Tum ci 12

Saak apuuɗ, Piyeer ambuuɗ ŋ kasoona

1Ŋ jamanoonaam Herod buura, ammba ɓi ɓo' ɓaah ŋ Janguuna, a tumeeɗa ɓa miskiɗ. 2A apɗukka Saak na ndang, taambɗoh Saaŋ. 3Wa a hot ne ineem neɓiɗ Yawuut ci, a nammba ambɗuk Piyeer. Wa nikee mbeh ciŋ feetiŋ Mbuuruuci raakaaɗi lawiir ci. 4Wa a amb Piyeer, a taƴca ɗe ŋ kasoona. A nakka lang soldaar nikiis ne ɓa niiɗee ɗe, lang nu nga ɗah raakee soldaar nikiis. A waaɗta ɗe ɓay ŋ fiki ɓooɓa, a atte'u ne feetiŋ Paak reeh ɗah. 5Ŋ ineem Piyeer niiɗasseeɗa ŋ kasoona, waaye ɓi Janguuna kiimɗeeɗa ɗe Kooh na keeñ ciŋ ɓa jen.

Piyeer pulɗuuɗ kasoona

6Herod nikee ŋ kot ɓay Piyeer ŋ fiki ɓooɓa ne a atte'u. Ŋ weka bala a atte'san ɗah, Piyeer toksee na ceen kanak, a neeheeɗa ŋ harmban soldaar kanak, te ŋ fiki yahndeeraŋ kasoona ɓi soldaar tufkeen nga, niiɗeeɗa.

7Ɗekka po malaaka Heɗ ɓoo hayya, ɗiski siñaariɗta nañ. A laɓiɗta Piyeer ŋ hambuus ne a yun ɗe, a woosa ɗe ne : « Kurka gaaw ! » Ceen ci nihsukka ŋ yaah ciŋ ɗe, ca keennda. 8Malaakaani woyissa ɗe ne : « Tokka seenturiŋ ɗa, fu ɓekuk ñafaɗ ciŋ ɗa ! » A tummbaa. Malaakaani degissa nga ne : « Degga paltooniŋ ɗa te fu ñaakiɗ to. » 9Piyeer ñaakiɗta malaakaana, a pulla. A ambeeɗi ne ini malaakaani na haɓɗe, wa keeh, a liiɓee ne e in hayɗohee ɗe findi heeƴ.

10Wa raakeen ɓi lang soldaar nga, tufkiɗ niiɗeeɗa. Piyeer na malaakaana taammba yino, ɓa taambissa yino, ɓa reesa buntaana tiwña pul ŋ kur-taaha, wa rangsukootta, ɓa pulla. Ɓa kooɗta mbeedda, ɓa kaɗeeɗa, ɗekka po malaakaana faɗta ɗe. 11Piyeer dokukka ŋ sagooniŋ ɗe, a woosa ne : « Ŋ inhiɗ kotii ne wa keeh, Heɗi woosiɗ malaakaaniŋ ɗe ne a pulɗoh ho ŋ yaah Herod na ini Yawuut ci waaɗee ne wa rahas so jen. »

12Wa Piyeer inhiskoh, a kaɗta kahan Mari yaayiŋ Saaŋ, Saaŋ yi na ɓeeɗkohse Maarko. Raak ɓo' laayiɗ cohiɗ nga, kiimeeɗa Kooh. 13Piyeer laɓiɗta buntaanaŋ kahna, wa raakeen cafaƴ nga, teeku Rood, a nikee ñaam, a hayya marke ɓoyi na laɓɗe. 14A inhissa hoosooriŋ Piyeer, a summba lool ; joyya ne a rangis, a nuppa a kaɗtaa yegɗoha ŋ ɗooƴa an : « A Piyeer, a yii ŋ buntaani, ŋ hari ! » 15Ɓa woosa ɗe ne : « Hanaa fu na dofe ! » Waaye a ndennga nga ne wa keeh. Ŋ ineem, ɓa woosa ɗe ne : « Kon a malaakaaniŋ ɗe ! »

16Piyeer rissa laɓiɗ ŋ buntaana. Wa ɓa rangis, ɓa hotta ne a yi, ɓa feyuusa jameet. 17A woosa na ɓa na yaah ne ɓa ɗek, a naandsukka ɓa findi Heɗi pulɗoh ɗe ŋ kasoona. A ɓaatta nga ne : « Woyaata Saak na ɓaah ciŋ ɓoo kosiɗ ci ɓinooɓi. » Ƴutta a pulla, a cootta ɗisik wiiriis.

18Wa Kooh wiis, soldaar ca jahaskohha keeh-keeh, ɓa woyeeɗa ne : « Ƴaari taamb nde ? » 19Herod nakohha ɗe waakɗu, waaye a hotuuɗi. A nakohha ne soldaar ca niiɗee ɗe meeksassaat, ƴutta a nakohha ne ɓa apu. Wa ineem coot, Herod pulohha Yudee a kaɗta Seesare, a nikka nga ɓi neeh.

Kakaan kaŋ buur Herod

20Waam, Herod ayrukohee ayrukoh na ɓi Tiir na ɓi Sidoon. Ɓeem hunnda ŋ woo ne ɓa kaɗ nga ɗe. Ɓa kiimtiɗohee na Balastus dagi meeɗ taambkoh tuuƴ buur ne a ɓaatɗoh ɓa. Ɓa kiimmba Herod ne jam raak ŋ harmban ɓa, laam kur ceem, kañam kiŋ ɓa, meeɗ puloh kur kaŋ Herod.

21Wa mbeha ɓa ambee ree, Herod ɓayya kulɓa-buur, a ɓekukkaa, a ɓooffa ŋ ɓoofohaanaŋ ɗe, a woyeeɗa na ɓooɓa. 22Ɓooɓa leehkeeɗa an : « A ɓo' na woye haa, a kooh ŋ kooh ci ! » 23Ŋ ɗiska ɗiska, malaaka Heɗ ɓoo tippa Herod ngonjom a kosaayya ŋ ini a wikɗi Kooh ciriŋ ɗe. Cangind ci ñamsohha ɗe, a kaannda.

24Woo kiŋ Kooh nak, wa ɓaatkeeɗa ɓaatuk, wa kaɗeeɗa kaɗ ! 25Ini kaɗ ŋ Barnabaas na Sool, wa ɓa reehiɗ pangka ɓayee ɓa Yerusalem, ɓa dokkeeɗa ; ɓa ɓayndohha Saaŋ yi na ɓeeɗkohse Maarko.

Currently Selected:

Tum ci 12: YM

Highlight

Copy