandibo nalibeshiba Bata. Pamulandu ngu nalipela ubumi bwanji pamulandu wambelele. 16Eko shaba imbelele nashimbi ishanji, ishitali pali ngu mukuni. Nasho nakushileta pamo, shakumfwa ishiwi lyanji, elo shakwisa kuba mumukuni umo nachembela umo.
17“Bata balintemwa pakuti nalitula ubumi bwanji, ukuti njise mbutole nakambi. 18Takupo umuntu uwingafumya ubumi bwanji kuli nebo, kuntu ndabutula nemwine. Ndikwete ifiso fyakubutula, nakambi nokubutola nemwine. Nchi echo Bata bansambisha ukuti nchite.”
19Elo mwali ukulekana mukati kabantu pamulandu waku nga mashiwi. 20Abenji abaku bo balikweba ati, “Ngu muntu ali nomupashi uubi, alifuntile! Mba nindo mukokutikilako?”
21Nomba bambi balikusosa ati, “Umuntu uukwete umupashi uubi tekuti asosepo ifili nga mfi. Mba chibanda kuti chaposha shani impofu?”
Abayuda bakana Yesu
22Yali ninshita yapamwela, nenshita ya Kulya kwa Kuwamya inanda yaku Lesa, yalifikile mu Yelusalemu. 23Nomba Yesu alikwenda-enda munanda yaku Lesa mulukolo lwakwa Solomoni. 24Elo abantu bamushingulukile nokumufumba ati, “Mba ninshita ndo wakuyifisulula wemwine ukuti ewe Wasubwa waku Lesa? Twebeko apabuta tuutu ukuti twilokukayika-kayikapo.”
25Yesu alibasukile ati, “Ndimubushishe kale, kuntu tamukochetekelapo. Imilimo iyo nchita mwishina lyaku Bata, eyimfisulula. 26Nangu chibe mfi tamukochetekelapo pantu tamuli bamwichinka lyambelele shanji. 27Mbelele shanji shilomfwa ishiwi lyanji, nandibo nalishishiba, nasho shilankonka. 28Elo ndashipela ubumi butashila. Tashakafwepo nakambi takupo uwingashipokolola kuli ne. 29Pantu Bata abampela bakulu ukuchila pali bonse, epo takuli umuntu nangu umo uwingashifumpula muminwe yaku Bata. 30Bata nandibo twaba umo bwaka.”
31Abayuda mbalya batolele amabwe ukuti bamulase. 32Elo Yesu asosele ati, “Nebo nchitile imilimo iinji iyawama pamenso enu iyo Bata bampele ukuchita. Pali nji yonse, mba niwisa uwo mukofwayilapo ukundashilapo amabwe?”
33Abayuda balyasukile ati, “Tatukofwayapo ukukulasa amabwe pamulandu wamilimo iyawama iyo uchitile, kuntu nipamulandu wakusalula Lesa. Pantu webo uli muntu bwaka, kuntu ukoyilinga ukuba Lesa.”
34Elo Yesu abasukile ati, “Chalilembwa mu Mafunde enu ukuti Lesa akoti, ‘Mwebo muli balesa’#Amal. 83.6 35Lesa ayitile abo abaletele amashiwi akwe ukuti nibalesa. Ekuti Malembo Apatulika aaba akwebesha lonse. 36Nebo, Bata ba nsalile nokuntuma muno chalo. Mba nindo nomba mukonjebela ukuti nkosalula Lesa ulo nsosa ati nine Mwana waku Lesa? 37Kati nshibomba milimo yaku Bata, mwinchetekelapo iyowo. 38Nomba nga nkoyichita, nangu kati tamukonchetekelapo, chetekeleni milimo iyo nkobomba. Elo mwakwishiba ukuti Bata baba muli nebo, nandibo naba muli Bata.”
39Apa nakambi bafwayile ukumwikata, kuntu alifumpumukile muminwe yabo.
40Elo Yesu alibwelelemo nakambi kwishilya lyamulonga wa Yodani, apo Yohane alikubatishisha pakwamba. Eko ayile kwikala. 41Abantu abenji bayishile kuli Ye nokusosa ati, “Yohane tachitilepo imilimo iyafiso ifikulu. Nomba ifintu fyonse ifyo asosele ifyaku ngu fyakwebesha.” 42Elo abantu abenji bachetekele muli Yesu.
Currently Selected:
Yohane 10: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.
