SALAMO 106
106
Ko te Atafai o te Aliki ki ona Tino
1 #
1NTupu 16.34; 2NTupu 5.13; 7.3; Esela 3.11; Sala 100.5; 107.1; 118.1; 136.1; Iele 33.11 Ke 'viki atu koutou ki te Aliki!
Fakafetai atu ki te Aliki me 'lei a ia;
A tena alofa e se gata mai.
2Ko oi te tino e mafai o taku atu a mea sili katoa ko oti ne fai ne ia?
Ko oi e mafai ne ia o tuku atu a tavaega e katoatoa 'lei ki a ia?
3Amutia latou kola e fakalogo ki ana fakatonuga,
Kae fai mea tonu faeloa.
4Te Aliki, manatua mai au i taimi e fesoasoani ei koe ki tou fenua;
i taimi e fakaola ei ne koe latou, ke aofia foki au i ei.
5Fakaasi mai ke matea ne au te maumea o tou fenua,
Ke manuia foki au i te manuia o latou,
Ke iai foki au i te fiafiaga o latou kola e o koe.
6A matou ne agasala e pela mo omotou tupuga;
A matou ne tino masei kae amio masei.
7 #
Eso 14.10-12
A omotou tupuga i Aikupito ne seki maina latou i uiga o galuega fakaofoofogina a te Atua;
Ne puli i a latou te alofa o te Atua tela ne fakaasi ki a latou i taimi e uke,
Ne 'teke foki ne latou te Atua Malosi i te Tai Kula.
8Kae ne fakaola latou ne te Atua pela mo tena feagaiga ne fai,
Ke fakaasi ei tena 'mana sili.
9 #
Eso 14.21-31
Ne fai tena fakatonuga ki te Tai Kula,
Ko te mea loa ko 'masa pakupaku;
Ne 'taki atu ne ia tena fenua i loto i ei pela eiloa me se laukele malō.
10Ne faka'sao ne ia latou mai tino kola e ita ki a latou;
Ne fakaola ne ia latou mai olotou fili.
11Ne ma'lemu olotou fili i te tai;
E seai lele se tino e tokotasi o latou ne sao.
12 #
Eso 15.1-21
Tela, talitonu ei latou ki tena feagaiga,
Usu ei ne latou a pese tavae ki a ia.
13Kae ne vave o puli i a latou a mea a te Aliki ne fai,
Ne fai mea e loto latou ki ei, kae seki fakatali ki se fakatonuga mai i a ia.
14 #
Nume 11.4-34
Ne 'fonu olotou loto i manakoga e uke i te vao,
Kae tofotofo ne latou te Atua;
15Ne avatu ne ia a mea ne ma'nako mai ki ei latou,
Kae fakatupu ake ei ne ia a te famai fakamataku i a latou.
16 #
Nume 16.1-35
Ne loto ma'sei latou ki a Mose i te vao,
Pela foki ki a Alona, te Tavini 'malu a te Aliki.
17Ne mavae te laukele, folo ei ne ia Tatano,
Tanumia ei foki Apelamo mo tena kaiga;
18Kae ne fanaifo te afi ki tino ne tautali atu ki a laua,
kae ka 'suni katoa ei tino amio ma'sei.
19 #
Eso 32.1-14
Ne faite ne latou te pulumakau aulo i Sinai,
Kae tapuaki ki ei;
20Ne fesuiaki ne latou te 'malu o te Atua
Ki te fakatusa o te manu kai mouku.
21Ne puli i a latou te Atua tela ne fakasao ne ia latou
Ki ana galuega 'mana i Aikupito.
22Ko oko eiloa te fakaofoofogina o mea ne fai ne ia i Aikupito!
Pela foki mo mea ne fai ne ia i te Tai Kula!
23Tela, faipati ei te Atua me ka fakamalaia ne ia tena fenua,
Ka ko Mose, tena tavini filifilia, ne tu atu i mua o te Atua e tusa mo te fakalavelave tena,
Ko te mea ke taofi tena ita, ke se fakamalaia tena fenua.
24 #
Nume 14.1-35
Tela la, ko se manako latou ki te fenua gali,
Me ne se tali'tonu latou ki te folafolaga a te Atua.
25Ne mui'mui latou ki te Atua i loto i olotou faleie,
Kae ko se fia fakalogo latou ki te Aliki.
26Tena, polopoloki malosi atu ei a ia ki a latou
Me ka 'ta ne ia latou ke 'mate i te vao,
27 #
Levi 26.33
Kae fakasalalau olotou fanau i fenua fakaatea,
Ko te mea ke 'mate latou i fenua kona.
28 #
Nume 25.1-13
Tela la, ko kau atu a te fenua o te Atua ki te tapuakiga ki a Paala i Peolo,
Kae kai latou ki taulaga e ofo atu ki atua 'mate.
29Ne fakaitaita ne latou te Aliki ki olotou amioga masei,
Poko ei latou ne te famai fakamataku.
30Kae tu mai ei a Fineaso o fakasala ne ia a latou kola ne fai te mea tena,
Ko te mea eiloa ko gata te famai.
31A te mea tenei, ko fai mo mea e manatua ei ne ia i tena alofa e se gata mai,
Kae ka tumau eiloa pena tena alofa i taimi katoa.
32 #
Nume 20.2-13
Ne fakatupu foki ne latou te ita o te Aliki i te vai o Melipa,
Kae ne oko te fakalavelave ki a Mose e pogai mai i a latou.
33Ne fakaitaita ne latou a Mose,
Tela faipati ei a ia ki muna e se 'tau o faipati ne ia.
34 #
Faka 2.1-3; 3.5,6 Ne seki tamate ne latou a tino o fenua fakaatea,
E pela mo te fakatonuga a te Aliki ki a latou,
35Kae ne fakatau avaga ki a latou,
Kae fakaakoako ki tu mo amioga pouliuli a fenua kona.
36A te fenua o te Atua ko tapuaki ki tupua,
Tenei te mea ne mafua ei te fakamalaiaga o latou.
37 #
2Tupu 17.17
Ne ofo atu olotou fanau mo fai a taulaga ki atua fapaupau o Kanana;
38 #
Nume 35.33
Ko tamate ne latou a tamaliki e seai ne agasala,
Ko masei valevale te fenua i te tamatega o tino kona.
39Ko fai eiloa latou ne latou ke ma'sei i olotou amioga,
Ka ko se fakamaoni foki ki te Atua.
40 #
Fama 2.14-18
Tela, ita ei te Aliki ki tena fenua;
Kae takalialia foki ki a latou.
41Ne tiaki atu ne ia latou ki te malosi o fenua fakaatea,
Ko pule ei latou ne olotou fili.
42Ne fakasauagina latou ne olotou fili,
Takavale ei latou i olotou fili.
43Ne fakasao ne te Aliki tena fenua i taimi e uke,
Kae ne filifili faeloa ne latou a faiga e 'teke atu ei ki te Aliki,
Tena la ko gasolo ei latou o 'galo ifo ki te matoluga o te agasala.
44Kae ui eiloa i te mea tena, ka ne lagona eiloa ne te Aliki te lotou kalaga atu,
Kae lavea mai foki ne ia te lotou puapuaga.
45Tela, manatua ei ne ia tena feagaiga mo latou,
Kae mai te lasi o tena alofa,
Tena ne fuli ei tona mafaufau.
46Ne fai ne ia tino kola e fakasaua atu ki a latou ke alofa atu ki a latou.
47 #
1NTupu 16.35,36 Te Aliki te motou Atua, fakaola mai matou,
Aumai keatea matou mai fenua fakaatea,
Ko te mea ke fiafia matou o avatu fakafetai mo tavaega ki tou igoa tapu.
48Ke 'viki atu tatou ki te Aliki, te Atua o Isalaelu;
Tavae atu ki a ia nei ke oko ki te se gata mai!
Kae ke kalaga tino katoa penei, “Amene!”
Ke viki atu koutou ki te Aliki!
Currently Selected:
SALAMO 106: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
