Yohane 11
11
Yesu abusha Lasalo kubafwa
1Kwali umwalalume umo uwalikulwala, uwalikwitwa Lasalo. Alikwikala mumushi wa Betaniya. Wali emushi uwalikwikalamo Maliya nenkashi inakwe Malita. ( 2Ngu Maliya engulya uwayitulwile amafuta anunkila pamakasa aaku Bashikulu nokusumuna nemishishi yakwe. Ndume yakwe Lasalo alilwele.)#Luk. 10.38-42; Yoh. 12.11 3Echo inkashi shakwe shatumine amashiwi kuli Yesu ati, “Bashikulu, chibusa wenu mulwele.”
4Ulo Yesu aumfwile, asosele ati, “Ukulwalapo nku takuli kwamfwa iyowo. Nchi chachitika ukuti chilete ubuleme kuli Lesa. Pamulandu wabulwele mbu Umwana waku Lesa akupokelelamo ubuleme.”
5Yesu atemenwe Malita nenkashi inakwe pamo na Lasalo. 6Ulo aumfwile amashiwi akulwala kwakwa Lasalo, aayikele pali nchilya chifulo inshiku shibili. 7Kumupwilo wanshiku nshi, Yesu asosele kubakusambila bakwe ati, “Katulokuya ku Yudeya.”
8Nomba abakusambila bakwe balimwasukile ati, “We musambishi, papita bwaka inshita inini, abantu nkulya bafwayile ukukulasa amabwe. Kanshi nakambi mukofwaya ukubwelelako?”
9Yesu abasukile ati, “Kanshi mukasuba tamwaba maoola ikumi na abili? Umuntu onse uwenda mukasuba tekuti ayitutulepo, pantu akasuba kakosanika. 10Nomba ukoyenda mubushiku kuti ayitutula, pakuti ali mumfinshi.” 11Panuma yaku mfi, Yesu asosele kubakusambila bakwe ati, “Chibusa wesu Lasalo alilele, kuntu nkoya kumubusha.”
12Abakusambila balimwasukile ati, “Bashikulu, kati alele bwaka utulo, akupola.”
13Nomba Yesu alikweba ati Lasalo alifwile. Lelo bena balangulukile ifyakulala utulo bwaka. 14Epo Yesu alibebele apatubile ati, “Lasalo alifwile. 15Nomba pamulandu waku mwebo natemwa pakuba nebo tanshalipo nakwe, epo mwakuchetekela. Katulokuya.”
16Tomasi, (uwalikwitwa Mpundu,) asosele kubakusambila banakwe ati, “Katulokuya pamo nomusambishi, tukafwile pamo nakwe!”
Yesu ekubuka nobumi
17Ulo Yesu afikile, asangile ukuti Lasalo alindako munshinshi inshiku shine. 18Ukufuma kumushi wa Betaniya ukuya ku Yelusalemu, tayakumenepo imilundu itatu. 19Abena Yudeya abenji balishile mukubona Malita na Maliya, mukubashinshita pamulandu wamfwa yakwa ndume yabo.
20Ulo Malita aumfwile ati Yesu akoyisa munshila, alile mukumuchinsha, kuntu Maliya ashele ekele munanda. 21Elo Malita asosele kuli Yesu ati, “Bashikulu, nga mwali nkuno indume yanji nga tayafwilepo! 22Nomba ndishibile ukwebati nangu ninduno Lesa kuti amupela chonse icho mukolomba.”
23Yesu alimwebele ati, “Indume yobe yakubuka kubumi.”
24Malita aasukile ati, “Ndishibile ukwebati akwisa kubuka nakambi mukubuka kwabafwa mukasuba kakumupwilo.”
25Yesu asosele kuli ye ati, “Nine ukubuka nobumi. Uyo onse uuchetekela muli nebo, akuba nobumi nangu aafwa. 26Na uyo uwakwikala nokuchetekela muli nebo, tayise kufwa iyowo. Napo ukochetekela mfi?”
27Malita aasukile ati, “Ina, Bashikulu. Nkochetekela ukuti mwebo nimwe Uwasubwa, Umwana waku Lesa, uyo uwakwisa panonshi.”
Yesu alilile umusowa
28Panuma ulo Malita ashilile ukusosa mfi, alibwelelemo mukwita nkashi inakwe Maliya. Mubumfishi alimwebele ati, “Umusambishi afika ali nkuno, akokwita.” 29Ulo Maliya aumfwile mfi, bwangu-bwangu alimine ukuya kuli Yesu mukumukumanya. ( 30Yesu aali talafika kumushi, kuntu alipenka mpalya apo Malita amukumenye.) 31Abantu abali munanda pamo na Maliya abali kumushinshita, ulo babwene ayima mukasaku ukuya panse, balimukonkele, bakolanguluka ati nangula aya kunshinshi mukulila.
32Ulo Maliya afikile kuchifulo ukwali Yesu, ulo amubwene, bwangu-bwangu awile pamakasa akwe nokusosa ati, “Bashikulu, nga mwali nkuno indume yanji nga tayafwilepo iyowo.”
33Yesu ulo amubwene akolila, nakambi nokubona abantu mbalya abali pamo nakwe bakolila imisowa, umutima wakwe wayiketwe ichikonko. 34Elo afumbile ati, “Nikwisa mwamushika?”
Bamwasukile ati, “Bashikulu iseni mubone.”
35Yesu alililile. 36Abantu basosele ati, “Boneni ifyo amutemenwe!”
37Nomba bambi basosele ati, “Ngu muntu ewaposeshe mpofu. Napo nga takenyepo Lasalo ukuti efwa?”
Lasalo abuka kubafwa
38Yesu ayiketwe nakambi ichinkonko ichikulu. Ayile kunshinshi, lwali luchengo napamwinshi bashinkilepo ibwe. 39Yesu abebele ati, “Fumyenipo ibwe.”
Elo Malita, nkashi yakwe uwafwile, ayasukile Yesu ati, “Bashikulu, ino nshita akonunka pakuti nomba papita inshiku shine ukufuma apo bamushikile!”
40Yesu amwasukile ati, “Napo nshikwebelepo kale ati wakubona ubuleme bwaku Lesa nga wanchetekela?” 41Elo abantu bafumishepo ibwe. Nomba Yesu aloleshe kumulu nokusosa ati, “Nkomutota Bata pakuti mulang’umfwa. 42Nalishiba ukuti mulang’umfwa inshiku shonse, kuntu nasosa mfi pamulandu wabantu mba abali mpano, ukwebati bachetekele ukuti nimwe mwantumine.” 43Panuma yakusosa mfi, alibilikishe neshiwi ilikulu ati, “Lasalo, fuma!” 44Elo uwafwile alifumine, alipombelwe kumolu nakumaboko nensalu isho bamushikilemo, pamo nechitambala icho bamupombele kumenso. Elo Yesu abebele ati, “Mukakuleni alokwenda.”
Bapinga ukwipaya Yesu
(Mat. 26.1-5; Mk. 14.1-2; Luk. 22.1-2)
45Abantu abenji abayishile mukubona Malita balibwene ifyo Yesu achitile, echo balimuchetekele. 46Nomba bambi nabo bayile ku Bafalisi nokubeba ifyo Yesu achitile. 47Elo Abafalisi nentungulushi shabachipupila nabakulu ba Bayuda balikumene nokusosa ati, “Twakuchita shani? Lolesheni pafyafiso ifikulu fyonse ifyo ngu muntu akochita! 48Kati atwamuleka ukuti apitilile ukubomba muli nji nshila, abantu bonse bakumuchetekela. Elo ababuteko bwabena Loma bakwisa muchifulo chabuta nokonaula inanda yaku Lesa nomutundu wesu!”
49Umo uwaku bo, uwali kwitwa Kayafasi, uwali chipupila mukulu muli ngulya mwaka, aebele ati, “Mwebo findo mwishibile! 50Kanshi tamwayishiba ukuti chiweme umuntu umo ukufwila abantu muchifulo chakonaula umutundu onse?” 51Ukuba tayisosele umwine enka, pantu ewali chipupila mukulu muli ngulya mwaka, aloseshe ukuti Yesu akufwila umutundu wa Bayuda. 52Tekufwilapo Bayuda benka iyowo, kuntu nokulonganya abana baku Lesa bonse abo abapalangana.
53Ukufuma pali nkalaya kasuba, abakulu ba Bayuda bapingile ukwipaya Yesu. 54Pamulandu ngu, Yesu talikwendapo ichende-ende muchalo cha Yudeya, kuntu alifumineko nokuya kuchifulo ichali mupepi namuchiswebebe, kumushi wa Efulaimu, uko ayikele nabakusambila bakwe.
55Ukulya kwa Bayuda ukwa Chakulya Chakuchilila kwalipalamine. Abantu abenji abafumine mumishi yonse iyapusana-pusana bayile ku Yelusalemu mukuyiwamya#11.55 mukuyiwamya: Abayuda abatali kulama Amafunde akwa Mosesi, balikubakanya ukuchita utufuto utwakulombelamo Lesa kufikila ulo basangululwa munshila yasuminishiwa na Mafunde ngalya. ukulya kutalafika. 56Abantu balikufwaya Yesu ulo balongene munanda yaku Lesa. Bafumbene umo nomunakwe ati, “Mba mukolangulukapo shani? Napo nachine tayisepo kuli nku kulya?” 57Intungulushi shabachipupila na Bafalisi bapele abantu amafunde aakuti nga kwakuba umuntu uwakwishiba uko Yesu ali, alingile ayisa mukusosela ukwebati bamwikate.
Currently Selected:
Yohane 11: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.
