Maarko 14

Kilifaacaŋ Yawuut ca waaɗiɗ ap Yeesu

1Waam, e neeh kanak tasee ne feetiŋ Paakiŋ Yawuut ci na wiŋ mbuuruuci raakaaɗi lawiir ci ree.#Pula 12:1-27 Kilifaacaŋ seeƴkiɗoh caŋ waasiŋ Musaa na jangɗohoh caŋ wa waakeeɗa findi ɓa ambohan Yeesu te ɓo' yeguu, ne ɓa apɗuk ɗe. 2Ɓa woyee ne wa joyɗi nik ŋ ɗooƴ feet ci, ɓa sangee ne ɗuuɗ raak ŋ ɗooƴ ɓooɓa.

Ɓitiɓ yiifiɗ laackoloñ ŋ hafiŋ Yeesu

3Yeesu nikee ŋ kahan Simong Gaanaana, ŋ Betani. Ɗekka po ɓo' ɓitiɓ aassa, a raakka ɗe ñameeɗa, a ɓayee buteel albaatar#14:3 albaatar : wa atoh moɗiɗ, yooɓiɗ pestu, wa na etohse haɓɗoha tumoha laackoloñ. riifiɗ na laackoloñ haɓɗohuuɗ narda koceet, candoomaŋ wa ɗoɓeen lool. A poɓiɗta lecmiŋ wa, a yiiffa Yeesu wa ŋ haf. 4Ɓooɓa nikee ŋ ɗiska hotta ineem, ɓa lahtukeeɗa ŋ harmban ɓa, ɓa woyeeɗa ne : « Wa ye tah laackoloñi yahrohse ? 5Wa mineen toonohu ini uup dinaar teemet-kaahay (300), ñakiɗ ci eɗu kopori. » Ŋ ineem ɓa ngaskeeɗa ɓitɓa. 6Waaye Yeesu woosa ɓa ne : « Faɗaat ɗe, wa ye tah ɗu yaaɓɗee ɗe ? A tumiɗ to in baahiɗ. 7Ñakiɗ ci genan gen na ɗu ; ɗu miniɗ ɓa tumiɗ in baahiɗ ŋ jamano nu ɗu waaɗoha ɗah. Waaye mi, ŋ genanɗi na ɗu. 8Te ɓitɓii haɓiɗ ini a min, a eeñɗiɗ faaniŋ ngo po ƴutiɗ bala ɓekuukiŋ wa ŋ ruy-ruy. 9Ñam na woyee ɗu wa te wa keeh, ɗisik nu Yegɗohiŋ Muci woyu ŋ adinaani jen ɗah, ini a haɓiɗ hey woyse nga, naandsukohaa ɗe. »

Yudaa woriɗ Yeesu

10Yudaa Iskaryot, yino ŋ Apootar ci ndaŋkiyaah na kanak ci (12), kaɗta ŋ kilifaacaŋ seeƴkiɗoh caŋ waasiŋ Musaa, ne a min ɓa eɗind Yeesu. 11Ɓa sikɗukka ɗe, ɓa summba nga lool ! Ɓa gappa ɗe eɗ kopor. Ŋ ineem, Yudaa waakeeɗa findi a joy ɗe eɗoh ɓi sang ɗe moɗoɗ.

Ɗiski Yeesu haɓɗohan Paaki

12Ŋ mbehi koc ŋ feetiŋ Mbuuruuci raakaaɗi lawiir ci wi mbaaliŋ Paaki na hoosohse, taalubeeciŋ Yeesu meekissa ɗe ne : « Kilifaani, fu waaɗ ne ɓoo kaɗan ɗa haɓɗohɗa kañam kiŋ Paak nde ? » 13Yeesu tuuƴca kanak nga ɓa, a woosa ɓa ne : « Kaɗaat Yerusalem, ɗu hey cohe na ƴaar ɓayiɗ meeme masuɓ, ñaakɗaat ɗe. 14Woyaat heɗ kahna a aasohan ne : “ Jangɗohohi woo ne, wa nde ɗiski a joy ñamoh mbaaliŋ Paak, a yi na taalubeeciŋ ɗe ? ” 15A hey ɗu teeɓe tuuƴ angiɗ ŋ ɗafuk kahna, na in ci joy nik nga, ɗu kooɗkiɗohɗan ɓoo kañam ki ndaam. » 16Taalubeeca kaɗta Yerusalem ; wa ɓa ree, ɓa raakohha in ceem ɗaa findi Yeesu woyohee ɓa, ɓa kooɗkiɗta kañam kaŋ Paak.

Kañam kiŋ Paak

17Wa niina ree, Yeesu na Apootar ci ndaŋkiyaah na kanak ci (12) hayya. 18Wa ɓa ɓoof ɓa ñameeɗa, a woosa ne : « Ñam na woyee ɗu wa te wa keeh, ɗu ɓi na ñame na so ɓii, yino nga ɗu hey yo eɗndohe ŋ ɓi sang ngo. » 19Ɓa soossa, yaa nu nga woosa ɗe ne : « Mbaar a mi haa ? » 20A loffa ɓa ne : « Yino ŋ ɗu ɓi ndaŋkiyaah na kanak ci (12) na ɓeke yaah na so ŋ booli. » 21A degga nga ne : « Wa keeh ne Kuɓkiŋ ɓoyi hey kurke nga findi Fiis ci woyoha nga ɗe, waaye mas ɓoyi na hee ɗe eɗndohe ŋ ɓi sang ɗe, ini ngisohee ŋ ɓoyeem weɗ ne a rimkuu. »

22Ɓa ñameeɗa, Yeesu ɓayya mbuuru, a corkiɗta Kooh, a poɓiɗtaa, a eɗta ɓa wa, a woosa ɓa ne : « Ɓayaat, wii wa faaniŋ ngo. » 23Ƴutta, a ɓayya kaas tumiɗ, a corkiɗta Kooh, a eɗta ɓa wa, ɓa jen ɓa annda nga. 24A woosa ɓa ne : « Wii, wa ñif miŋ ngo aamu wuu ɓi laayiɗ, ñif mi ndengiɗ Ambtiɗohi. 25Ñam na woyee ɗu wa te wa keeh, ŋ heyɗi anisse masuɓ reseñ po mbaɗna ŋ anissan wi asi, ŋ Nguuraŋ Kooh. »

Yeesu yegɗohiɗ kafndukiŋ taalubeeci

26Wa ɓa ƴut ŋ kañam ka po ɓa ƴeekka ƴeek ciŋ Sabuur, ci hun na feeti, ɓa pulla, ɓa kaɗeeɗa Tangooraŋ-Oliiw-ca. 27Yeesu woosa ɓa ne : « Wa fiisuuɗ ne : “ Ŋ hey laɓe niiɗohi, mbaal ci pasarkoh.#Sakriya 13:7 ” Kon inhaat ne ɗu jen ɗu hey kafnduke. 28Waaye, ŋ hultiɗu po ƴut ɗah, ŋ hey ɗu adge Galile. » 29Piyeer woosa ɗe ne : « Ali ɓooɓi jen kafnduk, ŋ kafndukanɗi. » 30Yeesu loffa ɗe ne : « Ñam na woyee ɗa wa te wa keeh, woti ŋ ɗooƴ weki, bala siiki leehkan waas kanak ɗah, fu hey yo taaske waas kaahay. » 31Waaye Piyeer ɓaatta ndengɗuk ŋ woo ka an : « Ali nik ne ŋ kaanan kaan na ɗa sah, ŋ taaskanɗi ɗa. » Ɓa jen ɓa nammba woo ɗaa.

Kiim caŋ Yeesu ŋ Getsemane

32Wa ɓa ree ngaŋ ɗiska na woyse Getsemane, Yeesu woosa ɓa ne : « Ɓoofaat ndii, ŋ kaɗ kiima Kooh. » 33A kooɗta Piyeer na Saak na Saaŋ, a hunnda na ɓa. A cammba yeg neƴƴoh na jaahiɗ ŋ ɗooƴ ce. 34A woosa ɓa ne : « Ɗiski wa nik ndii faaniŋ ngo goy goy po mi yii heeɗa kaane, tasaat ndii ɗu irin. » 35A faɗta ɓa ndaam, a kaɗta ƴissuut ŋ fikiiɓa, a ƴekka ŋ kehƴi, a kiimeeɗa Kooh ne wahtuuniŋ miskiɗi ɗalaat ɗe, ne wa min nik ɗah. 36A woosa ne : « Abba#14:36 Abba : weɗ "baab", ŋ peɗmaŋ Yawuut ca ɗeɓgaan., Baab, raakɗi ini wooñ ɗa, usɗiɗ to kaasiŋ miskiɗii. Waaye wa kinaat nikoh findi ŋ waaɗoh, waaye waaɗ-waaɗiŋ ɗa weɗ raakaat. »

37Wi a dokuk, a raakka ɓa neeheeɗa, a woosa Piyeer ne : « Simong, fu yi neeh de' ! Fu minɗi sah irin ini ree wahtu ! » 38A woosa ɓa ne : « Kinaat neeh, kiimaat Kooh a ndengiɗ ɗu po ɗu keenuu ŋ fiir. Waaɗ-waaɗi wii nga waaye faan ci raakɗi hatil. » 39A kaɗissa, a woyeeɗa in ci a woyee ŋ kiimaŋ ɗe koc.

40Wa a dokkis nga ɓa, a raakissa ɓa neeheeɗa, raak ɓa pani'uuɗ po has ciŋ ɓa aaykohha. Ɓa raakeeɗi lofaah ɗe. 41A kaɗissa, a hayissa waasi kaahayɗoh, a woosa ɓa ne : « Ɗu ɓii neeh, ɗu ɓii iɗsiɗuk ! Wa doyiɗ, wahtuuni reyiɗ ! Weɗɗi, Kuɓkiŋ ɓoyi faɗuuɗ ŋ yaah ciŋ bakaaɗoh ci ! 42Kurkaat ɓoo kaɗ ! Markaat, yi joy yo eɗndoh a yi ! »

Yeesu ambuuɗ

43Wa Yeesu na woye, jaarra, Yudaa, yi ɓaah ŋ ndaŋkiyaah na kanak ci (12), reesa na mboolo ɓayiɗ ɓi ndooɗ na ɓi ndang. Ɓa puloh ŋ kilifaacaŋ seeƴkiɗoh caŋ waasiŋ Musaa na jangɗohoh caŋ wa na yakak ca. 44Raak Yudaa woyiɗ ɓa ne : « Ɓoyi maa hee foone inhaat ne a yi ; ambaat ɗe po a ndeng, ɗu ɓay ɗe ɗaa. » 45A reyeeɗa rek, a reɓpa ŋ Yeesu, a woosa ɗe ne : « Jangɗohohi ! » A foonnda ɗe. 46Jaarra ɓa ammba Yeesu. 47Ƴaar ɓaah ŋ ɓa nikee ŋ ndaam fuurra ndang, ƴoɓpa ñaam ŋ ñaam caŋ seeƴkiɗoha yakka, a carissa nofaŋ ɗe. 48Yeesu woosa ɓa ne : « Ɗu hayiɗ na ndooɗ na ndang findi taamboh rok ne ɗu amb mbo. 49Moona Kooh-nu-wiis, ŋ nikee ŋ harmban ɗu ŋ Kahan Kooh, ŋ jangɗoheeɗa, te ɗu ambɗi so. Waaye in cii jen raakiɗ ne ini Fiis ci Hooliɗ ci woo raak. »

50Ŋ ineem, taalubeeciŋ ɗe jen faɗta ɗe, ɓa saandohha. 51Raakiɗ kuɓka fiira ñaakɗee ɗe, a lipkee na uuf dong. A ambseeɗa, 52a faɗta lipaŋ ɗe nga, a saandohha faan ɓarang.

Yeesu ŋ yaah atte'oh ca yakak ca

53Ɓa ɓayoh Yeesu ɗaa ŋ kahan seeƴkiɗoha yakka. Kilifaacaŋ seeƴkiɗoh caŋ waasiŋ Musaa jen na jangɗohoh caŋ wa na yakak ca cohee ŋ ɗiska. 54Piyeer nikee ñaakɗeeɗa ɗe usiɗ ŋ finhoora po findi a reyoh kahan seeƴkiɗoha yakka, a ɓooffa na surgaaca ŋ leero kahna, ɓa yohnukeeɗa. 55Kilifaacaŋ seeƴkiɗoh caŋ waasiŋ Musaa na ɓooɓa ɓinooɓa ɓaah ŋ saangnaŋ yakak caŋ Israayel jen waakeeɗa seede ne ɓa raak ini tah ɓa min apɗuk Yeesu, waaye ɓa hotɗi. 56Laayiɗ leyɗoheeɗa ɗe waaye woo caŋ ɓa huneeɗi. 57Raakka ɓa kuruk leyɗoheeɗa ɗe ne 58ɓa kerhootiɗ ɗe a woosa ne : « Ŋ hey yahrohe Kahniŋ Kooh wi yaah ɓo' haɓiɗ wii. Ƴut ɗah, ngaŋ neeh kaahay, ŋ taɓah wiiriis wi yaah ɓo' haɓɗanɗi. » 59Po ŋ ineem sah, woo caŋ ɓa huneeɗi.

60Teemb ndeem, seeƴkiɗoha yakka tufukka ŋ fiki mboolnda jen, a meekissa Yeesu ne : « Fu heyɗi lofe ali in ŋ in ci ɓooɓi na yambee ɗa e ? » 61Waaye Yeesu ɗekka teɗ, lofɗi ali in. Seeƴkiɗoha yakka meeksissa ɗe an : « Andi a fu Mucɗohi Gapohse, kuɓkiŋ Heɗ barkeeni ? » 62Yeesu loffa ɗe ne : « Ñam nik, te ɗu hey hote Kuɓkiŋ ɓoyi ɓoofiɗ ŋ ñaahmiŋ Heɗ hatili, te ɗu hey ɗe hote hayee ŋ eel.#Sabuur 110:1; Dañeel 7:13 » 63Seeƴkiɗoha yakka faarra kulɓaaciŋ ɗe, a yi ŋ haf ce, ne a teeɓoh ne wa woo uupiɗ. A woosa ɓa ne : « Ɓoo etohis seede ye ? 64A ɗu kerhoota, a ɗaliɗ Kooh, a joy ye tumu ? » Ɓa jen ɓa hunnda ɓa woosa ne : « A apaah apu #Lewiici 24:16! » 65Raakka ɓi tuhsee ɗe, ɓa muurra has ciŋ ɗe na daah, ɓa laɓeeɗa ɗe kumah, ɓa woyeeɗa ɗe ne : « Nik ne fu woosuuɗ ɗah, woya ɓoyi laɓ ɗa ! » Surgaaca taambukka ɗe na paɗ.

Piyeer taaskiɗ Yeesu

66Waam, raak Piyeer ŋ kehƴi, ŋ leero kahna, komaaki cafaƴ reesa, a ɓaahee ŋ ñaam caŋ seeƴkiɗoha yakka. 67A hotta Piyeer yohnukeeɗa, a feerukka ɗe baahiɗ, a woosa ɗe ne : « Fu namee nik na ƴaariŋ Nasareet ci, Yeesu. » 68Waaye Piyeer woosa ɗe ne : « Ŋ hotɗi ini fu waaɗ woo te ŋ inahɗaa. » A kurkohha ndaam, a kaɗta nguɓu kahna. [Siika leehukka.] 69Ɓoya ɓitɓa hotissa ɗe, a woyisseeɗa ɓooɓa nikee nga ne : « Ƴaarii, a ɓaah ŋ ƴaaɓiŋ ɗe. » 70Waaye Piyeer taaskissa. Wa degga ƴissuut, ƴaaɓa nikee ndaam nammba ɗe woo ne : « Fu ɓo' Galile, wa keeh ne fu ɓaah ŋ ƴaaɓiŋ ɗe. » 71Piyeer giñeeɗa, a woosa ne : « Ŋ lee ɗah, Kooh alkaat to, waaye ŋ inahɗi ƴaari ɗu na woye. »

72Weɗi siika kanakɗukoh leehuk. A naandsukka findi Yeesu woyohee ɗe wa ne : « Bala siiki leehkan waas kanak ɗah, fu hey yo taaske waas kaahay. » Jaarra, a fuɗeeɗa.

Currently Selected:

Maarko 14: YM

Highlight

Copy