Ala Kalɔ Buse 32
32
Yakob Ɔ́klibi Lɛlɔ Ka Ɔsiaku Esau
1Ɔmmɔ kama ni, Yakob lɛnɔ ɔ́sɔ úti nwuna ulu na ɔ́tɔlɔ. Na ulu lɛlɔ mmɔ ni, útásiaku Katɔti batu badi. 2Uwi ɔni na ɔ́nu-ma kani na ɔ́su ɔnini, “Mɛni ndi Unwoti Katɔti kakyakɔ.” Ɔmmɔ ɔsu na ɔ́sia mmɔ lɛnyi ɔnii Mahanaim.
3Yakob ɔ́tala batu badi ɔnii bagyu batɔ-nwu. Na ɔ́tala-ma ɔ́kya ɔnwani Esau na kalɛkɛ kani baalɔ Seir na Edom kalɔ kemmo. 4Na ɔ́kya-ma litemi kenye ɔnini, “Bisie na bitásu mina ati Esau bɛnini, ‘Ami, ƒula kabla ɔblane Yakob, mɔɔyá na ati ka Laban kudɔ na lísie ńtákya uwi ɔni návi mɛni ƒui. 5Na mbo ɔmantɛ bakɔ ku bebuo ala betine ku baƒonu ku bese ku kabla bablane bananabi ku belekubi. Na ɔƒaani ni, mina Ati, mɔɔsia-a kenye kamɛni kalɛ na mina lɛlɔ lɛda-a ebiti.’ ”
6Ka batu bammɔ bénwini bébo ni, bábasu Yakob banini, “Búsie ƒula ɔnwani Esau kudɔ. Na anwu ɔlati ɔsia ulu ɔdubo ubasiaku-ɔ. Na ɔdanku nkyuli eti maane ubunku lɛlɔ.”
7Ka únu lɛni ni, kayi kékpoku-nwu, na liƒu lɛnɔ lɛ́da-nwu geen. Ɔmmɔ ɔsu ni, Yakob úle nwuna basiakune bammɔ akpa anyɔ. Lɛni kani na úle bebuo bammɔ ku bebuo ala betine bani mbo keƒu mmɔ kemmo akpa anyɔ. 8Na ɔbla kasusu ɔnini, “Ɔƒɛni kalɛ si kekpo ɔsu na Esau ɔ́ta ni, si úkpo lɛkpa linwi ni, na lɛkpa lɛkladi ani lɛdubo kekpo kammɔ bukeli.”
9Ɔmmɔ kama ni, Yakob ɔ́kpali katɔ na úvele ɔnini, “O mina Unwoti, Abraham Katɔti ku Isak Katɔti, awɔ ɔni násu-mi anini, ‘Nwini na eteesie ƒula kalɔ lɛlɔ ku ƒula lɛlɔ bekyuli kudɔ na ndubɔya na enu ku akɔkɔ eyi-ɔ.’ 10Ńtamanku ƒula lɛƒɔndia lɛni na aabla-mi ku kalɛ na aadi ƒula etemila lɛlɔ teete ami ƒula kabla ɔblane. Mina ugyii ɔdadi kani nkya-mi kɔnu uwi ɔni na lɛ́via Yordan Ketu kamɛni. Na ɔƒaani ni, mina kaduli bekyuli lɛti pɛ bubo esu akpa anyɔ. 11Muuvele-ɔ nnii die-mi na lɛlɛ sɛɛn na mina ɔnwani Esau enu kemmo. Ɔsika mɔɔyia ka ɔdubo bɔta na ubekpoku-mi ku mina beleku ku bana bebi. 12Nsu awɔ násu-mi anini, ‘Ndubɔnu ka enu ku akɔkɔ éyi-ɔ. Na ndubɔya na ƒula bebi ku bawɔ bemomo aani ɛpu kɔnwinimi. Na ukyuli ɔdi ulakana-ma bɔka.’ ”
13Yakob ɔ́tɛ mmɔ usien ɔmmɔ. Na ala ani na ɔda ɔkɛ ni, ɔ́ƒuna etela adi ka uti ute ɔnwani Esau. 14Etela ammɔ ndi bese beledi eti ene (200) ku betukpa aavlanyɔ. Baƒonu beledi eti ene ku bagyani aavlanyɔ. 15Bebuo ala betine bani mbo keƒu avlaatɛ ku bana bebi. Ɔmantɛ bakɔ aavlene ku bagyani leevu. Bebuo ala betine bamba beledi aavlanyɔ ku bagyani leevu. 16Bebuo bamɛni ƒui na Yakob úti ɔ́kya nwuna kabla bablane lɛkɔkɔ ka bataanu-ma lɛlɔ bana esu esu ammɔ na ɔ́su-ma ɔnini, “Bɛgyu bataatɔ-mi na bɛya na kuƒi kɔkya bebuo bammɔ ntɛ na bana esu ammɔ kenye.”
17Ɔmmɔ kama ni, ɔ́su kabla ɔblane ɔni ntɔ ɔnini, “Si mina ɔnwani Esau úbasiaku-ɔ na úye ɔnini, ‘Ɔma kabla ɔblane na adi, na wɛ na ésela na ɔma mbo bebuo bani ntɔ-ɔ lɛtɔtɔ mmɔ’ ni, 18na edie kenye anini, ‘Ƒula ɔnwani Yakob ɔni ndi-ɔ kabla ɔblane mbo-ma. Na badi etela ani na ɔnii nti mboku awɔ nwuna ati Esau. Ɔƒɛni ni, anwu ɔlati ɔkpɛ kama ɔdubo.’ ”
19Ɔmmɔ kama ni, ɔ́su nwuna kabla ɔblane unyɔdi ku ɔtɛdi ku bani ƒui mɔɔkpanku bebuo esu esu ammɔ ɔnini, “Si Esau úbasiaku-mi ni, na bɛsu-nwu lɛla lɛni kani na lɛ́su bina kabla ɔblane ɔkpana ɔni ntɔ mmɔ. 20Na bitayiƒala ka bɛsu-nwu bɛnini, ‘Ƒula kabla ɔblane Yakob ɔkpɛ kama ɔdubo.’ ” Yakob ɔ́su-ma lɛni ɔsika ɔ́bla kasusu ɔnini, “Ndubuti etela ani na líti lɛ́tualaku lɛtɔtɔ mɛni lɛyala-nwu kaƒɔ. Na ɔmmɔ kama si uwi ɔni na ami ku-nwu búbasa anumi ku anumi ni, ɔƒɛni kalɛ ɔdubo enu bugyingya na ɔƒɔ-mi.” 21Ɔmmɔ ɔsu Yakob ɔ́ya na etela ammɔ ágyu átɔ. Nsu anwu ɔlati ɔ́ƒɔ lɛlɔ ɔ́tɛ mmɔ usien ɔmmɔ na kesii kani na ɔ́da keliekɔ mmɔ.
Unwoti Katɔti Ɔ́vumana Yakob Lɛnyi
22Usien ɔmmɔ ni, Yakob ɔ́ta na útiku nwuna beleku inyɔ bammɔ ku nwuna kaduli kabla bablane beleku inyɔ. Na útiku nwuna bebi leevu-unwi bammɔ na bávia Yabok Ketu. 23Ka ɔ́viaku-ma ɔ́wɔlɔ ni, ɔ́viaku nwuna akɛla ammɔ lɛnɔ ƒui. 24Ɔƒɛni Yakob lɛti kani nébu na ketu ɔvi ɔmɛni. Mmɔ na ɔnana ɔdi úbo úbekpoku-nwu laa útédu ka kadi kégye. 25Ka ɔnana ɔmmɔ ɔɔɔdaku tɔ Yakob lɛlɔ bɔkana bɔdi ni, ɔ́wɔ Yakob kasɔma likubi na líkpeli. 26Mmɔ na ɔnana ɔmmɔ ɔ́su Yakob ɔnini, “Ya na nteesie, ɔsika kadi kéegye.”
Ka ɔ́su-nwu lɛni ni, Yakob lɛnɔ udie kenye ɔnini, “Lɛɛɛdubo-ɔ kuƒi bute amu ntu éte-mi kusɛ kusɛ.”
27Amu na ɔnana ɔmmɔ úye-nwu ɔnini, “Dɛ na baalɔ-ɔ?”
Mmɔ na Yakob údie kenye ɔnini, “Ami baalɔ Yakob.”
28Amu na ɔnana ɔmmɔ ɔ́su Yakob ɔnini, “Asɔ aladi lɛnyi anii Yakob. Mmomu bekyuli badubɔlɔ-ɔ banii Israel, ɔsika énye asiaku Unwoti Katɔti ku bekyuli na ádi lɛlɔ.”
29Mmɔ ni, Yakob ɔ́su ɔnini, “Buvele, lɔ ƒula lɛnyi te-mi.”
Nsu ɔnana ɔmmɔ úye-nwu ɔnini, “Bɔsu na ada anii aaagyi ukyuli ɔni mɔɔtɛmiku-ɔ?” Na mmɔ ni, úte-nwu kusɛ kusɛ na kesii kani na benye mmɔ.
30Ɔmmɔ ɔsu ni, Yakob ɔ́sia mmɔ lɛnyi ɔnii Peniel, na ɔ́su ɔnini, “Lɛ́sia mɛni lɛnyi lɛni, ɔsika lɛ́nu Unwoti Katɔti anumi ku anumi na útayila-mi ngba.”
31Uwi ɔni na ɔkɛ Paniel mmɔ ni, kadi káata, na ɔkɛ ɔɔtu ɔgba taakya ka nwuna kasɔma likubi líkpeli ɔsu. 32Ɔmmɔ ɔsu ni, Israel kadi bekyuli balákun bebuo kasɔma likubi lɛna kpɛtɛ kpɛtɛ lɛni mma-nwu lɛlɔ mmɔ. Ɔsika mmɔ geen nékpeli Yakob mmɔ.
Currently Selected:
Ala Kalɔ Buse 32: lef
Highlight
Share
Copy
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
