Marko 1

Ntu Ɔkpilane Yohane Ɔ́kɔ Lɛsa

1Ɔmɛni ndi litemi buni lɛni nkɛnku Yesu Kristo lɛlɔ ɔni ndi Katɔti ɔlati ubidi.

2Kukuuku ni, Katɔti Kenye Udiene Yesaia únweni úse ka Katɔti ɔ́su Ubidi ɔnini,

“Ndubɔtala ɔtu ɔdi

na wagyu watɔ-ɔ,

kalɛ na ɔklibi bekyuli

ute ƒula bubo.

3Adubunu ka ukyuli ɔmɛni ɔkɛ ɔɔva na ketele kemmo

taasu ɔnini,

‘Binye kagyumana bite Blɔti.

Bɛklibi bina lɛlɔ kaduɛ bite nwuna bubo!’ ”

4Ɔtu ɔmɛni ndi Yohane. Anwu nébo úbelie ketele kemmo, kesii kani na ɔɔkpila bekyuli ntu na ketu kemmo aani kalɛ na Yudaƒuɔ baabla kalɛ. Na ɔɔkɔ́ lɛsa ka ɔlɛka bekyuli benwini kayi na bada ekpidi bɔbla baya na baƒɔ ntu bɔkpila ɔdi ɔmmɔ, na Katɔti ɔdubuti bana alaekpidi ɔkyiɛ-ma. 5Bekyuli pii bási Yudea kalɔ lɛlɔ ku bana ɔma unengudi ɔni baalɔ Yerusalem bésie ketele kamɛni kemmo béténu Yohane litemi. Bédie bana ekpidi kalɔ béte Katɔti, na Yohane ɔ́kpila-ma ntu na ketu kani baalɔ Yordan kemmo.

6Uwi ɔmɛni kemmo ni, Yohane ɔkya ɔƒlumu linwini awu, na úti ebuo ɔku kabuli ɔ́da kavobi. Nwuna adila ani na ɔɔdi ndi uwɔ ku baalɔlɔ bani muubile edula.

7Nwuna linyesia lɛni lɛlɔ na ɔɔkɔ́ lɛsa ndi ɔnii, “Ukyuli ɔni nkpɛ-mi kama ɔdubo ni, anwu utulo-mi ƒui. Ńtedu ka lɛbla kabla kadi lite-nwu muedi. 8Ami ni, ntu na muuti taabla bula bɔkpila ɔdi. Nsu anwu ndubuti Katɔti Kɔyu ɔkpila-mii.”

9Uwi útetu asa na Yesu ɔ́si ɔma ɔni baalɔ Nasaret na Galilea kalɔ lɛlɔ úbo, na ɔ́ƒɔ Yohane ntu bɔkpila ɔdi na Yordan kemmo. 10Ka Yesu ɔ́nya ɔ́lɛ ntu bɔmmɔ kemmo ni, ɔ́nu ka katɔ kébimi na Katɔti Kɔyu kɔ́si kɔɔyu-nwu lɛlɔ aani aasɛ. 11Na lɛdi lɛdi lɛ́si Katɔ lɛɛsu lɛnii, “Awɔ ndi mina ubi ɔni náƒɔ-mi kuye, na kubiti kɔɔda-mi ƒula lɛlɔ.”

12Kɔnakunwi ni, Katɔti Kɔyu kɔ́kpanku Yesu kúsienku ketele kemmo, kesii kani na beƒiebuo bakya. 13Anwu lɛti úlie mmɔ emeyi aavlene. Uwi ɔmmɔ kemmo na Satan úkpoku Yesu ɔ́nu si wasiaku-nwu. Ɔmɛni kama ni, Katɔti batu bébo bébebunku-nwu na bákya-nwu ɔkplu.

14Uwi ɔni na béƒie Yohane ɔni mɔɔbla ntu bɔkpila ɔdi bákya ɔtɔ ni, Yesu ɔ́tɔlɔ úsie Galilea na útásu Katɔti litemi buni mmɔ.

15Ɔkya ɔɔsu ɔnini, “Uwi ɔbuni ɔmmɔ úudu. Katɔti lɛga bɔdi uwi úude. Binwini kama bɛkya bina ekpidi na bɛƒɔ litemi buni lɛmɛni bɛdi!”

16Ka Yesu ɔkɛ ɔɔví na ɛpu ɔdi kudɔ na Galilea kalɔ lɛlɔ ni, ɔ́nu asawu bewine inyɔ badi bani ndi Simon ku ɔnwani Andrea ka bakya beewi asawu.

17Amu na Yesu ɔ́su-ma ɔnii, “Bibasiaku-mi, na matina-mii kalɛ na bidie bekyuli biboku Katɔti kudɔ.” 18Na kɔnakunwi ni, báda bana lɛsawu béwi na báta básiaku-nwu.

19Úsie anumi blii úbu na ɔ́nu banwani inyɔ badi bani ndi Sebedeo bebi Yakobo ku Yohane. Na belie bana ɔkɔlɔ kemmo baaklibi bana lɛsawu. 20Ka Yesu ɔ́nu-ma kani na ɔ́lɔ-ma. Ama lɛnɔ báta kɔnakunwi na báda bana ɔti Sebedeo ku nwuna kabla bablane lɛti pɛ bákya ɔkɔlɔ kemmo, na básiaku Yesu.

Yesu Ɔ́gya Kɔyu Kukpidi Ɔ́lɛku Ɔnana Ɔdi Kemmo

21Yesu ku nwuna basiakune bamɛni bésie bétéduo ɔma ɔni baalɔ Kapernaum. Na lɛnwunameyi lɛni nébo na bana mmɔ busie kama ni, Yesu úsie bana kasalakɔ na úsie ɔkya ɔɔsu litemi buni. 22Ɔ́bla bekyuli bani nénu nwuna ala bɔtina kalɛ kadi, ɔsika uuuse aani ama bani baatina ɔda bubo. Mmomu ni, ɔɔtina ala ku ɔyikun taasiku nwuna kayi kemmo.

23Uwi ɔmmɔ kani kemmo ni, ɔnana ɔdi ɔni na kɔyu kukpidi kulie-nwu lɛlɔ ɔkya kasalakɔ mmɔ na ɔ́va momoomo ɔnini, 24“Yesu Nasareni, bi na aawia asiku bula kudɔ? Bubo na ébo anii abakyula-bu? Ngyi ukyuli ɔni na adi. Awɔ ndi Katɔti Ɔtalane Kedee!”

25Yesu ɔ́bala kɔyu kɔmmɔ ɔnini, “Da bɔtɛmi ya! Na avi alɛ ɔnana ɔmmɔ kemmo.” 26Kɔyu kɔmɛni kɔ́kunku ɔnana ɔmɛni momoomo na kɔ́ya-nwu na ɔ́va asa na kɔ́vi kɔ́lɛ-nwu lɛlɔ kemmo.

27Ɔ́bla bekyuli bani nnye ƒui yaa na béye lɛlɔ banii, “Bi litemi lɛdi mɛni? Bi bɔkpa bɔwɔdi udu na bɔmɛni bɔdi? Ukyuli ɔmɛni ubo ɔyikun ɔni na ɔɔtɛmi ku ayu ekpidi na eenú-nwu litemi!” 28Anwuɔsu Yesu lɛlɔ litemi lígyingya na Galilea kalɔ lɛlɔ ƒui.

Yesu Ɔ́bwi Bekyuli Pii

29Yesu ku nwuna batɛyane ku Yakobo ku Yohane bálɛ kasalakɔ mmɔ, na bátɔlɔ bésie Simon ku Andrea kaduli. 30Ka bétéduo mmɔ ni, bekyuli badi básu Yesu ka Simon ulekudi uni uuƒi ɔtɛ ɔni na lɛlɔ lɛbi-nwu. 31Anwuɔsu Yesu úsie útéduo-nwu kudɔ, na úƒie-nwu kɔnu ɔ́da na ɔ́tala-nwu únyene. Kɔnakunwi na nwuna ɔlɛ ɔ́da-nwu ɔ́ya, na ɔ́ta na úte-ma adila.

32Ka useyi uwi údu ni, bekyuli béti balɛne pii ku bekyuli bani na ayu ekpidi asiaku-ma béboku Yesu banii ɔbwi-ma. 33Na ɔma ɔmmɔ bekyuli ƒui bébenye kayakun mmɔ baanu. 34Yesu ɔ́bwi bekyuli pii bani muuƒi lɛlɛ lidu lidu na ɔ́gya ayu ekpidi pii lɛnɔ ɔ́lɛku bekyuli bani na ayu ekpidi asiaku-ma lɛlɔ. Ka Yesu ɔgyi ɔnii ayu amɛni agyi ukyuli ɔni na ɔdi ɔsu ni, útatuna ka ayu ammɔ asu lɛla lɛdi asiku nwuna lɛlɔ.

Yesu Ɔ́kɔ Litemi Buni Lɛmmɔ Lɛsa Na Galilea

35Ɔtanta tutuutu asa na kadi kadubɔda ni, Yesu ɔ́ta ɔ́lɛ kaduli mmɔ. Na ɔ́lɛ ɔma ɔmmɔ kemmo úsie kesii kani na ukyuli ɔdi biala uuude, na útákpali katɔ.

36Kama ni, Simon ku nwuna bakpana bésie bakya baawia Yesu. 37Na uwi ɔni bánu-nwu ni, básu-nwu banini, “Bekyuli pii bakya baawia-a!”

38Nsu Yesu ɔ́su-ma ɔnini, “Bɛya na busie lɛma lɛbambadi lɛnɔ. Ɔlɛka lɛsu ama lɛnɔ litemi buni lɛmɛni, ɔsika ɔmɛni ndi mina kabla kani na líbo mabla na kayawi kemmo.”

39Anwuɔsu úsie ɔ́vi Galilea kalɔ kesii biala. Ɔkɛ ɔɔsu litemi buni na kasalakɔ, na ɔɔgyá ayu ekpidi taalɛku bekyuli lɛlɔ lɛnɔ.

Yesu Ɔ́bwi Ɔnana Ɔdi

40Ɔnana ɔdi muuƒi ɔlɛgyie úbo Yesu kudɔ. Ɔ́lɛ akɔnkɔ, na úvele-nwu ɔnii ubunku-nwu. Ɔ́su Yesu ɔnii, “Si aayɔ́ ni, akana na abwi-mi na lɛlɔ lɛbla-mi sɛɛn.”

41Nwuna lɛlɔ lɛ́kywi Yesu kaƒɔ, anwuɔsu únene kɔnu na útuku-nwu. Amu na ɔ́su-nwu ɔnini, “Mɔɔyɔ́. Lɛlɔ lɛbla-a sɛɛn ƒui!” 42Kɔnakunwi ɔlɛ ɔmmɔ ɔ́ba-nwu.

43Mmɔ kani na Yesu ɔ́su-nwu ka ɔtɔlɔ mmɔ, na úbo-nwu ɔda kpakplaa ɔnini, 44“Tedi tenye ulu lɛlɔ na asu bekyuli lɛla lɛni nébo. Mmomu teesie na eti lɛlɔ atátina ɔkpane. Na ete akpala ani na Mose ɔda bubo bɔ́tina. Na ɔmɛni ɔdubɔtina bakpane bammɔ ka ɔlɛ ɔmmɔ ɔ́ba-a na ábla sɛɛn.”

45Nsu ka ukyuli ɔmɛni úsela ni, úse kalɔ ɔɔva taasu kalɛ na Yesu ɔ́bwi-nwu. Na ɔmɛni ɔsu ni, Yesu útakana na uduo ɔma ɔdi kemmo, ɔsika bekyuli pii beebo-nwu kudɔ. Ɔmɛni ɔsu Yesu ɔ́ƒɔ lɛlɔ ɔkya alakpi akɔ. Nsu bekyuli básɔ bási ekpo ekpo bébo-nwu kudɔ mmɔ.

Currently Selected:

Marko 1: lef

Highlight

Copy