Luka 15

Bánu Koƒonu Kɔni Náyii

1Limeyi lɛdi ni, kuyi baƒɔne pii ku alaekpidi bablane babambadi bébo Yesu kudɔ banii bebenu-nwu litemi. 2Mmɔ na Ƒarisiƒuɔ ku ɔda bubo ala batinane bése kalɔ beetemi teewi-nwu na bana lɛlɔ kemmo banii, “Ukyuli ɔmɛni ɔɔƒɔ́ alaekpidi bablane na anwu ku-ma baadi muedi!”

3Anwuɔsu Yesu úbo-ma lɛgba lɛmɛni ɔnini, 4“Si banii bina akɔ ɔdi ubo baƒonu eti anyɔ na bana akɔ unwi ɔ́yii ni, bi na adubo bɔbla? Adubɔda liti ku aavlene-yaalenwi bammɔ enyene kadikɔ mmɔ na atásia kɔni náyii mmɔ kama wetédu uwi ɔni na ánu-ku. 5Na si ánu-ku ni, adubɔkɛ kubiti geen, na agyu-ku asia amangba. 6Na eti-ku eboku kaduli. Na adubɔlɔ ƒula bakpana ku liku bekyuli na asu-ma anii, ‘Ebiti aada-mi geen, ɔsika lɛ́nu mina koƒonu kɔni náyii ɔsu bɛkɛku-mi ebiti!’ 7Na mɔɔsu-mii ka ni, lɛni na ebiti enengudi adubɔda Katɔ Ɔga Ɔma badi ƒui na alaekpidi ɔblane unwi pɛ ɔni nénwini kayi ɔsu utulo ebiti ani bebo na nkyuli liti ku aavlene-yaalenwi babuni bani naaawia kayi bunwini.

Bánu Sika Ɔƒualadi Ubi Ɔni Náyii

8“Na si uleku ɔdi ubo sika ɔƒualadi ebi leevu ani ndubɔƒɔ nkyuli leevu limeyi kayu na ɔ́yila unwi ni, bi na ɔdubo bɔbla? Ɔdubɔtu asogya na ɔkpala nwuna ɔtɔ kemmo ƒui na ɔwia lɛkɔkɔ lɛmmɔ ƒui kaduɛ wetédu uwi ɔni na ɔ́nu sika ubi ɔmmɔ. 9Na si ɔ́nu-nwu ni, ɔdubɔlɔ nwuna bakpana ku liku bekyuli ɔsala, na ɔsu-ma ɔnii, ‘Ebiti aada-mi geen, ɔsika lɛ́nu mina sika ubi ɔni náyii ɔsu bɛkɛku-mi ebiti.’ 10Na mɔɔsu-mii geen ka ni, lɛni kani na Katɔti batu lɛnɔ baakɛ́ ebiti na alaekpidi ɔblane unwi ɔni nénwini kayi ɔsu.”

Ubi Ɔni Náyii Ɔ́sɔ Úbo Ɔti Kudɔ

11Yesu úsie anumi na ɔ́su-ma ɔnini, “Ɔnana ɔdi ɔ́kya ɔni mbo bebi bananabi inyɔ. 12Amu na ɔnamudi ɔ́su ɔti ɔnini, ‘Ati, ti mina kadikɔ kani na adubo-mi bute te-mi gyɔnkɔ.’ Ɔmɛni ɔsu ɔnana ɔmmɔ úti ala ammɔ úle akpa anyɔ úte nwuna bebi inyɔ bammɔ.

13“Na emeyi alɛɛ adi kama ni, ɔnamudi ɔmmɔ úti nwuna ala ammɔ ƒui úye na úti egulabi ammɔ na ɔ́tɔlɔ úsie ɔlɔgyu kakaaka kesii kani na útélie ngba basa basa na úbile egulabi ammɔ ƒui. 14Ɔ́di lɛla biala lɛni na ɔda ɔ́wɔlɔ. Na ɔmmɔ kama ni, kɔka kubendi kɔdi kúbo na kalɔ kammɔ lɛlɔ ƒui ɔsu kɔka kúbo kɔɔda-nwu na ɔsɔ uuubo lɛla lɛdi na ɔdi. 15Ɔmɛni ɔsu úti lɛlɔ útése ɔkpa úte ɔnana ɔdi ɔnii utaabla kabla udu biala na wakɛ ute-nwu. Na ɔnana ɔmmɔ lɛnɔ úti-nwu útákya nwuna baplakuo kanyuɛkɔ na nwuna lɛkpaklɔ lɛdi. 16Kɔka ɔsu ni, ɔ́yɔ ka nka ɔkɛ baplakuo adila ani na beete-ma mmɔ adi ɔdi, ɔsika ɔ́nu aani bekyuli lɛnɔ bakana-nya bɔdi, nsu ukyuli ɔdi útete-nwu adi.

17“Kawɔlɔkɔ ni, ɔ́sɔ únwini úbo lɛlɔ kemmo na ɔ́su lɛlɔ ɔnii, ‘Bekyuli bani nése lɛlɔ ɔkpa béte mina ɔti na baabla nwuna kabla ni, baakɛ́ adila taadi na eebú muedi. Na ami nlie mɛni na kɔka kɔdubo-mi bɔdu! 18Ndubo bɔta na lɛsɔ linwini nteesie mina ɔti kudɔ, na ntásu-nwu nnii, “Ati, lɛ́bla likpidi na lɛ́ƒiɔ Katɔti ku awɔ lɛnɔ. 19Ńsɔ ńtamanku ka alɔ-mi anii ƒula ubi. Mmomu bla-mi aani bekyuli bani néti lɛlɔ bése ɔkpa béte-ɔ akɔ ɔdi.” ’ 20Amu na ɔ́ta kɔnakunwi na úti ala na ɔ́yu ulu úsela ɔti kudɔ.

“Ka ɔti ɔ́nu-nwu ɔ́ti ɔni na ubidi ɔmɛni ɔmu ɔkɛ ɔgyu ɔdubo ni, ubidi lɛlɔ lɛ́bla-nwu kɔnyana, na úkeli útátu ɔda-nwu ku kubiti.

21“Mmɔ na ubidi ɔ́su-nwu ɔnini, ‘Ati, lɛ́bla likpidi lɛ́ƒiɔ Katɔti, na lɛ́ƒiɔ awɔ lɛnɔ. Na ńsɔ ńtamanku ka alɔ-mi anii ubi lɛnɔ!’

22“Nsu ni, ɔti ɔ́kpali nwuna kabla bablane ɔnii, ‘Bɛbabla na biti adala abuni bibakya-nwu. Na biti asɛɛ ku lɛgbanvuo lɛbuni lɛnɔ bɛkya-nwu enu ku lɛgba. 23Ɔmɛni kama ni, bisie na bitéƒie ebuo ɔni nélie lɛmwi kaduɛ na bɛdu-nwu. Na bɛya na bɔdi limeyi. 24Ɔsika mina ubi ɔmɛni ni, búti-nwu bɔnii úkpi. Nsu ɔ́sɔ únwini úbo ngba. Ɔ́yii na bɔ́sɔ bɔ́nu-nwu.’ Ɔmɛni ɔsu bése kalɔ ku limeyi bɔdi.

25“Amu na uwi ɔmɛni kemmo ƒui ni, ubidi unengudi úsie ɔɔví taanu bana mmo. Ka ɔ́si ɔdubo na ɔ́kpɛ uudé kaduli ni, únu kɔgya ku katɔ kani nda. 26Amu na ɔ́kpali kabla bablane bammɔ akɔ unwi na úye-nwu ɔnini, ‘Bi mɔɔlɛ́ kaduli?’ 27Mmɔ na kabla ɔblane ɔmmɔ údie kenye ɔnini, ‘Ƒ'ɔnwani násɔ únwini úbo ɔma na ƒ'ɔti ɔ́ya na bádu ebuo ɔni nélie lɛmwi, ɔsika ɔ́sɔ únwini úbo úbeduo ɔni na lɛla lɛdi lɛɛɛda-nwu.’

28“Ɔmɛni ɔ́ya na livo líƒi ɔnwani unengudi ɔmmɔ kaduɛ ɔni na úni ɔnii ɔsɔ uleduo kaduli muedi. Ɔmɛni ɔsu ɔti ɔ́vi ɔlɛ úbo-nwu kudɔ mmɔ, na úbevele-nwu ɔnii ubo ubeduo kaduli. 29Nsu ubidi ɔmmɔ únwini na ɔ́su ɔti kɔnakunwi ɔnii, ‘Bi ɔsu na nnye mɔɔbla kabla akwa pii amɛni kemmo teete-ɔ aani ƒula kabla ɔblane na ńtata ńtenye ƒula ɔda bubo ɔdi lɛlɔ kudii, na étete-mi lɛla lɛdi ina ese muedi étete-mi anii ndi limeyi ku mina bakpana. 30Nsu ka ƒ'ubidi ɔni nébile ƒula lɛkɛ na ɔkɛ ɔsiaku bayalɛ mɛni ɔ́sɔ únwini úbo ɔma ni, ádu ebuo ɔni nélie lɛmwi éte-nwu!’

31“Mmɔ na ɔti ɔ́su-nwu ɔnini, ‘Mina ubi, awɔ akya-mi kudɔ uwi biala na ala ani na mbo ƒui ni, awɔ adi na adi. 32Nsu ni, ɔlɛka bɔdi limeyi na bɔkɛ ebiti, ɔsika búti-nwu bɔnii bukpi na ƒ'ɔnwani úkpi na ɔ́sɔ únwini úbo ngba. Bɔyii na ɔ́yii na bɔ́sɔ bɔ́nu-nwu.’ ”

Currently Selected:

Luka 15: lef

Highlight

Copy