Maarko 13
13
Sañuukaŋ Yerusalem na hayiŋ Kuɓkiŋ ɓoyi
1A Yeesu nik ŋ Kahan Kooh po a puleeɗa, ƴaar ŋ taalubeeciŋ ɗe woosa ɗe ne : « Jangɗohohi, marka taɓah ci findi ca yakoh na atoh ci ca taɓahohu findi ca moɗoh ! » 2Yeesu loffa ɗe ne : « Taɓah ci yakak ci fu na hote cii, ali atoh tasanɗi ŋ ɗafuk atoh ŋ ndii, ca jen ca hey yahrohse. »
3Ŋ finho woo keem, a kaɗta, a ɓooffa ŋ ɗafuk Tangooraŋ-Oliiw-ca, a yurhiɗkohha na Kahnaŋ Kooh. Piyeer na Saak na Saaŋ na Andare ɗaayya na ɗe, meekissa ɗe ne : 4« Woya ɓoo jamanooni in ceem na hee raakohe na ini na hee teeɓohe ne in ceem jen ca ɗi heeɗa raake. »
5A kooɗta woo ki, a lofeeɗa ɓa an : « Wortukaat, ali ɓo' kinaat ɗu muuƴiɗ. 6Ɓo' laayiɗ hey haye, ɓa kooɗ tiikiŋ ngo, ɓa woyee ne ɓeɗ Mucɗohi Gapohse te ɓa hey muuƴɗe ɓo' laayiɗ. 7Kaɗ po ɗu kerhoot ɓi hiñoh yakak wala ɗu kerah yegɗoh ci na woye ŋ hiñoh ɗah, kinaat neƴƴoh, in ceem joy joy raak waaye wa nikanɗi ne a Adina na reehe ŋ ɗiski ɗiski. 8Cum ɗah, kur hey hiñohe na kur morom wa, buur hey hiñohe na buur morom ce. Kehƴi hey yoondɗuke ŋ ɓi ɗisik te aɗ raak ŋ ɓi ɗisik. Wa nikohan ɗaa. Ca nikan cambiŋ miskiɗ ci findi ɓitɓi na hee ɓasle.
9Waaye ɗu, kurkaat ŋ haf ɗu, laam, ɗu hey ambse, ɗu ɓayu ŋ ngelohaaci, ɗu hey laɓse ŋ sinaagog ci te ɗu hey ɓayse ŋ fiki ɓi goornoor na ɓi buur saguuso. Ineem hey tahe po ɗu min ndo seede ŋ fikiiɓa. 10Yegɗohiŋ Muci weɗ joy katohu paaɗ ŋ cuuɓ ci jen. 11Ɓa ɓayee ɗu kaso ɗah, kinaat feyu ŋ ini ɗu woyan. Woyaat ini hayɗohan ɗu ŋ saasi saasi ; e ɗu woyan haa, waaye a Fuuɗsi Hoolohngaani.
12Ɓo' hey ambɗuke taambɗoh ce ne a apu, baabu hey ambɗuke kuɓkiŋ ɗe ne a apu, ɓi komaaki hey nike sangiɗ ciŋ ɓooɓi rim ɓa, ɓa apɗuk ɓa. 13Ɓooɓi jen hey ɗu sange saguuso. Waaye ɓoyi na hee ndengɗuke muñ po ŋ reehɗohaana, hey mucɗasse.
14Kaɗ po ɗu hot ini araamiɗi na yahrohe tufkiɗ ŋ ɗiski a joyɗi nik ɗah,#Dañeel 11:31 - Fu yi na jange Fiis cii, inha ! - ɓooɓi wa raakan ŋ Yudee, ɓa saandohaat ŋ tangooca. 15Ɓoyi wa raakan ŋ ɗafuk teeraasiŋ ɗe, a ruhsee ɗah, a kinaat aas ŋ ɗooƴ kahan ce ne a hee ɓaye in nga. 16Te ɓoyi wa raakan ŋ yohon ca, a kinaat gurid ne a hee ɓaye kulɓaakiŋ ɗe. 17Mas ɓitiɓ ci na hee nike rook ŋ jamanooneem na ɓapɗoh ci ! 18Kiimaat Kooh po wa nikuu ŋ jamanooniŋ soosi. 19Laam ŋ mbeh ceem ɓooɓi hey raake miskiɗ. Miskiɗ mand ɗaa moosɗi raakoh ina Kooh feroh Adina poyi te wa raakissanɗi. 20Te Heɗ ɓoo haawseeɗi mbeh ceem ɗah, ali kiñin heeɗi muce ; waaye a haawsiɗ ca sagu ɓooɓi a tan.
21Ŋ jamanoonaam ɓo' woo ɗu ne Mucɗohi Gapohse yii ŋ ndii wala ŋ nden ɗah, kinaat ɗe kos. 22Laam ɓi ɓo' hey haye ɓa tum haf ɓa Mucɗohi Gapohse wala woosuuɗ te ɓa yino nga ca haa, ɓa haɓɗee firnde na keemaan ne ɓa muuƴiɗ ɓooɓi po ɓi Kooh tan sah ne wa mineen nik ɗah. 23Waaye ɗu nak, wortukaat ! Ŋ woyiɗ ɗu ca jen nak, bala ca hayan.
24Ŋ jamanooneem, ŋ finho mbeh ci miskiɗ ceem, nohi ñuus, caɓni ƴim, 25hor ci keen, hatil ci nik ŋ eel ci yoondɗu, 26teemb ndeem, ɓooɓi hey hote Kuɓkiŋ ɓoyi hayee ŋ eel,#Dañeel 7:13 a hun na hatil laayiɗ na ndam. 27A hey woose malaakaaci, a cohɗoh ɓooɓi a tan ɓak po ɓak ŋ adinaani jen po ɗiska eel ci top.
28Inhaat ini nduni jangɗoh : Kaɗ po naak ciŋ wa hiƴ, wa camb kifis ɗah, ɗu na jaare inah ne rehi usisɗi. 29Wa mand ɗaa, ɗu nam hot in ceem ɗah, inhaat ne wa usisɗi, weɗi ŋ nguɓu kahni. 30Ñam na woyee ɗu wa te wa keeh, ɓooɓiŋ adinaani woti kurkohanɗi nga jen te in ceem jen raakɗi. 31Eel ci na kehƴi hey coote, waaye woo ciŋ ngo moosanɗi cootoh.
32Ini kaɗ ŋ mbehi, wala wahtuuni in ceem na hee raakohe, ali ɓo' inahɗaa. E malaakaaciŋ Eel ci haa, a Kuɓki haa, a Baabi a yi inaha. 33Kon wortukaat, kinaat neeh, ɗu inahɗi andi wa nikan kiɗa. 34Wa mand na ƴaari na ɓaaɓe, a dengkoh ñaam ciŋ ɗe kahni, yaa nu nga ɗah a tufkiɗ ɗe, a woo ɗe ini a hee haɓɗe, a woo yi nik ŋ yahndeeri ne a niiɗaat. 35Kon kinaat neeh, ɗu inahɗi andi heɗ kahni hayan kiɗa, ndaa wa nikan noh niiniɗ, wala na wek, wala na wiisaaɗi, wala daaɓdaaɓ. 36Mbaa wortukaat po a hey jalañ ɗah, a raakuu ɗu neehe.
37Ini mi na woyee ɗu, maa woyee wa ɓooɓi jen : Kinaat neeh ! »
Currently Selected:
Maarko 13: YM
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc
