SALAMO 104
104
Ko te Pese Tavae ki te Atua
1Toku agaga, ke tavae atu koe ki te Aliki!
Te Aliki toku Atua, ko oko eiloa koe i te maluga!
E fai mo ou gatu te vikiga mo te malu fakatupu;
2Ko pulupulu koe ki te mainaga.
Ne 'fola ne koe a te lagi e pela mo se faleie,
3kae ne faite ne koe tou fale i vai i luga.#104.3: Te vai mai luga: Te mataupu ki te vai i luga i te vanimonimo (Kene 1.6, 7).
E fai a kaumana mo fai au kaliota,
Kae sopo foki koe i kapakau o te matagi.
4 #
Epe 1.7
E fakaaoga ne koe a matagi mo fai au ave‐fekau,
Kae fai mo au tavini a uila.
5Ne fakatu ne koe te lalolagi ke mautakitaki i luga i ona fakavae,
Ko te mea ke se toe gasuesue.
6Ne fakatakato ne koe te moana i luga o te lalolagi e pela me se gatu 'loa,
Ka ko te vai ne ufi ne ia a mauga.
7Kafai e makonokono koe ki vai,
Ko te mea loa ko tele keatea;
Ne vave o tele latou keatea i te lagonaga ne latou a tau fakatonuga 'mafa.
8E tafe mai latou mai luga i mauga ki lalo i vanu,
Ki te koga ko oti ne fai ne koe mo latou.
9Ne fakatuakoi ne koe a vai ke se tafe valevale,
Ko te mea ke se toe lofia te lalolagi.
10Ne fai ne koe a vaipuna ke tafe ifo ki vanu,
Mo vaitafe foki i va o mauga.
11E avatu ne latou te vai e inu ei manu o te vao;
Pena foki a asini o te vao, e fakamalie ki ei te lotou fiainu.
12A lakau e tu pili atu ki ei,
E fai ei a ofaga o manu kae usu olotou pese.
13E faka'to ifo ne koe te vaiua mai te lagi ki luga o mauga,
Mo te lalolagi ko 'fonu i au fakamanuiaga.
14E fakaola ne koe te mouku ma pulumakau,
Mo lakau kaina foki mo te tino
Ke mafai ne ia o toki ana fatoaga,
15Ke maua ei a te uaina e fakafiafia ei a ia,
Mo te sinu olive e fakamata fiafia ei a ia,
Mo te falaoa e fakamalosi ei a ia.
16E lasi te vaiua e maua ne alasi o Lepanona;
Ko lakau tonu eiloa a te Aliki ne toki ne ia.
17E ofaga i kona a manu lele;
Ka ko matuku e fai olotou ofaga i luga i lakau ko pelosi.
18A kouti vao e 'nofo i mauga maluga,
Ka ko manu e igoa ki patia e muni i kaupapa maluga.
19Ne faite ne koe te masina e fakailoga ei a masina;
Mo te la foki e iloa ne ia tena taimi e tō ei.
20Ne fai ne koe te po, kae i te pouliga
Ne takakau ei a manu katoa o te vao.
21A punuā leona e tagi'tagi i te salasalaga ki olotou meakai,
E salasala ki meakai kola ne fakatoka ne te Atua mō latou.
22Kafai e sae ake te la, ko 'foki ei latou o takato i olotou ana;
23Ka ko tino ko olo o fai olotou galuega
Ke oko atu eiloa ki te afiafi.
24Te Aliki, ko oko eiloa te uke o mea ne fai ne koe!
Ko oko foki eiloa i te poto o tau faitega o mea katoa kona!
A te lalolagi ko 'fonu i au mea ola.
25E isi te moana, e lasi kae lauefa,
E nofo i ei a mea ola e se lausia,
Ko mea ola 'lasi mo mea ola foliki.
26 #
Iopu 41.1; Sala 74.14; Isa 27.1 E fo'lau sale ei a vaka, kae tafao sale foki i ei a Leviatana,
Ko te ika lasi tena o te tai ne fai ne koe.
27A mea katoa kona e fakalogo'lago atu katoa ki a koe,
Ke avatu ne koe ki a latou a meakai i taimi e fia'kai ei latou.
28E avatu ne koe a meakai ki a latou, ko 'kai ei latou;
E fakatoka ne koe a meakai, ke makona ei latou.
29Kafai e se saga mai koe ki a latou, e ma'taku latou;
Kafai ko fakagata ne koe olotou manava, ko mate ei latou,
Ko 'foki atu ei ki te pefu tela ne faite ei latou.
30Kae kafai e toetuku atu ne koe te manava ki a latou,#104.30 tuku ki a latou te manavaga; io me uga atu a tou agaga.
Ko toe ola ei latou;
Me aumai ne koe te ola fou ki te lalolagi.
31Ke tumau eiloa te 'malu o te Aliki ki te se gata mai!
Ke i te Aliki te fiafia ona ko ana mea ne fai!
32Ka kilo atu a ia ki te lalolagi, ko te mea eiloa ko gatete,
Kafai e fakapatele atu a ia ki mauga,
Ko te mea eiloa ko pusa ake te au mai i a latou.
33Ka pese atu au ki te Aliki i toku olaga katoa;
i aso katoa e ola ei au, ka tavae atu faeloa au ki toku Atua.
34Ke fiafia mai a ia ki taku pese,
Me i toku fiafia e maua mai i a ia.
35Ke fulu faka'ma atu tino agasala mai te lalolagi;
Ke se toe iai i te lalolagi!
Toku agaga, ke tavae atu koe ki te Aliki!
Tavae atu ki te Aliki!
Currently Selected:
SALAMO 104: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
