Ala Kalɔ Buse 28

1Ɔmmɔ ɔsu ni, Isak ɔ́ya na bálɔ Yakob béte-nwu na úte-nwu kusɛ kusɛ na úbo-nwu ɔda kpakplaa ɔnini, “Teti uleku ɔdi tasiku Kanaan. 2Ta kɔnakunwi na eteesie Mesopotamia kalɔ lɛlɔ lɛlɔ na ƒula uni ɔti bene kaduli ɔni ndi Betuel kaduli. Na atáwia uleku eti na mmɔ na Laban ɔni ndi ƒula uni ɔnwani bebi belekubi akɔ. 3Unwoti Katɔti kusɛ kusɛ ɔsiaku-ɔ na ɔya na awɔ bebi na bemomo na benwini kadi bekyuli pii. 4Na Unwoti Katɔti uti kusɛ kusɛ ɔni na úte Abraham ute awɔ ku ƒula kaba kemmo bebi. Na ɔya na kalɔ kani kemmo na eli ɔmwi mɛni aani ɔƒɔ kalɛ kenwini amii kadi. Kalɔ kamɛni na Katɔti úti úte Abraham.” 5Ɔmmɔ kama Isak údie Yakob ulu na ɔ́tɔlɔ úsie Mesopotamia kalɔ lɛlɔ na Laban kudɔ. Laban ɔdi Rebeka ɔni náwɔ Yakob ɔmɛni ku Esau ɔnwani, na bana ɔti ndi Betuel ɔni nási Aram.

6Ka Yakob ɔ́tɔlɔ ni, Esau úbenu ka ɔti Isak úte Yakob kusɛ kusɛ na údie-nwu ulu na ɔ́tɔlɔ úsie Mesopotamia kalɔ lɛlɔ ɔnii utéti uleku na mmɔ. Na uwi ɔni na úte-nwu kusɛ kusɛ ni, úbo-nwu ɔda ɔnini, “Teti Kanaanni uleku ɔdi.” 7Na Yakob lɛnɔ únu ɔ́ti ku uni bɔlɛ na ɔ́tɔlɔ úsie Mesopotamia kalɔ lɛlɔ sɔsɔ. 8Anwuɔsu Esau ɔ́nu ɔ́ti ka Kanaanƒuɔ beleku ala aláda ɔti Isak kubiti. 9Ɔmmɔ ɔsu ni, Esau ɔ́tɔlɔ úsie Abraham ubidi Ismael kudɔ. Na útéti ubidi Mahalat ɔni ndi Nebaiot ɔnwani ulekubi úbunku Kanaanƒuɔ beleku inyɔ bani na úti.

Yakob Úgye Kɔna Kɔdi Na Betel

10Na uwi ɔmmɔ kemmo ni, Yakob úuti ala na ɔ́yu ulu ɔ́si Beer-Seba úsela Haraan. 11Ka útédu kesii kadi ni, ɔƒɛ úbasa-nwu, anwuɔsu ɔ́bla kasusu ka ɔdubɔtɛ mmɔ na kadi kégye. Amu na úti lɛtabi lɛdi ntɛ mmɔ na ɔ́sia lili nina lɛlɔ na ɔ́tɛ ɔlɛɛ. 12Ka ɔtɛ ni, úgye kɔna kɔdi na ɔ́nu ka ubili kɔnyakɔ kɔdi kɔ́si kalɔ kɔ́kɔ laa kútédu katɔ. Na ɔ́nu ka Katɔti batu baasia-nwu lɛlɔ taakɔ na baasia taayu. 13Na ubili kɔnyakɔ kɔmmɔ katɔ ƒui ni, ɔ́nu ka Unwoti Katɔti unye. Na ɔ́su-nwu ɔnini, “Ami ndi Unwoti, ƒula ɔti Abraham ku Isak Katɔti. Na ndubuti kalɔ kani lɛlɔ na atɛ mɛni lite awɔ ku ƒula kaba kemmo bebi. 14Na ƒula kaba kemmo bebi bamɛni badubo bumomo aani kɔnwinimi. Na bɛdubo bugyingya busie ɔƒɛ katukɔ ku kanukɔ. Na bisie katɔ ku kada kakɛ lɛnɔ. Na ɔkɛnku awɔ ku ƒula kaba kemmo bebi lɛlɔ na ndubute kayawi kadi bekyuli ƒui kusɛ kusɛ. 15Nliku-ɔ na ndubɔsia-a anu kesii biala na aaví. Na ndubɔsɔku-ɔ liboku kalɔ kamɛni lɛlɔ. Lɛɛɛdubo-ɔ bɔnyonu buse uwi ɔdi wetédu ka lɛ́bla lɛla lɛni kenye na líse-ɔ ka mabla.”

16Ka Yakob ɔ́gyinya ni, ɔ́su ɔnini, “Sɔsɔ na ɔdi ka Unwoti Katɔti ɔkya mɛni na ami ńtati.” 17Ɔ́yia na ɔ́su ɔnini, “Ntɛ bɔmɛni bubo liƒu, ɔsika Unwoti Katɔti keliekɔ geen na kadi mɛni! Na kadi katɔ ɔban kayakun kammɔ geen kenye.”

18Ka kadi kégye ɔtanta ni, Yakob ɔ́ta na úti lɛtabi lɛni lɛlɔ na ɔ́sia lili mmɔ úku únyene na ɔ́bla akpala na mmɔ na úti nnɔ úwi-ni lili. 19Na ɔ́sia mmɔ lɛnyi ɔnii Betel, na nka ɔma ɔmmɔ na bátaalɔ banii Lus.

20Amu na Yakob ɔ́kpali Unwoti Katɔti lɛnyi na úse kenye ɔnini, “Lieku-mi, na asia-mi anu na ulu busie bɔmɛni kemmo, na ete-mi adila ku adala. 21Na si lɛ́sɔ línwini líbo mina ɔti kaduli buɛɛ ni, ndubɔti ka awɔ ndi mina Unwoti Katɔti sɔsɔ. 22Na lɛtabi lɛni na lɛ́lɛ mɛni ni, lɛdubunye aani ƒula ɔtɔ kalɛ. Na ala ani ƒui na adubo-mi bute ni, ndubuti lɛkpa leevudi lite-ɔ.”

Currently Selected:

Ala Kalɔ Buse 28: lef

Highlight

Copy