Ala Kalɔ Buse 44
44
Yoseƒ Banwani Bánu Sika Ɔƒualadi Ɔɔƒɛɛ Na Koƒo Kemmo
1Ɔmmɔ kama ni, Yoseƒ úbo nwuna kaduli lɛlɔ ɔnune ɔmmɔ ɔda ɔdi ɔnini, “Yile banana bamɛni aƒo ku adila ani na badubɔkana buti. Na asɔku ɔdi biala sika ɔƒualadi akya-nwu koƒo kemmo. 2Na eti mina sika ɔƒualadi ɔɔƒɛɛ akya ɔnamudi koƒo kemmo ebunku nwuna edula sika ɔƒualadi ɔmmɔ.” Na ɔnana ɔmɛni ɔ́bla aani kalɛ na Yoseƒ ɔ́su-nwu.
3Ka kadi kadubo kegyekɔ ni, bédie-ma ulu ku bana bebuo ala betine. 4Yoseƒ banwani bamɛni bétesie tɔ ɔgyu ɔdi na ɔma unengudi ɔmmɔ kudɔ asa na ɔ́tala nwuna kaduli lɛlɔ ɔnune ɔnii ɔsia-ma kama. Úbo-nwu ɔda ɔnini, “Sie na atábala banana bammɔ kɔnakunwi. Na si átásiaku-ma ni, na eye-ma anini, ‘Bi ɔsu na bíti likpidi bɛ́ƒɔ lɛbuni lɛni na mina ɔtɔlati ɔ́bla-mii kayu? 5Ɔɔɔdi mina ɔtɔlati ɔɔƒɛɛ ɔni kemmo na ɔɔní taasiku, na anwu kani kemmo na ɔɔnu ala kemmo taati na bíti bɛtɔlɔku mɛni? Kalala geen kadi na bɛ́bla mɛni!’ ”
6Ka ɔnana ɔmɛni útasiaku-ma sɔsɔ ni, anwu lɛnɔ ɔ́sɔku ala ammɔ úye-ma lɛni kani. 7Nsu banana bammɔ bédie kenye banini, “Ati, bi ɔsu na aasu ala amɛni udu taasiku-bu lɛlɔ. Abu ƒula kabla bablane bulakana lɛmɛni udu bɔbla kudii! 8Na sika ɔƒualadi udeedi ɔni na bɔ́ka bɔnu muedi ni, bɔ́sɔku-nwu bɔ́siku Kanaan kalɔ lɛlɔ búboku. Bi ɔsu na aabu anii bɔdubuyu sika ɔƒualadi iye ugyiedi bɔsiku ƒula ɔtɔlati kesii? 9Na si bula akɔ ɔni koƒo kemmo na ánu lɛla lɛmɛni udu ni, na adu-nwu. Na abu bakladi bunwini kabla bablane bute bula Ati.”
10Amu na ɔnana ɔmmɔ lɛnɔ ɔ́su ɔnini, “Ɔmmɔ ɔdia. Bɔdubuti-nwu lɛni. Anwuɔsu bina akɔ ɔni koƒo kemmo na manu lɛnila lɛmɛni ni, anwu ndubuti lɛbla mina kabla ɔblane. Na bakladi ni, lɛla lɛdi lɛɛɛda-ma.”
11Ɔmmɔ kama ni, ɔdi biala ɔ́babla na ɔ́lɛlɛ nwuna etila úse kalɔ na ɔ́ƒɛnimi-nya. 12Mmɔ ni, kaduli lɛlɔ ɔnune ɔmmɔ úse kalɔ na ɔɔnu bana aƒo kemmo taawia ɔɔƒɛɛ ɔmmɔ. Úse kalɔ ɔ́si bana ɔtɔnkune lɛlɔ na úbawɔlɔ ɔnamudi lɛlɔ. Na ɔnamudi ɔni ndi Benyamin mmɔ koƒo kemmo na ɔ́nu ɔɔƒɛɛ ɔmmɔ. 13Ka úbo úte lɛni ni, ɔ́bla-ma kɔnyana geen na bana ƒui báni bana lɛwu bábwɛ! Amu na básɔ bágyu ala bétile bana bebuo ala betine na bénwini bésie ɔma unengudi ɔmmɔ kemmo.
14Ka bétéduo ni, Yoseƒ ɔmu ɔkya kaduli asa na Yuda ku nwuna banwani bakladi bábalɛlɛ. Mmɔ na báyu bébi kalɔ na Yoseƒ lɛgba akɔ. 15Amu na Yoseƒ úye-ma ɔnini, “Bi ɔdi na bɛ́bla mɛni? Bɛɛɛgyi bɛnii ukyuli aani ami bene udu ni, mɔɔkana na mɔɔnu ala na bɔbɛ kemmo?”
16Amu na Yuda ɔ́ƒɔ na údie kenye ɔnini, “O Ati, bi na bɔdubɔkana na bɔsu ɔƒɛni. Bi geen na bɔdubɔsu na ati ka bɔɔɔgyi lɛla lɛni mɔɔlɛ́ mɛni kemmo lɛla lɛdi? Unwoti Katɔti ɔlati muudie abu, ƒula kabla bablane, likpidi keyi. Ɔƒɛni amu búnwini ƒula kabla bablane ƒui, abu ku ukyuli ɔni koƒo kemmo na bánu ƒula sika ɔƒualadi ɔɔƒɛɛ ɔmmɔ.”
17Nsu Yoseƒ údie kenye ɔnini, “Kudi kudii! Ɔɔɔdi ami ndubɔbla lɛmmɔ udu. Ukyuli unwi pɛ ɔni kudɔ na bánu ɔɔƒɛɛ ɔmɛni ni, anwu kani na ndubo bɔkpanku na unwini mina kabla ɔblane. Amii bakladi ƒui binwini biteesie bina ɔti kudɔ ku keyi buɛɛ.”
18Mmɔ ni, Yuda ɔ́ni úde-nwu na útévele-nwu ɔnini, “Ati, kɛku-mi kayi na aya na ami, ƒula kabla ɔblane, lɛtɛmiku awɔ, mina Ati. Takɛ kɔnyi takya ami, ƒula kabla ɔblane! Ngyi ka awɔ ku Ɔga Unengudi Ƒarao ni, kavumana keeebo-mi ntɛ ɔdi. 19Awɔ ɔni ndi bula Ati ni, éye abu, ƒula kabla bablane, anini, ‘Bibo ɔti iye ɔnwani ɔnamudi ɔdi?’ 20Mmɔ na búdie kenye ka ni, ‘Bubo ɔti ɔni náabi lɛlɔ geen. Na ubo ubi ɔni na ɔ́wɔ na nwuna linengu uwi. Ɔnwani ɔni na anwu ku-nwu badi uni unwi bebi úkpi na anwu lɛti kani nébu na uni bebi akɔ. Na ubi ɔmɛni ni, bula ɔti ɔɔyɔ́-nwu geen.’
21“Ɔmmɔ kama ni, Ati, ásɔ ásu-bu anii, ‘Biti-nwu biboku na ami ɔlati lɛnu-nwu!’ 22Ati, mmɔ na bɔ́su-ɔ bɔnini, ‘Bula ɔti ulakana kebii kamɛni bɔnyonu. Si ɔɔɔdi lɛni na ɔ́tɔlɔ-nwu kudɔ ni, bula ɔti ɔdubo bukpi.’ 23Nsu ásu-bu aani ƒula kabla bablane kalɛ anini, ‘Si bítakpanku bina ɔnwani ɔnamudi ɔmmɔ bíteboku ni, bɛsɔ bitada bitalɛ mina anumi.’ 24Ɔmmɔ ɔsu ka búnwini búsie bula ɔti ɔni ndi ƒula kabla ɔblane kudɔ ni, bɔ́su-nwu lɛla lɛni na awɔ bula Ati ásu-bu.
25“Ɔmmɔ kama ni, bula ɔti ɔ́su-bu ɔnini, ‘Bisie na bitéye adila ammɔ adi bibu.’ 26Nsu bɔ́su-nwu bɔnini, ‘Bulakana busie ntu bɔdanku bula ɔnwani ɔnamudi ɔmmɔ asa na bɔdubusie. Ɔsika bulakana ɔnana ɔmmɔ anumi bɔda bɔlɛ amu ntu bula ɔnwani ɔnamudi ɔsiaku-bu.’
27“Ƒula kabla ɔblane ɔni ndi bula ɔti údie kenye ɔnini, ‘Bɛgyi ka bebi inyɔ na mina uleku ɔni náwɔ kebii kamɛni ɔ́wɔ úte-mi. 28Na bana akɔ unwi ɔ́da-mi úse. Na lɛ́su ka ɔƒɛni kalɛ eƒiebuo ɔdi nádu-nwu na ɔ́duli-nwu lɛna lɛni. Na ɔ́si ɔmmɔ lɛlɔ ni, ńsɔ ńtanu-nwu kudii. 29Na si bɛ́sɔ bɛ́kpanku ɔmɛni lɛnɔ bɛ́tɔlɔku-mi kudɔ na ɔgbankpi ɔdi útásiaku-nwu mmɔ ni, agyi anii lɛbibo kemmo na ndubuti mina liliƒuala ntéduo kekpine.’
30“Ɔmmɔ ɔsu ɔƒɛni ni, si ɔnanabi ɔmɛni ɔɔɔsiaku-mi si lɛ́sɔ línwini ńtéduo mina ɔti ɔni ndi ƒula kabla ɔblane kudɔ ni, 31na ɔ́nu ka lɛɛɛdanku ɔnanabi ɔmɛni ni, ɔdubo bɔda ɔƒɛ bukpi. Ɔsika nwuna ngba ƒui bɔsia kebii kamɛni lɛlɔ. Na ɔmɛni ɔdubɔtina ka abu ƒula kabla bablane náya na ƒula kabla ɔblane ɔni ndi bula ɔti uduo kubiɔ ku kɔnyana ku nwuna lili ƒuala. 32Ami, ƒula kabla ɔblane, líti mina lɛlɔ línyene kama líte mina ɔti ka ubi ɔmɛni ɔdubɔsɔ unwini ubo-nwu kudɔ na lɛla lɛdi lilabla-nwu. Na lɛ́su-nwu nnini, ‘Si ńtasɔku ɔnamu ɔmɛni ńteboku-ɔ ni, ami ndubɔƒɔ kɔtu bɔni bɔmmɔ mina ngba ƒui kemmo.’
33“Ɔmmɔ ɔsu ɔƒaani ni, Ati, ya na ami ƒula kabla ɔblane lɛ́sɔ lɛkya-a kudɔ mɛni aani ƒula kabla ɔblane na aya na ɔnamu ɔmmɔ uteesie bula ɔti kudɔ ku nwuna banwani bakladi. 34Dɛ na ndubɔkana na lɛsɔ linwini lisie mina ɔti kudɔ si ɔnamu ɔmɛni ɔɔɔsiaku-mi? Ulatɛ! Tadu-mi ku kɔnyana! Naaakana mina ɔti lɛƒɛda lɛni mebo-nwu lɛlɔ bunye bɔnu kunyɔ.”
Currently Selected:
Ala Kalɔ Buse 44: lef
Highlight
Share
Copy
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
