Tum ci 13

Fuuɗsi Hoolohngaani taniɗ Barnabaas na Sool

1Ŋ Janguunaŋ Añcos, wa raakeen ɓi woosuuɗ na ɓi jangɗohoh. Ɓa nikee Barnabaas na Simeyong yi na ɓeeɗkohse Suusus, Lusiyus yi genee Sireen, Manahen yi koɗu yino na Herod goornoori, na Sool. 2Wa raakka mbeh, ɓa ñaamkeeɗa Heɗi, ɓa oreeɗa, Fuuɗsi Hoolohngaani woosa ɓa ne : « Ɗiski wa nik, faɗɗaat to Barnabaas na Sool wuu pangki tah ho ɓeeɗuk ɓa. »

3Ŋ ineem, wa ɓa ƴut or na kiim Kooh, ɓa degga ɓa yaah ciŋ ɓa, ɓa faɗta ɓa, ɓa cootta.

Barnabaas na Sool kaɗiɗ Siipar

4Wa Fuuɗsi Hoolohngaani woos Barnabaas na Sool, ɓa kaɗta kur kaŋ Selesi, ɓa aassa bato ndaam ne ɓa kaɗ Siipar, kur ŋ ɗooƴ cookmi. 5Wa ɓa ree Salamin, ɓa yegɗoheeɗa woo kiŋ Kooh ngaŋ sinaagog caŋ Yawuut ca. Saaŋ Maarko hunee na ɓa ne a ɓaatɗoh ɓa. 6Ɓa huussa Siipar jen, ɓa kaɗta po Pafos. Ŋ ndaam, ɓa cohha na luhusoh teeku Bar-Yeesu, a nikee Yawuut, a tumee haf ce woosuuɗ te a nikɗaa. 7A ɓaahee ŋ ɓooɓa wilee goornoora na woyse Seersiyus Polus. Goornooreem nikee ɓo' ñaañiɗ, a nakohha ɓeeɗkiɗu Barnabaas na Sool, raak ɗe waaɗee kerah woo kiŋ Kooh.

8Waaye luhusohi, yi nam teeku Elimaas (wa tokis ineem ŋ gerek) hiñoheeɗa ɓa, a jeemeeɗa hondoh goornoora kos. 9Ŋ ineem, Sool yi na name woyu Pool, riiffa na Fuuɗsi Hoolohngaani, a marakka ɗe ŋ ɗooƴ has in maañiɗ, 10a woosa ne : « Leyohi yakki, fu riif na liiɓohaaɗ moɗaaɗi, fu kuɓu Seytaani rek, fu sangiɗiŋ in nu baah ɗah ! Fu heyɗi faɗe nduuɗ waasiŋ Heɗ ɓoo yurhiɗi e ? 11Weɗɗi, yaahiŋ Heɗi deggiɗ ɗa, fu hey fuule, fu hotissanɗi nohi ɓi neeh. »

Ŋ ɗiska ɗiska has ciŋ Elimaas ñuussa, a nikka ŋ ñuus tuɗ, a saaɓɗeeɗa ne a waak ɓoyi nookan ɗe. 12Wa goornoora hot ina raak, a kossa ; ini a jangɗassee ŋ Heɗi aaseen ɗe lool.

Woo kaŋ Pool ŋ Añcos-Pisidi

13Ŋ ineem Pool na huntoh caŋ ɗe aassa bato, ɓa pulohha Pafos, ɓa kaɗta Perge ŋ kur kaŋ Pamfili. Saaŋ Maarko faɗta ɓa ndaam, a dokukka Yerusalem. 14Waaye ɓeɗ, ɓa kurkohha Perge, ɓa taalndiɗta po ɓa reesa Añcos-Pisidi. Ŋ mbehi na iɗsiɗkohse, ɓa aassa ŋ sinaagoga, ɓa ɓooffa. 15Wa jangaŋ teerndiŋ waasiŋ Musaa na woo ciŋ woosuuɗ ci ƴut, kilifaacaŋ sinaagoga nakohha ɓa woyɗu ne : « Ɓaah ci, ɗu raak ini ɗu woyan ɓooɓi ne ɗu ñaah ɓa ɗah, ɗu miniɗ woo. »

16Wa ɓa woyu ineem, Pool kurukka, a raɗissa yaah a woosa ne : « Ɗu, Israayel ci na ɗu ɓi nup Kooh, sikɗukaat to ! 17Koohiŋ cuuɓiŋ ɓoo Israayel taniɗ caac ciŋ ɓoo. A ɓaatta cuuɓi wa ɓa genohaah ŋ Misra. Ƴutta, na hatiliŋ yaahiŋ ɗe, a puliɗta ɓa nga.#Camba 46:5-7; Pula 1:1-7; 12:37-42

18Wa ɓa nik ŋ kehƴa hulanga, a muñɗeeɗa ɓa ini ree kiis ndaŋkiyaah-nikiis (40).#Rohƴiɗi 29:1-7 19Ƴutta, a ɗummba cuuɓ yasna-kanak ŋ Kanaan, a eɗta cuuɓiŋ ɗe kur keem ne ɓa kooɗa.#Yosuwe 24:11 20In ceem jen, a tumiɗ ca ŋ ɗooƴ kiis teemet-nikiis na kiis ndaŋkiyaah-yatuus (450). Ƴutta a eɗeeɗa caac ciŋ ɓoo ɓi kilifa#Kilifaaci po wi woosuuɗi Samuwel#1 Samuwel 1:20–25:1 hay.

21Ŋ jamanoonaŋ Samuwel, ɓa waaɗta waakɗu buur. Kooh eɗta ɓa Sawul kuɓkiŋ Kis yi ɓaah ŋ cuuɓiŋ Benyaamin.#1 Samuwel 9:1–10:25 A nikka buur kiis ndaŋkiyaah-nikiis (40). 22Kooh ruhsiɗta ɗe, a eɗta ɓa Dawuuda findi buur. Kooh seede'iɗta ɗe inii : “ Ŋ hotiɗ ŋ Dawuuda kuɓkiŋ Yesay, ƴaari neɓ po ŋ keeñ, yi tuman ini ŋ waaɗ jen.#1 Samuwel 13:14 ”

23Ŋ ineem, Kooh ɓayiɗta Israayel ci Mucɗoh ngaŋ ɓi rimkoh ŋ Dawuuda findi a gapohee wa,#2 Samuwel 7:11-13 te Mucɗoheem, e Yeesu. 24Bala Yeesu hayan ɗah, Yahya woyeen na Israayel ci jen, a ɓeeɗukka ɓa ne ɓa ɓoƴsoh pesohaaɗ, te ɓa ɓoktu.#Luk 1; 3

25Wi pangkiŋ Yahya na hee reehe, a meeɗ woo ne : “ Ɗu liiɓ ne ñam ɓa ? Ñam yi ɗu na seke haa ; waaye ɓoyeem, a yi hay ŋ finhooso te ŋ yeyyooɗi sah toksiɗ ɗe ñafaɗ ciŋ ɗe.#Saaŋ 1:20-27 ”

26Ɓaah ciŋ ngo, ɗu ɓi rimkoh ŋ Ibrahiima, na ɗu ɓi nup Kooh te ɗu nikka na ɓoo ndii, Kooh woosoh ɓoo woo kiŋ muci. 27Ɓi Yerusalem na kilifaacaŋ ɓa, inheeɗi ya ɓa a yi nikee Yeesu, ɓa nameeɗi inah ini woo ciŋ woosuuɗ ci tokis, woo ci meeɗ jangu ŋ mbehi na iɗsiɗkohse nu ree. Te kat, ɓa tumeen po ini woosuuɗ ceem woyee raakka, wa ɓa na atte'ee Yeesu ne a apu. 28Ɓa hoteeɗi ini joy ɗe tah atte'u kaan, waaye ɓa woosa Pilaat ne a apaat ɗe. 29Wi ɓa mitiɗ in ci Fiis ci woyee nga ɗe jen, ɓa kooɗohha ɗe ŋ kurwaana, ɓa ɗaakka ɗe ŋ ruy-ruy.

30Waaye Kooh hultiɗta ɗe. 31Ngaŋ ɓi neeh laayiɗ, a teeɓkeeɗa ɓi ɓo', ɓa hoteeɗa ɗe jahran. Ɓooɓeem nikee ɓooɓa pulohee na ɗe Galile, kaɗta Yerusalem, te ɓooɓeem nikka ɓooɓi na seede'ee ɗe woti-woti ŋ fiki cuuɓi.

32Te ɓoo hayiɗ ne ɓoo woo ɗu Yegɗohiŋ Muci : Ini Kooh gapee caac caŋ ɓoo, 33a mitɗiɗ ineem wuu ɓoo ɓi set ciŋ ɓa, ŋ hultiɗi a hultiɗ Yeesu, findi wa fiisohu ŋ saari kanakɗoh ŋ Sabuur. Wa woo ne :

“ A fu Kuɓkiŋ ngo,

ini kooɗoh woti, ñam rim ɗa.#Sabuur 2:7 ”

34Kooh gapoheen ne a hey ɗe hultiɗe, po a dokissanɗi a kee nopa ŋ ruy-ruy, weɗ Kooh woo, wi a woo ŋ Fiis ci ne : “ Ŋ hey ɗu one in ci hooliɗ ci te ca carra kosu, ci ŋ gapee Dawuuda.#Esayi 55:3 ” 35Weɗ tah, a woyissa ŋ ɗisik wiiriis ŋ Fiis ci ne : “ Fu faɗanɗi Ñaamiŋ ɗa yi fu min ooluk, a nopee ŋ ruy-ruya.#Sabuur 16:10 ” 36Moona Dawuuda ŋ jamanoonaŋ ɗe, a pangkiɗ ŋ waaɗ-waaɗiŋ Kooh, a kaannda, a dabba caac caŋ ɗe, faaniŋ ɗe noppa ŋ ruy-ruya.

37Waaye yi Kooh hultiɗ, faaniŋ ɗe nopɗi ŋ ruy-ruya. 38-39Kon ɓaah ciŋ ngo, inhaat ne, a yi tah ɗu yegɗassee ne ɗu ɗaasuuɗ bakaaɗ ciŋ ɗu, te ɓo' nu kos ŋ Yeesu ɗah, in ci fu mineeɗi ɗaasu ŋ waasiŋ Musaa jen, Kooh hey ɗa ca ɗaase, a amb ɗa findi ɓo' yurhiɗ.

40Kon wortukaat po ini woosuuɗ ca woyee wii rahsuu ɗu an :

41“ Markaat, ɗu ɓi na heefohe !

Feysaat, sooƴaat !

Ŋ hey haɓɗe ŋ jamanooniŋ ɗu,

ini fu inah ne

ɗu naandsuksee wa naandsuku ɗah,

ɗu kosuu wa.#Habakuk 1:5 ” »

42Wa Pool na Barnabaas pul sinaagoga, ɓooɓa kiimmba ɓa ne mbehi na iɗsiɗkohse na haye, ɓa dokkis ŋ woo ka. 43Wa ɓooɓa pasarkoh, Yawuut laayiɗ, na laayiɗ ŋ ɓa tuuɓee nikka Yawuut, ñaakka ŋ Pool na Barnabaas. Ɓeem ɓeesɗoheeɗa na ɓa, ñaaheeɗa ɓa ne ɓa amb ndengiɗ oolkohi ɓa oolkoh baahohiŋ Kooh.

Pool na Barnabaas kaɗiɗ ŋ ɓi nikɗi Yawuut

44Wa mbeha na iɗsiɗkohse dokkis, ɓo' min woo ne kur ka jen ɓeɗ coh ne ɓa sikɗuk woo kiŋ Heɗ ɓoo. 45Wa Yawuut ca hot mboolnda, ɓa siiseeɗa Pool na Barnabaas, ɓa taaseeɗa Pool, ɓa ɓaseeɗa ɗe. 46Ŋ ndeem Pool na Barnabaas neƴƴohɗi nga, woosa ɓa ne : « E ɗu joy koc yegɗu woo kiŋ Kooh, waaye ŋ gantuki ɗu gantuka, ɗu atte haf ɗu ne ɗu yeyyooɗi raak kipes ki reehanɗi. Kon ɓoo ɓii yurah ŋ cuuɓ ci cinooci. 47Laam weɗ ini Heɗi nak ɓoo, wi a woo ne : “ Ŋ tufkiɗiɗ ɗa ne fu nik siñaariŋ cuuɓ ci, fu ɓay muci po ɗisik nu ɗisik ŋ Adina.#Esayi 49:6 ” »

48Wa ɓooɓa nikɗi Yawuut kerah woo ceem, ɓa summba keeh-keeh, ɓa laasukka woo kiŋ Heɗi te ɓooɓa Kooh kooɗee ne ɓa rahas kipes ki reehanɗi jen kossa. 49Woo kiŋ Heɗ ɓoo pasarkohha ŋ kur ca nikee ndaam jen. 50Waaye Yawuut ca hiirra yakak caŋ kur-taaha, na ɓi ɓitiɓ ; yakak ceem na ɓitiɓ ceem tolfiɗeeɗa Pool na Barnabaas po ɓa puliɗta ɓa ŋ kur caam jen. Ɓitiɓ ceem meeɗ meeɗ ñaamuk Kooh, ɓa nikee ɓitiɓ raakiɗ tiik.

51Ŋ ineem Pool na Barnabaas farsiɗta ɓa merhey miŋ kot ciŋ ɓa ndeem, kaɗta Ikoñum. 52Waaye ini kaɗ ŋ taalubeeca, ɓa summba keeh-keeh, ɓa riiffa na Fuuɗsi Hoolohngaani.

Currently Selected:

Tum ci 13: YM

Highlight

Copy