SALAMO 103
103
Ko te Alofa o te Atua#Ulutala Epelu: i a Tavita.
1Toku agaga, tavae atu ki te Aliki!
Toku foitino katoatoa, tavae atu ki tena igoa tapu!
2Toku agaga, tavae atu ki te Aliki,
Kae sa puli foki te lasi o tena alofa.
3E fakamagalo ne ia aku agasala katoa,
Kae faka'lei foki ne ia oku masaki katoa.
4E fakasao ne ia au mai te tanuga,
E fakamanuia foki ne ia au ki tena alofa mo tena alofa 'nau.
5E fakafonu ne ia toku olaga ki mea 'lei,
Ko te mea ke tumau faeloa toku tamataene mo toku malosi pela mo se aeto.
6A te Aliki e fakamasino mo te alofa ki tino puapuagatia,
Kae tuku ne ia ki a latou a te saolotoga tonu.
7Ne taku atu ne ia ki a Mose ana fuafuaga,
Ke matea foki ne tino Isalaelu ana galuega 'mana.
8 #
Iako 5.11
A te Aliki e alofa kae alofa 'nau,
E tuai o ita, kae fonu i te alofa tumau.
9E se fakasala soko ne ia a tino;
E se tumau foki tena ita ki te se gata mai.
10E se fakasala ne ia tatou e tusa mo 'tou amio masei,
E se taui mai foki ne ia 'tou agasala mo 'tou mea 'se.
11E pela mo te maluga o te lagi mai te lalolagi,
E pena eiloa te lasi o tena alofa ki tino kola e ma'taku ki a ia.
12E pela mo te 'mao o te saegala mai te togala,
E pena foki te fakamao ne ia otou agasala mai i a tatou.
13E pela mo te alofa o te tamana ki ana tamaliki,
E pena foki te alofa o te Aliki ki tino kola e ava ki a ia.
14E iloa ne ia a te mea ne faite ki ei tatou,
E manatua foki ne ia i a tatou ne pefu.
15Ka ko tatou, e 'pau tou olaga mo mouku,
E tupu ake tatou kae lauolaola e pela me se pula o te lakau i te vao;
16E agi atu ki ei te matagi, ko te mea eiloa ko galo,
E seai eiloa se tino e toe lavea atu ne ia.
17Ka ko te alofa o te Aliki ki tino e fakaaloalo ki a ia,
E tumau ki te se gata mai;
A tena atafai e tumau ki kautama katoa,
18Pela foki ki tino kola e tausi ki tena feagaiga
Kae fakamaoni o faka'logo ki ana tulafono.
19E fakatu ne te Aliki a tena nofogaaliki i te lagi;
A ia ko te tupu o mea katoa.
20Tavae atu ki te Aliki, koutou agelu ma'losi mo te 'mana,
Kola e faka'logo ki ana fakatonuga mo ana muna.
21Tavae atu ki te Aliki, koutou mea malosi katoa i te lagi,
Mo koutou foki tavini kola e fai tena loto!
22Tavae atu ki te Aliki, ana mea ola katoa i so se koga e pule ei a ia.
Toku agaga, tavae atu ki te Aliki!
Currently Selected:
SALAMO 103: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
