Maarko 15

Yeesu ɓayuuɗ ŋ Pilaat ne a atte'u

1Wa Kooh wiis na ɓaaɓa teel, kilifaacaŋ seeƴkiɗoh caŋ waasiŋ Musaa cohha na jangɗohoh caŋ wa, na yakak ca, na saangnaŋ atte'oh ca jen. Ɓa tokɗukka Yeesu, ɓa ɓayya ɗe ŋ Pilaat.

2Wa ɓa ree, Pilaat meekissa ɗe ne : « A fu buuriŋ Yawuut ci e ? » Yeesu loffa ɗe ne : « Fu woyiɗa ! » 3Kilifaacaŋ seeƴkiɗoh caŋ waasiŋ Musaa yambeeɗa ɗe in laayiɗ. 4Pilaat woyissa ɗe ne : « Fu lofanɗi e ? Fu kerahɗi in ci laayiɗ ci ɓa na yambee ɗa e ? » 5Waaye Yeesu lofisɗi ali in ; ineem feyya Pilaat.

6Waam, feet Paak reyeen ɗah, Pilaat faɗsiɗ ɓa ambuuɗ yino ŋ ɓa nik ŋ kasoona, ɓeɗ na tanootee ɗe. 7Wa raakeen ƴaar teeku Barabaas ; a ɓaahee ŋ ɓa hiñohee na nguura. Wa kurka yoond, ɓa apee ɓo', ɓa taƴuusa ŋ kasoona. 8Mboolnda kaɗta ŋ Pilaat, ɓa woyeeɗa ɗe ne : « Haɓɗiɗa ɓoo ini fu na cure ɓoo tumiɗ kiis nu ree. » 9Pilaat loffa ɓa ne : « Ɗu waaɗ ne ŋ faɗsiɗ ɗu buuriŋ Yawuut ci e ? » 10A inheen ne waaɗa ɓooɓa waaɗ Yeesu, weɗ tah po kilifaacaŋ seeƴkiɗoh caŋ waasiŋ Musaa degga ɗe ŋ yaah ciŋ ɗe. 11Waaye ɓa yoppa mboolnda ne ɓa woyaat ne : Barabaas ! 12Pilaat woyissa ɓa ne : « Moo ɗu waaɗ ne ŋ tum ƴaari ɗu teek buuriŋ Yawuut ci na ? » 13Ɓa leehkisseeɗa ŋ ɗafka ne : « Daaƴaa ɗe ŋ kurwaa ! » 14A meekissa ɓa ne : « A haɓiɗ ye in moɗaaɗi ? » Waaye ɓa uupeeɗa nga leehuk ŋ ɗafka an : « Daaƴaa ɗe ŋ kurwaa ! » 15Pilaat waaɗta jam, a taambiɗta mboolnda ŋ ini neɓ ɓa ; a faɗsiɗta ɓa Barabaas, a nakohha Yeesu laɓu na leraw po ƴutta, a eɗta soldaar ca ɗe ne ɓa daaƴ ɗe ŋ kurwaa.

16Ɓa ɓayya ɗe leero kahan goornoor, ɓa ɓeeɗukka soldaar ca ɓinooɓa jen. 17Ɓa ɓekiɗta ɗe kulɓa ruumind po haa buur, ɓa teɗta ñapir, ɓa ɓekiɗta ɗe wa ŋ haf findi mbahne-buur. 18Ɓa kañɗeeɗa ɗe an : « Ɓoo ɓii kañiɗ ɗa buuriŋ Yawuut ci. » 19Ɓa laɓeeɗa ɗe ŋ haf na ngeer, ɓa tuhseeɗa ɗe, ɓa ƴekeeɗa ŋ fikiice. 20Wa ɓa njembit ɗe po ƴutta, ɓa wolla kulɓaaka ɓa ɓekɗee ɗe, ɓa ɓekɗissa ɗe kulɓaacaŋ ɗe, ɓa ɓayeeɗa ɗe bilaf fa ne ɓa daaƴaa ɗe ŋ kurwaa.

Yeesu daaƴuuɗ ŋ kurwaa

21Waam raak ƴaar gen Sireen teeku Simong, baabiŋ Aleksaandar na Rufus, a pulohee ɓak caŋ yohon ca, a lahha ndaam, ɓa tufukka ɗe ne a deguk kurwaaniŋ Yeesu. 22Ɓa ɓayya Yeesu po ŋ ɗiska na woyse Golgota, wa tokis "Ƴoh-haf", 23ɓa waaɗta ɗe anɗukoh biiñ ambsohuuɗ na miir#15:23 miir : wa cuuraay, wa na fuuɗseeɗi. Wa na woyse "myrrhe" ŋ farañse., waaye a anɗi. 24Ƴutta, soldaar ca daaƴca ɗe ŋ kurwaa, ɓa piilohha kulɓaacaŋ ɗe#Sabuur 22:19 ne yaa nu nga ɗah inah ini a joy raak. 25Wa raak yoor-yoora aaseeɗa. 26Raakka ina ɓa fiis ndaam, ne wa teeɓoh ini tah ɗe daaƴu. Ɓa fiisee inii : « Buuriŋ Yawuut ci. »

27Yeesu daaƴsee na rokoh kanak, yii lahha ɗe yaah-ñaahum, yum yaah-sing. [28]#15:28 Ngaŋ Fiis ci maañiɗ ci, cum raak ayaanii : "Ineem raakka ne ina Fiis ca woyee raak, an : « A ɓaahndohuuɗ ŋ tumoh moɗaaɗiica. »" (Esayi 53:12). Waaye Fiis ci uup woor ngaŋ ci maañiɗ ci ris woti raakɗi woo keem. 29Ɓooɓa taambee ŋ ɗiska njembteeɗa ɗe, ɓa kuɗteeɗa haf, ɓa ɓaseeɗa ɗe an : « Ngec ! Fu yi woyee ne, fu hey yahrohe Kahniŋ Kooh, fu taɓahisa ŋ neeh kaahay, 30mucɗa haf fu, fu ruhus ŋ kurwaani #Sabuur 22:8! » 31Kilifaacaŋ seeƴkiɗoh caŋ waasiŋ Musaa ŋ harmban ɓa, na jangɗohoh caŋ wa nameeɗa ɗe njembit an : « A mucɗiɗ ɓinooɓi, a minɗi muciɗ haf ce ! 32Mucɗohi Gapohse, buuriŋ Israayel, ruhsaat ŋ kurwaani win-win, ɓoo hot, ɓoo han kos. » Ɓa daaƴsee na ɗe nameeɗa ɗe ɓas.

Kaanaŋ Yeesu

33Wa njooloora ree, kehƴi jen nikka ŋ ñuus ini ree wahtu kaahay. 34Wa wahtu ceem mit, Yeesu leehukka ŋ ɗafka, a woosa ne : « Eloyi ! Eloyi ! Lema sabahtani ? » weɗ ne "Koohiŋ ngo ! Koohiŋ ngo ! Wa ye tah fu faɗta so ?#Sabuur 22:2" 35Ɓi ɓo' ɓaah ŋ ɓa nikee ŋ ndaam kerahhaa, ɓa woosa ne : « Kerhaat, a na ɓeeɗke Ilyas#15:35 Ilyas : tiikiŋ "Ilyas" na tiikiŋ "Eloyi", findi ɓa na woyohee ca, ca reɓ reɓ mand. ! » 36Ƴaar nga ɓa nuppa, ɓayya daah, a hooƴcaa ŋ masuɓ raakiɗ bineegar, a tokkaa ŋ lecem ndooɗ, a deggaa ŋ nguɓiŋ Yeesu ne a an. Ƴaara woosa ne : « Sekaat ɓoo marak, andi Ilyas hey ɗe hee ruhsiɗe ŋ kurwaani. »

37Yeesu leehukka, nguɗta. 38Ridoona ɗasɗee Ɗiska Hoolohngaanaŋ Kahnaŋ Kooh faarukka tareet ini kooɗoh ɗafka po kehƴa.#Pula 26:31-33 39Ƴaara adgohee soldaar ca, ya tufkee ŋ fiki Yeesu, hotta findi a kaanoh, a woosa ne : « Wa keeh ne ƴaarii nikee Kuɓu Kooh. »

40Raakeen ɓitiɓ ca tufkee usiɗ markeeɗa. Mari Makdala ɓaahee nga na Salome na Mari yi yaay ɓi Yoose na Saak yi ƴini. 41Ɓeem ɓeɗ ñaakɗee Yeesu te ɓeɗ meeɗ ɗe taambkoh wa a nik ŋ Galile. Nameen raak ɓitiɓ wiiriis laayiɗ, ɓaah ŋ ɓa hunee na ɗe Yerusalem.

Ɗaakuukaŋ Yeesu

42-43Ŋ noh niinɗaŋ mbehi na kooɗkohse, wi adug mbehi na iɗsiɗkohse#15:42-43 Mbehi na iɗsiɗkohse, wa na cambe juma na niin, weɗ ne muyohaaɗ-nohaŋ mbehi na kooɗkohse, wa reeh ŋ gaaw ne noha muyeeɗa., Suseef ya genee Arimate hayya. A nikee ɓo' yeguuɗ ŋ atte'oh ca te a yi ŋ haf ce, a namee sek Nguuriŋ-Kooh. Hooɓa wa kee hooɓa tahha po a kaɗta ŋ Pilaat na fit, a meekissa ɗe fiɗaafa. 44Pilaat feyuusa wi a kerah ne Yeesu ariɗ kaan, a nakohha ɓeeɗkiɗu ƴaara adgohee soldaar ca, a meekissa ɗe andi a ɓaatsiɗiɗ kaan. 45Pilaat kerahha ini yeem lof, a teyɗukiɗta Suseef ne a ɓayaat fiɗaafa.

46Suseef rommba uuf leeŋ, a ruhsiɗta faanaŋ Yeesu ŋ ɗiska wa daaƴsee ; a lemessaa na uufa, a ɓekkaa ŋ ruy-ruy huruuɗ ŋ atoh. Ƴutta, a pilnginnda atoh yakak, a ranngaa naa. 47Raak Mari Makdala na Mari yaay ɓi Yoose nga, ɓa markeeɗa ŋ ɗiska Yeesu ɗaaku.

Currently Selected:

Maarko 15: YM

Highlight

Copy