Batalane Kabla 7

Steƒano Ɔ́kɔ Katɔti Litemi Buni Lɛsa

1Amu na ɔkpane unengudi úye Steƒano ɔnini, “Ala ani na básu básiku-ɔ lɛlɔ mɛni ni, sɔsɔ na adi?”

2Amu na Steƒano údie kenye ɔnini, “Ati bene ku mina banwa, binu kaduɛ ka ni, Katɔti údie lɛlɔ ɔ́tina bula Nana Abraham na Mesopotamia kalɔ lɛlɔ asa na ɔ́ta mmɔ úsie kalɔ kani baalɔ Haran lɛlɔ. 3Mmɔ na ɔ́su-nwu ɔnini, ‘Ta na atɔlɔ ƒula bekyuli akɔ ku ƒula kalɔ lɛlɔ na eteesie kalɔ kani na matina-a!’

4“Anwuɔsu ɔ́ta ɔ́lɛ Kaldea kalɔ lɛlɔ na úsie útélie Haran útédu uwi ɔni na ɔti úkpi. Amu na Katɔti útiku-nwu úboku kesii kani bilie ɔmwi mɛni. 5Katɔti útete Abraham kadikɔ kadi mmɔ, ina kalɔ blii suɛ muedi. Nsu ni, ɔ́su-nwu úse ka kalɔ kammɔ kadubɔbla anwu ku nwuna kaba kemmo bebi kadi ina ka útawɔ tɔ ubi ɔdi úti úbedu ku uwi ɔmmɔ kemmo! 6Lɛni na Katɔti ɔ́sɔ ɔ́su-nwu úse ka ni, nwuna bawɔ ƒui badubo baƒɔ bunwini na kadi bamba kalɔ lɛlɔ. Na badubo bunwini bekyuli bammɔ kabla bablane. Na badubo-ma kalala bɔbla na bebo abi akwa eti maane sɔɔn. 7Na ɔ́sɔ ɔ́su-nwu ɔnini, ‘Nsu kalɔ kani bekyuli ndubuti ƒula bebi benwini bana kabla bablane ni, ndubo-ma kɔtu bɔni geen. Na ɔmmɔ kama ni, badubɔlɛ kalɔ kammɔ kemmo na badubɔkpa-mi na kalɔ kani bilie mɛni lɛlɔ.’

8“Amu na Katɔti úti lego bukulo linyese úte Abraham uwi ɔmmɔ kemmo aani lɛla lɛni makya anwu Katɔti ku Abraham bawɔ ntɛ. Na Abraham úbawɔ Isak na úkulo-nwu lego uwi ɔni na ɔ́ƒɔ emeyi maane. Isak lɛnɔ úbawɔ Yakob, na Yakob lɛnɔ ɔ́wɔ bebi leevu-inyɔ bani nábawɔ Yudaƒuɔ adua leevu-anyɔ ammɔ ƒui.

9“Yakob bebi bamɛni anumi égyie na bana ɔnwani Yoseƒ lɛlɔ. Na béƒie-nwu béye béte bekyuli bani néti-nwu bésienku Egyipte kalɔ lɛlɔ. Nsu ni, Katɔti ɔ́siaku-nwu, 10na únyeku-nwu na ɔ́da-nwu údie nwuna lɛbibo ku kɔnyana buwulo kemmo. Katɔti úte-nwu lɛnunda bonwu. Anwuɔsu Egyipte Ɔga Ƒarao ɔ́yɔ-nwu litemi na úti-nwu ɔ́bla Egyipte kalɔ ƒui lɛlɔ ɔnune ku nwuna kaduli ƒui ala lɛlɔ ɔnune lɛnɔ.

11“Uwi ɔdi kemmo ni, kɔka kubendi kɔdi kɔ́kya na Egyipte ku Kanaan kalɔ lɛlɔ ƒui, na kɔnyana buwulo geen búbo bula bati bene lɛlɔ. 12Uwi ɔni na bana adila áasa ƒui ni, Yakob únu ka adila adi akya Egyipte, anwuɔsu ɔ́tala nwuna bebi ɔnii besie betéye adi beboku-nwu. 13Na ka Yakob bebi básɔ bésie mmɔ kunyɔdi banii betéye adila ni, Yoseƒ údie nwuna lɛlɔ ɔ́tina-ma, na údie-ma ɔ́tina Ɔga Ƒarao. 14Amu na Yoseƒ ɔ́kada-ma ɔnii si bésie ni, na betiku ɔti Yakob ku Yoseƒ banwani ƒui ku bana lɛlɔ bekyuli beboku Egyipte. Na uwi ɔmmɔ kemmo ni, bana ƒui bumomo bɔbla liti ku aavlanyɔ-ɛlɔ. 15Anwuɔsu Yakob ɔ́tɔlɔ úsie Egyipte na úlie mmɔ útédu uwi ɔni na úkpi. Na nwuna bebi bananabi lɛnɔ bélie mmɔ bétédu uwi ɔni na békpi. 16Na básɔku bana ƒui bésienku ɔma ɔni baalɔ Sekem. Na bátáva-ma mmɔ na kaƒiɔtɔ kani na Abraham úye ɔ́siku Hamor kaba kudɔ kemmo.

17“Uwi ɔni na linyese lɛni na Katɔti úse úte Abraham lɛdaku budu ni, bula kadi bekyuli béemomo na Egyipte. 18Úbebo lɛnɔ ka Ɔga Ƒarao ɔwɔdi ɔni mɔɔdi Egyipte lɛlɔ ni, ɔɔɔgyi Yoseƒ. 19Ƒarao ɔmɛni ɔ́bla bula kadi bekyuli bamɛni kalala na únye-ma lɛlɔ na beeti bana bebiwɔ teetévaakun na beekpi.

20“Uwi ɔmmɔ kemmo kani na báwɔ Mose. Na bánu ka ɔdi ubi ɔni ndia geen. Ɔmɛni ɔsu ni, nwuna bawɔne béti-nwu bábala na kaduli abuli atɛ sɔɔn. 21Na uwi ɔni na basɔ balákana-nwu bɔbala ni, ɔlɛka bada-nwu bedie bana kudɔ. Amu na Ƒarao ubidi ulekubi útákɛ-nwu na úti-nwu ɔ́bla aani nwuna kaƒɔ ubi. 22Ɔ́da-nwu na ɔ́tina-nwu Egyipteƒuɔ ala bɔbla ku bana kɔkwɛ ƒui, na ɔ́lɛ lili úbabla ukyuli geen na butemi ku kabla lidu pii kemmo.

23“Na ka ɔ́ƒɔ akwa aavlene ni, úbo-nwu kasusu kemmo ka ɔlɛka usie utégyele nwuna banwani Israelƒuɔ. 24Amu na uwi ɔni na úsie mmɔ ni, ɔ́nu Egyipteni ɔdi ka ɔkya ɔɔbla Israelni ɔdi kalala. Na Mose ɔ́du Egyipteni ɔmɛni. 25Mose ɔ́kali ka nwuna banwani badubɔkali banii Katɔti nátala-nwu ɔni ubebunku-ma, nsu bátakali lɛni. 26Amu ka kadi kégye ni, ɔ́sɔ úsie-ma kudɔ na útánu Israelƒuɔ inyɔ ka bakya beekpó. Úsie útáda-ma na ɔ́su-ma ɔnini, ‘Ati bene, banwani na bɛdi, anwuɔsu útalɛka biteekpoku lɛlɔ.’

27“Nsu ukyuli ɔni náƒiɔ na nkyuli inyɔ bamɛni kemmo ni, údi Mose na ɔ́su-nwu ɔnini, ‘Taatɛku awɔ lɛdi! Ɔma nédie-ɔ bula lɛlɔ ɔdine ku bula litemi ɔtɛne? 28Munuu aayɔ́ ka adu-mi aani kalɛ na ádu Egyipteni ɔni kamaadi kalɛ?’ 29Ka Mose únu litemi lɛmɛni ni, liƒu lɛ́da-nwu geen. Anwuɔsu úkeli útábɛ na Midian kalɔ lɛlɔ. Na mmɔ na ɔ́wɔ nwuna bebi bananabi inyɔ.

30“Akwa aavlene kama ni, Katɔti ɔtu ɔdi údie lɛlɔ ɔ́tina-nwu na ogya ɔni mɔɔda na liyu kugyii blii kɔdi lɛlɔ na Sinai Kɔbi ketele kemmo. 31Ka Mose ɔ́nu ɔmɛni ni, útati lɛla lɛni na lɛdi. Na uwi ɔni na úsela ɔnii utánu lɛla lɛni lɛdi ni, Unwoti ɔ́lɔ-nwu na ɔ́su-nwu ɔnini, 32‘Ami ndi ƒula bati kuuku Abraham ku Isak ku Yakob bene Unwoti.’ Amu na lɛlɔ lɛ́tɔ Mose ku bɔyia ɔni na ɔsɔ útakana mmɔ bɔnu.

33“Amu na Unwoti ɔ́su-nwu ɔnini, ‘Da ƒula lɛgbanvuo die! Ɔsika kalɔ kedee lɛlɔ na enye. 34Sɔsɔ ni, lɛ́nu lɛbibo lɛni kemmo na mina bekyuli bakya na Egyipte kalɔ lɛlɔ. Na muunú bana keku kani na beewulo taakpali-mi. Anwuɔsu lɛ́yu líbo nnii medie-ma. Bo, na lɛtala-a Egyipte.’

35“Mose ɔmɛni ndi ukyuli ɔni na bátu kenye banii, ‘Ɔma nédie-ɔ bula lɛlɔ ɔdine ku bula litemi ɔtɛne?’ Anwu Mose ɔmmɔ kani na Katɔti ɔ́tala ɔnii usie na utábla bana lɛlɔ ɔdine ku bana ɔƒɔne ɔkɛnku Katɔti ɔtu ɔni na ɔ́nu na ketele kemmo mmɔ kebunku lɛlɔ. 36Anwu nédie-ma na Egyipte ɔkɛ akɔla budie taatina pii kemmo ani na ɔ́bla na Egyipte mmɔ ku Ɛpugyie kɔtu ku uwi ɔni na bakɛ ketele kemmo akwa aavlene sɔɔn.

37“Mose ɔmmɔ ɔlatidi násu Israelƒuɔ ɔnini, ‘Katɔti ɔdubudie kenye udiene ɔdi aani ami kalɛ, na ɔdubudie-nwu ɔlɛku bina kaba kemmo.’ 38Mose ndi ukyuli ɔni násala bula bati kuuku uwi ɔni na Israelƒuɔ bákya ketele mmɔ. Na anwu ndi ukyuli ɔni na Katɔti ɔtu ɔ́tɛmiku na Sinai Kɔbi lɛlɔ. Na anwu náƒɔ Unwoti litemi lɛni muute ngba úboku-bu.

39“Nsu ni, bula bati bénwini kama bákya Mose ɔni na báyɔ ka basɔ benwini beteesie Egyipte kalɔ lɛlɔ. 40Amu na bana ƒui básu Mose ɔnwani Aaron banini, ‘Bla baƒiɔ bani matɔnku-bu te-bu, ɔsika bɔɔɔgyi lɛla lɛni nálɛku Mose ɔni nákpanku-bu ɔ́siku Egyipte.’ 41Anwuɔsu bábla baƒiɔ badi aani akɔ ubi, na baakpá-nwu, na bádi limeyi ku ebiti na lɛla lɛni na bábla mɛni ɔsu. 42Ɔmɛni ɔsu na Katɔti únwini kama ɔ́kya-ma, na ɔ́nyonu-ma. Na bákya bátaakpa ɔƒɛ ku kɔbuli ku ayabi. Ɔmɛni ndi lɛla lɛni na Katɔti kenye bediene bénweni bákya Bunweni Kedee Ɔku kemmo banini,

“ ‘Israelƒuɔ, ɔɔɔdi ami na bíti bebuo ku baƒonu bɛ́bla akpala bíte akwa aavlene ani na bɛ́kya ketele kemmo mmɔ

43Mmomu bɛ́gyu Molek lɛbi ku Romƒa ayabi

ani ndi baƒiɔ bani na bɛ́vɔ bíse bɛnii bitaakpa bíti.

Anwuɔsu ndubɔya na beƒie-mii besienku ɔgyu kakaaka na Babilon kama ngye ƒui.’

44“Bula bati kuuku bágyu Katɔti kevo béti na ɔ́tɔnku-ma na ketele kemmo. Bátu ɔtɔ ɔmɛni aani kalɛ na Katɔti údie ɔ́tina Mose mmɔ kalɛ pɛpɛɛpɛ. 45Na akwa pii kama ni, Yosua ɔ́tɔnku bula bati bani nágyu kevo kamɛni béti na bétékpo-ku bekyuli bani na Katɔti ɔ́bɔku ɔ́lɛku kɔlɔ kɔmɛni lɛlɔ. Mmɔ na kevo kamɛni káƒɔ lɛlɔ kése úti útédu Ɔga Dawid uwi. 46Katɔti úbunku Dawid kaduɛ. Anwuɔsu Dawid úye Unwoti ɔnii nka ute-nwu kuƒi na ɔtu keliekɔ geen use ute anwu ɔni ndi Yakob Katɔti. 47Nsu ni, Salomo geen nátu keliekɔ kammɔ.

48“Nsu Katɔti ulélie ɔtɔ ɔni na bekyuli bayawine bátu kemmo. Unwoti ɔ́kɛnku nwuna kenye bediene lɛlɔ ɔ́su ɔnini,

49“ ‘Katɔ ndi mina lɛgaboku,

na kalɔ ndi mina lɛgba kanyakɔ.

Na bi ɔtɔ udu na bɛdubɔkana-mi bɔtu bute,

munuu mɔɔyaki keliekɔ kadi?

50Ɔɔɔdi ami nédie ala amɛni ƒui yoo?’ ”

51Amu na Steƒano ɔ́sɔ ɔ́su-ma ɔnini, “Batuɔkplune geen bɛdi! Amii lɛnɔ bɛɛda atu teedie Katɔti litemi lɛlɔ aani kalɛ na bina bati bábla kalɛ. Uwi ndi uwi bɛɛta teenye Katɔti Kɔyu lɛlɔ. 52Katɔti kenye udiene ɔmani na bina bati kuuku bátawia ka badu? Bádu Katɔti kenye bediene bani muedi násu ka Ukyuli Ɔƒunadi ɔni nse siin webo. Na Ukyuli Ɔƒunadi ɔmmɔ lɛnɔ bídie-nwu bíte na bádu. 53Sɔsɔ na ɔdi ka bɛgyi ƒui na bíni Katɔti ɔda bubo bɔni na bɛ́ƒɔ bɛ́siku Unwoti ɔtu enu kemmo.”

Bébo Steƒano Atabi

54Ka bénu etemila ani na Steƒano ɔ́su ɔ́siku-ma lɛlɔ ni, ɔƒɛ ɔ́da-ma geen na ɔ́ya bákya baadu anyi ku kɔnyi. 55Nsu ka Katɔti Kɔyu kɔ́ƒɔ Steƒano lɛlɔ kemmo ƒui ɔsu ni, ɔ́talaku anumi ɔ́nu katɔ laa, na ɔ́nu Katɔti bukeye ku Yesu ɔni nnye-nwu kɔdianu. 56Amu na ɔ́su-ma ɔnini, “Bɛnu! Mɔɔnu ka katɔ kébimi na Ukyuli Ɔyawine Ubi unye Katɔti kɔdianu!”

57Amu na báyoli momoomo na bétile bana atuƒi, na békeli bétéƒie-nwu. 58Na bákpɛ-nwu bálɛku ɔma ɔmmɔ kemmo, na bákya-nwu anumi ku atabi bubo. Na bekyuli bani nákpɛ-nwu bálɛku ni, bédie bana lɛwu béti béwi okloƒu ɔkɔdi ɔni baalɔ Saulo lɛgba lɛlɔ. 59Na uwi ɔni na bakya beebó-nwu atabi ni, Steƒano ɔ́kpali katɔ ɔ́su ɔnini, “Blɔti Yesu, ƒɔ mina kɔyu.” 60Amu na ɔ́lɛ akɔnkɔ na ɔ́sɔ ɔ́kpali katɔ ɔ́su ɔnini, “Unwoti, teti bɔƒiɔ bɔmɛni tete-ma, énu!” Na ka útemi ɔ́su lɛni ɔ́wɔlɔ ni, ɔ́lɛ úbo kalɔ na ɔ́yula.

Currently Selected:

Batalane Kabla 7: lef

Highlight

Copy