Marcos 12

Ema Jesús máimikutichina ena pártirarioana máurira'ana

(Mt 21.33-46; Lc 20.9-19)

1Ema Jesús tépanawapa máimitukawaka'i eta máimikutichakene'i. Máichawakapa:

–“Matiari'i ema achane, tikaewaru'i kamuri eta uwa te máesane, tási'a manaruaka'iware eta masukure. Máepiyakawarepa eta nakatikaresi'ayare eta tachi eta uwa, máepiyakaware eta torre, nápani'ayare eta najaneasirayare eta máewaru.

Tási'a, máijarakapa ena achaneana, pártirariuanayare'i. Taicha ema achane tiyanayare'i te apana awasare. 2Taka'e, te títekapapa eta kaje taya'aira'i eta uwa, máimiwanerekapa ema mamusura nayaseapanawakayare'i ena pártirarioana'i eta maye'eyare'i ema tikaye'e. 3Énasera tisemauchawanaichucha, nakaratakapa náe'apa ema wanairuka'i. Tichawapa ema, tájina náijaraka'ini. 4Taka'e ema tikaye'e máimiwanerekawarepa ema apana mamusura, énasera naepuchirikapa najarasikapa te machuti, tási'a náume'awarepa. 5Máimiwanerekawarepa ema apana, éneichuware nakapakaware. Taka'e máimiwanerekawarepa ena apamuriana kamurianapana, éneichuware tiápechawanapa náe'awarepa, nakapakawakapa ena apamuriana.

6“Matiari'icha'asera ema apana: émajakaruwapa ema machicha máemunarukene'i máewatakapa ema, máimijachaine'i: ‘Émaina'ipukaini napikaucha'ini ema machicha.’ 7Te'esera te náima'apa ema machicha ema tikaye'e eta úwakiji, naka'emuripa: ‘Émainapapuka tikaye'eyare ema maka eta maima'akeneana ema maiya, yare vikapaka apaesa tánasipa viye'ena eta maye'eya'ini.’ 8Taka'e nakaratakapa, tási'a nakapakapa, nákijikapa eta máke'e te aneka taye'e eta úwakiji.

9“¿Tási'a tája'apuka máicharakawakayare ema tikaye'e eta úwakiji? Waipa májapanuwakaima'i, makapakawakaya ena pártirarioana'i, máijarakainapa ena apamuriana.

10“¿Wa'i échejiku'a'ini eti eta Takapika'ukene Ajureka? Ani taka'e'i:

‘Ena tépiyarekara'iana eta peti,

tasapi'apa náepuru'i eta mari táikuchi'i tatumearayare,

taicha wa'i náimati'ini.

11Émasera ema Tata tepiyaka'i,

ichape eta taramikarewa'i.’ ”

12Nawara'ainipa nakaratakayare'íni ema Jesús, taicha tímatiakawanapa eta énaira'i tayunakawaka'i eta máimikutichirawaka'i. Énasera tipikakarakawana'isera naye'e ena achaneana, taka'e, najunijiakapa tási'a tiyananapa.

Nakayesesereru eta takayemekene eta nayase'ana

(Mt 22.15-22; Lc 20.20-26)

13Nawanekapa ena témejekapawachanayare ema Jesús. Natiari'i'i ena fariséuana machamuriana'i ema Aluresi, apaesa étaina'ipukaini taviucha'ini. 14Te náitekapauchapa, náichapa:

–Tata maestro, vímati'i eta tatupiruwaira'i eta pímiturapiana'i, wa'i pipikakarakawa'ini eta péchejisi'aira'i eta náichawakenewa'i nákani achaneana, wá'iware pesacha'ini pisama'ini eta nakayemakeneana'i. Taicha piti pimitukawaka'i eta táurinakene achene tikaiju'e me Viya. ¿Táurika'ipuka viwachacha eta viyase'ana maye'e ema akenuka emperador romano? ¿Tiuripuka viwachacha wa'ipuka?

15Émasera ema Jesús máimatiwane'i eta apimirairawaka'i ena, tási'a máichawakapa:

–¿Tája'a takayema ewara'a ímiakipaikanu? Níma'aseji, iáminanu étapena eta reale, apaesa íma'a.

16Ena náminapa, tási'a ema Jesús máichawakapa:

–¿Nája'a tikaijare eta juka, nája'aware tikawasima'i eta juka mirare eta te juka reale?

Ena najikapapa:

–Maye'e ema akenuka emperador.

17Taka'e ema Jesús máichawakapa:

–Puiti táurika'i íjaraka ema emperador eta maye'eichu'i ema emperarador, tási'a íjarakaware ema Viya, eta maye'eichu'iware ema Viya.

Te nasamapa eta majikapirawaka'i, náramine'i.

Nakayesesereru eta náechepusirayare ena animana

(Mt 22.23-33; Lc 20.27-40)

18Naka'epaipaware ena apamuriana achaneana, saduceoana. Ena nani saduceoana, apana'i eta náimiturapiana'i, ena wa'i nasuapa eta náechepusirayare eta nachanewa ena náepenakeneana. Tiyananapa náima'apana'i ema Jesús. Ánipa naka'e:

19–Tata maestro, ema Moisés manakika'i eta Ajureka máechejiriruwa'i eta viye'e, te máepenaekene'a'ipuka ema achane esu mayena, tási'a, nájinaicha'apuka machichaina'ini, te matiari'i'ipuka mákani maparape'i, mave'ayare esu machinenaekeneni, apaesa émainapuka makachicha eta suye'e, máitsiwaina'ini ema maparapeni. 20Taka'e natiari'i ena siétekeneana tikaparapejirikakana, te títauchawapa ema náechavimuri, máepenaekene'apasera esu mayena. Nájina'i machichaina'ini. 21Taka'e ema mae'iruichu, makaparapepa esu tepenaima'i, émasera éneichuware máepenaekene'aware, nájinaware machichaina'ini. Éneichuware máepenaekene'aware ema namapananekene, 22tási'a namutu'i ena sietekeneana, nájinasera émanaina'ini mákachicha'ini eta suye'e. Te táekenepa, tépenapa esu esenaini. 23Taka'e puiti, te apánapapuka eta náitaresirayare ena nani, ¿nája'apuka ena siétekeneana ema yátupikene'i suímakene'i esu esena, taicha ena siétekeneana namutu'i suímawaka'i?

24Ema Jesús majikapawakapa:

–Tetavikawa eta éjekapirawa'i eti wa'i ímati'ini eta táimiturapi eta Ajureka, eta tamutuira'iware marata'a ema Viya. 25Te apana náitaresiraya, waipa nákamunuima'i esu esena. Énaipa ena esenana wáipaware nákamunuima'i ema ajaira. Nakutinapa ena ángeleana tiávi'ana'i te anuma. 26Tayanapane naechepuka ena naepenakeneana'i, ¿wá'ipuka échejiku'a'ini eti, eta libro májuchakeneana'i ema Moisés, te máechejikapa ema Viya? Ema Viya, eta maka'e'i: ‘Nútira maye'e Viya, ema Abraham, ema Isaac émapa ema Jacobo.’ 27¡Ema Viya, ema técha'i eta náitaresirana ena té'ikana'i, tayanapane eta naépena'ini! Eti ichape eta éjekapirawa'i.

Eta tisuapakarepana'i te mawanairipiana ema Viya

(Mt 22.34-40)

28Taka'e, matiari'i'iware ema émana escriwáno. Masamararaka'i eta nakanarajirisirakaka'i, temeña'awapa, tási'a mayaserekapa:

–¿Tája'apuka tinapuika'i eta tisuapakarepana'i eta wanairipiana'i?

29Májikapapa ema Jesús:

–Eta tinapuika'i eta wanairipi, eta'i eta juka: ‘Esama eti israelítana: ema eye'e Viya. Najina apanaina iákenuina, emanaichu'i ema Viya. 30Pémunaka ema Viya, pijaraka tamutu eta pisamure eta piachanewa, étapa eta pipanereruana.’ 31Jarari'iware eta apana táe'iru'i: ‘Pémunaka ema piparaepiya, tákuti eta pémunasirawa'i píti.’ Tajina apanaina wanairipina, takachurika'ini eta juka.

32Ema escriwáno, máichapa:

–Yátupikene, Tata Maestro, tétupikawa'i eta péchejiriruwa. Yátupi'i eta makarichuira'i ema Viákenu, eta nájinaira'i apanaina'ini Viákenuina'ini. 33Pémunaka ema Viya, pijaraka tamutu eta pisamure, eta pipanereruana, eta pitumewa, étapa eta vémunasiraina ema viparaepiya'i, takuti eta vemunasirawa'i viti, taicha wa'i takuti'ini eta víjarakasichira'i eta sárareana, eta víjuchakeneana'i. Táetavika'i taye'e eta apamuriana viámawa'uana eta me Viya.

34Ema Jesús máimatiekene'apa eta táuriwa eta majikapira ema achane. Tási'a, máichapa:

–Píti piane'ipa pitekapa eta te mawasa ema Viya akenuka te anuma.

Tási'a wáipa napatsikawa'ini nápecha'ini nayasereka'ini'i

¿Tavi'apuka masi'a ema manerejiru ema Viya?

(Mt 22.41-46; Lc 20.41-44)

35Ema Jesús tímitureka'i te mapena ema Viya, tási'a mayaserekawakapa:

–¿Tajapuka takayema eta naka'e'i ena escriwánuana, tiúchukayare ema Cristo, mámariekene'i ema rey David? 36Yátupi émara ema Machanewa Viya tíjaraka'i eta maitukakene ema David, maka'epa:

‘Ema Tata Viákenu máichapa ema Tata Nákenu:

Yare péjaka te nuwaure,

eta pikuchapi'ayare eta nukaepuyusiraya

te pimira'u ena tikatianakaviana'i

nunakayare te tapeku te piwape.’

37Ema David, eta máimijarechira'i ema Cristo Tata Nákenu, ¿tája'apuka takayema eta machichaira'i?

Ena kamurikeneana achaneana náurika'i eta nasamararaka eta máimiturapiana'i ema Jesús.

Ema Jesús máimereuchawaka eta náejekapirawana ena escriwánuana

(Mt 23.1-36; Lc 11.37-54; 20.45-47)

38Ema Jesús, maka'e'i eta máimituresira'i: “Échapawayare naye'e ena escriwánuana, taicha tétavikawa'i náurisira'i tiúmaji'ana, nawaraira'i tikapika'uanayare'i eta náechejisiraya te plaza. 39Takutikene tinerejiurukawana eta táurinakeneana téjasi'akareana, eta te peti naúrujisirarewana ena juriyuana. Étaipa te nanisirana, tikaejakawanaware te távi'ana'i eta tiúrinisipanana tinikakareana. 40Takutikene naverejikaware eta nakaye'ekeneana ena tépenaimana. Tiupiemána eta nayujarásira. Énasera tiápajukawana'i eta náikuñayare muraka.”

Eta sunakiruwa esu máimaru paure

(Lc 21.1-4)

41Ema Jesús, tejaka'i te tamira'u eta chapama'i nanakakuirare'i eta námawa'uana. Máimararakawaka'i ena achaneana eta nanakakuira'i eta námawa'uana. Natiari'i'i ena ríkuana, tinakikawanapa'i ichapemuri plata. 42Taka'e, títekapapa esu esena suépenaimakene'i, páurekene'i esu, sunakika'isera eta apipechicha'i eta suplatane, wá'ichu kamurina'ini. 43Taka'e ema Jesús, máichu'amuripa ena máimitureana, tási'a máichawakapa:

–Íma'a esu suka esena páurechicha, jé'esare esu, tímepanawa'i eta sunakiruwa'i, sukachurikawaka'i namutu ena apamuriana achaneana tinakikawana'i, 44taicha namutu ena, nanakika'i eta náemacharajiana eta naplataneana. Ésusera esu suka páure'ineni, sunakika'isera tamutu eta sukaye'ekene'i. Suíta'i eta suníkawachayare'ini.

Currently Selected:

Marcos 12: IGB

Highlight

Copy