Ala Kalɔ Buse 42

Yoseƒ Banwani Bananabi Bésie Egyipte

1Ka Yakob únu ka edula akya Egyipte ni, ɔ́su nwuna bebi bananabi ɔnini, “Bitasɔ bitelie mɛni bitataanu lɛlɔ anumi! 2Línu ka banii edula akya Egyipte. Anwuɔsu bisie na bitéye na bɔkɛ lɛla lɛni na bɔdi bulie ngba na bulekpi!”

3Amu na Yoseƒ banwani leevu bátɔlɔ bésie Egyipte bétéye edula. 4Nsu Yakob útaya na ubidi Benyamin ɔsiaku-ma, ɔsika ɔɔyia ɔnii ɔgbankpi ɔdi watásiaku-nwu. 5Ɔmmɔ ɔsu Israel bebi lɛnɔ básiaku bekyuli lisu lɛni nási Kanaan kalɔ lɛlɔ mmɔ bésie betéye adila, ɔsika kɔka kɔmmɔ kɔ́ƒɔ Kanaan kalɔ ƒui lɛnɔ lɛlɔ.

6Na ɔƒɛni ni, Yoseƒ ndi aban ɔgadine unengu ɔni muuyé edula ammɔ teete kadi biala bekyuli. Ɔmmɔ ɔsu ka Yoseƒ banwani bammɔ lɛnɔ bébo ni, bábayu bébi kalɔ ku ɔbu na bégyele-nwu. 7Na ka Yoseƒ ɔ́nu-ma kani na ɔ́nu-ma ɔ́ti. Nsu ɔ́bla lɛlɔ aani ɔƒɔ ɔni naaagyi-ma ɔsu útete-ma anumi munu munu ka ɔɔtɛmiku-ma. Na úye-ma ɔnini, “Wɛ bɛ́si?”

Mmɔ na bédie kenye banini, “Bɔ́si Kanaan na búbo bɔnii bubeye edula.”

8Ɔƒɛni ina ka Yoseƒ ɔ́nu nwuna banwani ɔ́ti ni, ama bátanu-nwu bátati. 9Na mmɔ ni, Yoseƒ únyimo ana ani na anwu ɔlatidi ɔmmɔ úgye dii úbavi ɔ́siku-ma lɛlɔ. Na ɔ́su-ma ɔnini, “Batu bani mɔɔbɛ́ taawia ala kalɔ taanu na bɛdi. Na bíbo bɛnii bɛɛwia bɛti kesii kani na buuubo ɔyikun na bɛsia mmɔ bɛkɛ-bu.”

10Amu na bédie kenye banini, “Ati, kudii! Edula kani na abu, ƒula kabla bablane, búbo bɔnii bubeye. 11Na ukyuli unwi bebi na bula ƒui bamɛni bɔdi. Na aani ƒula kabla bablane kalɛ ni, litemi geen na bɔɔsu, na ɔɔɔdi batu bani mɔɔbɛ́ taawia ala kalɔ taanu na bɔdi!”

12Mmɔ na Yoseƒ ɔ́su-ma ɔnini, “Kudii! Batu bani mɔɔwia ala kalɔ taanu na bɛdi! Bíbo bɛnii bɛɛwia bɛti kesii kani na buuubo ɔyikun na bɛsia mmɔ na bɛkɛ-bu!”

13Amu na bédie kenye banini, “Abu ƒula kabla bablane ni, nka mbo-bu leevu-inyɔ na bɔdi ɔnana unwi bebi. Na bula ɔti ɔmmɔ ɔkya Kanaan kalɔ lɛlɔ ɔƒɛni. Na bula ɔnwani ɔnamudi ƒui ɔkya bula ɔti kudɔ, na unwi anwu ɔsɔ uuubo.”

14Mmɔ na Yoseƒ ɔ́su-ma ɔnini, “Lɛni geen ɔsu na litemi lɛni na mɔɔsu lɛdi litemi geen ka ni, batu bani mɔɔwia ala kalɔ taanu na bɛdi! 15Ami lɛnɔ ndubo-mii bɔkɔku bɔnu na ulu ɔdi lɛlɔ. Lɛ́kpali ala mɔɔlɔ Ƒarao na nwuna lɛgadi kenye ka si bina ɔnwani ɔnamudi ɔmmɔ útebo mɛni ni, bina akɔ ɔdi ulágyu na kesii kamɛni. 16Ɔmmɔ ɔsu bɛtala bina akɔ unwi na útákpanku bina ɔnwani ɔnamudi ɔmmɔ uboku. Na bina bakladi bani mebu ni, ndubɔya na bakya-mi aban ɔtɔ wetédu uwi ɔni na bɔ́nu bɔ́ti ka litemi geen na bɛɛsu. Na si ɔɔɔdi lɛni ni, na mɔɔsu-mii na Ƒarao lɛgadi lɛnyi kenye ka batu bani mɔɔwia ala taanu na bɛdi sɔsɔ!” 17Amu na Yoseƒ ɔ́ya na bébo-ma lɛkpu na bagyumanane enu kemmo emeyi atɛ.

18Na limeyi lɛtɛdi lɛlɔ ni, Yoseƒ úbasu nwuna banwani bammɔ ɔnini, “Si bɛɛyɔ́ ka bɛkɛ ngba bɔdi ni, amu bɛbla lɛla lɛni na ndubo-mii bɔsu mɛni, ɔsika ami ɔlati ni, ndi ukyuli ɔni mɔɔbu Unwoti Katɔti geen. 19Si bɛɛdi litemi geen lɛlɔ ni, bɛya na ukyuli unwi ɔsɔ ɔkya aban ɔtɔ ɔmɛni kemmo. Na bina bakladi bitáƒɔ edula bisienku bina kaduli bekyuli bani na kɔka kɔdaku bɔdu. 20Mmomu bɛkpanku bina ɔnwani ɔnamudi ɔmmɔ biboku na bɔwia bina etemila kalɔ bɔnu. Na si sɔsɔ geen litemi na bɛda ni, bɛdubulie ngba.” Amu na báta kɔnakunwi bésie bátábla kalɛ na Yoseƒ ɔ́su-ma.

21Ɔmmɔ kama básu lɛlɔ banini, “Katuala kadi keeebo ɔmɛni kemmo. Bɔgyi nwaa ka bula ɔnwani ɔni bɔ́bla likpidi ɔsu na buubó abi amɛni udu. Búnyimo kalɛ na ɔ́ƒɛ ɔ́da-nwu uwi ɔni na uuvele-bu ka nka bútabla-nwu lɛla lɛmmɔ udu. Nsu búni na bútanu-nwu kɔnyana. Anwuɔsu na lɛbibo lɛmɛni udu líbo-bu lɛlɔ.”

22Amu Ruben úye nwuna banwani bakladi ɔnini, “Ńtasu-mii nnii bitaya na bɔbla likpidi bɔƒiɔ ɔnamu ɔmɛni, na bítenuku-mi kalɔ? Ɔƒɛni bula ɔti ubi na ɔdi, na bɔdi ubugya unwi. Bɛɛnu ka nwuna ubugya lɛlɔ kɔtu na baaní-bu ɔmwi.” 23Na ɔmɛni ƒui ni, baaagyi banii Yoseƒ uunú ala ani ƒui na baasu kede kede, ɔsika lɛdi bamba na uutemiku-ma asa na nwuna kenye udiene uudie kalɔ teete-ma.

24Mmɔ ni, ɔ́gyu-ma kudɔ kɔnakunwi na úsie ɔkya uuwulo. Na ka ɔkwɛnu ɔ́da-nwu bukpo ɔ́ya ni, ɔ́sɔ únwini úbo-ma kudɔ ubatɛmiku-ma. Na ɔ́ya na béƒie Simeon na bényimi-nwu na bana anumi.

25Yoseƒ úbo nwuna kabla bablane ɔda ɔnii bakya edula beyile-ma aƒo. Na basɔku bana sika ɔƒualadi ɔni na nka bada badubo bebeye edula mmɔ bakya ɔdi biala koƒo kemmo. Na bete-ma adila bamba kalɛ na baatádi si bakɛ ulu bésela. 26Ka kabla bablane bammɔ bábla ala amɛni ƒui báwɔlɔ ni, bágyu ɔdi biala etila bétényimi básia bana bebuo ala betine kama na bátɔlɔ.

27Ka ɔƒɛ ɔ́sa-ma na bédu kesii kani na batɛ ni, bana akɔ unwi ɔƒɛnimi nwuna koƒo ɔnii uute nwuna ebuo ala utine adila. Na ka ɔɔnu ni, aanu sika ɔƒualadi ɔni na úti útéye edula mmɔ na básɔku bakya-nwu koƒo kemmo. 28Mmɔ na ɔ́su nwuna banwani kɔnakunwi ɔnini, “Bɛnu básɔku mina sika ɔƒualadi ɔmmɔ bákya-mi koƒo kemmo, bɛɛnu ka ɔsia edula lɛlɔ mɛni.”

Mmɔ kani na bana ƒui bágyini benye. Bénwini bánu lɛlɔ na lɛlɔ lɛɛtɔ́-ma na béye lɛlɔ banini, “Bi na Unwoti Katɔti ɔ́bla-bu mɛni?”

29Amu ka bébeduo ɔma na Kanaan kalɔ lɛlɔ na bana ɔti Yakob kudɔ ni, básɔku lɛla biala nálɛ mmɔ ƒui básu-nwu. Na bédie kenye banini, 30“Kalɔ kammɔ unengu ɔni mɔɔnu-ka lɛlɔ mmɔ útete-bu anumi munu munu ka ɔɔtɛmiku-bu. Na ɔ́bla-bu aani si batu bani mɔɔwia kalɔ kammɔ ala kalɔ bati na bɔdi. 31Nsu bɔ́su-nwu bɔnii ɔɔɔdi bekyuli bammɔ udu na bɔdi, mmomu bɔdi bekyuli bani mɔɔdi litemi geen lɛlɔ uwi biala. 32Na nka bubo banwani leevu-inyɔ na bula ɔti ɔ́wɔ na unwi ɔsɔ uuubo. Na ɔnamudi ƒui ni, anwu nkya bula ɔti kudɔ na Kanaan mɛni.

33“Amu na kalɔ kammɔ unengu ɔni mɔɔnu-ka lɛlɔ mɛni ɔ́su-bu ɔnini, ‘Ndubɔsia ulu ɔdi lɛlɔ na lɛnu lɛti si sɔsɔ na bɛɛdi litemi geen lɛlɔ. Bɛnyonu bina akɔ unwi bɛkya kama na mina kudɔ mɛni. Na biti adila bitésienku bina kaduli bekyuli bani na kɔka kɔdaku bɔdu. 34Nsu bɛkpanku bina ɔnwani ɔnamudi biboku-mi na lɛti ka sɔsɔ bɛɛɛdi batu bani mɔɔwia ala kalɔ taanu. Na ndubɔsɔku bina ɔnwani lite-mii. Na ndubɔya na biteebo mɛni taabadi kuye ku bula kalɔ lɛlɔ bekyuli.’ ”

35Ɔmmɔ kama ka ɔdi biala úwilimi nwuna edula ni, ɔdi biala sika ɔƒualadi ku obo ɔni na nka béti betéye edula mmɔ ɔkya bana aƒo kemmo. Na ka bátina bana ɔti lɛnɔ na ɔ́nu sika lɛbo lɛmɛni ni, bana ƒui báyia. 36Mmɔ na bana ɔti Yakob ɔ́su-ma ɔnini, “Bɛ́ya na lɛ́yila mina bebi. Yoseƒ ɔsɔ uuubo. Simeon lɛnɔ na bɛnii béƒie bése ngye. Amu na bɛsɔ bɛkpanku Benyamin lɛnɔ bɛtɔlɔku-mi kudɔ? Bi ɔsu na mina lɛla biala linwini-mi kekuma lɛni?”

37Amu na Ruben ɔ́su ɔti ɔnini, “Si ńtakana na lɛsɔku Benyamin liboku-ɔ ni, akana na adu-mi bebi inyɔ bani nnye-mi. Awɔ, ti-nwu bo ɔda te-mi. Na ndubɔsɔku-nwu liboku.”

38Mmɔ na Yakob ɔ́su Ruben ɔnini, “Mina ubi ulayu ulu ulasiaku-ɔ ulesie mmɔ! Ɔnwani úkpi na anwu lɛti kani nébu. Na si ɔgbankpi ɔdi úsie útásiaku anwu lɛnɔ na ulu ni, agyi anii lɛbibo kemmo na ndubuti mina liliƒuala ntéduo kekpine.”

Currently Selected:

Ala Kalɔ Buse 42: lef

Highlight

Copy