Ala Kalɔ Buse 43

Yoseƒ Banwani Básɔ Bésie Egyipte Kunyɔdi

1Na uwi ɔmɛni kemmo ƒui ni, kɔka kɔmmɔ kɔ́mu kɔ́nyi anyi na kalɔ kammɔ ƒui lɛlɔ. 2Anwuɔsu edula ani ƒui na bétéye na Egyipte mmɔ ni, báadi lɛla biala ƒui bédie báwɔlɔ. Ɔmmɔ ɔsu bana ɔti Yakob ɔ́lɔ-ma ɔ́su ɔnini, “Bɛsɔ bisie na bitéye edula blii adi biboku.”

3Mmɔ na ubidi Yuda údie kenye ɔnini, “Ɔnana ɔmmɔ úbo-bu ɔda kpakplaa geen ɔnini, ‘Bɛsɔ bitada bitalɛ-mi anumi amu ntu bɛdanku bina ɔnwani!’ 4Ɔmmɔ ɔsu si adubunu kalɔ na bɔkpanku bula ɔnwani bɔda bɔdi ni, na bɔdubusie butéye edula ammɔ buboku-ɔ. 5Na si elénu kalɔ bɔdi ni, abu lɛnɔ bulésie. Ɔsika bɔsu na ɔnana ɔmmɔ ɔ́su ɔnini, ‘Bɛsɔ bitada bitalɛ-mi anumi, amu ntu bɛdanku bina ɔnwani.’ ”

6Mmɔ na bana ɔti Israel ɔsu ɔnini, “Dɛ na ɔ́bla na bɛɛsu ɔnana ɔmmɔ bɛnii bibo ɔnwani bamba na bíti lɛbibo lɛmɛni bíboku-mi lɛlɔ?”

7Mmɔ na bédie kenye banini, “Ɔnana ɔmmɔ ɔlati nénye kpakplaa uuye-bu ala ammɔ udu teenu ɔ́si bula bɔwɔ ku kaduli bekyuli lɛlɔ. Ala ani bene na úye-bu adi ndi, ‘Bina ɔti ɔmu uli ngba? Bibo banwani bamba badi?’ Na ala ani na úye-bu kenye kani na búdie. Na bútati bɔnii ɔdubɔsu ɔnini, ‘Bɛkpanku bina ɔnwani buboku mɛni.’ ”

8Amu na Yuda ɔ́su ɔti Israel ɔnini, “Ya na okloƒu ɔmɛni ɔsiaku-bu na bɔyu ulu kɔnakunwi. Na butéye edula adi buboku na bɔkɛ lɛla lɛni na butaadi kalɛ na bulekpi. 9Ami ɔlati líti mina lɛlɔ muunyene kama ka lɛla lɛdi lilálɛku-nwu. Na si ńtasɔku-nwu ńteboku na liti-nwu mbenyene ƒula anumi mɛni ni, ami ndubunye kayu kammɔ kenye mina ngba uwi ƒui. 10Na kalɛ na use ni, si ɔɔɔdi abu alati nákpɛ kama ni, nka búusie mmɔ bubo kunyɔ muedi.”

11Mmɔ na bana ɔti Israel údie kenye ɔnini, “Si lɛni kani na ɔdi ka bɔbla na kavumana biala kasɔ kelebo ni, amu mɔɔyɔ́ ka bɛbla lɛla lɛdi. Bɛƒuna ala abuni ani na abu lɛnɔ bɔɔkana bɔbla na bula kalɔ lɛlɔ mɛni. Na biti bitéte unengu ɔmmɔ aani bula etela ani na abu lɛnɔ bɔda buute-nwu. Bɛwia ala aani uwɔ ku ala awɛɛdi ƒɛƒɛɛ ku kutu akyala ku egyiibi lidu lidu. 12Na biti sika ɔƒualadi ɔni na básɔku bákya-mii aƒo kemmo akpa anyɔ bɛda. Ɔsika ɔlɛka bitáƒɔ kayu kedeedi kammɔ lɛnɔ. Ɔƒɛni kalɛ bɔti na bátati asa na básɔku sika ɔƒualadi ɔmmɔ bákya-mii aƒo kemmo. 13Na bɛkpanku bina ɔnwani bɛda na bɛyu ulu kɔnakunwi biteesie ɔnana ɔmmɔ kudɔ. 14Na muuvele Unwoti Katɔti nnii ɔnu-mii kɔnyana na ɔya na ɔnana ɔmmɔ kayi kayɔ na ɔnyonu Benyamin ku ɔnwani ɔni na úƒie úse, na basiaku-mi na bɛsɔ binwini bibo. Nsu ami amu ni, si kukpi kɔ́du-mi ni, bɔdu na kɔ́du-mi.”

15Ɔmmɔ ɔsu ni, nwuna bebi bammɔ béti sika ɔƒualadi ɔmmɔ akpa anyɔ aani kalɛ na ɔ́su-ma. Na béti etela ammɔ lɛnɔ ku Benyamin na bátɔlɔ bésie Egyipte na bétédie lɛlɔ bátina Yoseƒ. 16Ka Yoseƒ ɔ́nu Benyamin ku nwuna banwani ni, ɔ́su nwuna kaduli lɛlɔ ɔnune ɔnini, “Kpanku bekyuli bamɛni teesienku mina kaduli. Na adu ebuo ɔdi na anwa adila adi ete-bu. Ɔsika ɔlɛka ami ku-ma bɔdi ɔƒiiwi ɔmɛni.”

17Kaduli lɛlɔ ɔnune ɔmmɔ ɔ́bla aani kalɛ kani na Yoseƒ ɔ́su-nwu. 18Amu uwi ɔni na bákpanku-ma béselaku Yoseƒ kaduli ni, liƒu bonwu lɛdi lɛ́da Yoseƒ banwani bamɛni. Na ɔdi biala ɔ́kali ɔnii, “Sika ɔƒualadi ɔni na básɔku bákya bula aƒo kemmo ɔni na búbo búbavi ɔsu na béti-bu béboku mɛni. Na ɔɔyɔ́ ka úkpoku-bu na ɔdi-bu lɛlɔ na uƒie-bu unwini nwuna kabla bablane, na ɔƒɔ-bu bebuo ala betine.”

19Ɔmmɔ ɔsu ni, báni béde kaduli lɛlɔ ɔnune ɔmmɔ asa na badubuduo kaduli kammɔ kemmo na básu-nwu banini, 20“Ati, buvele búbo mɛni kudeedi uwi ɔdi návi búbeye edula. 21Nsu ka bɔ́sɔ búnwini ni, bútédu kesii kani na ɔƒɛ ɔ́sa-bu na ɔdi ka bɔnwuna. Na ka bɔ́ƒɛnimi bula aƒo ni, bula akɔ ɔdi biala ɔ́nu ka edula bɔkɔku bɔni na búye ni, básɔku nwuna sika ɔƒualadi kayu kani na ɔdi ka bɔƒɔ bákya ɔdi biala koƒo kemmo. Ɔmɛni ɔsu bɔ́sɔku sika ɔmmɔ búboku. 22Na búti sika ɔƒualadi ɔbambadi lɛnɔ búboku kalɛ na bubeye adila bamba. Na bútati ukyuli ɔni násɔku sika ɔmmɔ ɔkya-bu aƒo kemmo.”

23Mmɔ ni, Yoseƒ kaduli lɛlɔ ɔnune ɔmmɔ údie kenye ɔnini, “Bɛsɔ bitayia. Ɔmmɔ útebile lɛla lɛdi. Bina Katɔti ɔni ndi Unwoti Katɔti úte bina ɔti ni, anwu néti lɛkɛ ɔ́kya bina aƒo kemmo. Ami ndi ukyuli ɔni na bɛ́ƒɔ kayu kammɔ bíte.” Ka ɔ́su-ma lɛni ɔ́wɔlɔ ni, útédie Simeon úboku-ma.

24Ɔmmɔ kama ni, ɔnana ɔmɛni ɔkpanku-ma na bétéduo Yoseƒ kaduli kemmo, na úte-ma ntu, na báƒɔ lɛgba. Na ɔ́wia adila úte bana bebuo ala betine. 25Ɔƒɛni Yoseƒ banwani lɛnɔ básala bana etela ani na badanku bése. Na benye bagya Yoseƒ ka ubo, ɔsika básu-ma ka anwu ku-ma ndubo bɔdi ɔƒiiwi ɔmmɔ.

26Ka Yoseƒ úbeduo kaduli ni, béti etela ani bada béboku mmɔ béte-nwu, na bákya eli kalɔ béte-nwu. 27Na Yoseƒ úye-ma kalɛ na báta. Na úye-ma lɛnɔ ɔnini, “Bina ɔti ɔni na bɛ́su ka ɔ́ɔbi lɛlɔ geen mmɔ ni, ɔmu ɔkya ngba?”

28Amu na bédie kenye banini, “Bula ɔti ɔni ndi ƒula kabla ɔblane ɔmu uli ngba na ubo ɔlɔkplu kaduɛ.” Mmɔ lɛnɔ béboku eli kalɔ na bábu-nwu geen.

29Amu na ɔ́nu ɔ́ka ɔ́mana na ɔ́nu ɔnwani Benyamin ɔni ndi-nwu unibi geen mmɔ. Na úye-ma ɔnini, “Bina ɔnwani ɔnamudi ƒui ɔni na bɛ́su mmɔ na ɔdi mɛni?” Ɔmmɔ kama ɔ́sɔ ɔ́su Benyamin ɔnini, “Mina ubi, Unwoti Katɔti lɛƒɔndia lɛsiaku-ɔ uwi biala.” 30Na ka ɔkwɛnu úkpo-nwu geen ka ɔ́nu ɔnwani ɔsu ni, Yoseƒ ɔ́babla ɔ́lɛ na útábɛ úwulo keku na nwuna ɔtɔ ɔni na údie úse lɛlɔ lɛti pɛ kemmo.

31Ɔmmɔ kama údu ntu ɔ́ƒɔ anumi na ɔ́kya kayi na únwini úbo-ma kudɔ. Mmɔ na ɔ́su-ma ɔnini, “Bidie adila ammɔ na bɔdi.”

32Amu na bése-ma kadikɔ bun bun. Yoseƒ uli kakɛ kenwi, na nwuna banwani lɛnɔ beli kakɛ kenwi. Na béte Egyipteƒuɔ lɛnɔ kesii bamba na beli. Bábla lɛni, ɔsika Egyipteƒuɔ beení ka ama ku Hebriƒuɔ badi basala. 33Nwuna banwani bammɔ ƒui bélie kalɔ na nwuna anumi. Na ɔ́ya na beli atɔ asia ɔ́si ɔtɔnkune úbedu ɔnamudi lɛlɔ. Na ɔmɛni ɔ́bla-ma kalɛ kadi. 34Na kesii kani na Yoseƒ uli mmɔ na beele adila taasiku teeboku-ma. Na ani na béte Benyamin ni, abla aani bakladi adi akpa alɔ. Lɛni na anwu ku-ma bádi na báni bákɛ ebiti ku kayi ƒaa.

Currently Selected:

Ala Kalɔ Buse 43: lef

Highlight

Copy