Batalane Kabla 8
8
1Na uwi ɔni na bakya baadú Steƒano ni, Saulo ɔ́kya-ma ogya.
Saulo Úkpoku Baƒɔtaadine
Na ɔ́si limeyi lɛmmɔ lɛlɔ ni, bése kalɔ beekpóku baƒɔtaadine bamɛni na Yerusalem. Amu na bana ƒui békeli bésie Yudea ku Samaria. Nsu batalane ama bébu bakya mmɔ. 2Amu na Yesu basiakune badi béti Steƒano bátáva ku keku.
3Amu na Saulo úti ɔ́sia lɛlɔ na uukpóku baƒɔtaadine bammɔ na ɔkɛ kɔduli uuƒie banana ku beleku taavinku-ma taatákya ɔtɔ.
Ƒilipo Ɔ́kɔ Litemi Buni Lɛsa Na Samaria
4Nsu baƒɔtaadine bani nékeli bási Yerusalem mɛni ni, bakɛ baaví kesii biala taasu Blɔti litemi buni. 5Na Ƒilipo anwu ni, úsie Samaria útásu bekyuli litemi buni lɛmmɔ ɔ́siku Ukyuli Ɔƒunadi lɛlɔ. 6Na bekyuli pii bénu etemila ani na ɔɔsu ɔ́si akɔla budie taatina pii ani na ɔ́bla na bánu ɔsu. 7Ɔ́bɔku ayu ekpidi pii ɔ́lɛku bekyuli lɛlɔ kemmo, na ayu ekpidi amɛni áva momoomo asa na ávi álɛ-ma lɛlɔ kemmo. Amu na ɔ́sɔ ɔ́bwi bani na lɛlɔ kakɛ kenwi kékpi-ma ku ama bani náƒɛ bewi kalɔ lɛnɔ. 8Ɔmɛni ɔsu ni, kubiti kɔ́kya Samaria ɔma ɔmɛni kemmo geen!
9Ɔnana ɔdi ɔ́kya Samaria ɔni baalɔ Simon, na ɔdi ukyuli ɔni mɔɔƒɛ evo. Na nwuna evo bɔbla útaabla bekyuli kalɛ kadi. Na úteeƒu ɔnii ɔdi ukyuli ɔdi na nwuna ala bɔnu taasu ɔsu. 10Samariaƒuɔ banana ku beleku ƒui baabu-nwu ɔ́si nwuna lɛlɔ bɔtina kabla kamɛni ɔsu. Anwuɔsu básu básiku-nwu lɛlɔ banini, “Anwu ndi katɔ ɔyikun ɔni baalɔ banii Ɔyikun Unengudi.” 11Amu ka nwuna evo bɔbla áƒɔ-ma anu ɔsu ni, béteenu-nwu litemi. 12Nsu ɔƒaani ni, báƒɔ Ƒilipo kenye bɔsu mmomu bádi ɔ́si Katɔti lɛga kadikɔ ku Yesu lɛlɔ. Na banana ku beleku pii báƒɔ ntu bɔkpila ɔdi na Blɔti Yesu Kristo lɛnyi kemmo. 13Amu na Simon ɔmɛni ɔlati lɛnɔ ɔ́ƒɔ ɔ́di. Na ka ɔ́ƒɔ ntu bɔkpila ɔdi ɔmɛni ni, útaasiaku Ƒilipo kesii biala na úsela. Na ɔkɛnku akɔla budie taatina ani na ɔ́bla ɔsu ni, ɔ́bla-nwu dɛye dɛye!
14Amu na uwi ɔni na batalane bani nkya Yerusalem bénu ka Samariaƒuɔ báƒɔ Katɔti litemi bádi ni, bátala Petro ku Yohane na bana kudɔ. 15Ka bétéduo ni, bákpali katɔ béte Kristoƒuɔ bawɔdi bamɛni kalɛ na baƒɔ Katɔti Kɔyu. 16Ɔsika úbalɛ uwi ɔmmɔ ni, bátaƒɔ tɔ Katɔti Kɔyu. Na ntu kani na bákpila-ma na Blɔti Yesu lɛnyi kemmo. 17Ɔmɛni ɔsu ni, Petro ku Yohane béti enu básia-ma eli, na ama lɛnɔ báƒɔ Katɔti Kɔyu.
18Ka Simon ɔ́nu ka si batalane bamɛni béti enu básia-ma eli na baaƒɔ́ Katɔti Kɔyu ni, úti egulabi ɔnii uute batalane bamɛni na ɔ́su-ma ɔnini, 19“Bɛya na ami lɛnɔ lɛkɛ ɔyikun ɔmɛni ɔdi kalɛ na si líti enu lɛ́sia ɔdi biala lɛlɔ ni, na ɔƒɔ Katɔti Kɔyu.”
20Amu na Petro ɔ́su-nwu ɔnini, “Awɔ ku ƒula egulabi ƒui bɛdubɔnuku-ni. Takali anii adubɔkana Unwoti litela buye ku egulabi. 21Alakana kalabla kamɛni kemmo bɔkya, ɔsika ƒula kayi keeese siin na Katɔti anumi. 22Da anumi die kasusu kekpidi kamɛni lɛlɔ na akpali katɔ. Ɔƒaalɛ Katɔti ɔdubuti ƒula likpidi ɔkyiɛ-ɔ na ƒula kasusu kekpidi kamɛni lɛlɔ. 23Ɔsika ni, mɔɔnu ka ebo lɛnungyie likpidi, na likpidi bɔbla lɛnɔ lɛ́di-ɔ lɛlɔ!”
24Amu na Simon ɔ́su-nwu ɔnini, “Biveleku-mi kalɛ na ɔgbankpi ubendi ɔmɛni udu ulálɛku-mi.”
25Amu uwi ɔni na Petro ku Yohane bédie Unwoti kenye na básu-ma litemi buni lɛmmɔ na Samaria ni, básɔ bénwini bésie Yerusalem, na bakɛ beedí teenye na lɛma lɛni nde Samaria kemmo taasu-ma litemi buni.
Ƒilipo Ɔ́tɛmiku Etiopiani Unengu
26Nsu Ƒilipo anwu ni, Katɔti ɔtu ɔdi úbasu-nwu ɔnini, “Teesie na atásia ketele ulu ɔni nási Yerusalem ɔ́yu úsie Gasa mmɔ.” 27Na ɔ́ta útásia ulu ɔmmɔ lɛlɔ. Ka úsela ni, útásiaku ukyuli ɔdi ka ɔ́si ɔdubo. Ukyuli ɔmɛni ndi egulabi lɛlɔ ɔnune unengudi na Etiopia Ɔga Uleku ɔni baalɔ Kandake lɛga kadikɔ. Unengu ɔmɛni ɔ́si Yerusalem kesii kani na útákpali katɔ. 28Na únwini ɔdubo na ɔpɔnkɔ kɛɛkɛ kemmo, na ɔkɛ ɔɔká Bunweni Kedee Ɔku ɔni na Katɔti Kenye Udiene Yesaia únweni. 29Amu na Katɔti Kɔyu kɔ́su Ƒilipo ɔnini, “Teesie na atásiaku ɔpɔnkɔ kɛɛkɛ ɔmɛni.”
30Ƒilipo úkeli úsie-nwu kudɔ na uunú ka unengu ɔmmɔ ɔɔká Yesaia ɔku. Amu na úye-nwu ɔnini, “Eenú lɛla lɛni na aaká mɛni kalɔ?”
31Amu na unengu ɔmɛni údie kenye ɔnini, “Oowo, dɛ na mabla asa na menu kalɔ ka ukyuli ɔdi uuubo na udie kalɔ ɔtina-mi?” Amu na úvele Ƒilipo ɔnii ubeduo kɛɛkɛ kemmo na ɔsɔ ulie-nwu kudɔ.
32Na etemila ani na ɔkya ɔɔká na Bunweni Kedee Ɔku kemmo ndi ɔnii,
“Báda-nwu béselaku aani koƒonu kɔni béti batádu.
Na ɔkɛ aani koƒonu kɔni naaadaku-ni si beekúlo-ku linwini,
na útebimi kenye lɛnɔ.
33Bákya-nwu kɔƒa na útakɛ ukyuli ɔni náƒɔ-nwu kenye.
Údie kaba kadi?
Bi na ɔ́bla úse asa baadú-nwu na kayawi kamɛni kemmo?”
34Amu na unengu ɔmmɔ úye Ƒilipo ɔnini, “Yesaia ni, anwu ɔlati lɛlɔ na uutemi taasiku, munuu ukyuli bamba ɔdi lɛlɔ na uutemi taasiku?” 35Amu na Ƒilipo úse kalɔ na úti Bunweni Kedee Ɔku ɔmmɔ na uudie litemi buni lɛmmɔ kalɔ taatina-nwu ɔ́si Yesu lɛlɔ.
36-37Amu na uwi ɔni na bakɛ bésela ni, bátánu ntu bɔdi ka bunye likpo lɛdi na ulu kudɔ mmɔ. Na unengu ɔmmɔ ɔ́su Ƒilipo ɔnini, “Aanu ntu bɔdi. Bi ɔsu na naaakana Katɔti ntu bɔkpila ɔdi ɔmmɔ bɔƒɔ?”
Amu na Ƒilipo ɔ́su-nwu ɔnini, “Si áƒɔ ádi ku ƒula kayi ƒui ni, adubɔkana.”
38Amu na unengu ɔmɛni ɔ́su ɔnini, “Lɛ́ƒɔ lɛ́di ka Yesu Kristo ndi Katɔti Ubidi.” Na ɔ́ya na bédi ɔpɔnkɔ kɛɛkɛ ɔmɛni bényene na báyu bétéduo ntu bɔmɛni kemmo, na Ƒilipo ɔ́kpila-nwu ntu na Yesu Kristo lɛnyi kemmo.
39Amu na uwi ɔni na bávi bálɛ ntu bɔmɛni kemmo ni, Katɔti Kɔyu kúti Ƒilipo kɔ́tɔlɔku, na unengu ɔmɛni ɔ́sɔ útanu-nwu. Na anwu lɛti ɔ́tɔlɔ ku kubiti.
40Ɔmɛni kama ni, Ƒilipo ɔ́nu ɔ́ti ka unye Asoto ɔma kemmo. Na ɔ́su litemi buni lɛmɛni na mmɔ bene ku lɛma lɛni nkya ulu lɛlɔ ƒui. Na úsie laa útédu Kaesarea ɔma lɛnɔ.
Currently Selected:
Batalane Kabla 8: lef
Highlight
Share
Copy
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
