Marko 2
2
Yesu Ɔ́bwi Ɔnana Ɔni Náƒɛ Uwi Kalɔ
1Emeyi adi kama ni, únwini úsie Kapernaum na nwuna bɔsɔ bubo lɛlɔ kɔtɛ kúbeyi ɔma ɔmmɔ kemmo uwi klukui kemmo. 2Uwi útetu asa na bekyuli bébeyi kesii kani na úduo mmɔ na kaduli ku keyi ƒui. Na ɔkya ɔɔsu-ma litemi buni lɛmmɔ. 3Mmɔ na nkyuli ine béti ɔlɛne ɔdi náƒɛ uwi kalɔ béboku-nwu. 4Na ka bátakɛ kavinkɔ na kayakun ɔ́si bekyuli bumomo ɔsu ni, bátákɔ ɔtɔ katɔ na báyula ɔlɛne ɔmmɔ ku nwuna atɛla báva Yesu anumi. 5Ka Yesu ɔ́nu kalɛ na báƒɔ bádi kpakplaa ka ɔdubɔkana ɔlɛne ɔmɛni bɔbwi ɔsu ni, Yesu ɔ́su ɔlɛne ɔmɛni ɔnii, “Ubi, líti ƒula ekpidi lɛ́kyiɛ-ɔ.”
6Nsu ɔda bubo ala batinane bani nkya mmɔ beeti kasusu na bana kayi kemmo banii, 7“Bi ɔsu na ɔɔtɛmi lɛni? Katɔti lɛti mɔɔkana ekpidi buti taakyiɛ!”
8Yesu ɔ́nu bana kasusu kemmo ɔ́ti na ɔ́su-ma ɔnii, “Bi ɔsu na ɔmɛni uukpóku-mii? 9Ukyuli biala ɔkana ɔsu ɔnii, ‘Líti ƒula ekpidi lɛ́kyiɛ-ɔ.’ Nsu ubo ɔkplu utulo si ɔ́su ɔnini, ‘Ta, na eti ƒula lɛtala na eteesie.’ 10Anwuɔsu kalɛ na bɛƒɔ bɛdi ka ami ɔni ndi Ukyuli Ɔyawine Ubi mbo kuƒi ka liti ekpidi lɛkyiɛ bekyuli na kayawi kamɛni kemmo ɔsu ni, bɛnu!” 11Mmɔ ni, Yesu ɔ́sɔ únwini anumi ɔ́tina ɔlɛne ɔmmɔ na ɔ́su-nwu ɔnini, “Ta, na eti ƒula lɛtala na eteesie kaduli.” 12Na ɔnana ɔmɛni ɔ́ta kɔnakunwi na úti nwuna lɛtala na úsie ɔ́vi bekyuli bani nnye mmɔ akɔ, na ɔ́tɔlɔ úsie nwuna kesii. Ɔmɛni ɔ́bla bekyuli bani nnye mmɔ ƒui kalɛ kadi. Na bátakɔsi Katɔti bumwi. Bana ƒui básu banii bátanu lɛla lɛmɛni udu kudii!
Yesu Ɔ́lɔ Lewi Ɔnii Ɔsiaku-nwu Kama
13Amu na Yesu ɔ́sɔ ɔ́tɔlɔ úsie Galilea Ɛpu kudɔ na bekyuli bammɔ ƒui bébo nwuna kudɔ mmɔ, na ɔ́su-ma litemi buni. 14Ka úti úsela ɛpu kudɔ mmɔ ni, útánu Lewi ɔni ndi Alƒeo ubidi ka ɔ́bla keliekɔ kadi na ulie mmɔ ɔɔƒɔ́ kuyi. Amu na Yesu ɔ́su-nwu ɔnini, “Bo basiaku-mi kama.” Amu na Lewi úmi ɔ́ta kɔnakunwi na ɔ́siaku-nwu.
15Useyi uwi ɔmmɔ ni, Yesu ku nwuna batɛyane ku bekyuli pii bani nsiaku-nwu bébo Lewi kesii banii babadiku-nwu. Na basiakune bammɔ akɔ ni, badi badi kuyi baƒɔne ku alaekpidi bablane. Amu na ɔda bubo ala batinane bani nkya Yudaƒuɔ lɛkpa linwi lɛni baalɔ Ƒarisiƒuɔ kemmo lɛnɔ bébo mmɔ. 16Anwuɔsu uwi ɔni na ɔda bubo ala batinane bani nási Ƒarisiƒuɔ lɛkpa lɛmmɔ kemmo bánu ka Yesu ulie ɔɔdiku bekyuli bani lɛlɔ neeebo ɔbu mɛni ni, béye nwuna batɛyane banii, “Dɛ na ɔ́bla na anwu ku bekyuli bamɛni udu nlie mɔɔdi?”
17Ka Yesu únu litemi lɛni na badaku bɔsu ni, ɔ́su-ma ɔnini, “Balɛne mɔɔwia kuvo ɔblane, na ɔɔɔdi bekyuli bani mbo lɛlɔ ɔkplu. Ńtebo nnii mbalɔ bekyuli babuni na benwini kayi, mmomu líbo na bekyuli bani ngyi ka alaekpidi bablane badi ɔsu.”
Yesu Ɔ́tina Ala Na Kɔka Bulie Lɛlɔ
18Amu uwi ɔdi ka Yohane ku nwuna batɛyane ku Ƒarisiƒuɔ beelie kɔka na bana katɔ bɔkpali ɔsu ni, bekyuli badi bébo Yesu kudɔ bébeye-nwu banii, “Bi ɔsu na ƒula batɛyane ama belélie kɔka aani kalɛ na Yohane badi ku Ƒarisiƒuɔ beelie kɔka?”
19Yesu údie kenye na úbo-ma lɛgba ɔnii, “Uleku ɔgya bakpana beení adila na uleku ketikɔ? Munuu útalɛka ebiti ada-ma ka uleku ɔgya ɔkya-ma akɔ? 20Nsu limeyi lɛdi ni, badubuti-nwu bɔtɔlɔku nwuna bakpana kudɔ na bakpana bammɔ badubunyimi kenye ku kɔnyana. 21Ukyuli ɔdi ulétile kɔdi kɔkukudi liƒi ku lɛdiku lɛwɔdi. Lɛdiku lɛwɔdi lɛmmɔ lɛdubɔni kɔkukudi kɔmmɔ kugyingya si báƒɔ-ku. Na ɔdubɔya na liƒi lɛkukudi lɛmmɔ liibómo litulo kalɛ na lise kudeedi. 22Na lɛnɔ ni, beléti ntɛ bɔwɔdi teewi ɔku koƒo kɔkukudi kɔni kemmo béewi ntɛ dii. Ntɛ bɔwɔdi bɔdubuƒuƒuo na bɔya ɔku koƒo kɔkukudi kɔmmɔ kɔbwɛ na ntɛ ku koƒo lɛnɔ kulálɛ kɔsia. Mmomu ni, ntɛ bɔwɔdi beeti teewi ɔku koƒo kɔwɔdi kemmo.”
Ƒarisiƒuɔ Bákyaku Yesu Unyeƒi Na Kalɛ Na Badi Lɛnwunameyi Lɛlɔ
23Uwi ɔdi ka Yesu ku nwuna batɛyane bási baaví anta kemo kadi kemmo na lɛnwunameyi lɛlɔ ni, báƒɛ anta amɛni adi na baakun. 24Anwuɔsu Ƒarisiƒuɔ badi básu Yesu banii, “Bi ɔsu na ƒula batɛyane baabla lɛni? Bula ɔda bubo útete kuƒi ka babla lɛni na lɛnwunameyi lɛlɔ.”
25-26Mmɔ ni, Yesu úye-ma ɔnini, “Bítaka Katɔti Bunweni Kedee Ɔku kemmo bítenu lɛla lɛni na Ɔga Dawid ɔ́bla? Uwi ɔni na kɔka kɔɔda anwu ku nwuna bakpana ni, Dawid úsie útéduo Katɔti kakpakɔ na lebo lɛni na ukyuli ɔni baalɔ Abiatar ɔdi ɔkpane unengudi. Údie bodobodo kedee ɔni nse nte bakpane lɛti pɛ na kakpakɔ mmɔ ɔ́di, na úti ɔdi lɛnɔ úte nwuna bakpana na bádi. Ɔmɛni lɛnɔ na nka ɔda bubo bútéte kuƒi, nsu bátasu-ma lɛla lɛdi.”
27Na Yesu ɔ́su-ma ɔnini, “Katɔti úse lɛnwunameyi úte ukyuli lɛbuni. Na ɔɔɔdi ukyuli na úse úte lɛnwunameyi. 28Anwuɔsu ami Ukyuli Ɔyawine Ubi ndi lɛnwunameyi lɛnɔ Unwoti.”
Currently Selected:
Marko 2: lef
Highlight
Share
Copy
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
