Maarko 10

Ini Kooh ambsoh, ɓo' kinaata saɓsoh

1Yeesu kurkohha ndaam, a kaɗta ɓakaŋ kur caŋ Yudee, na ɓaka winooraŋ Yurdan. Mboolo cohissa nga ɗe, a jangɗisseeɗa ɓa findi a meeɗa tumoh. 2Ɓi ɓo' ɓaah ŋ Farisen ca reɓpa, ɓa meekseeɗa ɗe ne ɓa woyɗukoh ɗe woo uupiɗ, an : « Andi ɓo' miniɗ faɗ ɓitiice ? » 3A loffa ɓa ne : « Musaa eɗ ɗu winde nakoh nga ? » 4Ɓa loffa ɗe ne : « A teyɗohiɗ ne, fu miniɗ fiisiɗ ɓitiifu kayti teeɓoh ne fu faɗiɗ ɗe, fu faɗ ɗe.#Rohƴiɗi 24:1 » 5A loffa ɓa ne : « E ndengi ɗu ndeng keeñ weɗ tah Musaa fiisiɗta ɗu nakoheem, 6waaye ŋ cambohaana, wa Kooh na fere Adina, a fer ɓa ƴaar na ɓitiɓ,#Camba 1:27 7weɗ tah ƴaar hey saɓsukohe na yaay na baab, a ŋoɗ ŋ ɓitiice, 8ɓa nik faan yino.#Camba 2:24 Teemb ndeem, ɓa nikisɗi kanak ɓa faan yino kotii. 9Kon, ini Kooh ambsoh, ɓo' kinaata saɓsoh. »

10Wa ɓa dokuk kahna, taalubeeciŋ ɗe meekissa ɗe ini kaɗ ŋ ineem. 11A loffa ɓa ne : « Yaa nu saɓsukoh na ɓitiice, a tokis ɓitiɓ wiiriis ɗah, a njaaloo njaaloo ŋ harmban ce na ɓitɓa koc. 12Te ɓitiɓ nu saɓsukoh na ƴaar ce, a tey ƴaar wiiriis tok ɗe ɗah, a njaaloo njaaloo. »

Yeesu na komaakci ƴin ci

13Ɓi ɓo' komeeɗa Yeesu komaaki ƴin ne a laal ɓa, waaye taalubeeciŋ ɗe ngaskeeɗa ɓooɓeem. 14Yeesu hotta ineem, a ayrukka, a woosa ɓa ne : « Faɗaat komaakci ɓa hay nga so, kinaat ɓa hondoh hay, ɓooɓi mand na ɓa ɓeɗ raak Nguuriŋ-Kooh. 15Ñam na woyee ɗu wa te wa keeh, ɓo' nu teyɗukɗi Nguuriŋ-Kooh findi komaaki ƴin ɗah, a aasanɗi nga muk. » 16Ƴutta, a gorukka komaakca, a degga ɓa yaah ciŋ ɗe a barke'iɗta ɓa.

Yeesu na heɗ raak-raaka

17Wa Yeesu coote, ƴaar nuppa ƴekka ŋ fikiice, meekissa ɗe ne : « Jangɗohohi baahiɗi, ŋ joy ye haɓiɗ po ŋ raak kipes ki heyɗi reehe ? » 18Yeesu woosa ɗe ne : « Wa ye tah fu ɓeeɗkohee so baahiɗ ? Ali ɓo' baahɗi, hanaa Kooh dong. 19Fu inhiɗ nakoh ci ; an kina ap ɓo', kina njaaloo, kina rok, kina woyiɗ ɓo' ini a tumɗi, kina njuucnjaac, eɗa yaay ɗu na baab ɗu cir.#Pula 20:12-16; Rohƴiɗi 24:14 » 20Ƴaara woosa ɗe ne : « Jangɗohohi, in ceem jen, mi yii taambiɗ ca, ina ŋ nikoh komaaki poyi. » 21Yeesu marakka ɗe, waaɗta ɗe ŋ ɗooƴ ce, a woosa ɗe ne : « Wa in yino dong weɗ fu taskoh. Toona in ci fu raak jen, fu eɗ ca ñakiɗ ci ; fu hey raake alal ŋ Eel ci. Ƴut ɗah, fu hay, fu ñaakiɗ to. » 22Ŋ woo keem, fikiiraŋ ƴaara ɓoƴsukohha, a cooteeɗa goyoh na goyoh, a nikee heɗ raak-raak.

23Ŋ ineem, Yeesu marakka ini wil ɗe, a woosa taalubeeciŋ ɗe ne : « Heɗ raak-raak aas ŋ Nguuriŋ-Kooh wa in ye miskan. » 24Taalubeeciŋ ɗe feyuusa ŋ woo kiŋ ɗe, waaye a woyissa ɓa ne : « Kuɓuuci, aas ŋ Nguuriŋ-Kooh yooɓɗi de' ! 25Ngeelemb taamb ŋ ngul kufic, weɗ uup yooɓ heɗ raak-raak aas ŋ Nguuriŋ-Kooh. » 26Taalubeeca uuppa nga feyu, ɓa woyeeɗa ŋ harmban ɓa ne : « Kon a ya ɓa min mucɗu ? » 27Yeesu marakka ɓa, woosa ne : « Ineem wooñiɗ ɓo' waaye raakɗi ini wooñ Kooh. »

28Ŋ ineem Piyeer kooɗta woo ka, a woosa ɗe ne : « Moo ɓoo ɓi faɗ in ciŋ ɓoo jen, ɓoo ñaakiɗta ɗa nak ? » 29Yeesu loffa ɗe ne : « Ñam na woyee ɗu wa te wa keeh, ɓo' nu faɗ kahan, wala taambɗoh ƴaar mbaa ɓitiɓ, yaay, baab, kuɓu wala yohon saguuso na Yegɗohiŋ Muci ɗah, 30ɓoyeem hey raake, ŋ jamanoonii, ini ree waas teemet ŋ kahan, taambɗoh, yaay, baab, kuɓu, na yohon. Wa hunan na tolfiɗu ŋ kehƴi, waaye, kim a hey raake kipes ki heyɗi reehe. 31Laayiɗ ŋ ɓi adug woti, ɓeɗ mirndohan, te laayiɗ ŋ ɓi mirndoh woti, ɓeɗ adgan. »

Yeesu woyissiɗ ŋ kakaan kiŋ ɗe na hultiŋ ɗe

32Waam, ɓa nikee ŋ waas Yerusalem, Yeesu adugka, ɓa kaɗeeɗa, taalubeeci feyuusa, ɓooɓa hunee na ɓa tiitta. Ŋ ineem a ɓeeɗkissa taalubeeci ndaŋkiyaah na kanak ci (12) kiik ɓa, a woyeeɗa ɓa ini na hee ɗe rahse. 33A woosa ɓa ne : « Ɗu hot nga, ɓoo ɓii kaɗ Yerusalem, Kuɓkiŋ ɓoyi hey faɗse ŋ yaah ciŋ kilifaaciŋ seeƴkiɗoh ciŋ waasiŋ Musaa, na jangɗohoh ciŋ wa ; ɓa hey ɗe atte'e ne a apu, ɓa eɗ ɗe ɓooɓi nikɗi Yawuut. 34Ɓeem hey ɗe njembte, ɓa tuhus ɗe, ɓa laɓ ɗe leraw, ɓa ap ɗe. Waaye wa raak neeh kaahay ɗah, a hey hulte. »

Kiimaŋ kuɓuucaŋ Sebede

35Saak na Saaŋ, kuɓuuciŋ Sebede, reɓpa ŋ Yeesu, ɓa woosa ɗe ne : « Jangɗohohi, ɓoo waaɗ ne fu haɓɗiɗ ɓoo ini ɓoo na hee ɗa kiime. » 36A woosa ɓa ne : « Ɗu waaɗ ne ŋ haɓɗiɗ ɗu ye ? » 37Ɓa woosa ɗe ne : « Ɓoo waaɗ ne fu nik ŋ ndamiŋ ɗa ɗah, yii ɓoof lah ɗa yaah-ñaahum, yii lah ɗa yaah-sing. » 38Waaye a woosa ɓa ne : « Ɗu inahɗi ini ɗu na kiime. Ɗu miniɗ an ŋ kaasiŋ miskiɗi ŋ anan e ? Andi ɗu miniɗ ɓoktuk ŋ miskiɗi ŋ ɓoktukohan ? » 39Ɓa loffa ɗe ne : « Ee, ɓoo miniɗa. » A woosa ɓa ne : « Wa keeh ne ɗu hey ane ŋ kaasiŋ miskiɗi ŋ anan te ɗu hey ɓoktuke ŋ miskiɗi ŋ ɓoktukohan ; 40waaye ini kaɗ ŋ yi lahan ndo yaah-ñaahum na sing, a ñam woyan ɓa haa ; ɓooɓi kooɗkiɗu ɗisik ceem, ɓeɗ lahan ndo nga. »

41Wa taalubeeca ndaŋkiyaah ca ɓinooɓa kerah ineem, ɓa ayrukka Saak na Saaŋ. 42Yeesu ɓeeɗukka ɓa jen, woosa ɓa ne : « Ɗu inhiɗ ne ɓooɓi ambu kilifa yakak ŋ kur ci na degee deg ɓooɓiŋ ɓa yaah, ɓooɓi uupiɗ hatil uupohee doole. 43Waaye wa nikohɗi ɗaa nga ɗu, ɓo' nu waaɗ nik ɓo' yakak nga ɗu ɗah, a teyɗukaat nik surgaaniŋ ɗu. 44Te ɓo' nu waaɗ adug nga ɗu ɗah, a teyɗukaat nik ñaamiŋ ɓi tas jen. 45Kuɓkiŋ ɓoyi sah, hayɗi ne a raak surga, a hay ne a nik surga te a eɗoh kipes kiŋ ɗe ne a tos ɓo' laayiɗ. »

Yeesu wirɗiɗ fuuliɗ

46Yeesu na taalubeeciŋ ɗe woyeeɗa, kaɗeeɗa po ɓa reesa kur-taaha na woyse Yeriko. Ɓa puleeɗaa, ɓa hunnda na mboolo laayiɗ, raak fuuliɗ yalwaanoh teeku Bartime, kuɓu Time, ɓoofiɗ ŋ mbeeddaana. 47Wi a kerah ne a Yeesu yi gen Nasareet na haye, a leehkeeɗa an : « Yeesu setiŋ Dawuuda, ŋ miskaat ɗa ! » 48Ɓo' laayiɗ ngaskeeɗa ɗe ne a ɗek. Waaye a uupeeɗa nga leehuk an : « Setiŋ Dawuuda, ŋ miskaat ɗa ! » 49Yeesu tufukka, nakohha ɗe ɓeeɗkiɗu. Ɓi ɓo' kaɗta nga ɗe, woosa ɗe ne : « Ndengɗuka ! Kurka, a nakohiɗ ɗa ɓeeɗku. » 50Jaarra fuulɗa njaffa paltoonaŋ ɗe, a gooñukka, a kaɗta ŋ Yeesu. 51Yeesu meekissa ɗe ne : « Fu waaɗ ne ŋ haɓɗiɗ ɗa ye ? » A loffa ɗe ne : « Rabbuuni (jangɗohohiŋ ngo), ŋ waaɗ ne fu tum po has ciŋ ngo min hot ! » 52Yeesu woosa ɗe ne : « Kaɗa, kosi fu kos wirɗiɗ ɗa. » Jaarra fuulɗa hoteeɗa, a taambiɗta Yeesu.

Currently Selected:

Maarko 10: YM

Highlight

Copy