Batalane Kabla 9

Saulo Úti Lɛlɔ Úte Yesu

1Lebo lɛmmɔ kemmo ƒui ni, Saulo ɔ́bi ɔ́siaku Blɔti basiakune bammɔ ku lɛnungyie ɔnii ɔɔdú-ma. Na ɔ́tɔlɔ úsie Yudaƒuɔ ɔkpane unengudi kudɔ. 2Mmɔ na úvele-nwu ɔnii ute-nwu ɔku na uti usienku Yudaƒuɔ kɔsakɔ na Damasko kalɛ na ɔkɛ ɔyikun na uƒie banana ku beleku bani ƒui nsiaku bɔƒɔtaadi bɔwɔdi bɔmmɔ usienku Yerusalem.

3Amu na uwi ɔni na ɔ́kpɛ uudé Damasko na kasusu kamɛni lɛlɔ ni, kɔnakunwi bukeye bɔdi búkeye bɔ́si katɔ na búbewi-nwu lɛlɔ. 4Na ɔ́lɛ úbo kalɔ na únu ka lɛdi lɛdi lɛɛsu-nwu lɛnini, “Saulo, Saulo, bi ɔsu na eekpóku-mi lɛni?”

5Amu na Saulo úye ɔnini, “Ati, ɔma na adi?” Amu na lɛdi lɛmɛni lídie kenye ɔnini, “Ami ndi Yesu ɔni na eekpóku kpakplaa. 6Ɔƒaani ni, ta na eteesie ɔma kemmo. Badubɔsu-ɔ lɛla lɛni na ɔlɛka abla.”

7Amu na bekyuli bani na ama ku Saulo bakɛ mmɔ bágyini. Bénu butemi bɔmɛni, nsu bátanu ukyuli ɔdi. 8Amu ka Saulo ɔ́ta únye na úbimi anumi ni, ɔ́sɔ ulanu. Amu na bákpanku-nwu bétéduoku Damasko ɔma kemmo. 9Na úlie mmɔ emeyi atɛ ɔni na ulánu, uládi na ulani lɛnɔ.

10Amu na uwi ɔmmɔ kemmo ni, ɔƒɔtaadine ɔdi ɔkya Damasko ɔni baalɔ Anania. Na Blɔti údie lɛlɔ ɔ́tina-nwu na ɔ́lɔ-nwu ɔnii, “Anania!” Amu na ɔ́tuna-nwu ɔnini, “Ati, ami mɛni!”

11Amu na Blɔti ɔ́su-nwu ɔnini, “Ta, na asia ulu ɔni baalɔ banii Ligeen lɛlɔ, na esie Yuda kesii na etéye Tarsoni ɔni baalɔ Saulo lɛlɔ. Ɔkya mmɔ ɔɔkpali katɔ teevele-mi. 12Ɔsika líidie lɛ́tina-nwu ka ukyuli ɔni baalɔ Anania ɔdubo ubeti enu ɔsia-nwu lɛlɔ na ɔsɔ utaanu.”

13Mmɔ na Anania údie kenye ɔnini, “Blɔti, línu na kesii biala kalala kani udu na ukyuli ɔmɛni ɔɔbla baƒɔtaadine na Yerusalem! 14Na búunu ka ɔ́ƒɔ ɔku ɔ́siku ɔkpane unengudi kudɔ banii ubeƒie baƒɔtaadine bani nkya Damasko ƒui!”

15Nsu Blɔti ɔ́su-nwu ɔnini, “Teesie, na atábla kalɛ na lɛ́su-ɔ. Ɔsika ami lɛ́ɛƒuna Saulo aani mina ukyuli ɔni meti mina litemi buni lɛmɛni mesienku ama bani naaadi Israelƒuɔ ku baga anumi ku Israelƒuɔ ƒui kudɔ. 16Na ndubɔtina-nwu kalɛ na ɔlɛka ubo abi na ami ɔsu.”

17Anwuɔsu Anania úsie na útánu Saulo na úti enu ɔ́sia-nwu lɛlɔ, na ɔ́su-nwu ɔnini, “Ɔnwa Saulo, Blɔti Yesu ɔni nédie lɛlɔ ɔ́tina-a na ulu lɛlɔ ni, anwu nátala-mi ɔ́kya-a kalɛ na asɔ ataanu na Katɔti Kɔyu kɔƒɔ-ɔ lɛlɔ kemmo ƒui.” 18Kɔnakunwi ni, ɔ́bla Saulo aani si akpa adi ámami ási nwuna anumi lɛlɔ na ɔ́sɔ ɔɔnu. Na ɔ́ta na ɔ́ya na bákpila-nwu ntu. 19Na ka ɔ́di adila adi ni, ɔ́sɔ ɔ́kɛ ɔyikun.

Saulo Ɔ́kɔ Litemi Buni Lɛmmɔ Lɛsa Na Damasko

Amu na Saulo úlie baƒɔtaadine bani nkya Damasko mmɔ kudɔ emeyi adi. 20Na uwi ɔmmɔ kani na úsie Yudaƒuɔ kɔsakɔ útásu Yesu lɛlɔ litemi ka Katɔti Ubidi na ɔdi.

21Amu na bekyuli bani ƒui nénu-nwu litemi lɛmɛni ni, ɔ́bla-ma dɛye dɛye. Na béye lɛlɔ banini, “Ɔɔɔdi ukyuli ɔmɛni nkɛ mɔɔdú Yesu kama basiakune na Yerusalem uwi ɔni yoo? Na búnu lɛnɔ ka nka baƒɔtaadine na úbo úbeƒie úsienku bakpane benengu.” 22Amu na Saulo úsie anumi geen na nwuna litemi bɔsu kemmo. Na Yudaƒuɔ bani nkya Damasko mmɔ ɔdi biala útakana lɛla lɛdi bɔsu. Na údie kalɔ ɔ́tina-ma ka Yesu ndi Kristo. 23Emeyi adi kama ni, Yudaƒuɔ bása na bábla kasusu ka badubɔdu-nwu. 24Nsu bekyuli badi bábasu Saulo ka baawia-nwu badu. Ɔmɛni ɔsu bekisine bamɛni baagyumana kɔyakun kɔni baasia taalɛ na beeduo ɔma ɔmmɔ kemmo kalɛ na bakɛ-nwu badu. 25Amu na nwuna badi bani ndi baƒɔtaadine mmɔ béti-nwu bákya kagyigyɛ kemmo na báyula-nwu básiku kowodu liƒi na ɔ́lɛ ɔma ɔmmɔ kemmo usientɛ!

Saulo Útéduo Yerusalem

26Amu na ɔni na útéduo Yerusalem ni, ɔ́wia ka nka uduo baƒɔtaadine bani nkya mmɔ akɔ. Nsu ama lɛnɔ báyia-nwu. Bábu ka bɔtɔlɔ na ɔda-ma. 27Amu na Barnaba útiku-nwu úsienku batalane bamɛni kudɔ na ɔ́su-ma kalɛ na Saulo ɔ́nu Blɔti ɔni na úsela Damasko. Ɔ́su-ma litemi lɛni na Blɔti ɔ́su-nwu ku litemi buni lɛni na ɔ́su ku kayi buse na Yesu lɛnyi kemmo na Damasko. 28Amu na báƒɔ-nwu bákya bana akɔ. Na ɔ́si uwi ɔmmɔ kemmo ni, ɔ́kya-ma akɔ uwi biala na ɔɔsu Blɔti lɛlɔ litemi na Yerusalem.

29Amu na Yudaƒuɔ bani muutemi Griki na baalɔ-ma banii Helaƒuɔ badi ku Saulo bákya unyeƒi ɔdi na báyɔ ka badu-nwu. 30Amu na uwi ɔni na baƒɔtaadine bamɛni badi bénu ka bekyuli bamɛni baawia-nwu badu ni, bétiku-nwu bésienku Kaesarea na bávinku-nwu bésienku nwuna ɔma ɔni ndi Tarso.

31Ɔmɛni ɔsu ni, baƒɔtaadine bani nkya Yudea ku Galilea ku Samaria kalɔ lɛlɔ ni, bákɛ bɔnwuna na basɔ balayia. Bákɛ kayi buse ku ɔkplu bɔkya ɔkɛnku Katɔti Kɔyu ɔyikun lɛlɔ. Na bémomo bébu na béteeti ɔbu teete Blɔti.

Petro Úsie Lida Ku Yopa

32Amu ka Petro ɔkɛ ɔɔví taatánu Kristoƒuɔ ƒui na nwuna bɔvi kemmo ni, úsie útánu baƒɔtaadine bani nkya ɔma ɔni baalɔ Lida. 33Amu na útánu ɔnana ɔdi na ɔma ɔmmɔ kemmo ɔni baalɔ Enea ka ɔ́ƒɛ uwi kalɔ akwa maane sɔɔn. 34Na ka Petro ɔ́nu-nwu ni, ɔ́su-nwu ɔnini, “Enea, nu! Yesu Kristo ɔ́bwi-ɔ! Ta nye! Na abuma ƒula atɛla.” Na mmɔ kani na ɔ́ta únye ku ɔlɔkplu. 35Na ka bánu ka Enea ɔkɛ uusié taavi ɔsu ni, Lida ku Saron lɛma kemmo bekyuli ƒui béti lɛlɔ béte Blɔti.

36Ɔmɛni kama ni, uleku ɔdi ɔkya Yopa ɔni baalɔ Tabita. Na Griki lɛdi kemmo ni, anwu baalɔ banii Dorka na nwuna kalɔ ndi kaƒɛ. Ɔdi ɔƒɔtaadine ɔni na útaabla lɛƒɔndia teete nwuna bakpana uwi pii. 37Amu na ɔlɛ úbebo-nwu na úkpi. Amu na nwuna bakpana bákpila-nwu na báklibi-nwu béti bétése katu taasia ɔtɔ ɔtɔdi ɔdi kemmo. 38Amu na uwi ɔni na bénu ka Petro úbo ɔkya Lida ni, na ka Lida ude Yopa ɔsu ni, bátala nkyuli inyɔ badi banii betévele-nwu na ɔsiaku-ma lɛgba lɛgba na ubo Yopa.

39Amu na anwu lɛnɔ ɔ́ta ɔ́siaku-ma, na ka ɔ́nya úbeduo ni, bétiku-nwu bésienku kesii kani na Dorka ɔtɛ. Na bekpinele bani nkya mmɔ ƒui bábaka bámana-nwu na beewulo. Na bada lɛwu lɛni na Dorka ɔ́ka úte-ma baatina Petro. 40Amu na Petro ɔ́su bana ƒui ɔnii bavi balɛ ɔtɔ ɔmmɔ kemmo, na ɔ́lɛ akɔnkɔ na ɔ́kpali katɔ. Amu na únwini anumi ɔ́tina Dorka na ɔ́su-nwu ɔnini, “Dorka, ta!” Mmɔ kani na úbimi anumi. Na ka ɔ́nya ɔ́nu Petro ni, ɔ́ta úlie. 41Amu na Petro úte-nwu kɔnu na anwu lɛnɔ úƒie-ku ɔ́da na ɔ́ta únye. Amu na Petro ɔ́sɔ ɔ́lɔ baƒɔtaadine ku bekpinele bammɔ ƒui úboku. Na úti-nwu ɔ́kya-ma lɛkɔkɔ.

42Amu na litemi lɛmɛni lígyingya lɛ́kya ɔma kemmo ƒui, na bekyuli pii báƒɔ Blɔti bádi. 43Ɔmmɔ kama ni, Petro úlie Yopa ɔma ɔmɛni kemmo útu uwi na Simon ɔni mɔɔbla bebuo lɛku lɛlɔ kabla mmɔ kudɔ.

Currently Selected:

Batalane Kabla 9: lef

Highlight

Copy