SALAMO 105
105
Ko te Atua mo Tena Fenua
(1NTupu 16.8-22)
1Fakafetai atu ki te Aliki, takutaku atu tena 'malu;
Kae fakailoa atu ki fenua ana mea ne fai.
2Usu vikiga ki te Aliki;
Taku atu mea fakaofoofogia katoa ne fai ne ia.
3Ke fiafia koutou i a tatou e o ia;
Ke fiafia tino katoa kola e tapuaki atu ki a ia.
4Salasala atu ki te Aliki mo se fesoasoani;
Kae tapuaki atu ki a ia i taimi katoa.
5-6A koutou ne fanau a Apelaamo, tena tavini;
Mo koutou te fanau a Iakopo, tena tino tokotasi ne filifilia;
Manatua vavega a te Atua ne fai,
pela foki mo ana fakamasinoga ne tuku mai.
7Te Aliki ko te Atua o tatou;
Ana fakatonuga e mō te lalolagi kātoa.
8Ka fakamaoni eiloa a ia ki tena feagaiga ki te se gata mai,
Ana feagaiga kona e mo te afe o kautama.
9 #
Kene 12.7; 17.8;
Kene 26.3
Pela foki mo te feagaiga ne fai ne ia mo Apelaamo,
Mo tena tautoga ki a Isaako
10 #
Kene 28.13
Ne fai ne te Aliki te feagaiga mo Isalaelu ke oko ki te se gata mai.
11Ana muna, “Ka avatu ne au mo koe te fenua o Kanana;
Ka fai mo ou tofi.”
12E se tokouke tino o te fenua o te Atua,
Me i a latou ne tino fou ki te fenua o Kanana.
13Ne olo sale latou mai te sua fenua ki te sua fenua,
Mai te sua malo ki te sua malo.
14 #
Kene 20.3-7
Kae ne seki tuku atu ne te Atua se tino ke 'teke mai ki
a latou, kae ne polopoloki 'mafa ne ia a tupu o fenua fakaatea mo te 'lei o latou:
15“Mo a ma oko otou lima ki aku tavini filifilia;
Sa fakasaua ki aku pelofeta.”
16 #
Kene 41.53-57
Ne tuku atu ei ne te Aliki te oge ki te lotou fenua,
Kae ave katoa keatea olotou meakai.
17 #
Kene 37.28; 45.5 Ne mua o uga atu ne ia a Iosefa
Tela ne fakatau atu ne latou pela me se pologa.
18 #
Kene 39.20—40.23
Ne 'sai ana vae ki seni,
Mo te kola fiti e fakamau i tena ua,
19Ke oko eiloa ki te fakataunuga o te valoaga tena.
E fakamaoni a muna a te Aliki i a ia e tonu.
20 #
Kene 41.14
Tela, fakasaoloto atu ei a ia ne te tupu o Aikupito;
E fakasaoloto foki a ia ne te pule o malo.
21 #
Kene 41.39-41
Ne tuku ne ia a ia ke pule i tena malo,
Kae ne fai foki a ia mo pule i te fenua katoa.
22E pule katoatoa foki a ia i ofisa a te tupu,
Ne tuku atu foki te pule malosi ke fakatonu ne ia tino fesoasoani a te tupu.
23 #
Kene 46.6;
Kene 47.11
Tena, fano ei a Iakopo ki Aikupito,
O nofo tumau i ei.
24 #
Eso 1.7-14
Ne tuku atu eiloa ne te Aliki tena fenua ke fanafanau,
Kae fai ne ia latou ke tupu malosi atu i olotou fili.
25Kae ne fai foki ne ia tino Aikupito ke loto ma'sei ki
Tena fenua kae fakapologa foki ne latou ana tavini.
26 #
Eso 3.1—4.17
I te taimi eiloa tena, uga ei ne ia a Mose, tena tavini,
Mo Alona ne filifili ne ia.
27Ne fai ne laua a galuega 'mana a te Atua
Mo vavega foki i Aikupito.
28 #
Eso 10.21-23
Ne fakapouli tagataga ne ia a te fenua,
Ka ko tino Aikupito ne seki fakalogo eiloa ki ana fakatonuga.
29 #
Eso 7.17-21
Ne fakaliu toto ne ia olotou vaitafe,
Ne 'mate katoa ei olotou ika.
30 #
Eso 8.1-6
Ne fakafonu te lotou fenua ki lane,
Pela foki mo te palesi o te tupu.
31 #
Eso 8.20-24;
Eso 8.16,17 Ne fai te fakatonuga a te Atua,
Tela ne fakafonu ei te fenua katoa ki lago mo kutu.
32 #
Eso 9.22-25
Ne faka'to ifo ne ia te vaiua fatu mo uila ki luga i te fenua,
Kae ne taofi ne ia te vaiua ke se to ifo;
33Ne fakamasei ne ia olotou vine mo mati,
Ne fatifati foki ne ia ki lalo a lakau.
34 #
Eso 10.12-15
Ne fai te fakatonuga a ia ko te mea loa ko oko mai a sē akelise,
Ko se lausia eiloa te aofaki o latou;
35Ne kai ne latou a lakau katoa i te fenua;
Ne kai foki ne latou a fuataga katoa o lakau.
36 #
Eso 12.29
Ne tamate ne ia a toekimua tagata o kaiga katoa o Aikupito.
37 #
Eso 12.33-36
Fakamuli ifo, taki ei ne ia a te fanauga a Isalaelu keatea mai Aikupito;
Ne ave ne latou a siliva mo aulo,
Kae ne malosi faeloa latou kae olaola 'lei.
38I te taimi ne 'teka atu ei latou keatea, ne fiafia tino Aikupito,
Me e mataku latou i tino Isalaelu.
39 #
Eso 13.21,22 Ne aumai ne te Atua te kaumana mo fakamalumalu latou,
Mo te afi e fakamaina ei latou i po.
40 #
Eso 16.2-15
Ne fia'kai latou, aumai ei ne te Aliki a manu eva e igoa ki salu;
Ne avatu ne ia a meakai mai te lagi mō fakamalie te lotou fiakai.
41 #
Eso 17.1-7; Nume 20.2-13 Ne 'fo ne ia te papa kae puna mai ei te vai,
Ko tafe atu ei ki loto i te toafa e pela me se vaitafe.
42Ne manatua ne ia tena feagaiga 'malu ki a Apelaamo tena tavini.
43Ne 'taki atu eiloa ne ia tena fenua keatea;
Ne usuusu olotou pese,
Kae kalaga fia'fia.
44 #
Iosu 11.16-23
Ne tuku atu ne ia a fenua o tino fakaatea ke fai mo latou,
Ke fai foki olotou fatoaga mo latou,
45Ko te mea ke fakalogo tena fenua ki ana tulafono,
Kae tausi foki ne latou ana fakatonuga.
Ke viki atu koutou ki te Aliki!
Currently Selected:
SALAMO 105: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
