MALEKO 14

Ko te Pulepulega Masei o Tamate a Iesu

(Mata 26.1-5; Luka 22.1-2; Ioa 11.45-53)

1 # Eso 12.1-27 Toe lua mai aso kae oko ki te 'Kaiga o te Paseka mo Falaoa e se Fakafete. Ne taumafai a faitaulaga sili mo faiakoga o te Tulafono ki se auala o puke 'funa ne latou a Iesu o tamate. 2Ne fai ake olotou muna penei, “E se 'tau mo tatou o fai a te mea nei i te taimi o te 'kaiga, i te mea mana ua'te valevale a tino.”

Ko te 'Miliga o Iesu i Petania

(Mata 26.6-13; Ioa 12.1-8)

3 # Luka 7.37,38 Ko nofo nei a Iesu i loto i te fale o Simona te lepela i Petania. Ka koi kai a ia, ne ulu mai te fafine mo te fagu alapasa e fonu i sinu manogi e faite mai te lakau ko te nato. Ne 'fo ne ia te fagu kae ligi te sinu manogi i luga i te ulu o Iesu. 4E isi ne tino ne 'tu i kona ko oko eiloa i te ita, kae fai ake olotou pati penei, “Se a te mea ka fakamaumau ei fua a te sinu manogi tenei? 5Ne 'tau o 'togi atu a te sinu tenei e silia atu mo te tolu selau tupe siliva,#14.5:Tupe siliva:Onoono ki te 6.37 kae tuku atu te tupe mō tino ma'tiva!” Ne faifai muna se 'tau latou ki te fafine tena. 6Kae ne fai atu a Iesu: “Sa fakalavelave ki a ia! Ai a e fia 'saga fua ei koutou ki a ia? Ko oti ne fai ne ia te mea sili i te gali kae 'lei mō oku. 7#Teu 15.11 A koutou e 'nofo tasi eiloa mo tino ma'tiva, kae e mafai ne koutou o fesoasoani ki a latou i so se taimi e ma'nako koutou ki ei. Ka ko au e se nofo mau i a koutou i aso katoa. 8Ko fai ne ia te mea e mafai ne ia o fai: ne 'ligi ne ia te sinu manogi i luga i toku foitino o fakatoka ne ia au mo toku tanuga mai mua nei. 9Ke masaua a te mea nei! So se koga e folafola atu ki ei te tala 'lei i te lalolagi katoa, ka salalau atu foki a te mea ne fai ne ia, e fakamasaua ei a tena mea ne fai.”

Ko Loto a Iuta o Fakalata a Iesu

(Mata 26.14-16; Luka 22.3-6)

10Ka ko Iuta te Isikaliota tela ko ia se tokotasi o te kau soko, ne fano a ia ki faitaulaga sili ki se auala e tuku atu ei ne ia a Iesu ki olotou lima. 11Ko oko eiloa i te lotou fia'fia ki ana fakamatalaga, tauto ei latou me avatu ne latou a tupe ki a ia. Tela, mafaufau ei a Iuta ki se taimi 'lei o fakalata ne ia a Iesu.

Ko 'Kai Iesu mo Ona Soko i te Paseka

(Mata 26.17-25; Luka 22.7-14,21-23; Ioa 13.21-30)

12I te aso muamua o te 'Kaiga o Falaoa e se Faka'fete, ko te aso tela e ta ei a tama mamoe mo te Paseka, ne fesili mai a soko o Iesu ki a ia: “Tefea te koga e manako koe ki ei, ke olo matou o fakatoka tau 'Kaiga o te Paseka?” 13Uga atu ei ne Iesu a te tokolua soko ke olo o fakatoka mo tena fakatonuga penei: “Olo ki te fa'kai, kae ka fetaui koulua mo te tino e amo ne ia te tia vai. 14Tautali i ona tua ki te fale e ulu ki ei, kae fai atu ki te tino e o ia te fale: ‘Muna a te Faiakoga, Tefea toku potu tela ka 'kai ei au mo oku soko i te 'kaiga o te Paseka?’ 15Ka fakaasi atu ne ia a te potu lasi tafa ki luga, ko oti ne fai faka'lei kae fakatoka. Ko fakatoka la ne koulua a mea katoa ke toka 'lei mō tatou.” 16Ne olo te tokolua soko kona ki te fa'kai, kae ne maua atu katoa ne laua a mea e pela eiloa mo pati a Iesu ne fai; fakatoka ei ne laua a te 'kaiga o te Paseka.

17I te okoga ki te afiafi, oko mai ei a Iesu mo te tinoagafulu mo te tokolua soko. 18#Sala 41.9 Ka koi 'kai latou, fai ake ei a muna a Iesu penei: “Au e fai atu, e tokotasi o koutou e fakalata ne ia a au. Ko ia tenei e 'kai tasi maua.” 19Ne se toka te kau soko, fesilisili atu ei latou taki tokotasi ki a Iesu, “E a, mata ko au e fakauiga ki ei tau pati?” 20Ne tali atu a Iesu, “Se tino e tokotasi mai i a koutou o te tinoagafulu mo te tokolua, ko ia tela e 'fui tasi a ma falaoa ki te ipu e tasi. 21Ka ko au te Tama a te Tagata, e mate eiloa, e pela eiloa mo muna a te Tusi; kae kalofa eiloa i a ia tela e fakalata ne ia te Tama a te Tagata! E sili atu manafai e se fanau mai a te tino tena ki te lalolagi!”

Ko te 'Kaiga a te Aliki

(Mata 26.26-30; Luka 22.15-20; 1Koli 11.23-25)

22Ka koi 'kai latou, ne puke a Iesu ki te falaoa, kae fai tena 'talo fakafetai, ko tofitofi ne ia, kae tufatufa atu ki ona soko, ana muna, “Puke, ko toku foitino tenei.” 23Ne puke foki ki te ipu, ko fakafetai ki te Atua, kae tuku atu ne ia ki a latou, kae ne inu katoa ki ei. 24#Eso 24.8; Iele 31.31-34Muna a Iesu, “Ko toku toto tenei ko fakamaligi mo te tokoukega. A toku toto e fakamau fakailoga ki ei te feagaiga a te Atua. 25Au e fai atu ki a koutou, e se toe inu eiloa au ki te uaina, ke oko ki te aso e inu ei au ki te uaina fou i te Malo o te Atua.” 26Tela, usu ei te lotou pese, ulu ei ki tua o olo ki te Mauga o Olive.

Ko 'Valo ne Iesu te Fakafiti o Petelu

(Mata 26.31-35; Luka 22.31-34; Ioa 13.36-38)

27 # Saka 13.7 Kae i te lotou ologa tena, ne fai atu a Iesu ki a latou: “A koutou e 'tele katoa keatea kae tiaki au, me ne fai mai te Tusi, ‘E tamate ne te Atua a tausi mamoe, ko mafuta valevale ei a mamoe. ’ 28#Mata 28.16 Kae kafai ko oti ne toetu au mai te mate, ka mua atu au i a koutou ki Kalilaia.” 29Ne fai atu a Petelu ki a Iesu, “Kafai e tiakina koe ne latou nei, kae e se tiaki eiloa ne au koe!” 30Muna a Iesu ki a Petelu, “Ke masaua ne koe a te mea nei, ka koi tuai o tagi fakalua a te moa i te po nei, ka ko fakafiti fakatolu mai koe me se ke iloagina au.” 31Kae ne tali mai fakapatonutonu a Petelu ki a Iesu, ana muna: “E se mafai lele eiloa o fakafiti au me se iloa ne au koe, ke oko foki eiloa manafai ka fai o 'mate tasi taua, e se mafai lele o fakafiti ne au koe!” Ne pena katoa a pati a te kau soko.

Ko 'Talo Iesu i Ketesemane

(Mata 26.36-46; Luka 22.39-46)

32I te lotou okoga ki Ketesemane i te Mauga o Olive, fai atu ei a Iesu ki ona soko penei, “'Nofo mua i konei ke fano au o 'talo.” 33Puke ei ne ia a Petelu, Iakopo mo Ioane ke olo latou. Ko oko mai te manavase mo te se toka ki a ia, 34fai atu ei a ia ki a latou: “Ko oko eiloa i te fanoanoa o toku loto, toe itiiti eiloa ko malukuluku valevale toku loto. 'Nofo i konei ka ke matapula'pula koutou.” 35Ne momea atu ke tai 'mao malie mo latou, fakasiga ifo ei a ia ki lalo o talo, me e a, e mafai ke se oko ifo ki a ia a te faigata o te itula o puapuaga. 36Ne 'talo atu a ia penei, “Tamana! Toku Tamana! E mafai a mea katoa i a koe. Ave keatea a te ipu tenei mai i a au. Ke se fai te mea e loto au ki ei, ka ko tou loto.”

37Ne toe foki mai ki te koga tena, kae ne maua atu ne ia a te tokotolu soko e 'moe, tela fai atu ei a ia ki a Petelu, “Simona a koe e moe? E se mafai eiloa ne koe o 'pula i se itula?” 38Tela, fai atu ei a Iesu ki a latou, “Ke matapula'pula koutou kae 'talo, ke mo a e pa'ku atu koutou ki te fakaosoosoga. E malosi te agaga, ka ko vaivai te foitino.”

39Ne toe fano keatea o 'talo, kae ne fai foki eiloa ne ia ana pati ko oti ne fai i tena 'talo muamua. 40Ne toe foki ki soko kae toe maua ake foki ne ia me 'moe; ko se mafai eiloa ne latou o 'pula olotou mata. Ko se iloa ne latou me ne a olotou pati ka fai atu ki a ia.

41I te fokimaiga a Iesu i te fakatolu ki ona soko, ne fai atu a ia ki a latou: “E a, koi 'moe kae malo'lo eiloa koutou? Ko lava te 'moe! Ko oko mai te taimi! Kilo mai ki a au te Tama a te Tagata, ko pili o tuku atu nei ki te pulega a tino agasala. 42'Tu ki luga i a tatou ka olo. Kiloke, tenei te tino tela e fakalata ne ia au!”

Ko Puke Fakapagota a Iesu

(Mata 26.47-56; Luka 22.47-53; Ioa 18.3-12)

43Ka koi faipati a ia, kae oko mai a Iuta, ko ia se tokotasi o te tinoagafulu mo te tokolua soko, ne o'mai fakatasi mo te vaitino, e puke mai i olotou lima a pelu mo pago. Ne uga mai latou ne faitaulaga sili, faiakoga o te Tulafono mo toeaina. 44Ne fai ne te fakalata a te fakailoga ki te vaitino: “A te tino e sogi au ki ei, ko ia tena e ma'nako koutou ki ei. Puke ne koutou a ia o ave, kae ke leoleo faka'lei ne sotia.”

45I te taimi ne oko mai ei a Iuta, ne fanatu a ia ki a Iesu, kae fai atu, “Te Faiakoga!” kae sogi ki ei. 46Puke fakapagota ei ne latou a Iesu, kae taofi mau ne latou. 47Kae e tokotasi te tino e tu pili mai i kona, ne tata ake ne ia tena pelu, kae kati ne ia te taliga o te tavini a te Faitaulaga Pule ke to keatea. 48Ne faipati ki luga a Iesu, kae fai atu ki a latou: “Ne o'mai koutou mo pelu mo pago o puke fakapagota au e pela mo se tino ofa tulafono? 49#Luka 19.47; 21.37 49 I aso katoa e nofo faeloa au i a koutou i loto i te Fale Tapu o akoako, kae ne se puke fakapagota au ne koutou. Kae e 'tau o fakataunu a muna a te Tusi.” 50Tiaki ei a ia ne soko katoa kae 'tele keatea.

51E isi se tamatane, e pei ki gatu lino ne tautali ia Iesu. Ne taumafai latou o puke a ia, 52kae ne tele fuafua a ia keatea, kae tiakina te gatu lino.

Ko Iesu i Mua o te Fono

(Mata 26.57-68; Luka 22.54-55,63-71; Ioa 18.13-14,19-24)

53Ne ave ne latou a Iesu ki te fale o te Faitaulaga Pule, kola e potopoto mai ei a Faitaulaga Sili, toeaina mo faiakoga o te Tulafono. 54Ne tautali 'mao mai a Petelu i olotou tua, ulu atu ei foki ki loto i te lotoa o te fale o te Faitaulaga Pule. Sagasaga ifo ei i kona fakatasi mo leoleo, e fakavelavela i tafa o te afi. 55A Faitaulaga Sili mo te Fono katoa, ko taumafai o fai ne mau ke tamate ei a Iesu, kae e seai eiloa se lotou mau ne maua. 56E tokouke a tino molimau ne fai olotou mau 'loi e uiga ki a Iesu, kae e kesekese katoa olotou mau.

57E isi ne tino ne 'tu ake ki luga kae fai te lotou mau loi tenei e uiga ki a Iesu: 58#Ioa 2.19 “Ne lagona ne matou tena muna, ‘Ka ofa ne au a te Fale Tapu tenei ne faite ne tino, kae i aso e tolu, ka toe faite ake ne au se isi Fale Tapu tela e se faite ne tino.”’ 59E se mafai foki ne latou kona o fai ke pau olotou mau.

60Ne tu ake a te Faitaulaga Pule i mua o latou katoa, kae fesili mai ki a Iesu: “E a, e seai sau tali ki mau e uiga ki a koe?” 61Ne se mu eiloa a Iesu. Ne toe fesili mai foki a te Faitaulaga Pule: “A koe ko te Keliso, te Tama a te Atua e ona vikiga!” 62#Tani 7.13 Ne tali atu a Iesu, “Ao, kae ka matea ne koutou au te Tama a te Tagata e nofo i te feitu fakaatamai, tela ko te feitu taua o te Atua 'Malu, e vau i kaumana o te lagi!” 63Ne 'sae ne te Faitaulaga Pule tena gatu kae fai ake penei, “Ko se toe ma'nako tatou ki nisi tino molimau ake! 64#Levi 24.16 Ko lagona mai ne koutou ana muna se 'lei. Se a la te otou taofi ki ei?” Ne sisi katoa olotou lima me sala a ia, kae 'tau o tamate.

65E isi ne tino ne puapuaki ki a Iesu, kae fakapulou ona mata kae kini, kae fai atu ki ei, “Mate mai ake me ko oi ne kini ne ia koe?” Ne puke atu ki ei a leoleo kae laupapa a ia.

Ko Fakafiti a Petelu ki a Iesu

(Mata 26.69-75; Luka 22.56-62; Ioa 18.15-18,25-27)

66A Petelu koi nofo eiloa i loto i te lotoa o te fale o te Faitaulaga Pule, i te ulumaiga ki loto a te tavini tamafine a te Faitaulaga Pule. 67I te mateaga ne ia Petelu e fakavelavela tena foitino, kilo tonu atu ei ki a ia, kae fai atu, “A koe foki ne fakatasi mo Iesu te Nasaleta.” 68Kae ne fakafiti a Petelu, ana muna, “E se iloa eiloa ne au au muna kona e fai mai.” Fano ei a Petelu i te ala ki tua. I kona foki eiloa kae tagi mo te moa.#14.68: I naai lomiga e seai iei I kona eiloa kae tagi mo te moa.

69Ne toe matea foki a ia ne te tavini tamafine i kona, kae toe faipati ake ki tino e tu'tu pili mai penei, “A ia foki se tokotasi o latou!” 70Ne toe fakafiti foki a Petelu. E seki leva, kae fai atu a tino ne tu'tu pili i kona ki a Petelu penei, “E se mafai ne koe o fakafiti ia koe se tino Kalilaia.” 71Tauto ei a Petelu, ana muna, “Ke fakasala au ne te Atua manafai e se tonu taku mau! E se iloa ne au a ia tena e fai'pati mai ei koutou!” 72I kona foki eiloa kae tagi te moa i te fakalua, masaua ei ne Petelu a muna a Iesu ne fai ki a ia, “Ka koi tuai o tagi fakalua te moa, ka ko fakafiti fakatolu koe me se ke iloagina Au.” Ne tagi mautuutu ei a ia.

Currently Selected:

MALEKO 14: Tusi Tapu

Highlight

Copy