Batalane Kabla 6
6
Baƒɔtaadine Bédie Bebunkune Maatɛ
1Na uwi ɔmmɔ kemmo ɔni na batɛyane bamɛni beemomo teebu ni, unyeƒi úbebo Yudaƒuɔ bani na beetemi Griki lɛdi ku Yudaƒuɔ bammɔ geen ntɛ. Ɔsika si béle adila ni, eledu Grikiƒuɔ bekpinele. 2Ɔmɛni ɔsu leevu-inyɔ bammɔ bálɔ batɛyane bammɔ ƒui na básu-ma banini, “Ɔlɛka buti bula uwi bute litemi buni bɔsu, na ɔɔɔdi adila bɔdi etemila lɛlɔ. 3-4Na ɔƒaani ni, banwa, bɛnu bɛmana na bidie nkyuli maatɛ bani náda anu na Katɔti Kɔyu kɔ́ƒɔ-ma lɛlɔ kemmo ƒui. Na bɔdubuti-ma buse kabla kamɛni kenye kalɛ na abu bɔkɛ uwi bute Katɔti bɔkpali ku litemi buni bɔsu ku ala bɔtina.”
5Litemi lɛmɛni lɛ́dia bana ƒui bunu, anwuɔsu bédie Steƒano ɔni ndi ukyuli ɔni mbo bɔƒɔtaadi na Katɔti Kɔyu kɔ́ƒɔ-nwu lɛlɔ kemmo ƒui. Na bédie Ƒilipo ku Prokoro ku Nikanor ku Timon ku Parmena ku ɔƒɔ ɔni nénwini Yudani ɔni baalɔ Nikolao ɔni nási Antiokia lɛnɔ bébunku-nwu. 6Nkyuli maatɛ bamɛni na bédie bátina batalane bamɛni. Na ama lɛnɔ bákpali katɔ na bana lili. Na béti enu básia-ma lɛlɔ bévele keyi buɛɛ béte-ma.
7Amu na bekyuli pii báƒɔ Katɔti litemi buni. Na baƒɔtaadine lɛnɔ bémomo na Yerusalem bébu. Na Yudaƒuɔ bakpane pii badi lɛnɔ bénwini basiaku bɔƒɔtaadi bɔmmɔ kama.
Yudaƒuɔ Batɔnkune Béƒie Steƒano
8Amu na Steƒano ɔni na Katɔti Kɔyu ɔyikun ɔ́ƒɔ-nwu lɛlɔ kemmo ƒui mɛni ni, ɔ́bla akɔla budie taatina pii na bekyuli akɔ. 9Amu na Yudaƒuɔ bani nálɛ bekyuli bamba kabla bɔbla kalɔ na bási Kirene ku Aleksandria ku bani nási Kilikia ku Asia bákya ku Steƒano unyeƒi. 10Nsu bana akɔ ɔdi biala útakana-nwu kenye bunye ɔ́si nwuna lɛnunda ku litela lɛni na Katɔti Kɔyu kúte-nwu ɔsu.
11Anwuɔsu bátása lili ku bekyuli badi banii babanyi ɔkɔ basia-nwu basu banii, “Búnu ka Steƒano uutemi taata teenye Mose ku Katɔti lɛnɔ muedi lɛlɔ.”
12Linyeda lɛmɛni lɛ́ya na bekyuli bamɛni bébeti kɔnyi geen. Na ɔmɛni ɔsu Yudaƒuɔ batɔnkune béƒie-nwu na béti-nwu bésienku bana kasalakɔ. 13Amu na bekyuli bani náda-nwu kenye mɛni básɔ bábada Steƒano kenye ka ni, “Uutemi teewi kakpakɔ kamɛni uwi biala ku Mose ɔda bubo lɛlɔ. 14Na búnu ka ɔ́su lɛnɔ ɔnii ukyuli ɔni nási Nasaret na baalɔ-nwu banii Yesu mmɔ ni, ɔdubɔƒɛ Katɔti ɔtɔ ɔmɛni na wavumana Mose ɔda bubo bɔni na úte-bu.”
15Na uwi ɔmmɔ ni, bekyuli bani nnye mmɔ bánu ka Steƒano anumi eekeye aani Katɔti ɔtu ɔdi kalɛ.
Currently Selected:
Batalane Kabla 6: lef
Highlight
Share
Copy
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
