Luka 14
14
Yesu Ɔ́sɔ Ɔ́bwi Ɔnana Ɔdi Na Lɛnwunameyi Lɛlɔ
1Na lɛnwunameyi lɛdi lɛlɔ ni, Yesu úsie Ƒarisiƒuɔ benengu akɔ unwi ɔdi kesii likpo lɛni na bálɔ-nwu banii ubadi. Na bekyuli bakya baatú-nwu kpakplaa. 2Mmɔ na ɔnana ɔdi na lɛgba ku enu eeƒu-nwu úbo-nwu kudɔ. 3Amu na Yesu úye ɔda bubo ala batinane ku Ƒarisiƒuɔ bammɔ ɔnini, “Bula ɔda bubo búte-bu ulu ka bɔbwi ukyuli na lɛnwunameyi lɛlɔ, munuu bútete-bu ulu?” 4Nsu bátakana kenye bubimi bɔsu lɛla lɛdi. Mmɔ na Yesu ɔ́kpɛ ukyuli ɔmɛni úsienku kɔƒɛlɛ na ɔ́bwi-nwu na ɔ́ya-nwu na ɔ́tɔlɔ.
5Amu na ɔ́su-ma ɔnini, “Si bina ɔdi ubo ubi iye ebuo ɔni muuti ala na ɔ́nu libiɔ lɛdi kemmo na lɛnwunameyi lɛlɔ ni, bɛɛɛdubo-nwu budie na lɛnwunameyi lɛmmɔ lɛlɔ kɔnakunwi?” 6Nsu bátakana-nwu kenye budie.
Yesu Ɔ́su Kalɛ Beeboku Lɛlɔ Kalɔ Ku Kalɛ Na Baaƒɔ́ Baƒɔ
7Ka Yesu ɔ́nu ɔ́ti kalɛ na bekyuli bani na bálɔ-ma béboku likpo lɛdi bakya baanwanɛ kuliekɔ kɔni na kɔ́ƒɔ kuye ni, úbo-ma lɛgba lɛdi ɔnini, 8“Si ukyuli ɔdi ɔ́lɔ-ɔ ɔnii bo-nwu uleku ketikɔ ni, tetélie likpo lɛni na lɛ́ƒɔ kuye litulo. Ɔsika ɔƒɛni kalɛ ɔ́lɔ ukyuli ɔni náƒɔ kuye utulo-ɔ lɛnɔ na mmɔ. 9Na ukyuli ɔni nálɔ bina inyɔ ƒui úboku mmɔ ulasu-ɔ ɔnii, ‘Ya na ukyuli ɔmɛni ubelie mmɔ.’ Na alata eletélie likpo lɛni nátaƒɔ kuye ku kɔƒa. 10Mmomu si bálɔ-ɔ bésienku likpo lɛdi ni, sie télie likpo lɛni nátaƒɔ kuye. Na si ukyuli ɔni nálɔ-ɔ úboku mmɔ úbo ni, na ubasu-ɔ ɔnii, ‘Ɔkpana, ta mmɔ na ebelie likpo lɛni náƒɔ kuye mɛni.’ Na ɔmɛni ɔdubɔkɔliku-ɔ katɔ na bekyuli bakladi bani na bálɔ béboku mmɔ ƒui anumi. 11Ɔsika ukyuli biala ɔni makɔli lɛlɔ katɔ ni, Katɔti ɔdububoku-nwu kalɔ. Na ukyuli biala ɔni meboku lɛlɔ kalɔ ni, Katɔti ɔdubɔkɔliku-nwu katɔ.”
12Amu na Yesu ɔ́su ukyuli ɔni nálɔ-nwu ɔnii ubo kadikɔ mmɔ ɔnini, “Si álɔ bekyuli anii bebo na babadi na ƒula kesii ni, talɔ bakpana iye ƒula banwani iye lɛlɔ bekyuli iye ƒula liku bekyuli bani ndi balakɛne. Ɔsika ama lɛnɔ badubɔlɔ-ɔ lɛni kani banii bo na abadi. Na si úbo lɛni ni, agyi anii lɛla lɛni na ábla éte-ma lɛyuƒɔla na básɔku beete-ɔ mmɔ. 13Mmomu si aadi limeyi lɛmɛni udu ni, lɔ bawabane ku bekyuli bani naaakana busie kaduɛ ku bani náƒɛ bewi kalɔ ku bani na anumi ábwɛ-ma. 14Ɔmɛni ɔdubɔya na Katɔti ute-ɔ kusɛ kusɛ. Ɔsika bekyuli bammɔ baaadubo-ɔ kayu kadi bɔkana bɔƒɔ. Katɔti ndubɔƒɔ-ɔ kayu na limeyi lɛni lɛlɔ na bekyuli babuni badubɔsɔ bata bási bekpine akɔ.”
Bálɔ Bekyuli Ka Bebo Limeyi Kadikɔ Na Katɔ Ɔga Ɔma
15Ka bekyuli bani nlie kadikɔ mmɔ akɔ unwi únu litemi lɛmɛni ni, ɔ́su Yesu ɔnini, “Kubiti geen ndubɔda bekyuli bani ndubo babadi Katɔ Ɔga Ɔma.”
16Amu na Yesu ɔ́su-nwu ɔnini, “Dii ni, ɔnana ɔdi ɔ́lɔ bekyuli pii badi na limeyi libendi lɛdi kadikɔ. 17Ka uwi údu ka bese bɔdi ku bɔni kalɔ ni, ɔ́tala nwuna kabla bablane ɔnii batásu nwuna bekyuli bani ƒui na ɔ́lɔ na bebo. Ɔsika lɛla biala lɛ́ɛsadi!
18“Nsu bana ƒui bése kalɔ atɔ asia ku kuƒi buvele. Ukyuli udeedi ɔ́su kabla ɔblane ɔmmɔ ɔnii, ‘Líye kalɔ kadi na ɔdi ka lisie ntánu-ka. Anwuɔsu su-nwu anii, “Buvele, naaakana bubo.” ’
19“Ɔbambadi lɛnɔ ɔnii, ‘Líye ɔmantɛ bakɔ leevu bani mebunku-mi na kemo. Na ulu ndaku bɔyu ntábla-ma lɛnu kalɛ na badubo bɔkana bɔtuma. Ɔmɛni ɔsu ni, su-nwu anii, “Buvele, naaakana bubo.” ’
20“Ɔbambadi lɛnɔ ɔnii, ‘Ɔƒɛni kani na búti lɛlɔ na báwɛɛ-bu ɔgya ku ule, anwuɔsu naaakana bubo.’
21“Kabla ɔblane ɔmmɔ ɔ́sɔ únwini úsie útásu nwuna Unwoti ala amɛni ƒui. Mmɔ ni, Unwoti ɔmmɔ úti kɔnyi geen na ɔ́su nwuna kabla ɔblane ɔmmɔ ɔnini, ‘Babla na esie lilu lɛlɔ ku ekpo ani ƒui na akpanku bawabane ku bekyuli bani naaakana busie kaduɛ ku bani na anumi ábwɛ-ma ku bani ƒui náƒɛ bewi kalɔ eboku.’
22“Amu na kabla ɔblane ɔmmɔ úsie útábla lɛni. Na ɔ́sɔ únwini úbasu nwuna Unwoti ka ɔ́lɔ-ma, nsu kuliekɔ pii kɔ́sɔ kúbu.
23“Amu na Unwoti ɔmmɔ ɔ́su-nwu ɔnini, ‘Sie na asia umolu ku akpaklɔ lilu na akya ɔkplu na akpanku bekyuli ƒui eboku kalɛ na mina ɔtɔ ɔmmɔ kemmo ƒui keyi. 24Na mɔɔsu-ɔ nwaa nnii bekyuli bani ƒui na lɛ́lɔ nnii bebo kadikɔ ni, ɔdi biala ulétuku mina adila amɛni kenye ulanu!’ ”
Adububo Abi Si Adi Ɔtɛyane
25Uwi ɔdi ka bekyuli pii badi basiaku Yesu ni, únwini na ɔ́su-ma ɔnini, 26“Ukyuli biala ɔni muubo-mi kudɔ ni, ulakana-mi bɔtɛya si ulayɔ-mi teetulo ɔti ku uni ku ulekudi ku bebi ku nwuna banwani bananabi ku belekubi ku anwu ɔlati lɛlɔ muedi. 27Si ukyuli ɔni naaadubo bɔkana na ubo abi aani ami kalɛ na ɔsiaku-mi kama ni, ulakana-mi bɔtɛya.
28“Si ukyuli ɔdi ɔɔwia ka ɔtu ɔtɔ bonwu ɔdi ni, ɔɔka kalɔ bulie na ɔɔbu atula ammɔ ƒui kuye taanu si ubo egulabi ammɔ udu ɔyikun kalɛ na wakana ɔtɔ ɔmmɔ bɔwɔlɔ asa na use kalɔ. 29Na si útakana ɔmɛni bɔbla ni, ulakana ɔtɔ ɔmmɔ bɔwɔlɔ, ina ɔ́nwu lɛti ku atabi kpakplaa ɔ́kya awodu kalɔ ɔ́wɔlɔ. Na si bekyuli bani nnye amadɔ bánu ɔmɛni báti ni, badubo-nwu butaama banii, 30‘Ukyuli ɔmɛni úse ɔtɔ bɔtu kalɔ, nsu útakana bɔwɔlɔ.’
31“Si ɔga ɔdi ɔ́ta kekpo ku nwuna bekpone mpim leevu na útásiaku ɔga ɔbambadi ɔni mbo bekpone mpim aavlanyɔ ni, ɔɔsɔku lili kemmo taabu kaduɛ si nwuna ɔyikun ɔni na ubo ɔdubɔya na unye ɔsiaku nwuna ukisine ɔmmɔ. 32Na si ɔ́nu ka uuubo ɔyikun ɔmmɔ udu ni, ɔdubɔtala nwuna batu na besie batásiaku ɔga ɔmmɔ na bevele-nwu na basɔ belékpo na benwini bakpana mmomu asa na ɔga ɔmmɔ ɔda ɔlɛ muedi.” 33Amu na Yesu ɔ́wɔlɔ nwuna kɔtɛ ɔ́su-ma ɔnini, “Lɛni kani na bina akɔ ɔdi ulakana-mi bɔtɛya si útada atu útedie lɛla biala lɛlɔ.
Lɛla Lɛni Neeebo Lɛblakula Ni, Buti Na Beeti-ni Teevaakun
34“Mma bubo emini. Nsu si emini ása mma kemmo ni, ulu ɔdi biala ɔsɔ uuubo na bakya-mu emini lɛnɔ. 35Ɔɔɔdi lɛla lɛni na beti bakya kalɔ lɛmwi na útamanku kebu muedi. Buwiakun na beewiakun-mu.
“Anwuɔsu bibimi atu na binu-mi kalɔ kaduɛ!”
Currently Selected:
Luka 14: lef
Highlight
Share
Copy
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
