Luka 13
13
Si Bítenwini Kayi Ni, Bɛdubɔyii Ku Udu
1Lebo lɛmmɔ ni, bekyuli badi bakya mmɔ bani násu Yesu kalɛ na Pilato ɔ́du Galileaƒuɔ badi uwi ɔni na bákya bátaabla akpala teete Katɔti. 2Amu na Yesu úye-ma ɔnini, “Bɛɛbu bɛnii ka bádu Galileaƒuɔ bammɔ lɛni ɔsu ni, ama ndi alaekpidi bablane benengudi ntulo Galileaƒuɔ bakladi ƒui? 3Oowo, ɔɔɔdi lɛni kudii! Nsu bɔsu nda-mii nnii si bítada bina ala ekpidi bɔbla bítaya ni, lɛni kani na amii lɛnɔ bɛdubo bukpi. 4Na nkyuli leevu-maane bani na Siloa ɔtɔ ubendi ɔmmɔ ɔ́ƒɛ úbo na békpi nɔɔ? Bɛɛkali ka ɔmɛni ɔsu ama ndi bekyuli bekpidi ntulo ama bani nli Yerusalem mmɔ ƒui? 5Oowo, ɔɔɔdi lɛni kudii! Mɔɔsu-mii ka si bítavumana udu ni, lɛni kani na bina ƒui bɛdubo bukpi aani ama kalɛ.”
Yesu Úbo Lɛgba Na Kɔdingyii Kɔni Naaanwu Ebi Lɛlɔ
6Amu na Yesu úbo-ma lɛgba lɛmɛni ɔnini, “Uwi ɔdi kemmo ni, ɔnana ɔdi ɔ́kya ɔni na ubo kɔdingyii kɔdi na nwuna kemmo. Úsie ɔnii utáwia kugyii kɔmɛni ebi, nsu útakɛ adi. 7Amu na ɔ́su nwuna kemo kammɔ lɛlɔ ɔnune ɔnii, ‘Nu! Akwa atɛ sɔɔn mɛni ka muubo mɛni taabawia kugyii kɔmɛni ebi taanɔ. Da-ku va kalɔ, ɔsika kuuubo lɛblakula na kalɔ kani lɛlɔ na kunye mmɔ.’
8“Nsu kemo lɛlɔ ɔnune ɔmmɔ údie kenye ɔnini, ‘Ati, nyonu-ku na kɔsɔ kunye lɛkwa linwi pɛ bɔnu. Ndubuku-ku kalɔ na lɛkya-ku ala ani ndubɔya na kalɔ kammɔ kelie lɛmwi na bɔnu. 9Na si kɔ́kana ebi bonwu ni, ɔdia. Nsu si útakana bɔnwu ni, akana na ada-ku ava kalɔ.’ ”
Unyeƒi Ɔbambadi Bɔkya Na Lɛnwunameyi Lɛlɔ
10Na lɛnwunameyi lɛdi lɛlɔ ni, Yesu ɔkya ɔɔtina ala na Yudaƒuɔ kasalakɔ kadi. 11Na uleku ɔdi lɛnɔ ɔ́kya mmɔ ɔni na kɔyu kukpidi kɔdi kuukpóku akwa leevu-maane sɔɔn. Kɔyu kɔmmɔ kɔ́ya na kalɔ kani na uleku ɔmmɔ úbo ɔkɛ uwi biala ɔni na ulakana na unye ligeen. 12Uwi ɔni na Yesu ɔ́nu-nwu ni, ɔ́kpali-nwu na ɔ́su-nwu ɔnini, “Uleku, ƒula ɔlɛ ɔ́ba-a!” 13Na Yesu úti nwuna enu ɔ́sia uleku ɔmmɔ lɛlɔ. Na kɔnakunwi ni, uleku ɔmmɔ ɔ́ta únye ligeen na úmwi Katɔti.
14Yudaƒuɔ kasalakɔ kammɔ lɛlɔ ɔnune úti kɔnyi geen sɔsɔ na ɔni na Yesu ɔ́bwi ɔlɛne na lɛnwunameyi lɛlɔ ɔsu. Anwuɔsu ɔ́su bekyuli bammɔ ƒui ɔnini, “Bubo emeyi aku ani buti bɔbla bula kabla. Anwuɔsu bibo na emeyi amɛni kemmo si lɛla lɛdi lɛda bina akɔ ɔdi na babwi-nwu, na ɔɔɔdi lɛnwunameyi lɛlɔ!”
15Mmɔ na Blɔti údie kenye na ɔ́su-nwu ɔnini, “Amii, anumi lɛlɔ bekyuli, biidie bebuo bani mɔɔbla-mii kabla iye beeti-mii ala lɛbuli na bɛɛkpanku-ma teesienku ntu kanikɔ. 16Na ɔƒɛni ni, bɛɛnu Abraham kaba kemmo ubi nnye mɛni ɔni na Satan úbo lɛkpu akwa leevu-maane sɔɔn mɛni. Ɔɔɔdia ka baƒɛnimi-nwu abuli ammɔ na lɛnwunameyi lɛlɔ?”
17Kenye kani na Yesu údie mɛni ɔ́ya na kɔƒa kúkpo nwuna bekisine, na bekyuli bakladi bákɛ ebiti na akɔla budie taatina ani ƒui na ɔ́bla ɔsu.
Yesu Úti Katɔ Ɔga Ɔma Ɔ́manku Kugyii Kebi Blii Suɛ Kadi
18Amu na Yesu úye-ma ɔnini, “Bɛgyi kalɛ na Katɔti lɛga bɔdi litemi bugyingya buse? Na bi na ɔlɛka buti-mu bɔmanku? 19Bɛnu! Ɔnana ɔdi úti edula kebi blii suɛ kadi útáva nwuna kemo. Ka edula kebi kamɛni kákwɛ ni, kébenwini kugyii bonwu na baasɛ bábatu ayu bákya-ku kɔgba akɔ.”
Yesu Úti Katɔ Ɔga Ɔma Ɔ́manku Bɔnyii
20Yesu ɔ́sɔ úbo-ma lɛgba lɛbambadi ɔnini, “Katɔti lɛga bɔdi litemi bugyingya buse aani ɔmɛni. 21Uleku ɔdi úti bɔnyii ɔ́salaku ɔlaaƒɔ koƒo kunwi, na ɔ́nwu ɔ́sala útédu uwi ɔni na bɔnyii bɔmmɔ bɔ́ƒɔ ɔlaaƒɔ ɔmmɔ ƒui na úƒu.”
Yesu Ɔ́su Ka Ngba Kayakun Kátabɛbɛ
22Yesu úsie ɔ́vi lɛma ku akpaklɔ kemmo na ɔ́tina bekyuli ala uwi ɔni na úsela Yerusalem. 23Mmɔ na ukyuli ɔdi úye-nwu ɔnini, “Ati, bekyuli bani ndubɔkɛ bɔƒɔ ni, baaadubo bumomo yoo?”
Amu na Yesu údie kenye ɔnini, 24“Kya ɔkplu na asia kayakun kani nse blii suɛ kemmo eduo. Ɔsika bekyuli pii badubɔwia geen banii baasia mmɔ beduo, nsu balakana. 25Uwi ɔdubo ubedu ɔni na Unwoti ɔmmɔ ɔdubɔta na ɔkalɛ kayakun kammɔ. Na amii bani nébu binye keyi bɛdubo kɔnu kayakun buteebo bɛnii, ‘Ati, lɛmi-bu!’
“Nsu Unwoti ɔmmɔ ɔdubudie kenye ɔnii, ‘Lɛɛɛgyi-mii!’
26“Na bɛdubɔsu bɛnii, ‘Abu ku-ɔ nádi na bɔ́ni, na átina ala na bula ɔma!’
27“Nsu anwu ɔdubɔsɔ udie kenye ɔnii, ‘Lɛɛɛgyi-mii! Bɛkpɛ bisie-mii lɛlɔ, amii bekyuli bekpidi.’
28“Mmɔ na keku ku animi bɔdu bɔdubɔkya uwi ɔni na bɛdubɔnu Abraham ku Isak ku Yakob ku Katɔti kenye bediene ƒui na Katɔ Ɔga Ɔma uwi ɔni kemmo na Katɔti ɔ́gya-mii ɔnii biteduo. 29Bekyuli badubɔsi ɔƒɛ katukɔ ku kanukɔ bebo. Na basi katɔ kakɛ ku kada kakɛ babasala na badi na bani na Katɔ Ɔga Ɔma. 30Na bekyuli bani ndi bekplodi ni, badubunwini bedeedi. Na bani ndi bedeedi ni, badubunwini bekplodi.”
Yesu Ubo Bɔyɔ Ute Yerusalem
31Na uwi ɔmmɔ kemmo ni, Ƒarisiƒuɔ badi bébo Yesu kudɔ na bábasu-nwu banii, “Babla na avi alɛ mɛni kɔnakunwi eteesie likpo bamba, ɔsika Ɔga Herode ɔɔwia ka ɔdu-ɔ.”
32Mmɔ na Yesu ɔ́su-ma ɔnini, “Bisie na bitásu uƒukutu ɔmmɔ ka lɛ́su lɛnii, ‘Ɔmwi ni, ndubo ayu ekpidi bɔgya na lɛbwi bekyuli lɛlɛ lɛni na beeƒi utálɛ kɔnaadi. Na limeyi lɛtɛdi lɛlɔ ni, ndubɔwɔlɔ mina kabla.’ 33Anwuɔsu ɔ́bla bi ɔ́bla dɛ ni, ndubusie anumi ɔmwi utálɛ kɔnaadi ku keegye. Ɔsika útalɛka badu Katɔti kenye udiene ɔdi na likpo bamba si ɔɔɔdi Yerusalem ɔma kemmo.
34“Yerusalem, Yerusalem! Awɔ mɔɔdú Katɔti kenye bediene, na awɔ muubó Katɔti batalane bani na ɔ́tala ɔ́kya-a atabi. Kɔlɛ kɔlɛ sɔɔn mɛni ka líbimi mina enu nnii mɔɔsála-mii aani kalɛ na akɔkɔ uledi uuti nwuna avwi teebi nwuna bebi lɛlɔ, nsu étenu kalɔ. 35Ɔmɛni ɔsu ni, Katɔti ɔdubudie ɔma ɔmɛni atu. Na mɔɔsu-mii geen ka ni, bɛsɔ bɛɛɛdubo-mi bɔnu wetédu uwi ɔni na bɛdubɔsu bɛnii, ‘Bimwi anwu ɔni ndubo na Blɔti lɛnyi kemmo!’ ”
Currently Selected:
Luka 13: lef
Highlight
Share
Copy
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
