Yohane 9
9
Yesu aposha umuntu uwafyelwe impofu
1Ulo Yesu alikwenda, abwene umuntu umwalalume uwafyelwe impofu. 2Abakusambila bakwe balimufumbile ati, “We musambishi, mba ninani uwabifishe ukuti ngu muntu afyalwe impofu? Napo mwine nangula bafyashi bakwe?”
3Yesu alibasukile ati, “Ngu muntu tabifishepo nangula abafyashi bakwe, kuntu afyelwe impofu ukuti imilimo yaku Lesa emo ibonekele. 4Apo kachili kasuba tulingile ukubomba imilimo iyaku ngulya uwantumine pantu ubushiku bukoyisa umo tutangabombamo. 5Ulo nchili muno chalo, ndi kusanika kwachalo.”
6Panuma yakusosa mfi, Yesu ashipile amate panshi. Elo afubile iloba namate nokulisuba pamenso aku ngulya muntu uwafyelwe impofu. 7Amwebele ati, “Koya kasambe kumenso muchishiba cha Siloamu#9.7 muchishiba cha Siloamu: Chishiba chimbi ichaba mu Yelusalemu. Echo bakososapo mu 2 Ishamf. 20.20; 2 Mil. 32.30..” (Ndi shina lyaalula ati, “Uwatumwa.”) Echo ngu muntu alile nokusamba kumenso nokubwela akobona.
8Abena mupalamano bakwe nabantu bambi abalikumubona uwakupula-pula, balifumbile ati, “Napo ngu muntu tengulya uwayikalile ukupula-pula?”
9Bambi balisumine ati, “Ina, eye.” Nomba bambi nabo balikene bati, “Iyowo teyepo, apalene bwaka naye.”
Elo umwine asosele ati, “Nine.”
10Elo balimufumbile ati, “Mba chilengele ukuti ulokubona chindo?”
11Alibasukile ati, “Umuntu uwitwa Yesu, afubile iloba nokulisuba pamenso anji. Anjebele ati, ‘Koya kasambe kumenso muchishiba cha Siloamu.’ Epo nalile. Bwangu-bwangu ulo nasambile, natatikile ukubona.”
12Elo bamufumbile ati, “Nikwisa ali?”
Naye ayasukile ati, “Nshishibilepo uko ali.”
Abafalisi bafwayilisha umulandu
13Elo bayile nangulya muntu uwali mpofu ku Bafalisi. 14Akasuba ako Yesu afubilemo iloba nokuposha ngu muntu kali ke Sabata. 15Abafalisi nakambi balimufumbile ati, “Nga achitile shani ukuti ubone?”
Ye alibebele ati, “Afubile iloba nokunsuba pamenso anji. Echo nomba nkobona.”
16Bambi abamu Bafalisi basosele ati, “Umuntu ngu uukochita mfi tafumapo kuli Lesa iyowo, pantu tasungapo Amafunde akasuba ke Sabata.”
Nomba bambi nabo basosele ati, “Mba umuntu imbifi kuti achita shani imilimo iyafiso ifikulu nga nji?” Elo mwali ukulekana mukati kabo.
17Abafalisi balimufumbile ngulya muntu nakambi ati, “Nga nomba webo ukotipo shani pali ngu muntu?”
Naye alyasukile ati, “Musoseshi.”
18Abayuda tabasuminepo ukwebati ngu muntu ewali mpofu, kuntu nomba akobona. Echo bayitile abafyashi bakwe 19nokubafumba ati, “Napo ngu mwana ewo mukoti afyelwe impofu? Kanshi nomba akobona shani?”
20Abafyashi bakwe balyasukile ati, “Ina, tulishibile ukuti ngu mwana wesu, nakambi afyelwe impofu. 21Nomba tatwishibilepo ifyo atatikile ukubona. Mufumbeni umwine, mukulu, akoyiyasukila umwine!” 22Abafyashi bakwe basosele mfi nipamulandu wakutina abakulu. Mba basuminishenye kale ati onse uwakwisa kusumina ukwebati Yesu Ewasubwa waku Lesa, bakwisa kumutamfya munanda yakulombelamo Lesa. 23Echo abafyashi bakwe basosele ati, “Mukulu umwine, mufumbeni!”
24Inshita iyachibili bayitile ngulya muntu uwafyelwe impofu nokuti kuli ye, “Laya kuli Lesa ukuti webo ukososa ukwebesha! Fwebo tulishibile ukuti ngu muntu uukuposeshe nimbifi.”
25Elo ayasukile ati, “Nebo nshishibilepo ati nimbifi nangula iyowo. Chimo icho njishibilepo chakwebati nali impofu, nomba nkobona.”
26Bo balimufumbile ati, “Akuchitile shani? Nga achitile shani ukuti ubone?”
27Elo abasukile ati, “Ndimwebele kale, kuntu tamukofwayapo ukumfwa. Mulandu ndo mukofwaya ukumfwa nakambi? Napo namwe mukofwaya ukuba abakusambila bakwe?”
28Bo balimwebawile nokuti, “Webo uli wakusambila waku ngulya muntu, kuntu fwebo tuli bakusambila bakwa Mosesi. 29Twalishiba ukuti Lesa asosele kuli Mosesi, kuntu ngu muntu, fwebo tatwishibilepo noko afuma.”
30Umwalalume ngulya asosele ati, “Nchi chakushimbwisha ichakuti mwebo tamwayishibapo noko afuma, kuntu nebo alimposeshe! 31Twalishiba ukuti Lesa tomfwapo mbifi, kuntu omfwa abantu abamuchinshika nokuchita ifyo afwaya. 32Ukufumina pakutatika kwachalo, tatwabonapo umuntu nangu umo uwaumfwapo uko umuntu aposeshe umuntu uwafyelwe impofu. 33Ngu muntu kati taafuminepo kuli Lesa, tekuti achitepo akantu nangu kamo.”
34Balimwasukile ati, “Webo wafyalilwe nokulelwa mububi, epo kanshi ukofwaya ukutusambisha?” Elo balimutamfishe kunse yananda yakulombelamo Lesa.
Ifyakupofula kwamumutima
35Ulo Yesu aumfwile ukuti bamutamfisha kunse nokumusanga ngulya umuntu, amufumbile ati, “Napo ukochetekela mu Mwana wa Muntu?”
36Ye alimwasukile ati, “Njebeniko, ninani Umwana wa Muntu ukuti muchetekele?”
37Yesu amwasukile ati, “Ulimubwene, ewo mukososhanya nakwe nomba.”
38Elo asosele ati, “Nkochetekela, mwe Bashikulu.” Elo afukeme pamakasa aku Yesu nokumutotela.
39Elo Yesu asosele ati, “Nayisa muno chalo mukupingula ukuti impofu shilokubona nakambi nambalya abakobona baaluke impofu.”
40Bambi Abafalisi abali pamo nakwe balyumfwile ifyo Yesu asosele. Elo bamufumbile ati, “Napo nafwe tuli mpofu?”
41Yesu alibasukile ati, “Nga mwaba impofu, nga tekuti mukwatepo umulandu, kuntu apo musosa ukuti, ‘Tulabona,’ mwalikwata umulandu.”
Currently Selected:
Yohane 9: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.
